Read Sabu MATIUS 13 Bible Online

MATIUS 13 - Sabu bible

MATIUS 13

¹Pa lodho do naanne dhangnge ta pekaddhi ke Yesus ngati ammu do naanne jhe kako la mejaddhi la ngidi ei-lobo ne.

² Dhai ae ne ddau ne do peteni pekehero Yesus, rowi do mina harre ke ta kako Yesus la mejaddhi pa dha ra hewue kowa, jhe ne ddau he do titu pa lahalae ne.

³Ta wie ke liajha ri Yesus pa ddau do na harre jhara lua ae lai nga pake lipehakku. ”Ta era ke heddau mone liba wini ta la liba wini,” mina harre ke ne jhare ri Yesus ne pedhiri No.

⁴”Pa dhara liba ne wini he, era ne wini he do bunu pa rujhara. Ta dakka ke dolila jhe la tutu tade alla ne wini do na harre.

⁵Era lema do bunu pa era do wowadu, ne worai pa anne do menii he we. Ne wini-wini do bunu paanne, henginga ne muri rowi do menii ne worai ne.

⁶Tapulara ta dhai ta dhida lodho, ta merajhu ke ne wini do muri he, jhe made rowi adho do meramma ne amo he.

⁷Era lema ne wini he do bunu la ro'a koo nga huki. Ri koo nga huki he ta muri ke pekewowo ne wini do muri he tade made.

⁸Tapulara era lema ne wini he do bunu pa worai do wwau-bbahha, muri jhe wila jhe wue, era do hengahu, era do anna nguru nga era lema do tallu nguru wari lipa.”

⁹Ta alla pepedhire ne lipehakku do naanne ta lii ke Yesus, ”Ki do era nga wodilu, dhanno we!”

¹⁰Ta dakka ke ne ana hekola Yesus he, jhe kebhali ro pa Yesus, ”Tanga Ama hakku pake lipehakku, ki nga pedai lii Ama nga ddau lowe hidhe?”

¹¹Ta bhale ke ri Yesus, ”Rowi do alle ke pehamme ri mu ne lua ruba dhara ne mita tada mu ne lai do pehune jhara lua mina mii Deo ne pereda, tapulara adho do wie pa ro.

¹² Rowi nadu do era nga unu-oha, do ta wie ke pa no pe rihi ae, mita ie ta era pa dhara kereja-kenata. Tapulara nadu do dho bhule nga wuru ne nga-nga, moko ne nga we do era pa no, maji le ta hudi, do ta abbe ngati no.

¹³Mina harre ke, hakku pake Ya lipehakku, ki pedai lii ya nga ddau lowe he, rowi ro do ngaddi ma, tapulara do hela'u mii do bhaddu he; do rangngi ma ro, tapulara do hela'u mii ddau do hoe he, jhe adho do tada nga nga.

¹⁴ Ri do mina harre tobo ke ne do pale ri Nabi Yesaya ne, ’Ane Deo: Do pee ma ri ro nga dhanno loro, tapulara tada dho ro nga-nga; Do heloe loro ma ri ro, tapulara tada ro ne nga ne do jadhi.

¹⁵Rowi ne lua penge ddau-ddau do na hedhe do ketabba ke, ne wodilu ro do hoe ke nga ne namada ro do pebba'e ke. Hakku jadhi ne lai do na hedhe mita do dho ngaddi ke ne namada ro, ne wodilu ro mita do dho rangngi ke, ne penge ro mita do dho tada ke jhe bhale ro ma nga Ya moko ta peie ke ro ri Ya.’ ”

¹⁶ ”Ta lii ke Yesus pa ana hekola No he,” Tapulara mu do dhai mangngi tarra rowi do ngaddi ke nga do rangngi tarra ke mu.

¹⁷Henge we ri mu, ae nabi nga ddau do pedhanno pa Deo, do ddhei ta ketarra ne nga ne do ngadde ri mu pa dhara awe nadhe, tapulara ngade dho ri ro. Dhei ri ro ta dhanno ne nga ne do dhanno ri mu pa dhara awe nadhe, tapulara dhanno dho ri ro.”

¹⁸”Dhanno we ri mu ne nga ne lua pedabbho ngati lipehakku mone liba wini ne.

¹⁹Wini do bunu pa rujhara ne, do hela'u ke mii ddau-ddau do dhanno ma ne lii do mina mii Deo ne pereda, tapulara tada dho nga-nga. Dakka Wango la rabe ne nga ne do lebe ne ngati dhara ade ro.

²⁰Wini do bunu pa era do wowadu-wowadu ne, do hela'u ke mii ddau-ddau do dhanno ma ne lii do naanne, jhe hamme dhangnge nga mengallu nge nga kehaka dhara.

