Read Sabu MATIUS 21 Bible Online

MATIUS 21 - Sabu bible

MATIUS 21

¹Ta umu ro la Yerusalem, ta dhai ke ro la Betfage pa Lede Zaitun. Ti anne ta pepu ke ri Yesus do dhue ddau ngati ana hekola No he ta uru jhara ngati ro.

²”Kako we mu la dhara rae do pehedhapa di do nanidhe,” ne lii Yesus pa ro. ”Do medae nga henginga ta peabu nga hengi'u keledai do akke hela'u nga ana no. Ma'i ri mu hari dhue ngi'u, jhe aggu ma dhe.

³Kinga era ne ddau do kebhali nga-nga pa mu, bhale we ri mu, ’Ne ta paralu Muri nga no’, moko ri ddau napoanne do ta hani ma mu nga henginga pe aggu ne keledai do na harre.”

⁴Do mina harre ke ne lai do naanne mita tobo ke ne nga ne do pale ri nabi do mina hedhe,

⁵ ”Peke we pa Sion, nanne ke ne Duae mu la nga mu. No do wawa nge danni ade jhe do nga menya'e keledai, hengi'u keledai do najawi ko.”

⁶Ta alla pemina harre ta kako ke ne ana hekola Yesus he, jhe la tao mii do alle pejaji ri Yesus pa ro.

⁷La aggo ri ro ne keledai ne nga ana ne. Ta walle ke ri juba ro pa rudanni keledai he. Ta menya'e ke hengi'u ri Yesus.

⁸Ae ne ddau do paanne do walla ne juba-juba ro pa rujhara ne, jhe era ri do wala do la atta kelai ajhu jhe la walla la rujhara ne.

⁹ Ne ddau lowe he do kako uru jhara he nga do pa kejhunga Yesus he, do hodha peka-ka jhe pali, ”Medi-melatu Ana Daud! Peobhe-pemerage No do dakka nga ngara Muri! Wue waje pedhede peketute we Deo, do Mone Wiki Dhida ne!”

¹⁰Moko dhai Yesus ta maho la Yerusalem, dhai kebhaddi hari hewue dhara Yerusalem, ”Nadu nadhe?” ne kebhali ri ddau-ddau do pa dhara rae do naanne.

¹¹”Nabi Yesus, do ngati Nazaret do ti Galilea ne,” ne bhale ri ddau-ddau do lere Yesus he.

¹²Ta maho ke Yesus la dhara Ammu Deo, jhe hudi-keluru hari-hari ne ddau do pewie-pewalli paanne. Nyakka ri No pekebiro-baro tade keloli ne meja-meja mone pehuru doi he, mina harre le nga bhagu-bhagu mone pewie koro jhawa he.

¹³ Ta lii ke No pa ddau-ddau do na harre, ”Pa dhara Buku Lidara-likewahhu Deo, do hure do bhuke ne lii Deo, ’Ammu ya do ta pale ta ammu era hebhajha.’ Tapulara alle ke ri mu petao ta nyabbhu do mengamo!”

¹⁴Ne ddau do bhaddu nga do made heatta he, do dakka la nga Yesus pa Ammu-Deo, ta peie ke ro hari-hari ri Yesus.

¹⁵Tapulara kattu-kattu mone tunu-menahu he nga guru-guru aigama he, ta bubu dhara ke nga Yesus taga tari lua ma dalae do tao ri Yesus he. Jhe do bubu dhara lema ro ne dhanno ne lihodha-lipeka naiki-naiki do pa Ammu Deo he, ”Medi melatu Ana Daud!”

¹⁶ Ta lii ke ro pa Yesus, ”Rangngi ri Au ne nga ne do pali ri ro hidhe?” Bhale ri Yesus pa ro, ”Oo, rangngi ri Ya, ngaddi de dho ta ajhe ne lilolo do nadhe pa dhara Buku Lidara-Likewahhu Deo: ’Naiki nga ana-mea do alla ke ro peajha ri Ya tu ta pali liwue-waje do kemolo’?”

¹⁷Ta alla pemina harre ta hani ke ro ri Yesus, jhe mahhu-anni ngati dhara rae do naanne jhe kako la Betania, jhe bba'i pa ni.

