Read SEBR SÕNGO, 1998 1SAMWƐL 7 Bible Online

1SAMWƐL 7 - SEBR SÕNGO, 1998 bible

1SAMWƐL 7

¹ [8†] Kiriyat-Yeyarim neb waame, n deeg zood kasetã, n tall-a n kẽng a Abinadab yiri, tãn-bila zugu, la b yãka a biiga a Elazar t'a soog zood kaseta gũudem.

²B sẽn tɩ bĩng kuga walsa koglg Kiriyat-Yeyarim, a kaoosa be wʋsgo: taa yʋʋm pisi. Dẽ marsã la a Israyɛl waa n yik n yãbd n dat Soaala-Wẽnde.

³A Samwɛl yeela a Israyɛl rooga gilli: «Sã n yaa ne y sũur fãa, la y lɛɛg n baood Soaala-Wẽnde, bɩ y yiis y sʋkã wẽn-sãamsã: a Baal la a Astarte rãmba. Rɩk-y y sũur n togl Naaba-Wẽnde, sak-y bãmb b yembr bala; la b na n fãag yãmb, Filisti rãmb nugẽ.»

⁴A Israyɛl kamba sɩd yiisa Baal la Astarte rãmba, la b tũ Naaba-Wẽnd b yembr bala.

⁵A Samwɛl yeelame: «Bɩ Israyɛl kamba fãa tigim taaba, Mispa, tɩ m pʋʋs Soaala b yĩnga.»

⁶B tigma taab Mispa. La b yõnga koom n bas Wẽnd taoore; b loe noor badaare n yetẽ: «Tõnd beega Wẽnnaam!» Yaa Mispa la a Samwɛl sɩd lebg a Israyɛl naaba la a bʋ-kaooda.

⁷Filisti rãmba wʋmame t'a Israyɛl kamba tigma Mispa, tɩ nanamsa yik n na n wa zab ne a Israyɛl. B sẽn wʋm woto, a Israyɛl kamba diga Filisti rãmb rabeem,

⁸la b yeel a Samwɛl: «Kelem Naaba-Wẽnd n kõ-do, la da zĩ sɩɩ woto ye. Bool-b tɩ b wa fãag-d Filisti rãmba nusẽ.»

⁹A Samwɛl rɩka pe-bila sẽn ka bas bĩisim, n kʋ yũ-noog maoongo, n yõog-a bugum zãnga n kõ Soaala-Wẽnde. La a kelma ne Naaba-Wẽnde, a Israyɛl yĩnga; la b reega a kosgo.

¹⁰A Samwɛl sẽn da waa n kõt maoongã la Filisti rãmb kolg n na n kaoog zabre ne a Israyɛl. Badaare, Naaba-Wẽnd tʋma sa-tãse, n yɛɛs Filisti rãmba al wʋsgo. A Israyɛl tõog-b lame.

¹¹A Israyɛl yii Mispa n dig Filisti rãmba, n tar b kʋʋbo al n tɩ yõsg Bɛt-Kar.

¹²A Samwɛl tãsa ne pãnga: «Sẽn ta marsã Soaala sõngr ka paoog-d ye.» Dẽ la a rɩk kugri n lugl Mispa ne tẽng a ye sʋka, n pʋd a yʋʋr tɩ Eben-Ezɛr, Wẽnd sõngr kugri. A ra yeelame: «Soaala-Wẽnd sõnga tõndo n ta marsã.»

¹³Woto Filisti rãmb pa maam daood ye. B pa le saag n kẽe a Israyɛl soolem pʋgẽ, n ta a Samwɛl loogr ye.

¹⁴Filisti rãmba sẽn dag n deeg a Israyɛl tẽns niynsã le leba a Israyɛl, sẽn sɩng Ekrõ n tɩ tãag Gat. Yɩɩ woto la a Israyɛl bogr kãng tɩlg ne Filisti rãmbã. Laafi zĩnda Israyɛl ne Amoritsa sʋk marsã.

¹⁵A Samwɛl yɩ-la a Israyɛl taoor soab la a bʋ-kaooda, a vɩɩm tɛka.

¹⁶Yʋʋmd fãa, a ra kẽnda Betɛl, la Gilgal la Mispa, n kaood a Israyɛl bʋʋd be,

¹⁷n yaool n lɛɛg n wa Rama, t'a yir da bee be, a ra kaooda a Israyɛl bʋʋd be me, la a mee maan-kugr beene, Soaala-Wẽnd waoogr yĩnga.