Read SEBR SÕNGO, 1998 1SAMWƐL 21 Bible Online

1SAMWƐL 21 - SEBR SÕNGO, 1998 bible

1SAMWƐL 21

¹A Daviid yik n loogame t'a Zonatã me leb tẽnga pʋgẽ.

² [33†] A Daviid zoe n kẽnga Nob, maan-kʋʋd a Ayimelɛk nengẽ. Maan-kʋʋda yɛɛsame, t'a zoe n seg a Daviid n sok-a: «Yaa wãna tɩ yãmb ya y yembre tɩ ned ka tũud yãmba?»

³A Daviid leoka maan-kʋʋda, a Ayimelɛk: «Naabã n kõ m noore, n yeel-ma: ‹Sõng tɩ ned da bãng yell ninga sẽn kɩt tɩ mam tʋmd fooma ye.› Sã n yaa m poorẽ dãmbã, m yãka zĩiga tɩ b na n seg-m be.

⁴La bõe n be y nugẽ? Kõ-y maam bur a nu, bɩ bũmb ning yãmb sẽn tar bala.»

⁵Maan-kʋʋda leokame: «Mam ka tar bur zaalga m nugẽ ye; yaa bur sẽn kõ Naaba-Wẽnd bala n be, la y nebã yee n yaa yɩlma n ka pẽneg pagba.»

⁶A Daviid leokame: «Sã n ya pagbẽ wã, b gɩdg-d lame, wala rasem kam, d sã n bob zabre. Neba yĩns yaa yɩlma. D da pa yi rũnna n na n tɩ zab ye la baasgo, d pa rẽgem ye.»

⁷ [34†] Maan-kʋʋda kɩs-b la burã sẽn kõ Soaalã, tɩ bur a taab da ka be sã n pa wẽnd doogẽ rẽnda bala; sã n da yiis-ba, b lebsda bur sẽn nan ket n ya tʋʋlga.

⁸Segame tɩ dao a ye, a Sol sõgne, n da yɛs Soaala-Wẽnd taoore, a ra yaa Edomitga, n boond t'a Doeg; a dag n yaa a Sol dũm-kɩɩma.

⁹A Daviid soka a Ayimelɛk: «Yãmb pa tar kãnde bɩ sʋʋg yam-yam ka? M ka rɩk m sʋʋg bɩ zab-teoog ye, naaba sẽn da yãgd yĩnga.»

¹⁰[35†] Maan-kʋʋda leokame: «Ad sʋʋga! Yaa a Goliyat, yaa Filisti rao ning yãmb sẽn kʋ tɩ-wogda bãoogẽ wã, sʋʋgã; b vil-a-la ne peende, a be ne teed niyns sẽn tar n bʋgd bagr ne Wẽndã. B bĩnga zĩ-yɛnga. Yãmb sã n dat n dɩk-a, bɩ y rɩk, tɩ sʋʋg a to ka be ka ye.» A Daviid yeelame: «N-faa! Sʋʋg a to ka be sẽn ta-a ye, bɩ y kõ-m yẽnda.»

¹¹A Daviid yika badaar n zoe n zãag ne a Sol, a ta a Akis, Gat dĩma, nengẽ.

¹²[36†] A Akis poorẽ dãmba yeel-a lame: «Ka Daviid ninga sẽn yaa tẽnga dĩma la woto bɩ? Ka yẽnda yẽnẽ yĩng la b da yɩɩnda: ‹A Sol kʋʋ tusri! A Daviid kʋʋ tus piiga.› »

¹³ [37†] Gom bãmba kẽ a Daviid sũurẽ, la a zoe rabeem wʋsgo, a zoe Gat dĩm, a Akis, rabeem.

¹⁴[38†] Bãmb nifẽ a Daviid maana wala a yika gãeemdo, a sɩngame n tuumnẽ la latemdẽ, n gʋlsd gʋlsem sẽn ka tõe n karem kʋɩlenga zugu la a basd kolkood tɩ rʋʋgd n mat a toɛɛnga.

¹⁵A Akis yeela nebã: «Yãmb sẽ n pa ne tɩ daoã zug lebgame; bõe tɩ yãmb peeg-a n wa m nengẽ?

¹⁶Yaa gãeems la m kongd bɩ, tɩ y le tall yãoa n wa ka tɩ m ges a zu-lɛbg tʋʋma? Y tẽed tɩ m na bas ned a woto t'a kẽ m zakẽ bɩ?»