Read SEBR SÕNGO, 1998 1SAMWƐL 4 Bible Online

1SAMWƐL 4 - SEBR SÕNGO, 1998 bible

1SAMWƐL 4

¹A Samwɛl da taasda Soaala-Wẽnd koɛɛgã a Israyɛl gill fãa. Dasem kãense, a Israyɛl yiime n na n tɩ seg Filisti rãmba n zab ne-ba. B wẽ-la b sik Eben-Ezɛr, tɩ Filisti rãmba wẽ b sik Afɛk.

²Filisti rãmba gãnega tãpo n na zab ne a Israyɛl, la zabrã yɩɩ kãsenga. Filisti rãmba tõoga a Israyɛl, tẽn-nabrẽ, n kʋ b neb na ta tus a naase.

³Nebã leba b tãb-sikẽ, t'a Israyɛl nin-kẽemsa yeele: «Bõe yĩng la Soaala bas tɩ Filisti rãmba tõog tõnd dũnna? D kẽng Silo n tɩ rɩk zood kasetã [6] n wa, t'a zĩnd tõnd sʋka, n fãag-do d bɛɛb nusẽ.»

⁴[7†] B tʋma neb Silo, tɩ b tɩ wa ne koglgã, Wẽnd-Pãng-Soaba sẽn zao a soab zugã. A Eli kamb a yiibã, a Ofni la a Pinas, da bee be, koglga sɛɛga.

⁵Zood kaseta sẽn waa n kẽ b tãb-sikã, a Israyɛl kamba fãa zẽka koɛɛg n kaas ne sũ-noogo, tɩ tẽnga fãa rĩmda.

⁶Filisti rãmb sẽn wʋm b kelemsa rãamde, b sokame: «Kaasgo ning b sẽn kaasd Ebre rãmba tãb-sikẽ wã võor yaa bõe?» La b wʋmame tɩ zooda kaset koglga n wa b tãb-sikẽ.

⁷Filisti rãmba yɛɛsame tɩ b ra yetame: «Ade, wẽnd a ye n sig Ebre rãmba tãb-sikẽ la yell n paam tõndo, tɩ daar sẽn zãag bilf marsã, dag n ka le ya woto ye!

⁸Na wʋm tõndo! Tõe tɩ yaa Tãnsoaba-Wẽnde. Ãnd n na fãag tõndo bãmb nusẽ? Tõe tɩ yaa Wẽnd ninga sẽn sɩbg Ezipt rãmba ne bãas buud fãa, we-raoogẽ!

⁹Baasg zãnga, keng-y y pɛlga, la y wilg tɩ yãmb yaa rapa, la y maan zabre!»

¹⁰Filisti rãmb kaooga zabre la b tõoga Ebre rãmbã, tɩ ned kam fãa zoe. B pogla a Israyɛl tɩ looge; sẽn ki-b tãpẽ yɩɩ neb tus pis-tã.

¹¹Filisti rãmb reega zooda kaset la a Eli kamb a yiibã, a Ofni la a Pinas kiime.

¹²A Bẽnzame doog daoa a yembre, n yi zabra zĩigẽ n zoe n wa Silo, badaar bala; a futã ra pãrsame, t'a zuga ra yug tom.

¹³A sẽn ta wã, rẽ t'a Eli da zao a goeel zugu, sora noore, n gũud kibare; a sũur da rigda rabeem, kaseta koglga yĩnga. Daoã sẽn kẽ tẽnga pʋga, a togsa kibarã tɩ tẽnga fãa wẽ no-bɩnga.

¹⁴A Eli sẽn wʋm yãbrã, a sokame: «Bʋʋra võor la bõe?» Tao-tao bala, daoã waa togs-a-la kibarã.

¹⁵A Eli da tara yʋʋm pis-wɛ la a nii; a nina da menemame, t'a ra ka le ne bũmb ye.

¹⁶Daoã yeela a Eli: «Mam sẽn wa wã, ad-m da bee zabra zĩigẽ; yaa zabrã zĩigẽ la m yii n zoe dũnna.» A Eli sokame: «M biig sõngo, bõe n maane?»

¹⁷Sẽn wa-a ne kibarã leokame: «A Israyɛl zoee Filisti rãmba taoore, la neba paama ko-yũud meng-menga, la yãmb kamba a yiibã, a Ofni la a Pinas kiime; la b tol n deega zooda kasetã.»

¹⁸Daoã sẽn gom zood kaseta yell bala, a Eli lʋɩ-la a goeel zug tulumdi, dagnoora sɛɛga, n kaoog a yubla, n ki. A ra kʋʋlame, n ya zɩsgo. A yɩ-la a Israyɛl bʋ-kaood yʋʋm pis-naase.

¹⁹A bi-paga a yembre, a Pinas paga, da tara pʋga n kolg rogem. La a sẽn wʋm tɩ b tol n deega koglgã, la a wʋm t'a sɩda la a sɩda ba wã kiime, a lɛɛg n yĩgimdame; a sẽn da kũumd rogem yĩnga, a rogame.

²⁰A sẽn da sobg yĩnga, sẽn da be-b a sɛɛgẽ wã yeel-a lame: «Da maan dabeem ye, yaa bi-ribla la f rog yã.» La a pa leok ye, n tol n maan wa a pa wʋm ye.

²¹A waa n pʋda a biiga yʋʋre t'a Ikabod, n yetẽ: «Zu-zẽkr sɛɛ Israyɛl tẽn-peelmẽ.» A ra goma woto b sẽn deeg zood kaseta yĩnga, n paas a sɩda ne a sɩda ba wã kaalem yĩnga.

²²Paga ra yeelame: «Zu-zẽkr-sɛɛ Israyɛl» tɩ b reega Wẽnd zooda kaseto.