Read Sabu MATIUS 18 Bible Online

MATIUS 18 - Sabu bible

MATIUS 18

¹ Pa dhara awe naanne ta dakka ke ne ana hekola Yesus he la nga Yesus jhe kebhali, ”Nadu ke ne do ege ta do rihi mone-ae pa telora annu-niki Deo?”

²Moko ta pedoe ke ri Yesus heddau naiki, jhe petito pa hedhapa ro.

³ Moko ta ta lii ke Yesus, ”Parahajha we mu! Titu wata ki bhari-annu mu ta jadhi mii naiki do nadhe, do ta jadhi ke mu ta ai-alla ngati annu-niki Deo.

⁴Ddau do pewawa-anni, jhe jadhi mii naiki nadhe no ke nedo keriki pa telora annu niki Deo.

⁵Jhe ddau do hamme naiki do mina hedhe taga Ya, lai napoanne do hela'u ke mii hamme Ya lema.”

⁶”Nadu do tao mita do dho parahajha ri ne naiki do na hedhe maji le ta he ddau he we penaja nga Ya, rihi ie ta peratte ri wowadu pa lakoko ddau napoanne, jhe nabhe no pebolo la dhara dahi balla.

⁷Dhai tarra ne apa nga kerewe tu raiwawa do nadhe taga tari lai-lai do pebui ddau la dhara lubhu harro nga menyilu. Do tarra ma ne lai-lai do mina harre do pee ma ta era loro, tapulara apa nga kedhaha tu nadu we do tao ne lai-lai do mina harre.

⁸ Ki ruai au kiadho rubhebho au do pedide au ta tao lubhu harro nga menyilu, atte jhe nabhe no. Rihi ie au ta muri mada hela'u nga Deo nga do dho bhule kae hela, ngati maho hari hengi'u au la dhara rao ai do peloro ne.

⁹ Jhe ki nga namada au ne do pedide au ta tao lubhu harro nga menyilu, wuke jhe nabhe no. Rihi ie au ta muri mada hela'u nga Deo nga do dho bhule namada hebhakka, ngati hore au hari hengi'u la dhara rao ai do peloro ne, nga namada hari dhue bhakka.”

¹⁰”Jaga eeh! Bhole kara-menihi ie ta heddau he ti telora naiki do na hedhe. Rowi do mina harre ke henge pewoie we, ne naju ro he do era loro pa hedhapa Deo do era pa era do mmau do megala ne. [

¹¹ Rowi ne mai Ana Ddau Raiwawa, ta ma wie ne lua helama tona ie tu ddau do huli do teballi!]

¹²Mina mii pa tada mu? Kita era heddau do nga ki'i hengahu ngi'u, jhe mo ko ta ele hengi'u, ne nga ke ne do ta tao ri no? Rae-here dho ke, do ta hani ke ro ne, do ta hani ke ri no, ne ki'i no do heo nguru heo ngi'u he pa kolo lede, jhe la kale ri no ne do ele ne.

¹³Jhe ki nga ngadde bhale wari ke ri no ne ki'i no do ele ne — parahajha we mu nga Ya — do medae no ta rihi ne mengallu dhara penaja nga do hengi'u do naanne, ngati do heo nguru heo ngi'u he.

¹⁴Do mina harre lema ke Ama mu do era pa era do mmau do mega la ne, do dho ddhei No ta era ie ta heddau he do huli do teballi ngati ddau ddau do ta itu ko ta parahajha do na hedhe pa Ya.”

¹⁵ ”Kinga tao tuahhu mu lubhu harro nga menyilu penaja nga mu, kako we mu jhe peke we ne lua hala no. Jhagge we dhara-dhara ne lai napoanne pa telora mu we dhue. Ki pedute ne lii au ri no, moko do mangngi ke au, rowi do abobhale wari ke ri au ne tuahhu au do naanne.

¹⁶ Tapulara, ki do dho dhanno ma ri no, tina we ri au heddau kiadho do dhue ddau ri. Rowi pa dhara Buku Lidara-Likewahhu Deo do hure do bhuke, ’Rowi ri lipejhara do dhue kiadho do tallu ddau hakahi ke ta peteleo ne hala heddau do peanynye.’

¹⁷Ki do dho hammi ma no ne lira'a-litakka ddau do na harre peke ne lai do naanne pa jemaat. Pedakka rahi ki ki do dho wae ma no ta hammi ne lira'a-litakka jemaat, ege we no ta mii heddau mone hammi bhea he, nga mii heddau do dho tade Deo he.”

