Read SEBR SÕNGO, 1998 1SAMWƐL 19 Bible Online

1SAMWƐL 19 - SEBR SÕNGO, 1998 bible

1SAMWƐL 19

¹A Sol waa n goma ne a biiga, a Zonatã, la a poorẽ dãmba, t'a rat n kʋ-la a Daviid. La a Sol biig, a Zonatã, da yaa zood meng ne a Daviid.

²Woto a tɩ togsa a Daviid. A yeelame: «M ba, a Sol, baood n na n kʋ-f lame. Bɩ f maan gũusgu, beoog yibeoogo, bao zĩig n soonde.

³M na n yiime, la m na n yalsa m ba sɛɛgẽ, fo sẽn na n soond zĩig ningã. M na n goma f yelle ne m ba, n ges a sẽn na n leok bũmb ninga, n wa togs fo.»

⁴A Zonatã goma a Daviid yell ne a ba, a Sol, n pẽg a Daviid. A yeel-a lame: «M naaba, bɩ y ra saag n maan a Daviid wẽng ye, t'a Daviid ka beeg yãmb ye. A sẽn tʋm daooda ka bũmb sẽn wa ne bõn y yĩng ye.

⁵A ka zoe a yõor bõne, n kẽng n tɩ kʋ Filisti gãndaooga ye. La yẽ yĩnga, Soaala-Wẽnd fãaga a Israyɛl zãnga fãa ne fãagr kãsenga. Yãmb meng yãeeme: la y sũur yɩɩ noogo. Bõe tɩ y na n maan yel-wẽnde, n yiis nin-sõngo, ned sẽn pa tar a toor yell, zɩɩm? Bõe tɩ y na n kʋ a Daviid zaalem?»

⁶A Sol kelga a Zonatã goama, la a kãabame n yetẽ: «M wẽen ne Wẽnd, t'a Daviid kõn ki ye!»

⁷A Zonatã boola a Daviid n togs-a a ba wã gomdã; la a tall-a lame n kẽng a Sol nengẽ, t'a Daviid leb n zĩnd ne-a wa pĩnd n tʋmd a sõgen-tʋʋma.

⁸Zabra ra le yikame t'a Daviid kẽng n na tɩ pãb Filisti rãmbã. A pãb-b-la sõma tɩ b zoe.

⁹La yam wẽngã, Soaala-Wẽnd sẽn bas-a ne a soabã, le yẽega a Sol. A ra zĩ-la a zakẽ t'a kãnd be a nugẽ, t'a Daviid zĩ a sɛɛgẽ n wẽed bɛɛla.

¹⁰A A Sol da ratame n kõs a Daviid n ka ne lalgã ne a kãnde, la a Daviid liglame tɩ kãnda yõsg n tɩ sel lalgã. A Daviid yi n zoe n põsa yʋng kãnga.

¹¹[29†] A Sol tʋma neba, a Daviid yiri, tɩ b tɩ gũ-a tɩ beoog vẽeg t'a paam-a n kʋ. Mik a pag a Mikal wɩdg-a lame: «F sã n ka zoe yʋngã n fãag f yõore, zĩig sã n yẽege, b na n kʋ-f lame.»

¹²A kɩtame, t'a Daviid tũ roog võor n yi n zoe, woto la a paam n põse.

¹³A Mikal yaool n dɩka bõn-naande n ning a Daviid gãaga zugu, n pil zuga ne bʋ-gãongo sẽn ka pẽeg ye, n pil a menga ne gãmbre.

¹⁴A Sol tʋma neba tɩ b wa yõk a Daviid. A pagã yeel-b lame: «A pa keem ye.»

¹⁵T'a Sol le tʋm neb yɛsa tɩ b tɩ ges a Daviid, la a soos n gomd woto: «Tɩ tall-y yẽe ne a gãagã n wa kõ-m ka, tɩ m kʋ-a!»

¹⁶Neba kẽe roogẽ la bõn-naanda bal la b yãend yã, gãaga zugu, n paas puglã.

¹⁷A Sol yeela a Mikal: «Bõe tɩ f belg maam woto n bas m bɛyã, t'a zoe n põse?» A Mikal leokame: «A meng m yeel-m: bas-m tɩ m loog, tɩ m da kʋ-f ye!»

¹⁸Yaa woto, la a Daviid zoe n põse. A kẽnga a Samwɛl nengẽ, Rama, n tɩ togsa a Sol sẽn maan-a bũmb ning fãa. La a yaool n tũ-la a Samwɛl n tɩ zĩnd a karen-bokẽ.

¹⁹B tɩ togsa a Sol: «Ade, a Daviid bee a Samwɛl karen-bokẽ, Rama sɛɛgẽ.»

²⁰A Sol tʋma neba, tɩ b tɩ yõk a Daviid. B taa n mika bãngdba sẽn tigim taaba, n gomd bãngre goama, t'a Samwɛl ya b taoor soaba. Naaba-Wẽnd pãnga yẽega a Sol sẽn tʋm b rãmbã, tɩ bãmb me yɛs n digd wa dindibdu.

²¹B tɩ togsa a Sol t'a le tʋm neb a taaba, tɩ bãmb me ta, n yik rigbu la sobgre. T'a Sol le tʋm neba, naoor a tãab soaba, tɩ bãmb me tɩ yik rigbu la sobgre.

²²Wakat kãng marsã, a Sol yika a toore n kẽng Rama. A sẽn ta Seku ko-bao-kãsengã, a sokame: «A Samwɛl ne a Daviid bee yɛ?» Tɩ b leok-a: «B bee Nayot, Rama karen-bokẽ wã!»

²³A Sol teesa be; Wẽnd pãnga siga yẽ me, t'a yik rigb la a kẽnda n wa ta Rama karen-bokã.

²⁴[30†] Yẽ me yeesa a futu, n sɩng rigbu, a Samwɛl taoore. A waa n lʋɩɩme n kel n pa be wĩndga la yʋngo. Dẽ me yĩng la b sok yã: «A Sol lebga bãngd laa?»