Read SEBR SÕNGO, 1998 1SAMWƐL 30 Bible Online

1SAMWƐL 30 - SEBR SÕNGO, 1998 bible

1SAMWƐL 30

¹Da-yɩten-daare, a Daviid ne a neba taa Siklag. B mikame tɩ Amalesitsa ra zaba ne Negɛb rãmba, ne Siklag: b ra sãama Siklag n tol n yõog-a bugum.

²B ra yõga pagba ne neb niyns fãa sẽn da be tẽnga pʋga, bɛda la bõonego. B ra pa kʋ ned ba a ye ye, la b ra talla b sẽn yõg b rãmba, n kell n dɩk b sore n looge.

³A Daviid ne a neba sẽn ta b tẽngẽ, b mikame tɩ b yõog-a lame la b looga ne b pagba, b kom-dibli la b kom-pugli.

⁴Woto, a Daviid ne a neba sẽn da pʋgda sɩnga kelemse la b kũmame al tɩ b pãnga fãa sɛ.

⁵[54†] B ra yõga a Daviid pabga a yiiba me n looge. Yaa Zizreyɛl tẽng paga, a Ayinoam ne a Abigayil, Karmɛl Nabal pʋg-kõorã.

⁶A Daviid sũur da sãama al wʋsgo, neba ra gomdame tɩ b na n lab-a-la ne kuga, tɩ ned kam fãa da zĩi ne sũ-sãanga la a yãbd a bi-ribl bɩ a bi-pugla. La a Daviid sũur le kengame, Wẽnnaam, a Soaala yĩnga.

⁷ [55†] A Daviid yeela maan-kʋʋda, a Abiyatar, a Ayimelɛk biiga: «Tall sãnem-pɛ-m-poore n wa.» La a Abiyatar talla sãnem-pɛ-m-poore n wa.

⁸A Daviid soka Wẽnnaam: «M tõe pʋga zab-zabdbã la m na paam-b sɩda?» La leokrã yɩɩ woto: «Pʋge, tɩ f na paame, la f na n fãag b sẽn yõg b rãmba.»

⁹A Daviid kẽna ne a neb kobs-yooba sẽn da be ne yẽnda, la b ta Besor kʋɩlgã.

¹⁰Neb kobs-yi n pa tɩ b ra yɛɛ wʋsgo n pa tõe n gãndg Besor kʋɩlga ye: woto a Daviid kell n kẽnga ne neb kobs-naase.

¹¹B yãee Ezipt ned a yembre weoogẽ wã, la b tall-a lame n wa a Daviid taoore. B kõ-a-la buri t'a wãbe, la b kõ-a-la koom t'a yũ.

¹²B leb n kõ-a-la kankama la bugsuntung biis sẽn kʋɩɩse, gĩin a yiibu. A rɩɩme t'a pãng le wa; sɩd me a ra ka tol n dɩ la a yũ bũmbu al sẽn ta dasem a tã, wĩntoog la yʋngo.

¹³A Daviid sok-a lame: «Ãnd n so foom, la fo yita yɛ?» A leokame: «M yaa Ezipt bi-bɩɩga, Amalesitg a yembre yem-daoogo. Ad dasem a tãab rũnna, mam zu-soaba sẽn bas maam, m sẽn ka laafi yĩnga.

¹⁴Tõnd zaba ne Krɛt Nug-rɩtg rãmba, ne a Zɩɩda la a Kalɛb Nug-rɩtg rãmba la d yõoga Siklag bugum.»

¹⁵A Daviid sok-a lame: «F tõe n yãag-m-la zab-zabdb kãens nengẽ?» La a leokame: «Wẽen ne f Wẽnnaamã tɩ f pa na n kʋ-m ye, la f pa na n dɩk maam n kõ m zu-soaba ye. F sã n sak boto, m na tall foom n kẽng zab-zabdba nengẽ.»

¹⁶La a yãag-a lame, la b mikame tɩ b ra sẽeg n pida ne tẽnga, n dɩtẽ la b yũuda, la b maand b kibsa, tɩ sɩda, teed wʋsgo la b wʋk Filisti rãmba tẽnga la Zɩɩda tẽnga.

¹⁷A Daviid kʋ-b lame al yibeoogo n tãag zaabre n kãab-b ne Wẽnde. Ned ba a ye ka põs ye, sã n ka kom-bɩɩb kobs-naase sẽn zomb yʋgma n zoe n põse.

¹⁸A Daviid reega Amalesitsã sẽn dɩk bũmb niynsa fãa. A Daviid fãaga a pagb a yiibã.

¹⁹Bũmb ba a ye ka menem ye, al ba teedo n tɩ tãag kom-dibli la kom-pugli, bũmb ning fãa b sẽn da zɛ n loog ne wã, a Daviid le talla fãa n wa.

²⁰B riga rũm-bõonego la rũm-bɛda n taas a Daviid taoore n yetẽ: «A Daviid zabr pʋɩɩr la woto.»

²¹A Daviid babsa neb kobs-yi wã sẽn da yɛ n le pa tõe n kẽna, t'a bas-b Besor kʋɩlga rʋʋre. B yik n sega a Daviid ne a neba sẽn da pʋgdã: a Daviid ne a neba me seg-b lame n pʋʋs-ba.

²²Neb kẽer n da be a Daviid neba sʋka n ya nin-toose la nin-yaalse, b zẽka b koeese n yeel: «Nin-bãmba sẽn ka rʋʋg kʋɩlga wa tõndã, bɩ b ra kõ-b bũmb ba a ye tõnd sẽn deega pʋgẽ, sã ka b toorẽ pagba la b kamba; b reeg-ba n zoe.»

²³La a Daviid yeelame: «Naaba-Wẽnd sẽn maan bũmb ning n kõ tõndã, pa tog tɩ y tʋm woto ye, d saam-biisi. Soaala-Wẽnd yalsa tõnd sɛɛgẽ, la bãmb n ning tõnd nusẽ zab-zabdba sẽn wa n zab ne tõndã.

²⁴Ãnd n na n kelg y gomdã? Sẽn kẽnga zabrã sẽn deegd bũmb ninga, boto me la b kõt sẽn yaas-b n gũ teedã. B naagda fãa n pʋɩ taaba.»

²⁵La badaar tɛka, a Daviid kɩtame tɩ rẽnda lebg noor a Israyɛl yĩnga, la rog-n-miki sẽn ket n yɛs ne rũnna.

²⁶A sẽn ta Siklag, a Daviid tʋma Zɩɩda nin-kẽemba pʋɩɩr, tẽng-tẽnga, ne koe-kãnga: «Yãmb yĩnga, baad-y kũuni sẽn yãk Wẽnd bɛɛb teedẽ, tõnd sẽn zab n paame.»

²⁷Kũuna sẽn ta b rãmb la woto: Betɛl rãmba, Negɛb-Ramot rãmba, Yatir rãmba,

²⁸Aroɛr dãmba, Sifmot rãmba, Estemoa rãmba.

²⁹Rakal rãmba, Yerameyɛl dãmba, Kenitsa tẽns rãmba,

³⁰Orma rãmba, Bor-Asã rãmba, Atak rãmba,

³¹Ebrõ rãmba n paas tẽns niyns fãa a Daviid sẽn zĩnd ne a nebã.