Read SEBR SÕNGO, 1998 1SAMWƐL 22 Bible Online

1SAMWƐL 22 - SEBR SÕNGO, 1998 bible

1SAMWƐL 22

¹ [39†] A Daviid yii a Akis, Gat dĩma, nengẽ, n zoe n kẽng Adulam tãn-bokẽ wã. A kẽem dãmba la a zaka rãmb fãa wʋma rẽnda, n babs-a beene.

²Neb niyns fãa sẽn dɩt-b pɛta, la sẽn da tar-b sama bɩ sẽn da namsd-ba la sũ-pa-noang rãmba, fãa tigma taab a Daviid nengẽ la a lebga bãmb naaba. Woto sẽn babs-ba a Daviid da ta kobs-naase.

³A Daviid yii be n kẽng Mispa, Moab tẽn-peelmẽ. A tɩ yeela Moab dĩma: «Kõ-y m ba ne m ma sore, tɩ b wa zĩnd ne yãmba, n gũud m sẽn na n wa bãng Naaba-Wẽnd sẽn dat-m ne bũmb ninga.»

⁴La a Daviid talla nebã n kẽng Moab dĩma nengẽ tɩ b kell n zĩnd ne dĩma, la yẽ meng yaool n pa-la a sẽn soondẽ, tãn-bokẽ wã.

⁵Bãngda a Gad wa n yeela a Daviid: «Da pa-y y soondga zĩigẽ ye, yi-y be n tɩ kẽ Zɩɩda soolmẽ.» T'a Daviid na n yik n tɩ kẽ Erɛt googo.

⁶A Sol wʋma a Daviid ne a neba kibare. A Sol da zĩi pusg tẽngre, Gibea tãn-bila zugu, a ra zãada kãnde, a nugẽ, t'a sõgen-kamba da be ne-a.

⁷A Sol yeel-b lame: «Bẽnzame yagense, kelg-y ka! A Zese biigã na n pʋɩ yãmb fãa pʋt la bugsuntund wala m sẽn maand ne yãmba laa? Yaa Yãmb la a na n kõ tãnsobend tɩ y soog a tãb-biisa laa? M pa tẽed ye.

⁸Bõe yĩng marsã la yãmb maand sudum, n dat n zab ne maam? Ned ba a ye ka saag n wilg-m tɩ m biiga Zonatã yõga zood ne a Daviid ye. Ned ba a ye ka wa yeel-m tɩ m gũus t'a tusda a Daviid t'a gãneg-m bẽdgo, wala m sẽn ne rũnna wã ye.»

⁹A Doeg, Edomitga, ra yɛsa yĩngri, a Sol sõgen-kamba sɛɛgẽ la yẽ n yeele: «Mam yãee a Zese biiga t'a wa Nob, a Ayitub biiga, a Ayimelɛk nengẽ.

¹⁰[40†] La a Ayimelɛk tol n soka Soaala-Wẽnd a yĩnga, la a kõ-a sor dɩɩb fãa, la a kɩs-a-la a Goliyat, Filisti raoã, sʋʋga.»

¹¹Dĩma a Sol sẽn wʋme, a tʋmame tɩ b tall a Ayitub biiga, maan-kʋʋd a Ayimelɛk, n wa, ne a ba roog rãmba fãa la maan-kʋʋdba sẽn da be-b Nob. Bãmb fãa yik n wa saka naaba.

¹²A Sol yeelame: «Kelge, Ayitub biiga!» T'a yeele: «Ad-ma, m zu-soaba!»

¹³A Sol yeelame: «Bõe tɩ foo ne a Zese biiga naag taab n baood m yõore? Fo kõ-a-la rɩɩbo la sʋʋga, la f sok Naaba-Wẽnd a yĩnga, t'a yik marsã n na n zẽk a zug ne maam la a gãneg-m bẽdgo, wala sẽn maand dũnna wã.»

¹⁴A Ayimelɛk leoka dĩma: «Yãmb sõgen-kamba fãa sʋka, ãnd n tõe n mak a meng ne a Daviid, pʋ-peelem soaba, naab rɛɛmba, sẽn ligind-b fo yõorã, tãnsoaba, la sẽn paamd waoor f meng zakẽ.

¹⁵Ka rũnda bal la m sɩng n sokd Wẽnd a yĩng ye. Ade! M yam zãr ne m maan sudum ne yãmba. M naaba da rɩk yell ba a ye n dogl m zug la m ba roog zug ye, tɩ sɩda, m da ka tar yella buk ba bilf ye.»

¹⁶Dĩma yeela a Ayimelɛk: «Fo na n kiime, Ayimelɛk, foo ne f ba roog gilli!»

¹⁷La dĩma yeela a sõgen-kamba sẽn da yɛs a sɛɛgẽ: «Kʋ-y maan-kʋʋdbã, tɩ bãmb me sõngda a Daviid. B bãngame t'a Daviid da zoetame, la bãmb pa togs maam ye.» La naaba sõgen-kamba pa sak n zẽk b nug n kʋ maan-kʋʋdba ye.

¹⁸Dẽ la dĩma yeel a Doeg: «Bɩ fo wẽnemde! Kʋ-ba!» La a Doeg, Edomitga, wẽnemdame la yaa yẽ n kʋ-ba. Badaare, a kʋʋ dap pis-nii la a nu, bãmb fãa da bobda Wẽnd bagra bag-teedã.

¹⁹A Sol kʋ maan-kʋʋdba, Nob, bãmb tẽngẽ. A kʋʋ dapa, pagba, kom-bõonego, kom-peels sẽn yẽsemde, niis la bõeens la piisi. A kɛɛ-b fãa ne sʋʋga.

²⁰A Ayitub biig, a Ayimelɛk roagd a ye, n zoe n põse, a yʋʋr da boondame t'a Abiyatar.

²¹A zoe n kẽnga a Daviid nengẽ n tɩ togs t'a Sol kʋʋ Soaala maan-kʋʋdbã.

²²A Daviid yeela a Abiyatar: «Nin-daarẽ wã m da miime tɩ Edomitga, a Doeg, da bee d sʋka la a kõn pa n ka wilg a Sol ye. Maam n wẽnemd yellã n tees f ba roogo.

²³Pa ne maam, la f ra zoe rabeem ye, tɩ sẽn baooda n yiis fo vɩɩm, baood n na n yiisa mam rẽnna. F pa ne maam, f tɩlga f bɛɛba zãnga.»