²¹Tapulara adho do dhai meramma pa dhara ade ro, hakku nara dho ta tui ne halla-anni. Ki peabu ke ro nga lua hedui-herui, kiadho nara lua dede-merahhu taga ri lii napoanne, do ta henginga dhangnge ke ro ne naja kejhunga.

²²Wini do bunu pa roa koo nga huki he, do hela'u ke mii ddau-ddau do dhanno ne lii do naanne, tapulara do keba'a-kepapi ne ade ro jhara lua muri mada ro, jhe do ddhei ta muri mada pa dhara keruka-kerakki. Rowi do mina harre ke ne lii do ngati Deo ne, do hengappe pekedhaddu pa dhara ade ro, hakku i'a dho ke tao wue.

²³Nga wini do bunu pa era do wwau-bbahha ne, do hela'u ke mii ddau-ddau do dhanno ne lii do naanne jhe kena'a-ketarra pa dhara ade ro. Dhai ne wue ro, era do hengahu, era do anna nguru, nga era do tallu nguru wari lipa ne wue ro.”

²⁴Ta pedhire ke ri Yesus hewue lipehakku ri pa ddau lowe he, mina hedhe ne aneNo, ”Kidhai Deo ta pereda, ne lua do naanne mii lipehakku do nadhe ke: Ta era ke heddau mone liba wini do woie pa dhara maa no.

²⁵Herammi, pa dhara nga bba'i hari-hari ddau, ta dakka ke ne ihi muhu ddau do naanne, la liba namuhi widu pa telora namuhi gandum do liba ri ddau do naanne, ta langnga ke ne ihi muhu do naanne.

²⁶Ta dhai ta muri ke jhe hobho jhe kehabbha, moko ta teleo ke ne widu he.

²⁷Moko ta dakka ke ne ddau-nga'a-kehiwa he la lii, ’Muri, adho do liba wini do woie we Muri pa maa Muri do hewari ne.’ Ta mina mii hakku era widu do Muri pa ni?”

²⁸Ta bhale ke ri mone muri maa ne, ’Napoanne wui-ai ngati ihi muhu-ihi lawa.’ Ta kebhali ke ne ddau nga'a kehiwa he, ”Mina mii Muri, o'o marra muri ta la bhita ri ne widu do na harre?”

²⁹Ta bhale ke ri mone muri maa ne, ”Bhole, rowi ki nga bhita ke ri mu ne widu do na harre do ta meradda hari le nga gandum he.

³⁰Hani ro pemuri hela'u ne widu he nga gandum he, tade dhai la awe ghattu hine. Do ta lii ma ya hine pa ddau-ddau do ghattu he: Kebhoko uru jhara ne widu he, ujhu ro jhe tunu. Ki alla pemina harre jhe kebhoko ne gandum he, jhe hai la dhara hoka.”

³¹Ta pedhire wari ke ri Yesus hewue lipehakku pa ddau lowe he, mii na he dhe ne ane No, ”Kinga dhai Deo ta pereda, ne lua napoanne do mina hedhe ke: ”Henamuhi wosawi ta aggo ke ri heddau jhe la kojhe, la kojhe rino la dhara maa no.

³²Ne namuhi wo sawi do naanne do dhai kenori. Tapulara ki dhai no ta muri, do jadhi ta hekepue ajhu do dhai herugu rame, jhe rihi mone-ae nga ti hari-hari ajhu do era pa anne. Ta jadhi ke no ta hekepue ajhu, hakku ta dakka ke dolila-dolila la tao nyabbhu pa kelai-kejanga no.”

³³Era hewue lipediri do wala ri ne do pedhire ri Yesus pa ddau lowe he. ”Ki dhai Deo ta pereda, ne lua naanne do hela'u ke mii muu, do aggo ri heddau mobanni, jhe la pehiwo nga terigu appa nguru kilo, ta jadhi ta hewuu hari-hari!”

³⁴Hari-hari ne naharre, ajha ri Yesus pa ddau lowe he nga pake lipehakku.

³⁵ Rowi ri mina harre ke ta jadhi ke mii lii nabi, ”Do ta pake lipehakku ke Ya ki pedai lii Ya nga ro; do ta pepeke ke ri Ya ne lai-lai do pehune-penite rai ti petari ta era raiwawa do nadhe.”

³⁶Ta alla pemina harre ta hani ke ne ddau he ri Yesus, jhe maho No la dhara hewue ammu. Ta dakka ke ne ana hekola No he, jhe lii: ”Hakko ko we ri Ama ta peteleo pa jhi ne nga ne pedabbho lipehakku widu pa telora gandum ne.”

³⁷Ta bhale ke ri Yesus pa ro, ”Ddau do liba wini do woie ne, naanne Ana Ddau Raiwawa ke.

³⁸Maa ne, raiwawa do nadhe ke. Wini do woie ne, ddau-ddau do jadhi ta annu-niki Deo he ke. Widu he, ddau-ddau do anga jhara nga Wango ke.

