Read SEBR SÕNGO, 1998 1SAMWƐL 8 Bible Online

1SAMWƐL 8 - SEBR SÕNGO, 1998 bible

1SAMWƐL 8

¹A Samwɛl sẽn waa n kʋʋle, a kɩtame t'a kambã lebg bʋ-kaoodba, a Israyɛl tẽnga.

²A bi-kãsenga yʋʋr da boondame t'a Zowɛl, t'a yiib soaba boond t'a Abiya; b ra kaooda bʋʋda Beerseba.

³A Samwɛl kambã pa rɩk b ba nao ye. B ra nonga arzɛgs tɩ looge, bãmb da reegda neb kũuni, n pa kaood bʋʋd ne sɩd ye.

⁴A Israyɛl nin-kẽemsã fãa tigma taaba, n kẽng a Samwɛl nengẽ, Rama.

⁵[9†] B yeel-a lame: «Ade, fo kʋʋlame, la f kamba pa rɩkd fo nao ye. Marsã, maan wala buud a taaba sẽn maande, la f bao dĩm n kõ-do t'a soog-do.»

⁶A Samwɛl sũur pa yɩ noog ne b sẽn yeele: «Kõ-d dĩma t'a soog-do!» La a Samwɛl pʋʋsa Naaba-Wẽnde,

⁷la Soaala-Wẽnd leoka a Samwɛl: «Kelg neba koɛɛga, kelg b sẽn na n yeel-f bũmb ninga fãa. Ad ka foom la b pa rat ye, yaa maam la b pa tʋl tɩ m le rɩ naam b zugu.

⁸La rẽ ka sɩng rũnna ye, sɩnga al Ezipt yiib n tãag rũnna. Woto la b basd maam n pʋgd wẽn-naands toɛ-toɛ yã. Boto me la b maand dũnna ne foom.

⁹Kelg b koɛɛgã, la deng n wilg-ba, dĩma sẽn na n tall-b seem ninga.»

¹⁰Nebã sẽn da kot dĩma, a Samwɛl tɩ togs-b la Naaba-Wẽnd goama fãa.

¹¹A Samwɛl yeel-b lame: «Ad dĩma sẽn na n dɩ naam yãmb zugã, sẽn na n maan bũmb ninga. A na n deega yãmb kamba n kɩt tɩ b get a bilim-bilma yelle, a wiidi wã yelle, bãmb n na n zoet a bilim-bilma taoore.

¹²A na n yãk-b lame tɩ b yɩ neb tusri, neb pis-nu nanamse, tɩ b ko a pʋʋgã, n tigs a tigsgã, n kud a zab teedã la b zap a wiida fan-teedã.

¹³A na n deega yãmb kom-pugli tɩ b zɛɛd-a kaam sẽn tar yũ-noodo, tɩ b segend a rɩɩbo la b wẽed a buri.

¹⁴A na n deega y pʋtã, y bugsuntundã, [10] y oliviye sõma wã. A na n dɩk-b lame n kõ a tãnsoaben-dãmba.

¹⁵A na n deega yãmb kood-biisi la y bugsuntund biisi, pʋɩɩr a ye piig zugu, n kõ na-pagba gũudba la a sõgen-kamba.

¹⁶A na n deega yãmb dakõapa la y roog kamba, la y niis la y bõeens sẽn ya-b sõma n yɩɩda, n tʋm a tʋʋma.

¹⁷A na n deega y rũmsã, rũng a ye piig zugu. Yãmb mens na n yɩ-la a yemse.

¹⁸Baraar la y na n yãb ne Naaba-Wẽnde, y dĩma manesma poorẽ, dĩm ning, y meng sẽn tũusi, la Soaala-Wẽnd kõn kelg-y ye.»

¹⁹Neba zãgsa a Samwɛl kelgre. B yeelame: «Ayo, d kõn deeg f goama ye, dĩm n na n dɩ naam tõnd zugu bala!

²⁰Tõnd me na n wẽnega wala buud a taaba fãa: tõnd dĩma n na kao d bʋʋdo n kõ-do, a na n lʋɩ tõnd taoore, n tall-do, tɩ d kẽng zabre.»

²¹A Samwɛl kelga neba sẽn leoka fãa n tɩ togs Soaala-Wẽnde.

²²La Soaala-Wẽnd yeela a Samwɛl: «Kelg b koɛɛga, la f kõ-b dĩma.» T'a Samwɛl yeel a Israyɛl dapã: «Be neere, ned kam fãa kul a tẽngẽ.»