Read Sabu MATIUS 14 Bible Online

MATIUS 14 - Sabu bible

MATIUS 14

¹Pa dhara awe naanne Herodes, mone pereda pa ihi rai Galilea, do rangngi ke hari-hari ne jhara lua Yesus.

²Ta lii ke Herodes pa pegawai-pegawai no he, ”Do tatu ke ta nadhe ke Yohanes Mone Pijhiu, do alla ke pemuri wari ri! Ri do mina harre ke, hakku do nga higa No ta tao lua madalae.”

³ Rowi uru jhara ngati do naanne do alla ke Herodes pe lii ta kappe Yohanes jhe petuke, jhe pemaho la dhara ammu bhaddo. Hakku tao Herodes mina poharre, taga ngati lai Herodias, ihi-ammu ngati Filipus, tuahhu no ma miha.

⁴ Rowi do ngaddi Yohanes ta lii mina hedhe pa Herodes, ”Ie dho au ta peloje Herodias!”

⁵Do ne pa petu ne do ddhei ke Herodes ta pemade Yohanes, tapulara do meda'u no penaja nga ddau lowe, rowi Yohanes do periho ri ro ta heddau nabi.

⁶Pa awe pehewene ri Herodes ne lodho metana no, ta ledo ke ne ana mobanni ri Herodias pa hedhapa hari-hari ddau do era paanne. Dhai mengallu dhara Herodes ne heleo ne ledo ana mobanni do naanne,

⁷hakku ta jaji ke Herodes nga dhede hupa pa ana mobanni do naanne, ta ne nga we ne do ta ame ri no, do ta wie pa no.

⁸Taga tari do pedide ri ina no, moko ta lii ke ne ana mobanni do naanne, ”Ne ame ri ya, kattu Yohanes Mone Pejiu, ta wie pa ya pa dhara awe nadhe dhangnge, jhe do takke pa dhara hewue dhula!”

⁹Ta rangnge lii ami do naanne, dhai hedui ne ade Herodes. Tapulara rowi do alla ke no pepehupa pa hedhapa tamu no he, ta lii ke no ta petobe ne lii ami ana mobanni do naanne.

¹⁰Ta pepu ke ddau ri Herodes la ammu bhaddo ne tu ta la atte kattu Yohanes.

¹¹Ta alla pemina harre ta aggo ke ne kattu Yohanes ne la dhara, do takke pa dhara hewue dhula, jhe wie pa ana mobanni do naanne. Ta aggo ke ri ana mobanni do naanne, jhe la wie pa ina no.

¹²Ta alla pemina harre, ta dakka ke ne ana hekola Yohanes he la aggo ne ngi'u Yohanes ne jhe la pedane. Moko mina harre ta kako ke ro jhe la peke ne lua made Yohanes ne pa Yesus.

¹³Ta rangnge ri Yesus ne lai do naanne, ta ha'e kowe ke No miha-miha jhe pekaddhi ngati era do naanne, la hahhi era do keliu. Tapulara ta dhai ta rangngi ne ddau-ddau he jhara lai do naanne, ta mahhu-anni ke ro ngati rae ro jhe kako la pedute Yesus narru jhara kolo lede.

¹⁴Ta dhai Yesus ta puru ngati dhara kowa ne, jhe ngaddi ri No ne ddau lowe he, ta ruba dhara ke No nga ro. Ta peie ke ri No ne ddau-ddau do paddha do era pa telora ro he.

¹⁵Ta maddha lodho, ta dakka ke ne ana hekola Yesus he, jhe lii ro pa Yesus, ”Maddha ke lodho, jhe ne era do nadhe do jjhau ngati rae nga kowa. Rihi ie Ama ta lii pa ddau do na hedhe ta bhale, mita ie ro ta la walli nga'a nginu la dhara rae hidhe.”

¹⁶Ta lii ke Yesus pa ro, ”Tenge dho ro ta kako, wei ri mu we ro ne nga'a ne nginu.”

¹⁷Ta bhale ke ri ro pa Yesus, ”Ne do era pa jhi, wata ke lammi kedalli roti nga dhue ngi'u nadu'u we.”

