Read Sabu MATIUS 20 Bible Online

MATIUS 20 - Sabu bible

MATIUS 20

¹”Ki dhai Deo ta pereda, ne lua do napoanne do mii lipehakku do nadhe ke: Ta era ke heddau do nga dhoka ago, pa dhara awe jhammi-ae ta mahhu anni ke no la kale ddau ta la jhagga pa dhoka ago no ne.

²Ta alla ro pepemira lii, ta do ne gaji ro helodho hedinar, ta lii ke ne mone dhoka ne pa ddau do na harre ta kako la jhagga pa dhoka ago no ne.

³Pa wabba heo jhammi-ae ta kako ri ke ne mone dhoka ne, ta ngaddi ke ri no do parri ddau pa paha, era do heka-heka he we.

⁴Moko ta lii ke ne mone dhoka ne pa ddau do na harre ’Kako we mu la jhagga la dhoka ago ya. Do ta ma'i ri ya ne gaji do pekattu tu mu.’

⁵Ta kako he ke ro la jhagga. Pa wabba henguru dhue nattu lodho jhe mina harre lema pa wabba tallu maddha lodho, ta kako ri ke ne mone dhoka ne la kale ddau.

⁶Ta dhai ri, era ma ta wabba lammi maddha lodho he, ta mahhu-anni ri ke ne mone dhoka ne, jhe ngaddi ri, ri no ne ddau do heka. Ta kebhali ke ri no pa ro, ’Ta nga mu hakku pee nga titu pa dhe he we helodho raiballa bilu, jhe do dho wae ta jhagga?’

⁷Ta bhale ke ri ddau do na harre, ’Bhule dho ddau do wie jhi jhagga.’ Ta lii ke ne mone dhoka ne pa ro, ’Ki do mina harre, kako we la jhagga la dhoka ago ya.’

⁸ Ta maddha lodho ta lii ke ne mone dhoka ago ne pa mado no he, ’Pedoa ne ddau jhagga do na hidhe, jhe ma'i ne gaji ro heddau-heddau, jhari ngati ddau do maho letto-takka he lohe hape la ddau do uru jhara he.’

⁹Moko ta dakka ke ne ddau jhagga do maho pa wabba lammi maddha lodho he. Heddau-heddau nara he dinar.

¹⁰Ta alla pemina harre ta dakka ke ne ddau jhagga rai jhammi-ae he. Pa penge ro do ta nara do rihi ae ke ro. Tapulara we ne do hammi ri ro, hedi nar lema we.

¹¹Pa dhara nga hammi ri ro ne doi do na harre, ta pegu-pegallo ke ro nga mone dhoka ne:

¹²’Ddau do jhagga leto do na hidhe, wata hejaa we ro ne jhagga. Bhale jhi ri do jhagga helodho-rai balla-bilu, do nono-anni pa pana lodho do keti-ketinga, ma'i ri Muri pa ro hela'u we ne ae mii do ma'i pa jhi le.’

¹³Ta bhale ke pa heddau ti telora ro ri mone muri dhoka ne. ’Ihi-anga, hala dho ya penaja nga au. Henge dho ke ri au ta do pemira lii ke di ta do ne kehewe au ri ya hedinar helodho-rai?

¹⁴Nah! Hamme we ne gaji au jhe langnga au ngati dhe. Ki wata ke ne ddhei ya ta wie au ne gaji do hela'u ne ae nga ddau do dakka leto takka he.

¹⁵Ta do dho ie ke ya, ta e'e ne ddhei ya we pa unu-oha ya? We ata pana dhara au taga taripedhelo ri ya ne lua ruba dhara ya pa ddau do wala?’ ”

¹⁶ Moko ta lii ri ke Yesus, ”Mina harre lema ke, ddau-ddau do letto-takka do ta jadhi ta do uru jhara, jhe ddau-ddau do uru jhara do ta jadhi ta do le to takka.”