¹⁸Ta bhale ma helodho, rai jhammi-ae-ae, pa dhara ta bhale Yesus la Yerusalem, ta menganga ke Yesus.

¹⁹Ta ngadde ke ri No hekepue kepallu pa ngidi rujhara ne. Ta kako ke No la kepue kepallu do naanne, tapulara peabu le dho nga wue ie ta hewue he, titu wata rrau ne we do dhai bebu. ”Moko ta lii ke Yesus pa kepallu do naanne, ’Adho ke au do ta wue ri!’ ” Ta merajhu dhangnge ke ne kepallu do naanne.

²⁰Ta ngadde ri ana hekola Yesus he ne lai do naanne, dhai madalae ro, ”Mina mii ke hakku jadhi dhangnge ne kepallu do na nidhe ne made hari hekepue?” ne kebhali ro.

²¹ Ta bhale ke ri Yesus pa ro, ”Tarra-tarra,” ki parahajha mu nga do dho kedhue-kepapi, do ta nara ma mu ta tao le mii do tao ri Ya pa kepallu do nadhe, Jhe adho ke ta naanne we, do rihi ri ko ti naanne, do nara mu ta lii pa bhojo do nadhe, ’Pahhi-anni au ngati dhe, jhe horaanni we au la dhara dahi’; moko lai do napoanne do ta jadhi ma.

²²Ne nga we ne do ame ri mu pa dhara lihebhajha, do ta hamme ri mu, hadhi ta parahajha we mu.”

²³Ta alla pemina harre ta bhale ke Yesus la Ammu Deo, jhe maho la wie liajha pa ddau do pa anne. Pa dhara awe naanne ta dakka ke la nga Yesus, ne katu-kattu mone tunu-menahu he nga kattu-kattu do Yahudi he la kebhali pa Yesus, ”Jhalli pa ne nga ke Au, ne tao ri Au hari-hari ne nahedhe? Nadu ke ne do wie Au ne higa do naanne?”

²⁴Ta bhale ke ri Yesus, ”Ya lema ta kebhali pa mu. Jhe ki bhale ri mu ne likebhali Ya, moko do ta peke lema ke ri Ya pa mu, nga higa nadu ne tao Ya ne lai-lai do na hedhe.

²⁵Higa ngati nadu ke ne nara Yohanes, hakku pekako ri no ne lua pejhiu ne? Ngati Deo, we ngati ddau raiwawa?” Moko ata peli ke ne kattu-kattu mone tunu-menahu he nga kattu-kattu do Yahudi he, heddau nga heddau, ”Kinga lii di, ’Higa ngati Deo,’ do medae No ta lii No pa di, ’Ki do mina harre ta nga mu hakku do dho parahajha nga no?’

²⁶Tapulara ki nga lii di, ’Higa ngati ddau raiwawa,’ meda'u di ri ddau lowe, rowi Yohanes do takke ri ro ta heddau nabi.”

²⁷Hakku ta bhale ke ri ro, ”Toi dho ri jhi.” Moko ta lii ke Yesus pa ro, ”Ki do mina harre, peke le dho ma ri Ya pa mu ta higa ngati nadu ne tao ri Ya lai do na hedhe hari-hari.”

²⁸”Pa dahra awe nadhe mina mii lii mu, jhara lai do nadhe?” ne ene Yesus ri. ”Ta era ke heddau ama do nga ana momone do dhue ddau. Ta kako ke ne ama do naanne la nga ana do mone-a'a ne jhe lii, ’Wo ana ya, kako ko we au la jhagga la dhoka ago lodho dhe.’

²⁹Ta bhale ke ri ana ne, ’Owe, ama, hane ta kako ke ya,’ tapulara wae dho no ta kako.

³⁰Moko ta kako ri ke ne ama ne la nga ana no do kedhue ne, jhe lii mii lii no ma pa do heddau ne. Ta bhale ke ri ana no do kedhue ne, ’Wae dho, ’Wae dho ya ta kako.’ Ta alla pe mina harre ta menyaha ke no jhe kako la jhagga.

