Read Sabu MATIUS 12 Bible Online

MATIUS 12 - Sabu bible

MATIUS 12

¹ Pa dhara helodho, Lodho Pengaha-ihi, pa dhara nga narru Yesus jhara dhara maa gandum, moko ata puru ke ne wuri gandum he ri ana hekola Yesus he jhe paggu mada ri ro, rowi do menganga ke ro.

²Ta ngaddi ne tao ro ta do mina harre ri do Farisi he, moko ta lii ke ro pa Yesus, ”Heleo ko ri au! Ne ana hekola au hidhe do pehihu nga lii pa dhara uku aigama di nga jhagge ri ro ne lai do dho ie ta jhagga pa Lodho Pengaha-ihi.”

³ Moko ta bhale ke ri Yesus pa ro, ”Ngaddi dae dho mu ta ajhe ne jhara lai do tao ri Daud nga ddau-ddau pedute no he pa dhara nga menganga he ro?

⁴ Adho do maho Daud la dhara Ammu Deo; jhe la nga'a ri no ne roti do alla pejhula pa Deo he. Jhe ne do pa petu ne, pedutu nga lii pa dhara uku aigama di, Daud miha nga ddau-ddau pedute no he, adho do ie ta nga'a ne roti do mi na harre — wata ke mone tunu-menahu he we ne do ie ta nga'a.

⁵ We adho dae mu do ngaddi ta ajha pa dhara lidara Musa, ta do pa hadhi Lodho Pengaha ihi, ne mone tunu-menahu do pekako lua jhagga pa dhara Ammu Deo, do pehihu nga lai do peato jhara Lodho Pengaha-ihi, tapulara ngaddi dho ta lii pa ro ta do hala?

⁶Dhanno ko ri mu pewoie ne lii Ya do nadhe: pa dhe nee, ne do rihi ngati Ammu Deo dhe.

⁷ Pa dhara Buku Lidara-Likewahhu Deo era do hure do bhuke: Lua peruba-dhara ke ne do ddhei ri Ya, adho bhada tunu nga menahu. Jhe ki ta do tada nga petu-tu he mu ne lipedai do maanne, do bhara tatu ke mu dho lii ta do hala pa ddau do dho bhule nga hala he.

⁸Rowi Ana Ddau Raiwawa do nga higa penaja nga lodho Pengaha-ihi.”

⁹Ta pekaddhi ke Yesus ngati era do naanne jhe kako la hewue ammu hebhajha.

¹⁰Pa anne era heddau do made hebhakka. Do parri ddau do ddhei ta kale ne hala Yesus, ta la kebhali ke pa Yesus, ”Ie marra ta peie ddau pa Lo dho Pengaha-ihi?”

¹¹ Ki era pa telora mu do nga ki'i hengi'u, ”Do bunu la dhara ro'a do meramma pa Lodho Pengaha-ihi; kale marra ri no ne loro jhara ta la arre ne ki'i no ne ngati dhara ro'a ne?

¹²Nah, ddau do rihi ne kebhue ngati ki'i! Hakku ki do mina harre, do ie ta ruba dhara nga ddau pa Lodho Pengaha-ihi.”

¹³Ta alla pemina harre ta lii ke Yesus pa ddau do made hebhakka ne, ”Jhole ne ruai au.” Ta jhole ke ri ddau do naanne ne ruai no, moko pa dhara do naanne dhangnge ta ie ke ne ruai no ne, mii do helaa ne.

¹⁴Tapulara ne do Farisi he ta langnga ke ti ammu hebhajha ne, jhe la pelii ta pemade Yesus.

¹⁵Do toi ke ri Yesus, ta do ne do Farisi he do nga lua pedabbho do woapa penaja nga ngi'u No. Hakku ta pekaddhi ke Yesus ngati era do naanne, jhe do ae ddau do pedute No. Moko ta peie ke ri No hari-hari ddau do paddha.

¹⁶Ta pulara ta lii ke Yesus ta bhole pejha'e ne jhara lua No pa ddau-ddau do wala ri.

¹⁷Ri do mina harre ke ta tobo le ke ne lii do pale ri Deo do pelake jhara Nabi Yesaya,

¹⁸ ”Nadhe ke ne ddau pepu do jhujhe ri Ya ne, ddau do ddhei Ya nga do maddhi pa ade Ya. Ne Henga Ya do ta wie ke ri Ya pa No, ne lua mola-mira Ya do ta pedae-pejha'e ke ri No pa hari-hari ddau-rai.