³⁹Ihi muhu do la liba wini do woapa ne, Wango ke naanne. Awe ghattu ne Lodho Pedakka Rahi Raiwawa ke, nga ddau-ddau mone ghattu he naju-naju Deo ke.

⁴⁰Mina mii ne ujhu ne widu he jhe tunu pa dhara rao ai, mina harre lema ke pa Lodho Pedakka Rahi Raiwawa hine.

⁴¹Ana Ddau Raiwawa do ta lii pa naju-naju No he ta la kebhoko ngati telora annu-niki No he, hari-hari ne ddau do pedubhu lubhu harro nga menyilu he, nga hari-hari do wala he do tao lai do apa do kerewe he.

⁴²Do ta nabha ke ro hari-hari la dhara rao ai do kedu-kedaru ne; pa ni ke ro do ta tangi penina-noho perajja-jaru nga era pe kiho ngutu do peloro ne.

⁴³Jhe ne ddau-ddau do petobe ne lua ddhei Deo do ta kelala ke mii mada lodho he pa dhara Raiwawa Deo do Wowiu ne, do Ama ri ro. Hakku, ki do era nga wodilu, dhanno we!”

⁴⁴”Ki dhai Deo ta pereda, ne lua ne do hela'u ke nga lipehakku do nadhe: ta era ke ne puhaka do pedane pa ro'a worai, ta ngadde ke ri heddau, ta pedane wari ke ri no la ro'a worai. Nga mengallu dhara no, ta kako ke no la pe wie hari-hari ne unu-oha no, jhe la walle ne worai do naanne ri no.”

⁴⁵”Ki dhai Deo ta pereda, ne lua ne mii lipehakku do nadhe: Heddau ana dhaga do kale mutiara-mutiara do dhida kebhue.

⁴⁶Ta dhai no ta peabu nga henamuhi mutiara do dhai tarra ne woie, ta kako dhangnge ke no la pewie ne unu-oha, jhe la walle ri no ne womutiara do henamuhi do naanne.”

⁴⁷”Ki dhai Deo ta pereda, ne lua ne do pehakko mii jhala doligo la dhara ei-lobo, jhe lakka nabbu worawwu nadu'u.

⁴⁸Ta tobo le ne jhala ne, ta nune ke la kolo lede ri mone jhala he. Ta alla pemina harre ta mejaddhi ke ro jhe petala ne nadu'u do na harre: Nadu'u do ie takka la dhara hodi, jhe ne nadu'u do apa he ta hora he ke ro.

⁴⁹Mina harre ke lai ne pa Lodho Pedakka Rahi Raiwawa, naju-naju Deo do ta kako la petala ne ddau-ddau do apa he ngati ddau-ddau do petobe ne lua ddhei Deo.

⁵⁰Ne ddau-ddau do tao apa nga kerewe he do ta hora la dhara rao ai. Pa anne ke ro do ta tangi penina noho perajja-jaru.”

⁵¹”Tada ke mu hari-hari ne lai do na harre?” ne kebhali ri Yesus pa ro. ”Tada ke Ama ee!” ne bhale ari ro.

⁵²Moko ta lii ke Yesus pa ro, ”Ri do mina harre ke, nadu we ti telora guru aigama he do jadhi ke ta annu-niki Deo, hela'u ke no mii heddau muri ammu do pemahhu ne bhara-bhara no do wiu nga do dui ngati era takka he.”

⁵³Ta alla Yesus pepedhiri hari-hari ne lipehakku do na harre, ta pekaddhi ke No ngati era do naanne,

⁵⁴jhe bhale la rae nga kowa No. Pa ni ta kako ke No la ammu hebhajha, jhe wie liajha pa ddau he, moko ne ddau-ddau do dhanno-do tenae ne liajhe No ne, dhai madalae. Ta lii ke ro, ”Ngati mii ne ddau do nadhe ne nara lua mmau dhara do mina hedhe ne worawwu? Jhe ti mii ke No ne nara higa tu ta tao lua madalae do mina hedhe?

⁵⁵Ta do adho ke No dhe ana heddau tuka ajhu? Ta do adho ke ta Maria ma ne ina No; jhe ne tuahhu-tuahhu No he, wala dho ke ti Yakobus, Yusuf, Simon nga Yudas?

⁵⁶Nga do adho ke ne nawanni No he do pee pa dhe lema? Ngati mii ke No ne nara hari-hari ne nahedhe?”

⁵⁷ Moko ta nyakke he ke Yesus ri ro. Ta lii ke Yesus pa ro, ”Heddau nabi pa mii we no do takke pekerihe ri ddau, tapulara pa rae nga kowa no, jhe pa ammu nga kemali no nara dho no ta takke pekerihe.”

⁵⁸Rowi do mina harre ke, wae le dho ma ke Yesus ta tao ri ne lua madalae pa era do naanne, rowi ne ddau-ddau do paanne adho do wae ta parahajha.