Read SEBR SÕNGO, 1998 1SAMWƐL 27 Bible Online

1SAMWƐL 27 - SEBR SÕNGO, 1998 bible

1SAMWƐL 27

¹A Daviid kõ-la a meng yam n yeele: «Daar a ye bala, a Sol nug na kʋʋ maam; mam sẽn na n zoe n kẽng Filisti rãmba tẽng na sãoog m yĩnga. Daare, a Sol na yaa n bas m pʋgbo a Israyɛl soolmẽ, tɩ m paam n tɩlge.»

²Woto a Daviid rɩka sore ne a neb kobs-yoobã, la b kẽnga a Akis nengẽ, a Maok biiga, Gat dĩma.

³A Daviid tilga a yiri n pẽnega a Akis, Gat tẽnga, yẽnda ne a neba, ned fãa ne a zaka, a Daviid ne a pagba a yiibu, a Zizreyɛl biig, a Ayinoam, la a Abigayil, Karmɛl dao a Nabal pʋg-kõore.

⁴Kibara taa a Sol t'a Daviid zoeeme n kẽng Gat la a basame n le ka baood-a ye.

⁵A Daviid yeela a Akis: «Y sa n sɩd zoeta m nimbãanega, m yõkd-y sɛɛga tɩ y kõ-m zĩiga y tẽnga a ye pʋgẽ, tɩ m zĩndi. Yãmb yamba yɩta wãna n zĩnd y sɛɛgẽ, y na-tẽnga pʋgẽ.»

⁶Badaar bala, a Akis kõ-a-la Siklag tẽnga, yaa rẽ yĩnga, la Zɩɩda dĩm dãmba so Siklag n tãag rũnnã.

⁷A Daviid zĩnda Filisti rãmba tẽnga yʋʋmd la kiis a naase.

⁸A Daviid ne a neba kẽng n tɩ taka zabre ne Gesuritse, Girgazitse la Amalesitse, tɩ yaa bãmb buudã n da kẽed tẽnga al daar zãra, sẽn sɩng Sur, n tãag Ezipt tẽnga.

⁹A Daviid ra kʋʋda rapa la pagba, ba a ye ra ka põsd ye. A ra loogda ne rũm-bɛda la rũm-bõonego, bõeense la yʋgma la futu; la a sã n lɛɛg n wa, a ra tallda fãa n kɩt a Akis.

¹⁰A Akis sã n da soke: «Y tɩ zaba yɛɛne rũnna?» A Daviid da leokdame tɩ yaa ne Zɩɩda Nug-rɩtg rãmba, bɩ ne Yerameyɛl Nug-rɩtgo bɩ ne Kenitsa Nug-rɩtg rãmba.

¹¹A Daviid da pa sakde tɩ rao bɩ pag põse n tũ n wa Gat ye. A ra zoeta rabeem tɩ b na n wa gome n luk a bãongo. Tɩ b na n wa gome n yet t'a maana woto la woto. Woto n sɩd yɩ a manesem a sẽn waa n be Filisti rãmba tẽngẽ.

¹²Dẽ me la a Akis da pelga a pʋg ne a Daviid; a ra gomda a yamẽ: «A Daviid manesma kɩtame t'a buuda a Israyɛl kis-a, woto a na n yɩɩ m sõgen wakat buud fãa.»