¹⁸ ”Henge we ri mu! Ne nga ne do labbe ri mu pa danni raiwawa, do ta labbe lema pa era do mmau do megala. Jhe ne nga nedo pemole ri mu pa raiwawa, do ta pemole lema pa era do mmau do megala.

¹⁹Jehe henge lema we: Ki do era pa telora mu pa danni raiwawa dhe, do dhue ddau do hela'u lii-hela'u langu pa dhara lai ne nga we, jhe do aggo pa dhara lihebhajha, moko ne lihebhajha do napoanne do ta hamme ri Ama Ya do era pa era do mmau do megala ne.

²⁰Rowi pa mii we, ki era ke do dhue-tallu ddau do peteni taga Ya, do era heri ta hela'u ma Ya pa telora ro.”

²¹ Moko ta dakka ke Petrus la nga Yesus, jhe kebhali, ”Muri, tade parri wari ne jhamma ta pehuba ri ya, ki era ne tuahhu ya do tao lubhu harro nga menyilu penaja nga ya? Tade pidu wari ko?”

²²Ta bhale ke ri Yesus, ”Adho, adho ta tade pidu wari he we! Tapulara pidu nguru wari pidu!

²³Rowi ki nga dhai ke Deo ta pereda, napoanne do hela'u ke mii lipehakku do nadhe: Ta era ke heddau duae do ddei ta pemoko hari-hari kallu ngati annu-niki no.

²⁴Pa lai do petari ne lua pereha no, ta pedoe ke ri no ne naannu no do nga kallu tabbha-riwo-rawo,

²⁵jhe adho ke do nara ri ta ma'i pemmau ri no. Moko ta pereda ke ne duae pa no, do ta pewie ke no nga ana-ihi-ammu no, nga hari-hari unu-oha no, mita nara ta ma'i ne kallu no he.

²⁶Ta mejura ke ne naannu do naanne pa hedhapa duae ne, jhe ami huba, ’Muri, pehuba kowe ya ri muri. Do ta ma'i ma ri ya pemmau hari-hari ne kallu ya pa muri.’

²⁷Ta ruba dhara ke ne duae do naanne nga naannu no ne, ta lii ke ne duae do naanne pa naannu no ne, ta do dho tenge ke ta ma'i ri ne kallu no he hari-hari.

²⁸Ta dhai ta mahhu-anni ke ne naannu do naanne, ta peabu ke no nga ihi-anga no, heddau naannu lema, do nga kallu pa no parri tabbha we. Ta kappe ke ri no ne ihi-anga no do naanne, jhe gharro pa koko ne, jhe lii no, ’Ma'i marri-ai hari-hari ne kallu au he pa ya!’

²⁹Tapulara ta mejura ke ne ne ihi-anga no do naanne, jhe ami pa no, ’Mata dae kowe ihi-anga ya eeh, do ma'i ma ri ya pemmau ne kallu ya he pa au.’

³⁰Tapulara ta nyakke we ne lihuba ihi-anga no ne ri naannu do ngine ne. Ta aggo ke ri no ne ihi-anga no ne jhe hahhe la dhara ammu bhaddo, tade mmau hari-hari ne kallu he pa no.

³¹Ta ngadde ke ri naannu-naannu do wala he ne lai do tao ri naannu do naanne, ta hedui ke ne ade ro, jhe kako ro la pika pa duae ne.

³²Moko ta pedoe ke ne naannu do apa do kerewe do naanne, jhe lii pa no, ’Annu do apa do kerewe!’ Hari-hari ne kallu au, alla ke ri ya pepeila, ri do huba au pa ya.

³³Ta do adho ke ri au lema do jhamma ta ruba dhara nga ihi-anga au ne, mina mii ne do alle ri ya petao pa au?’

³⁴Do dhai tarra ne bubu dhara ne duae do naanne. Ne naannu do tao apa do naanne ta pemaho ke ri no la dhara ammu bhaddo tade moko ne ma'i ri no ne kallu no he.”

³⁵Ta tuu ne lipedhiri Yesus ne, ta lii ke No mina hedhe, ”Mina harre lema ke Ama Ya do era pa era do mmau do megala ne, do ta tao No penaja nga mu heddau-heddau, ki dho pehuba ke ri mu ne hala tuahhu mu nga hewue nge danni ade.”