Read Sabu MATIUS 16 Bible Online

MATIUS 16 - Sabu bible

MATIUS 16

¹ Ta dakka ke do parri ddau do Farisi nga do Saduki la nga Yesus do nga lua pedabbho ta kale ne hala No. Ta ame ke Yesus ri ro ta tao lua madalae tu ta peteleo pa ro ta do tarra No do dakka ngati Deo.

²Ta bhale ke ri Yesus, [”Ki pa dhara nga ta janna ke lodho, lii mu, ’Awe do woie lodho dhe, rowi do mea ihi liru.’

³Jhe pa dhara awe jhammi-ae, ane mu, ’Medae ta ajjhi lodho dhe, rowi do mea-mamo hi liru.’ Nah, i'a mu ne peira ihi liru nga heleo ne nga do era pa ni, tapulara we, ia'a dho mu ne peira ne telia-telia ngati awe do nadhe!”]

⁴ ”Dhai tarra ne apa-kedhaha nga langa-huka ne ddau-ddau do pa dhara awe nadhe. Ami mu pa Ya ta tao lua madalae, bhule dho do ta pedhelo pa mu, wata ke lua madalae Nabi Yunus we.” Ta alla pemina harre, ta hani ke ro ri Yesus, jhe kako ngati nanne.

⁵Ta dhai ne ana hekola Yesus he la hebhakka-rai, ta toi ke ri ro, ta do ballu ro ta do dho aggu roti.

⁶ Ta lii ke Yesus pa ro, ”Meniga ie we mu nga ti muu do Farisi nga do Saduki he.”

⁷Ta rangngi ri ana hekola he, ta lii ke ro heddau pa heddau, ”Hakku lii No mina hidhe rowi adho di do era aggu roti.”

⁸Do toi ri Yesus ta ne nga ne do pedai ri ro he, hakku ta lii ke No, ”Ta nga hakku ta jadhi hahhi lai pa mu taga tari do dho bhulu mu nga aggo roti? Mu hedhe do kura ko ne lua parahajha!

⁹ Pee ko ma mu nga do dho tada dae hape ma dhara awe nadhe? Henge dho ke ri mu ne jhara lammi bhue roti do pipi-pipi ri Ya he tu do lammi tabbha ddau he? Ta dhai ne pekupu ri mu, henga ne ae do rihi he?

¹⁰ Jhe mina mii ri ne jhara pidu bhue roti, tu do appa tabbha ddau he? Perri hope ne do rihi he, ta alla ri mu pepekupu?

¹¹Ta nga mu hakku pee ma nga do dho tada jhara lipedai ya do ngine ne, rowi ne do pedabbho ri Ya, adho jhara lua roti? Meniga we pewie-ie mu penaja nga muu do Farisi nga do Saduki he!”

¹²Moko ta tada he ke ne ana hekola No he, ta ne lua pedabbho Yesus ne, ne lii pa ro ta meniga pewoie-ie ne, adho penaja nga nga muu do pake pa roti, tapulara penaja nga liajha-liajha do Farisi nga do Saduki he.

¹³Ta kako ke Yesus la ihi rai do peumu nga rae Kaisarea-Filipi. Pa ni ta kebhali ke No pa ana hekola he, ”Pedutu nga lii ddau, nadu ke ne Ana Ddau Raiwawa?”

¹⁴ Ta bhale ke ri ana hekola No he, ”Era do lii ta Yohanes Mone Pejhiu. Era lema do lii ta Elia. Do wala ri, era do lii ta Yermia, kiadho hala heddau nabi.”

¹⁵Ta kebhali ri ke Yesus pa ro, ”Tapulara ki pedutu nga lii mu miha, nadu ke Ya dhe?”

¹⁶ Ta bhale ke ri Petrus, ”Ama ke ne Duae Mone ma'i-Mone golo ne, Ana-Deo Do Muri ne.”

¹⁷Ta lii ke Yesus, ”Mangngi mone-ae tarra au Simon ana Yona! Adho ddau-raiwawa ne do peke ne lai do naanne pa au, tapulara do peke ri Ama Ya do era pa era do mmau do megala ne.

¹⁸Ri do mina harre ke, au ke Petrus, pahiae do dho i'a kerattu wari. Pa dhida pahi do nadhe ke do ta petito ne gereja Ya, do adho ke do nara ta jharra ri, maji lema ta ri lua made mada!

¹⁹ Do ta jhole ke ri ya ne ana kuhi Raiwawa Deo Do Wowiu ne pa au. Nenga we ne do labbe ri au pa danni raiwawa, nopoanne lema do ta labbe pa era do mmau do megala ne. Jhe ne nga ne do pemole ri au pa raiwawa dhe, na poanne lema do ta pemole pa era do mmau do megala ne.”

²⁰Ta alla pemina harre ta lii ke Yesus pa ana hekola No he mita do dho pepeke ri ro ne lai do naanne ie ta pa nadu we, ta do No ke ne Duae Mone ma'i-Mone golo ne.

²¹Jhari rai ngati awe napoanne, ta peke pemola-mola ke ri Yesus pa ana hekola No he ne jhara lua No, do jhamma No ta kako la Yerusalem, jhe do ta peabu lua hedui-herui do ae ngati mone kettau-kettau, kattu-kattu mone tunu menahu he nga guru-guru aigama. Do ta pemade No, tapulara pa lodho do ketal lu ne do ta kaddhi bhale wari.

²²Moko ta pera'o ke Yesus ri Petrus ju la hebhakka rujhara, jhe lii, ”Ki ie mudhe he ta pejho ri Deo ne lai do naanne ngati Muri. Bhole tade dhai ta jadhi ne lai do naanne pa Muri!”

²³Ta kebhibha ke Yesus jhe lii pa Petrus, ”Wango, langnga au ngati dhe! Au dhe ta ma bhate-bhate we Ya. Ne lua penge au do napoanne, lua penge ddau raiwawa we; adho lua penge do ngati Deo!”

²⁴ Ta alla pemina harre ta lii ke Yesus pa ana hekola No he, ”Ddau do ddhei ta pedute Ya, do jhamma ta awi la kejhunga ne lua paralu ngi'u no, jhe dhue hape ne ajhu ketoe no, jhe pee nga pedute Ya.

²⁵ Rowi ddau do ddhei ta jage ne muri mada no, do medae ta ele ngati no. Tapulara tu ddau do jhole ne muri mada no taga Ya, do ta hamme ri no ne muri mada ne.

²⁶Ne nga ke ne lua mangngi tu heddau kinga unu ke ri no hari hewue raiwawa dhe, tapulara jhe do ele ne muri mada no? Nara marra ne muri mada dhe ta pehure nga heworawwu bhara ne nga-nga?

²⁷ Rajja dho ke, do medae ke ta dakka Ana Ddau Raiwawa, hela'u-la'u nga naju-naju No nga kuaha Ama No. Pa dhara awe do napoanne ke, do ta bhale ke ri No penaja nga heddau-heddau pedutu nga wui ai-wui tao ro.

²⁸Henge we ri mu! Do ta era ti telora mu do na hedhe do dho made dae, ki do dho ngadde dae ri no ne lua dakka Ana Ddau Raiwawa ne mii Duae he.”