¹⁷Pa dhara nga kako Yesus ju la Yerusalem, pa telora rujhara ko, ta pedoa ke ri No hari henguru do dhue ne ana hekola No he, jhe pekupu ro petala-anni. Ta lii ke Yesus pa ro,

¹⁸”Dhanno ko ri mu! He ke di pa dhara awe nadhe ta ju la Yerusalem. Pa ni, Ana Ddau Raiwawa do ta jhole No la dhara wolaabba Kattu-kattu mone tunu-menahu nga guru-guru aigama. Jhe do medae No ta wole ta pemade;

¹⁹ta alla pemina harre do ta jhole la dhara wola-abba ddau do adho do Yahudi. Do ta kare ta menihe No ri ro, jhe dede jhe merahho, jhe raje jhe ketoe No ri ro. Tapulara pa lodho do ketallu ne do medae No ta pekaddhe bhale wari.”

²⁰Ta dhai ta dakka ke ne ihi-ammu Zebedeus, penau hela'u nga ana no he, la nga Yesus. Ta mejura ke no pa hedhapa Yesus, jhe ami hahhi lai.

²¹Ta kebhali ke Yesus pa no, ”Ina, ne nga ne do ddhei ina?” Ta bhale ke ri no pa Yesus, ”Bhale ma ne ddhei ya, mita ie ke ne ana ya he dhe hari do dhue; heddau ta mejaddhi pa hebhakka keriu, jhe heddau ri pa hebhakka kedhanga Ama, ki dhai Ama ta jadhi Duae hine.”

²²”Tada dho mu nga-nga ne jhara liami mu hedhe,” ne lii Yesus pa ro, ”Do makka mu ta ngino ngati kabha nginu lua hedui-herui do ta ngino ri Ya ne?” Bhale ri ro, ”Makka”.

²³Ta lii ke Yesus pa ro, ”Tarra, do medae ma ta nginu ri mu ngati kabha nginu Ya ne. Tapulara jhara lua petatu ta nadu ne do medae ta mejaddhi pa hebhakka keriu nga kedhanga Ya adho pa dhara higa Ya. Ne era do napuharre tu ddau-ddau do alla pepetakka ri Ama Ya we.”

²⁴Ta rangngi ri do henguru ddau ana hekola Yesus do haghe he, ne lii do naanne ta bubu dhara ke ro nga do dhue ddau do petuahhu do na harre.

²⁵ Rido mina harre ke ta pedoa ke ro hari-hari ri Yesus, jhe lii pa ro, ”Toi ri mu hari-hari ne mone kettau-mone kettau ngati ddau-rai do dho tade Deo he, do ta jhalli ta kerupu ne ana rai ro. Jhe ne kattu-kattu mone-ae ro he ta anynyi ro pekehanynyi.

²⁶ Tapulara ie dho mu ta mina harre. Tapulara ri, ddau do ddhei ta jadhi mone kettau pa telora mu, do jhamma ke no ta jadhi mone pemoko ri.

²⁷Jhe nadu do dhhei ta jadhi mone jhuru kattu pa telora mu, do jhamma ke no ta mone pemoko mu ri.

²⁸Hela'u mii Ana Ddau Raiwawa lema, ne dakka No adho tu ta ma pemoke, tapulara tu ta ma pemoko nga jhole ne ngi'u No tu ta peballa kattu do ae ddau.”

²⁹Ta dhai ro ta mahhu ngati Yerikho, ae ddau ne do pedute Yesus.

³⁰Ta era ke do dhue ddau do bhaddu do mejaddhi pa ngidi rujhara. Ta rangnge ri ro, ta Yesus ne do ta narru jhara anne, ta peka ke ro, ”Ana Daud ruba ko ne dhara Au nga jhi!”

³¹Ta bhanni ke ne ddau lowe do paanne nga ro, jhe lii pa ro ta pe hangngo anni. Tapulara ta juu peka ke ro rihi kejarre, ”Muri, Ana Daud, ruba dhara we nga jhi!”

³²Moko ta pengaha ke Yesus jhe pedoa ro, ”Ne nga ke ddhei mu ta tao ri Ya penaja nga mu?” ne kebhali Yesus pa ro.

³³Ta bhale ke ri ro, ”Muri, ne ddhei jhi mita nara jhi ta ngaddi!”

³⁴Ta ruba dhara ke Yesus nga ro, ta herae ke ri Yesus ne ruai No pa namada ro. Pa awe napoanne dhangnge ta ngaddi ke ro. Moko ta pedute ke Yesus ri ro.