Read SEBR SÕNGO, 1998 1SAMWƐL 25 Bible Online

1SAMWƐL 25 - SEBR SÕNGO, 1998 bible

1SAMWƐL 25

¹Wẽnd kãnga, a Samwɛl kiime, t'a Israyɛl kamba fãa tigim taab n maan a kʋʋre; b mum-a-la a yiri, Rama. Rẽ poore, a Daviid yik n tɩ kẽe Parã weoogo.

²Dakãagr a ye n da be Maõ, n tar arzɛk wʋsgo, Karmɛl tẽnga. A da tara pe-yãans tus a tã, la bʋʋs tusri la a da waa Karmɛl n na n kɩt tɩ b wõrs a piisa kõbdo.

³Dao wã yʋʋr da boondame t'a Nabal t'a pag yʋʋr da boond t'a Abigayil. Yaa pag sẽn da tar yẽesem, la pag sẽn da yaa neere. La dao wã yẽ da yaa nin-wẽnga la nin-toaaga, a rag n yaa a Kalɛb yagenga.

⁴A Daviid zĩnda Parã weoogẽ n wʋm t'a Nabal da wõrsda a piis kõbdo,

⁵t'a bao kom-bɩɩb piig n tʋm a nengẽ, n yeel-ba: «Kẽng-y Karmɛl, a Nabal nengẽ, n tɩ pʋʋs a mam yʋʋr yĩnga,

⁶la y yeel-a woto: ‹Laafi zĩnd ne yãmba! Laafi zĩnd ne y zak rãmba la ne y sẽn tar fãa›

⁷La marsã mam wʋmame, tɩ y wõrsda y piis kõbdo. Bala yãmb dũm-kɩɩmbã zĩnda ne tõndo, d ka yɩ toos ne b ye, la b sẽn pa ne tõnd tɛk Karmɛl, b rũng ba a ye pa menem ye.

⁸Sok-y y tʋʋm-tʋmdba, tɩ b na togs yãmba. La Wẽnd na kɩt tɩ m kom-bɩɩbã paam bark yãmb taoore, tɩ b waame n na n pʋʋs yãmb ne y zu-noogo, y sũ-noog daare, Marsã mam bõsd-y lame, tɩ y sak n kõ y yemsã la a Daviid, bũmb ning sẽn be y nugẽ.»

⁹A Daviid sẽn tʋm b rãmba taa n togsa a Nabal a Daviid goama n gũud a leokre.

¹⁰La a Nabal leoka a Daviid nebã: «A Daviid yaa ãnna? La a Zese biigã zema bõe sẽ? Yembs wʋsgo bee rũnna sẽn zoet n basd b zu-soaben-dãmba.

¹¹La m na rɩk m dɩɩbo, la m niis m sẽn kʋ m tʋʋm-tʋmdba yĩnga, n kõ neba, n yaool n ka mi b sẽn yitẽ?»

¹²A Daviid neba le rɩka b sore, n ta n togs a Daviid daoã goama fãa. La a Daviid yeela a nebã:

¹³«Bɩ ned kam fãa sẽbg a sʋʋga a sɛɛgẽ.» A Daviid sẽbga a sʋʋga a sɛɛgẽ, la yaa neb kobs-naase n tũ-a, tɩ b na n kẽng Karmɛl, tɩ neb kobs-yi pa teeda zĩigẽ.

¹⁴A Nabal dakõor a yembre n waa n yeel a Nabal paga, a Abigayil: «Ade, a Daviid zĩnda weoogẽ n tʋm neb tɩ b wa pʋʋs d zu-soabã, la a waag-b la no-beedo.

¹⁵Nin-bãmba yaool n talla tõnd neere, b pa tol n zẽng tõnd sẽn zĩnd ne bãmb tɛk ye. D bũmb pa tol n menem, d sẽn zĩnd ne bãmb weoogẽ wã tɛk ye.

¹⁶Wĩntoogo, yʋngo bãmb yɩɩ d ba n gũ tõndo la b ra gũuda tõnd rũmsi.

¹⁷Bãng-y tiiri la ges-y y sẽn na n maan a soaba, tɩ tõnd zu-soaba ne a roog zãng fãa sãoong basa daare. Bãmb yaa nin-toaag tɩ looge al tɩ ned pa tõe n gom ne b ye.»

¹⁸Zĩig pʋg bala, a Abigayil rɩka bur kobs-yi, la ko-waoos a yiib ne rãam, ne rũms a nu sẽn segle, n paas ki sẽn kɩɩm pet a nu, ne bugsuntung bi-koeems gĩn koabga, la kankam miisdu kobs-yi. A rɩka rẽ fãa n zɩlg bõeense,

¹⁹n yeel a sõgen-kamba: «Lʋɩ-y mam taoore, tɩ m pʋg yã!» A pa wilg a sɩda ye.

²⁰A zomba bõanga, n tũ so-buka n sig tãngã la ade, a Daviid ne a nebã dag n sigdame la a seg-b lame.

²¹A Daviid da yetame: «Yaa zaalem bala, la m gũ dao kãnga sẽn da tar fãa weoogẽ, tɩ fɩ pa tol n meneme. M maan-a-la yel-sõmde t'a rol maam beed bala!

²²Naaba-Wẽnd na sɩbg a Daviid bɛɛba ne b toolma fãa, la b ra bas tɩ ka ne beoogo bɩ bũmb kell a Nabal ye, rao ra kees a zakẽ ye.»

²³A Abigayil sẽn yãe a Daviid, a siga a bõanga zug tao-tao, n vabend a Daviid taoore, n fõgneg a neng tẽnga.

