Read SEBR SÕNGO, 1998 1SAMWƐL 26 Bible Online

1SAMWƐL 26 - SEBR SÕNGO, 1998 bible

1SAMWƐL 26

¹ [47†] Zif tẽngẽ dãmba waa n yeela a Sol, Gibea: «A Daviid pa kẽng n tɩ soond Akila weoog tãn-bila zugu laa?»

²A Sol yikame n kẽng Zif weoogo, ne rap tus a tã, gãndaad menga, a Israyɛl sʋka, n na n babs a Daviid.

³A maana tãb-sika Akila tãn-bila zugu, sor noore, n tees weoogo. A Daviid da bee weo-kãnga la a bãngame t'a Sol waa n na n pʋg-a-la be.

⁴A tʋma lɩɩsdba, sẽn na yɩ-la n bãng vẽenega, a Sol sã n sɩd waame.

⁵Woto wã, a Daviid yikame n ta a Sol sẽn da sig zĩig ningã. La a yãee a Sol sẽn dag n gãe zĩig ningã, yẽ ne a Abnɛr, a Nɛr biigã, a tãnsoaba. A Sol da gãee tãb-sika tẽnsʋka tɩ neba da gũbg-a.

⁶A Daviid goma ne a Ayimelɛk, a Ɛt yagenga, ne a Abisayi, a Seruya biiga la a Zoab ba-biiga, a yeel-b lame: «Ãnd dat n tũ maam, tɩ d sig n kẽ tãb-sikã n ta a Sol.» T'a Abisayi yeele: «Maam n na n tũ yãmb n sigi!»

⁷A Daviid ne a Abisayi kẽnga neba nengẽ yʋngo. La ade, a Sol dag n gãeeme n gõe tãb-sika tẽnsʋka, a kãnd da sela tẽnga, a zugẽ. A Abnɛr ne a neba fãa da gũbg-a lame n gãe.

⁸A Abisayi yeela a Daviid: «Soaala-Wẽnd yõka y bɛyã n sagl y nugẽ; m kotame tɩ y kõ-m sore, tɩ m kõs-a ne kãndã, n ka a ne tẽngã, vugri bala, la na seke, m kõn le kõs n paas ye!»

⁹La a Daviid yeela a Abisayi: «Da maan-a bũmb koe, ãnd n na n kʋ Naaba-Wẽnd sẽn kõ a soab naama n kong sɩbgre?

¹⁰Ayo! Ne Wẽnd sẽn vɩ wã, yaa bãmb bala n na n kʋ-a; a kũum daar sã n ta, bɩ a kẽnga zabre, n tɩ ki.

¹¹[48†] Wẽnd dɩ beem ne-ma, m sã n zẽk m nug Wẽnd sẽn kõ a soab naama zugu. Bɩ f rɩk kãndã sẽn sel a zugã la lɩnga ne kooma tɩ d looge.»

¹²Woto, a Daviid rɩka kãndã ne lɩnga ne koomã sẽn da be a Sol zugẽ wã tɩ b looge. Ned pa yãe bãmba, ned pa bãng bũmbu, ned ba a ye pa tol n neke, tɩ bãmb fãa da gõee gõeem kãseng ning Wẽnd sẽn da lub-ba a soaba pʋgẽ.

¹³A Daviid sẽn yi tãb-sikã, a yalsa al yɩɩga, tãnga zugu. B sɩd da paam n vẽsga taaba.

¹⁴A Daviid teesa a Nɛr biig, a Abnɛr, nebã n tãse: «Abnɛr, f ka na n leok-m laa?» A Abnɛr sokame: «Foo la a bõe n wekd dĩma tʋba?»

¹⁵T'a Daviid yeel a Abnɛr: «Fo ka yet tɩ f yaa raoa la f to ka Israyɛl tẽn-peelmẽ bɩ. Bõe tɩ f pa gũ dĩma, f zu-soaba, tɩ ned a yembre yi kɛɛnga n wa n na n kʋ dĩma, fo zu-soabã?

¹⁶Ade, fo sẽn maana ka neer ye! M wẽend ne Wẽnde, tɩ fo toga ne kũum, fo sẽn pa gũ f zu-soaba, Soaala-Wẽnd sẽn kõ a soab naama. Bɩ f ges marsã naab kãnde, la b lɩnga ne koomã sẽn da be b zugẽ wã, ges-y b sẽn be zĩig ning marsã.»

¹⁷A Sol bãnga a Daviid koɛɛgã n yeele: «Sɩd yaa fo koɛɛg bɩ, m biiga a Daviid?» T'a Daviid leoke: «Yaa mam koɛɛga, m zu-soab la m dĩma!»

¹⁸La a yeelame: «Yaa bõe tɩ m naaba pʋgd a sõgne? M maana bõe? Yell bʋg n be m zugu?

¹⁹M zu-soaba la m dĩma sak bala n kelg y sõgna koɛɛga. Sã n yaa Soaala-Wẽnd n ning yãmb yamẽ tɩ y zab ne maam, bɩ b kok m vɩɩma sẽn tees bãmb wa yũ-noog kũuni! Sã n ya ninsaalba n dat m vɩɩma, bɩ Wẽnd yãk b bark zãnga. Ade, dũnna b digd-m lame, b digd-m lame n zãagd ne tẽng ning Soaala sẽn kõ b buudu la yaa wala b yet-m lame: ‹Zãag n tɩ waoog wẽn-naandse!›

²⁰Bɩ m zɩɩm da raag tẽnga tɩ Soaala-Wẽnd nenga zãr ne m ye. Yaa bõe tɩ Israyɛl dĩma bob zabr ne maam? M sãoo kareng ne bõe? Yaa bõe tɩ y rigd-m wala tãms zut koadenga?»

²¹A Sol yeelame: «M maana yel-wẽnde; m biiga a Daviid, lebg n wa tɩ m kõn le maan-f wẽng ye, tɩ dũnna daarã fo gesame tɩ mam vɩɩm bee yõodo. Mam maana wa yalma: m tudga wʋsgo.»

²²A Daviid leokame: «Ad dĩma kãnde, bɩ ned a ye wa reeg-a!

²³Wẽnd na rol ned kam fãa ne b zemsgo la b sɩda, tɩ rũnna, bãmb da ninga yãmb mam nugẽ, la m pa sak tɩ m nug sɩɩs dĩma Wẽnd sẽn taag a soab kaama ye.

²⁴La wala yãmb vɩɩm sẽn be yõod mam nifẽ wã, woto me, mam vɩɩm bee yõodo, Naaba-Wẽnd nifẽ, la bãmb na zãag-m ne bũmb ning fãa sẽn tõe n yãk yõore.»

²⁵A Sol yeela a Daviid: «M biiga Daviid, Wẽnd na ning f barka! F na tʋm tʋʋm bɛda, f tʋʋma na zĩnd yõod wakat fãa!» A Daviid le rɩka a sore, t'a Sol me leb a yiri.