Read SEBR SÕNGO, 1998 1SAMWƐL 23 Bible Online

1SAMWƐL 23 - SEBR SÕNGO, 1998 bible

1SAMWƐL 23

¹Kibar la a Daviid waa n wʋme: «Filisti rãmba gũbga Keyila la b saad n wʋgsda ki zɛɛsẽ.»

²A Daviid soka Wẽnnaam. «M kẽng n tɩ zab ne Filisti rãmbã, m na tõog ba?» La Soaala-Wẽnd leokame: «Kẽnge! F na tõog Filisti rãmbã, la f na fãag Keyila.»

³T'a Daviid neba na n yeel-a: «Zɩɩda kaane menga tõnd zoe n maanda rabeem. Yɩta a wãna sã n ya Keyila la d kẽng n na n tɩ zab ne Filisti rãmbã?»

⁴A Daviid le soka Naaba-Wẽnd n paase la Wẽnd le leokame: «Dɩk sore, sig Keyila, tɩ m na n ninga Filisti rãmba fo nugẽ.»

⁵A Daviid kẽnga Keyila ne neba, a zaba ne Filisti rãmba, n tõog-ba la a reeg b rũmsa. Yɩɩ woto la a Daviid fãag Keyila rãmba.

⁶Segame t'a Ayimelɛk biiga, a Abiyatar, sẽn wa n nok a Daviid, Keyila wã, segame t'a ra looga ne sãnem-pɛ-m-poore a ye.

⁷A Sol sẽn wʋm t'a Daviid kẽe Keyila, a yeelame: «Yaa Soaala-Wẽnd n yõk-a n kõ-ma tɩ yẽ n kẽng a toore n tɩ pag a meng tẽng sẽn tar kʋɩlense, la kʋɩlens sẽn sogd ne bãeense.»

⁸A Sol boola a neba fãa tɩ b wa yẽda a Daviid ne a neba, Keyila.

⁹A Daviid sẽn bãng t'a Sol mamsda wẽng ne yẽnda, a yeela maan-kʋʋd, a Abiyatar: «Wa tɩ m na n soka Wẽnde.»

¹⁰A Daviid yeelame: «Soaala, Israyɛl Wẽnnaam, yãmb yamba wʋmame t'a Sol segendame n na n wa Keyila la a wã tẽngã, mam yĩnga.

¹¹La a Sol sã n wa, tẽnga nin-tɩɩsã na yõk-m n kɩs-a? A Sol na n sɩd waame, wala m sẽn wʋma bɩ? Soaala, a Israyɛl Wẽnnaam, sõng-y tɩ yãmb yamba bãnge!» Soaala-Wẽnd leokame: «A Sol na n waame.»

¹²A Daviid le sokame: «Keyila nin-tɩɩsa na n dɩka maam ne m neba n bas a Sol nugẽ sɩda?» Naaba-Wẽnd leokame: «B na n bas-y-la a nugẽ.»

¹³Rẽ n so t'a Daviid yik ne a neb sẽn da tõe n ta kobs-yoobe, b yii Keyila, la b sɩnga yeebgo. Kibarã t'a a Sol t'a Daviid yii Keyila la a Sol me basame tɩ sɛ.

¹⁴A Daviid solga a meng tãmsẽ, Zif we-raoogẽ. La a Sol talla a baoobo, la Wẽnnaam pa bas t'a lʋɩ a nugẽ ye.

¹⁵A Daviid bãngame t'a Sol saa wetã n baood-a n na n kʋ. A Daviid yaool n da bee Zif weoogẽ wã, Oresa tẽnga.

¹⁶A Zonatã, a Sol biigã, rɩka sore n wa a Daviid nengẽ Oresa tẽnga, a waa n kenga a Daviid raoodo, Wẽnd maasem yĩnga.

¹⁷A yeel-a lame: «Da zoe rabeem ye. M ba nug kõn sɩɩs-f ye. Fo n na n dɩ naam Israyɛl tẽnga la maam n na n yɩ f pipi sõangda. M ba, a Sol meng mii rẽnna.»

¹⁸[41†] B yiiba pʋlma taab zood Soaala-Wẽnd taoore. A Daviid paa Oresa la a Zonatã leba a yiri.

¹⁹ [42†] Zif neba kẽnga a Sol nengẽ Gibea. B tɩ wilga a Sol: «Ad-y yã a Daviid solgda a meng tõnd sɛɛgẽ, Oresa, Akila tãnga zugu, nug rɩtg pʋ-weesẽ wã.

²⁰Marsã, y sã dat n waame, dĩma, bɩ y wa! Yaa tõnd n na n yõk-a n ning dĩma nugẽ.»

²¹A Sol leokame: «Wẽnd na ning y barka, y sẽn zoe mam nimbãanega.

²²Leb-y n dɩɩ-y kaset n paase, la y bãng zĩig ninga a sẽn kẽne n teesẽ. Modg-y n dɩ y nif kaseto tɩ m wʋmame t'a yaa sɩlem soaba.

²³Mao-y n bãng a sẽn soond zĩis niynsa fãa la y sã n bãng vẽenega, bɩ y lebg n wa wilg maam. D na tũ taab n bao-a. A sã sɩd ket yam-yam, d na vɛɛs a Zɩɩda sagsa fãa, al n wa yãend-a.»

²⁴B sẽn dɩk sore, b kẽnga Zif, n deng a Sol. A Daviid ne a neba ra be Maõ we-raoogẽ wã, weooga noorẽ pʋtã.

²⁵A Sol ne a nebã yi-la a baoobo. Kibarã taa a Daviid t'a tees tãng ning sẽn be a Maõ we-raoogẽ wã. A Sol bãnga yellã, la a pʋga a Daviid Maõ we-raoogẽ.

²⁶A Sol ne a nebã ra tũuda tãnga neng a yembre, t'a Daviid ne a nebã tũud neng a to wã. A Daviid da zoeta a Sol taoore ne a sũur fãa, la a Sol ne a neb ra wẽeda gũbri n na n yõk-a.

²⁷La ned n wa n yeela a Sol: «Wa tao tao tɩ Filisti rãmba kẽ f tẽngẽ n na n tak zabre.»

²⁸A Sol basa a Daviid pʋgbo n na n lɛɛg n zab ne Filisti rãmba. Yaa rẽ yĩnga, la b bool zĩ-kãnga tɩ Zab-vaal Pĩiga.