Read Sabu MATIUS 1 Bible Online

MATIUS 1 - Sabu bible

MATIUS 1

¹Nadhe ke ne lapi-lapi huhu ama-appu Yesus Kristus, kolo loro Daud, kolo loro Abraham. Rai ngati Abraham lohe hape ma Daud, ne ngara-ngara ama-appu Yesus he na hedhe ke:

²Ti Abraham ta era ke Ishak, jhe era Yakub, jhe era Yehuda nga tuahhu-tuahhu no he, jhe era Peres nga Zerah (ne ngara ina ro Tamar), jhe era Hezron, jhe era Ram, jhe era Aminadab, jhe era Nahason, jhe era Salmon, jhe era Boas (ina no Rahab), jhe era Obed (ina no Rut), jhe era Isai, jhe era Duae Daud.

⁶ Rai ngati Daud tade dhai hape la awe ta hora he do Israel la Babel ne ngara ro do bhuki he, na hedhe ke: Ngati Daud ta era ke Salomo (ne ina no ne, ihi-ammu ri Uria pa uru jhara ne), jhe era Rehabeam, jhe era Abia, jhe era Asa, jhe era Yosafat, jhe era Yoram, jhe era Uzia, jhe era Yotam, jhe era Ahas, jhe era Hizkia, jhe era Manasye, jhe era Amon, jhe era Yosia, jhe era Yekhonya nga tuahhu no he.

¹²Rai ngati awe hora he do Israel la Babel lohe ma awe metana Yesus, ne ngara-ngara ro na hedhe ke: Ti Yekhoya ta era ke Sealtiel, jhe era Zerubabel, jhe era Abihud, jhe era Elyakim, jhe era Azur, jhe era Zadok, jhe era Akhim, jhe era Elihud, jhe era Eleazar, jhe era Matan, jhe era Yakub, jhe era Yusuf ddau pa hedhapa Maria ne. Jhe ngati Maria do napoanne ke ne metana Yesus do pale ta Kristus ne.

¹⁷Hakku ngati Abraham lohe la ngi'u Daud, hari-hari henguru appa huhu ddau. Jhe ngati Daud lohe la awe hora he do Israel la Babel, henguru appa huhu ddau ri. Jhe ngati awe hora he do Israel la Babel lohe ma awe metana ne Kristus, henguru appa huhu ddau ri.

¹⁸ Mina hedhe ke ne jhara lua metana Yesus Kristus. Ina No Maria, do pa dhara peddhei ko nga Yusuf. Tapulara nga do dho peloko nga'a dae ro, moko ta era ke Maria nga kadho. Adho do toi ri Yusuf ne lai do naanne ta do ngati Henga Deo.

¹⁹Yusuf dhe heddau do dhai kenanno pa dhara uku aigama. Ri do mina har re ke ta ddhei ke no ta pehappo ne lua peddhei ro, nga do dho tenge ta toi ri Maria, mita ie Maria ta do dho mekae dhara penaja nga ddau lowe.

²⁰Pa dhara awe nga peowe ko ri Yusuf ne lai do naanne, moko ta nii ke no. Pa dhara linii no ne, ta ngadde ke ri no heddau naju Muri, do lii pa no, ”Wo Yusuf kolo loro Daud, bhole meda'u au ta peloko nga'a nga Maria, rowi ne ana do pa kekara Maria ne, do pemure ri higa Henga Deo.

²¹ Do ta pemetane ri Maria heddau ana momone. Ne ngara do jhamma ta pehune ri au tu naiki do naanne, Yesus, rowi No ke ne medae ta pemmau-pema'i ne lubhu harro nga menyilu annuniki No.”

²²Hari-hari ne lai do na hedhe, jadhi pedute nga do mina mii ne do alle pepale ri Muri, do pelake jhara nabi No, do lii mina hedhe,

²³ ”Heddau ana do ngarru do medae ta melole jhe metana heddau ana momone. Na iki do napoanne do medae ta pehune ne ngara No ta Imanuel.” (Imanuel lii Ibrani, kinga pa lii di, ”Deo, do era penau hari ta hela'u nga di.”)

²⁴Ta merrai Yusuf, ta tao ke ri no pedute nga do mina mii ne do lii naju Muri ne. Ta peloko nga'a ke no nga Maria.

²⁵ Tapulara ngaddhi dho Maria ta bba'i hela'u nga Yusuf tade dhai hape la awe kehoo dhara ne Maria. Ta alla pemetana ne naiki do naanne, ta pehune ke ri Yusuf ne nga No ta Yesus.