¹⁹Adho ke no do ta pebhata kiadho ta peka, kiadho ta lolo lii pa rujhara-ae poro-mata.

²⁰Kelaiwu do bele ri merajhu adho medae ta pepade ri No lapu do kelalu ke ne weo adho do medae ta pemade ri No. Do ta petadi no tu ta tade kajhe dhae ne lua mola mira ne;

²¹hari-hari ddau-rai do ta pee nga ito nga henao pa No ke.”

²²Ta alla pemina harre ta dakka ke nga aggo heddau do bhaddu jhe do bhangnga ri do maho ri henga kerabba, langa Yesus. Ta peie ke ri Yesus ne ddau do napoanne, hakku ta i'a ke no pedai lii, jhe mina harre lema ta nara le ke no ta ngaddi ne nga-nga.

²³Ta madalae ke ne ddau he hari-hari, jhe lii ro, ”Adho marra ke ta No ke dhe ne Ana Daud do alle pejaje ne?”

²⁴ Ta rangnge ne lii do napoanne ri do Farisi he, ta bhale ke ri ro, ”Ddau nadhe wata ke no ne nara ta hudhi henga kerabba, ri do wie ke pa no ne kuaha ri Beelzebul kattu ngati henga-henga kerabba he.”

²⁵Do toi ri Yesus ne penge do Farisi he. Hakku ta lii ke No pa ro, ”Kinga hewue rai pereda do menyalla-nyalla pa dhara kejie-kejie do pee nga pemuhu-pelawa, moko ne rae pereda do napoanne rajja dho ke ne janna, Jhe hewue dhara rae do kiadho hewue dhara ammu do pee nga petobha-pedharru heddau nge heddau, rajja dho ke ne me nyalla dhangnge.

²⁶Mina harre lema pa dhara rae pereda Wango; ki ri hekejie hudhi keluru ne kejie do wala he, moko ne rae pereda Wango do mina harre do ta menyalla kebali-bali ke jhe rajja dho ke ne jhanna.

²⁷Lii mu pa Ya ta do ne hudhi ri Ya ne wango he ri kuaha ngati Beelzebul. Ki do mina harre, nga kuaha nadu ri ke, hakku nara ne ddau ddau mu he ta hudi wango? Moko ri ddau-ddau mu ma miha ne do peteleo ta mu do hala.

²⁸Tapulara ne hudhi ri Ya ne henga kerabba he ri kuaha Henga Deo. Jhe ri lai do naanne ke, ne peteleo pa mu ta do jhari ke Deo ta pereda pa telora mu.

²⁹Mina mii ddau ne nara ta maho la dhara ammu heddau do rui tu ta la rabe ne unu-oha no, ki do adho do ujhe uru jhara ko ne ddau do rui do naanne ne? Ki alle ke peujhe ne ddau do rui do naanne, jhe itu nara ta la rabe ne unu-oha no ri ddau do naanne.

³⁰ Ddau do dho anga jhara nga Ya, no ke ne do pa petu ne, ne do pelawa-pe taddhu nga Ya. Jhe ddau do dho rabhe do dho dharro Ya, no ke ne do peape n lua jhagga Ya!

³¹Rowi do mina harre ke, henge we, do ki nga dhai ke ddau ta tao lubhu harro nga menyilu jhe nga pali likara nga menihi, do nara ko no ta pehuba! Tapulara ki kare ki menihe ri no Henga Deo, adho ke no do nara ta pehuba ri!

³² Kinga era ddau do pali hahhi lai do pelawa-petaddhu nga Ana Ddau Raiwawa, do nara ko ma no ta pehuba, tapulara kinga kare nga menihe Henga Deo ri no, adho ke do nara ri lua pehuba, ie ta pa dhara awe nadhe mina harre lema pa dhara awe pedakka rahi raiwawa!”

³³ ”Mii ta nara wue do woie, ne kepue ajhu ne do jhamma ta do bebu do meragi. Kinga do lara do addha, ne wue ne do addha do hagu lema. Ngati wue do ta tade ma ne kepue ne, kepue do bebu do meragi we do adho.

³⁴ Mu ddau do apa do kerewe, mina mii ne nara ta pali ne lai-lai do woie kinga mu do apa do kerewe? Nenga ne do pale ri ubha ne, naanne ke ne do lale ngati dhara ade ne!

