Read SEBR SÕNGO, 1998 1SAMWƐL 5 Bible Online

1SAMWƐL 5 - SEBR SÕNGO, 1998 bible

1SAMWƐL 5

¹Filisti rãmb reega koglgã. B tʋk-a-la Eben-Ezɛr n tall-a n kẽng Asdod.

²Filisti rãmba sẽn deeg koglgã, b tall-a lame n tɩ kẽes b wẽnd, a Dagõ, doogẽ; la b rɩgl-a-la a Dagõ sɛɛgẽ.

³Vẽkembeoogo, Asdod dãmb sẽn yi tõd-beoogo, b mikame, t'a Dagõ lʋɩɩme, t'a neng fõgneg tẽnga, Soaala zood kaseta taoore. Tɩ b rɩk a Dagõ n lebs a zĩigẽ.

⁴Vẽkembeoog yɛsa, bãmb sẽn le yi tõd-beoogo, b mikame t'a Dagõ le lʋɩɩme, zood kaseta taoore: da keesa yĩnga bala, zuga la nusa ra wãame n dɩg dooga noorẽ.

⁵Yaa rẽ yĩnga, la ba ne rũnna, a Dagõ maan-kʋʋdba la sẽn kẽed-ba a Dagõ doogẽ, Asdod tẽnga, pa tabd dignoora ye.

⁶Soaala-Wẽnd nug sɩbga Asdod dãmba, n wa ne sũ-sãang kãsenga b sʋka; b lobg-b-la yũya, Asdod ne a tẽn-kɩremsa fãa.

⁷Asdod dãmba sẽn mik tɩ yaa woto, b yeelame: «Wẽnd zooda kaset koglga kõn pa tõnd nengẽ ye, tɩ d yãeta toog wʋsg a sɛɛgẽ, tõnd ne d wẽnd a Dagõ.»

⁸Asdod dãmba kɩtame tɩ b bool la b tigim Filisti nanamsã n yeel-ba: «Bõe la d na n maan ne Israyɛl Wẽnda zood kaseta koglgã?» Tɩ b leoke: «D tʋk-a n kẽng Gat.» B sɩd tʋk-a lame.

⁹La b sẽn tʋk-a n ta Gat, la Soaala-Wẽnd nug sẽn le sɩbg tẽngã, la yɩɩ rabeem kãsenga. Soaala sɩbga tẽnga rãmba, sẽn sɩng kom-bõonego n ta nin-kẽemba, b fãa yĩnga pusa yũya.

¹⁰Woto bãmb tʋma koglga Ekrõ, tɩ Ekrõ rãmb na n wẽ no-bɩnga n yetẽ: «B tʋka koglgã n wa rɩgl-a tõnd tẽnga, n na n kʋ tõndo ne d buudu.»

¹¹Bãmb me kɩtame tɩ b bool la b tigim Filisti rãmb nanamse n yeel-ba: «Lebs-y Israyɛl Wẽnda zood kasetã t'a leb a zĩigẽ, la a ra kʋ tõnd ne d buud ye!» Kũum dabeem kãsenga da tara tẽnga rãmba, fãa da rigda dabeem kãseng menga; Soaala-Wẽnd da zɩsga b nugu.

¹²Nin-vɩɩg pa kell tẽngã n ka pus yũur ye la tẽnga rãmba kelemsã sãdame n kul yĩngri.