¹⁸Ta lii ke Yesus pa ro, ”Aggu ne napoharre ma dhe.”

¹⁹Ta lii ke No pa ddau he ta mejaddhi pa rujhu'u. Ta aggu ke No ne roti do lammi kedalli he nga nadu'u do dhue ngi'u he. Ta tengara ke No la liru jhe peha'e ri No ne kolo lii ie-ae pa Deo. Ta alla pemina harre ta pipi-pipi ke ruai No ne roti do na harre, jhe jhula pa ana hekola No he, tu ta la pekepala pa ddau lowe he.

²⁰Ta nga'a ke ro hari-hari tade bbhahhu keni'i-ni'i. Ta alla penga'a he, ta pekupu ke ri ana hekola he ne do rihi ri ro he; tobo henguru dhue hope.

²¹Ne do nga'a he pa dhara awe do naanne, era ma ta do lammi tabbha ddau he, kire de dho mobanni nga na iki.

²²Ta alla pemina harre, ta pepu ke ri Yesus ne ana hekola No he ta pekaddhi uru jhara ngati No la hebhakka-rai. Pa dhara awe do naanne lema ta lii le ke Yesus pa ddau lowe he ta bhale.

²³Ta ludu le ne ddau lowe he, ta ha'e ke Yesus miha la hewue bhojo, tu ta la hebhajha. Lohe la telora maddha era ko ma Yesus miha-miha pa era do naanne.

²⁴Pa dhara awe do naanne lema ne kowa do ha'e ri ana hekola No he do dhai jjhau ke la telora eilobo ne. Do pengidhi-ngadho ke ne kowa ne ri kolo nawa, rowi do dakka ngallu ti hedhapa.

²⁵Pa telora wabba tallu nga wabba anna jhammi-ae, ta dakka ke Yesus la nga ro, jhe do kako pa dhida ei ne.

²⁶Ta kebaddi ke hari-hari ne ana hekola No he, jhe peka, ”Wango!” do dhai meda'u tarra ro hari-hari.

²⁷Ta bhale dhangnge ke ri Yesus, ”Peketanna-anni! Ya, Bhole meda'u!”

²⁸Moko ta lii ke Petrus, ”Ki do tarra ma au ta Yesus, lii we pa ya ta ka ko ju la anne le pa dhida ei.”

²⁹Ta bhale ke ri Yesus, ”Mai we au,” ta puru ke Petrus ngati dhara kowa ne, jhe kako ju la nga Yesus.

³⁰Tapulara dhai ta heleo ri Petrus ta do dhai tarra ne ngallu nga kolo dahi ne, ta meda'u ke no jhe jhari ta janna. Ta peka dhangnge ke no, ”Muri, ruba ko we nga ya.”

³¹Ta jhole dhangnge ke ri Yesus ne ruai No, jhe kappe Petrus, nga lii pa ”Petrus, Petrus, Petrus au dhe ddau do kura lua parahajha. Ta nga hakku kepapi au penaja nga Ya?”

³²Moko ta ha'e ke ro hari do dhue la dhara kowa ne, moko ta ketanna le ke ne ngallu ne.

³³Moko ne ana hekola Yesus he, ta mejura ke pa hedhapa Yesus. Ta lii ke ro, ”Tarra, Muri ke ne Ana Deo ne!”

³⁴Ta dhai ro la hebhakka-rai, ta puru ke ro pa Genesaret.

³⁵Ta dhai ta ngadde ri ddau-ddau do era paanne ta Yesus ne do dakka ne, ta pelebe ke ri ro la hari-hari kebhihu ihi rai do peumu nga rae do naanne. Moko ta aggu ke hari-hari ddau do paddha la nga Yesus.

³⁶Ta ammi ke ro pa Yesus, kita ie he, ta bhuje hewe ri do paddha la nga Yesus. Ta ami ro pa Yesus, kita ie he, ta bhuje hewe ri do paddha he ne wui jhalla juba No. Hari-hari do bhuje ne wui jhalla juba Yesus he, ta ie he ke ngati lua paddha ro.