³⁵Ddau do woie do pali ne lai-lai do woie rowi no do tobo ri lua do woie. Do wala ri ddau do apa do kerewe, ne do pale ri no lai-lai do apa do kerewe, rowi no do tobo ri lua do apa do kerewe.

³⁶Hakku, henge we: pa Lodho Pedakka Rahi Raiwawa, heddau-heddau do jhamma ta hape ri no penaja nga nami we ne lipali no do dho bhule nga guna he.

³⁷Rowi ngati kolo lipali-lipedai mu ma miha ne do ta pake ta pehappo ta do hala au we adho.”

³⁸ Do parri ddau guru aigama nga do Farisi ta lii ke pa Yesus, ”Ama Guru, jhi ddhei ta heleo Ama ta tao lua madalae.”

³⁹ Ta bhale ke ri Yesus pa ro, ”Dhai tarra ne apa nga langahuka ne ddau-ddau pa dhara awe nadhe. Mu ammi ta tao lua madalae pa Ya? Wie tu-tu dho pa mu ne lua madalae maji le ta hahii he, wata ke lua madalae ngati Nabi Yunus we.

⁴⁰ Yunus tallu lodho tallu rammi ne pee pa dhallu lungi-rai. Mina harre lema Ama Ddau raiwawa do medae ta tallu lodho tallu rammi pa ro'a worai.

⁴¹ Pa Lodho Pedakka Rahi Raiwawa, do Ninewe do ta kaddhi hela'u-la'u nga ddau pa dhara awe nadhe, jhe do medae ro ta kelaa penaja nga ddau-ddau pa dhara awe do nadhe. Rowi do Ninewe he alla ke ro pejharra ngati lubhu harro nga menyilu ro, ta alla ri ro pedhanno ne lipeliba Yunus. Tapulara pa dhe pa dhara awe nadhe nee ne do rihi mone-ae ngati Yunus.

⁴² Pa Lodho Pedakka Rahi Raiwawa, banni-ae ngati ihi-rai Bholou do ta kaddhi hela'u-la'u nga ddau-ddau pa dhara awe nadhe, jhe do ta titu no ta kelaa penaja nga ro. Rowi tu ta la dhanno ne liajha Salomo do mone mmau dhara ne, alle ke penarro ri no ne loro jhara do rihi jjhau ngati kebhihu raiwawa dhe. Tapulara pa dhe nee do rihi mone-ae ngati Salomo!”

⁴³”Ki nga mahhu anni ne henga kerabba ngati dhara heddau, do ta bela ke no la hebhakka-hebhakka ta la kale era do kemangu tu ta pengaha-ihi,

⁴⁴tapulara peabu dho no nga era do mina harre, moko ta lii ke no, ’Rihi ie ya ta bhale la ammu do alle pehane ri ya ne.’ Ta dhai no la ni, ne ammu do naanne era do keliu, do mmau nga do kenajjhe.

⁴⁵Ta kako ke ne henga kerabba ne la aggu do pidu henga kerabba do wala do rihi apa ri ngati no. Ta maho ke ro la dhara ddau do naanne, jhe pee pa anne. Moko ne ddau do naanne jadhi ta rihi kepali ri ngati do uru jhara ne. Mina harre ke ne do ta jadhi pa ddau-ddau do apa do kerewe do pa dhara awe nadhe.”

⁴⁶Pa dhara awe nga pedai lii ko Yesus nga ddau lowe he, ta dakka ke ina nga tuahhu-tuahhu ri Yesus. Ta titu ke ro pa tele, jhe nga kale rujhara mita nara ta pedai lii nga Yesus.

⁴⁷Ta lii ke heddau ngati telora ddau lowe he pa Yesus, ”Ama, ina nga tuahhu-tuahhu Ama, hhai pa tele ni. Ro ddhei ta pedai lii nga Ama.”

⁴⁸Ta bhale ke ri Yesus, ”Nadu ke ne ina Ya? Nadu ke ne Tuahhu-tuahhu Ya?”

⁴⁹Ta pejhujhu ke ri Yesus ne ana hekola No he, jhe lii No, ”Na hedhe ke ne ina nga tuahhu-tuahhu Ya.

⁵⁰Nadu do pedute ne lua ddhei Ama Ya do era pa era do mmau do megala ne, no ke ne tuahhu ya do momone, do mobanni nga ina Ya.”