²⁴A wõgemda a Daviid taoore n yeele: «M naaba! Ad-y yaa maam n konge, m zu-soaba! Bɩ y sak n kõ y yem-poaka sor t'a gom tɩ y kelge.

²⁵M naaba, nin-wẽng a Nabal sẽn maan bũmb ningã bɩ y ra ning-a y sũurẽ ye, t'a yaa wa a yʋʋra sẽn togsã, nabd bala, tɩ yẽnda nengẽ wã, sɩd yaa yalemdo. La m naaba, ad-y m pa yãend neba yãmb sẽn tʋm b rãmba ye.

²⁶La marsã, m naaba, sɩd menga, wala m Soabã sẽn ya Wẽndã, tɩ yãmb me vɩ wã, yaa Soaala-Wẽnd n kokd yãmb nug, tɩ y da raag zɩɩm ye. Bɩ yãmb bɛɛbã, m naaba, la sẽn dat-b yamb ne wẽngã fãa, yɩ wala a Nabal!

²⁷Bɩ y sak kũuna, m sẽn tall n wa kõ yãmbã la y reeg m pʋɩ nebã sẽn pʋgb-b yãmba, m Naaba.

²⁸M kotame tɩ y kõ y yem-poakã a kongra sugri, tɩ Soaala-Wẽnd bala, m naaba, bãmb na tilg roog a ye sẽn kõn lʋɩ n kõ yãmba. Maan-y sugri, m naaba, tɩ yãmb zabda Wẽnd zabre; la b kõ tol n yãend pʋ-toogo yãmb nengẽ ye.

²⁹Neb n yik n digd yãmba, n baood y yõore, mik yãmb vɩɩma waa, m naaba, b na n bĩng-a-la Wẽnd nengẽ, Soaala, yãmb Wẽnnaam, nengẽ; la Wẽnnaam na n loba yãmb bɛɛba, wala ned sẽn ning kugri a loaabgẽ n lobge.

³⁰M naaba, Soaala-Wẽnd sã n wa maan yãmb yel-sõmd ningã b sẽn da pĩnd n yeele, n kõ yãmb naam tɩ yɩ a Israyɛl dĩma, yãmb kõn tol n bʋ ne y menga, la y yam kõn tol n bondg tɩ y daaga zɩɩm zaalem la y tuga ned beem y toor ye.

³¹La Soaala-Wẽnd sã n wa maan yãmb neere, m naaba, bɩ y tẽeg m yelle.»

³²A Daviid yeela a Abigayil: «D Soaala, a Israyɛl Wẽnnaam, paam pẽgre, bãmb sẽn tʋm foom dũnna tɩ fo wa seg maama yĩnga!

³³Wẽnd na ning-f barka, f yẽesem yĩnga! Wẽnd na ning-f barka, fo sẽn sagl maam dũnna tɩ m da yiis zɩɩm, la fo sẽn kok m nug yĩnga.

³⁴M Soaala, a Israyɛl Wẽnnaama, sẽn gɩdg maam tɩ m da maan wẽngã, m wẽend ne bãmb sẽn so vɩɩm, tɩ fo sã n da pa zoe tao tao n wa seg maam, ka la beoog tɛka m na menesẽ yẽe a Nabal ne rao fãa sẽn be a zakẽ.»

³⁵A Daviid reega a Abigayil nugẽ a sẽn wa ne kũun ninga fãa, la a yeel-a lame: «Wẽnd na n kuls-f f yir ne laafi! Gese! Mam kelga f koɛɛga, la m deeg f kosgã neere.»

³⁶A Abigayil sẽn ta yiri, a mikame t'a Nabal da segla dɩɩbo, dĩm dɩɩb menga, a sũur da yaa noogo, al t'a yũ rãam n tɩge, a Abigayil pa togs fɩ, yell kãsenga bɩ yell bil ye, al tɩ beoogo vẽege.

³⁷La yibeoogo, a Nabal dãama yiime, t'a pagã na n togs-a yɛla fãa. La a Nabal sũurã yalsa a yãoogẽ, n lebg wa kugri.

³⁸Sẽn maan wa dasem piiga, a Nabal tɩ saka Naaba-Wẽnde.

³⁹A Daviid sẽn wʋm a Nabal kũumã, a yeelame: «Wẽnd paam pẽgre! Tɩ bãmb gesa m yelle ne a Nabal sẽn da zẽng maamã, la bãmb n gɩdg maam tɩ m pa maan wẽng ye. Soaala-Wẽnd kɩtame t'a Nabal pʋ-toogã leb a menga.» A Daviid tʋmame tɩ b kos a Abigayil t'a sak n legb a paga.

⁴⁰A Daviid tʋʋm-tʋmdba ta-la a Abigayil nengẽ, Karmɛl, n gom ne a woto: «A Daviid tʋma tõnd yãmb nengẽ, tɩ d wa peeg yãmb n wa t'a maan a paga.»

⁴¹A Abigayil yikame n wõgemd n fõgneg a neng tẽng n yetẽ: «M naaba! Sẽn zems ne maam bala, yaa m waasd y tʋʋm-tʋmdba nao!»

⁴²La tao-tao bala, a Abigayil zomba bõanga, n yik n looge, tɩ kom-pugli a nu na n yãag-a. A tũ a Daviid tʋʋm-tʋmdba. A tɩ lebg a Daviid paga.

⁴³A Daviid da zoe n peega Zizreyɛl bi-pugla a ye, a Ayinoam, n maan a paga. Bãmb b yiibã n yɩ a Daviid pagba.

⁴⁴[46†] A Sol da pĩnd n deega a bi-pugla, a Mikal, a Daviid pagã, n kõ a Palti, Galim dao, a Layis, biiga.