³¹Nah, ngati telora do na hedhe, nami ne do pedute ne lua ddhei ama ro?” Ta bhale ke kattu-kattu mone tunu-menahu he nga kattu-kattu do Yahudi he, ”Ana do kedhue ne.” Ta bhale ke ri Yesus pa ro, ”Parahajha we mu: Mone hammi bhea nga mobanni do hala loro jhara kako ke do ta uru jhara ne jadhi ta ai-alla annu-niki Deo ngati mu hedhe.

³² Rowi ne dakka Yohanes mone Pejhiu ta ma pepeke pa mu ne loro jha ra Muri mada do maddhi pa Muri, maji lema ta mina harre wae dho mu ta parahajha nga lii ajha no; tapulara we mone hammi bhea nga mobanni do hala loro jhara kako he do parahajha ke pa No. Tapulara maji lema ta do ngaddi ke hari-hari ri mu, pee ma nga do dho i'a lari-anni ne penge mu jhe do dho parahajha pa Muri.”

³³ Ta lii ke Yesus, ”Dhanno we ne lipehakku do nadhe ri. Heddau mone rai, ta jhagga ke no kewue dhoka ago. Ta alla pemina harre ta petito ke ri no hewue leo jaga. Ta alla pemina harre ta pekehewe ke ri no pa ddau, jhe pekaddhi no la rai do hewala.

³⁴Ta dhai pa awe puu wue ago ta pepu ke ri mone dhoke ne, ne annu-niki no la nga mone jhangga-mone jhagga dhoka ago ne, ta la hammi ihi-rai.

³⁵Tapulara ri ddau-ddau do na harre ta kappa ke ne annu-niki he: Heddau kappe jhe dede, do wala he ri kappa jhe pemade, nga do wala he ri kajjhi ri wowadu.

³⁶Ta pepu ri ke ri mone dhoka ne, ne annu-niki no do rihi ae ri ngati do uru ne, tapulara hela'u we ne tao pa ro, mii do tao pa do uru he ma.

³⁷Pa pedakka rahi ta pepue ke ri mone dhoka ne, ne ana no do mone miha ne la nga ddau do na harre. Pa penge no, ’Do tatu ke ne ana ya dhe ta hamme nga woie ri ro.’

³⁸Tapulara we, ta dhai ta ngadde ri ddau-ddau do na harre ne ana mone dhoka ne, ta peli ke ro heddau nga heddau, ’No ke dhe ne ana mone hammi puhaka ne. Mai ma pemade ri di, mita ie ta bunu pa di ne unu-oha no dhe!’

³⁹Moko ta kappe ke ri ro, jhe nabhe la tele, jhe pemade ri ro.”

⁴⁰Ta kebhali ke Yesus, ”Nah, kinga dakka ne mone dhoka ne, ne nga ke ne do ta tao ri no pa ddau-ddau do na harre?”

⁴¹Ta bhale ke ri ro, ”Do teleo ke ta pemade ro hari-hari ri mone dhoka ne, jhe pekehewe ne dhoka ago ne pa ddau do wala, do wae ta ma'i ihi-rai pa no kinga dhai pa awe ma'i ihi-rai.”

⁴² Moko ta lii ke Yesus pa ro, ”Ngaddi de dho mu ta ajha ne do hure do bhuke pa dhara Buku Lidara-Likewahhu Deo? ’Ne wowadu do alle pehore-penabbhe ri tuka wowadu alla ke pejadhi ta wowadu kepue. Nadhe ke ne lua do tao ri Muri; do dhai tarra ne gaa nga merake no!’ ”

⁴³”Hakku henge we,” ane Yesus, ”hari-hari higa mii annu-niki Deo do ta bhete ngati mu jhe wie pa ddau do pedute ne lipereda Deo he. [

⁴⁴Ddau do bunu pa dhida wowadu do naanne do ta mae-tebho-ttei; jhe ne ddau do ta nappita kebii ri wowadu do naanne do medae ta kepanynyi-ranynyi-ranynyi.]”

⁴⁵Pa dhara nga dhanno ri kattu-kattu mone tunu-menahu he nga ri do Farisi he, ne lipehakku Yesus he, do toi ke ri ro ta do pedai jhara lua ro ri Yesus.

⁴⁶Ri do mina harre ke ta kale ke ri ro ne rujhara tu ta kappe Yesus. Tapulara do meda'u ro ri ddau lowe he, rowi ri ddau lowe he do takke Yesus ta heddau nabi.