Read Sabu MATIUS 22 Bible Online

MATIUS 22 - Sabu bible

MATIUS 22

¹Ta pedai lii ri ke Yesus nga ddau lowe he, nga pake lipehakku,

²mina hedhe ke ne ane No, ”Kinga dhai Deo ta pereda, ne lai ne mii lipehakku do nadhe ke: Heddau duae ta tao ke lai-ala peloko nga'a ana momone ngati no.

³Ta pepu ke ri no ne annu-niki no ta la pika pa tamu do alla pepedoa he ri duae do naanne la dhara lai-ala peloko nga'a do naanne. Tapulara bhule dho ro do wae ta kako.

⁴Ta alla harre ta pepu wari ke ri duae do naanne, ne annu-niki no do wala he ri, jhe lii no, ’Pika pa tamu do pedoa he: Do moko ke ne nga'a-nginu tu lai ala ne. Hapi nga nahapi ya do ta jhujhu he alla ke pekehabbha. Mai we la lai-ala peloko nga'a ne!’

⁵Tapulara ne tamu do pedoa he, bhule dho heddau he do era do pedhuli. Kako ro heddau-heddau la lua kako-kaddhi ro — era do kako la maa, era ri do kako la era jhagga ro;

⁶jhe ne do wala he ri, kappa ne annu-niki duae do naanne jhe dede ri ro pemade.

⁷Tarangngi ri duae ne ta do mina harre ne do jadhi pa annu-niki no he, moko ta bubu made ke no; ta pepu ke no do horodhadhu ta la pemade ne ddau do na harre hari-hari, jhe tunu pekappu ladu-ladu ne raekowa ro.

⁸Ta alla pemina harre, ta pedoa ke ri no ne annu-niki no he, jhe lii pa ro, ’Hee ke do moko ne lai-ala peloko nga'a ne, tapulara ne ddau do langu do pedoa he adho ke do jhamma ri.

⁹Pa awe nadhe dhangnge, kako we mu la rujhara-ae poro-mata, la pedoa we ri mu, henga we ne ae ddau do peabu nga mu pa ni, pedoa we ri mu ma lai-ala peloko nga'a do nadhe.’

¹⁰Moko ta kako ke ne annu-niki do na harre, la rujhara-ae poro-mata, la keworo hari-hari ddau do peabu nga ro pa ni, ddau do ie nga do apa. Moko tobo huke-huke ke ne era lai-ala peloko nga'a do naanne ri tamu he.

¹¹Ta alla pemina harre, ta maho ke ne duae ne, ta la heleo ne tamu he. Moko ke ri no heddau do dho pake bhara nnau lai-ala pa era do naanne.

¹²Ta kebhale ke ri duae ne pa ddau do naanne, ’Ihi-anga, ta nga au hakku mai ma dhe nga do dho pake bhara nnau lai-ala?’ I'a do dho ke lii nga-nga ri ne ddau do naanne.

¹³ Moko ta lii ke ne duae do naanne pa annu-niki no he, ’Ujhe ko ne ai ddau do nadhe, jhe nabhe no la tele, la era do kerabba ne. Pa ni ke ne do ta era ne litangi penina noho nga perajja-jaru ne.’ ”

¹⁴Moko ta tuu ne lipahakku do naanne, ta lii ke Yesus mina hedhe, ”Lowe ne ddau do pedoa, tapulara hudi we ne ddau do pidhi.”

¹⁵Ta alla pemina harre ta kako ke ne do Farisi he la pehela'u lii, mina mii ne loro jhara mita nara ri ro ta kappe Yesus, ri likebhali-likebhali ro.

¹⁶Moko ta pepu ke ri ro do parri ddau ne ddau pedutu ro hela'u-la'u nga ddau ti kejie Herodes la nga Yesus. Ta lii ke ne ddau do na harre pa Yesus, ”Ama Guru, ne toi ri jhi, Ama heddau do mola. Ajha ddau ri Ama nga peke mola mola jhara lua ddhei Deo nga ddau raiwawa, nga adho do pedhuli nga lua tada nadu we. Rowi adho Ama do ketarri worawwu ddau.

¹⁷Ri do mina harre ke, hakku ko Ama ta lii pa jhi; Pedutu nga uku aigama di, ie marra ta ma'i bhea pa Kehe we adho?”

¹⁸Do toi ri Yesus ne lua pedabbho ro do woapa he, hakku ta lii ke No, ”Wo ddau-ddau do pote do appi! Ta nga ke mu hakku mai ta ma pehii nga Ya!

¹⁹Hak ko ko ri mu ta pedhelo pa Ya, ne mada doi do pake ri mu ta ma'i bhea he!” Mo ko ta wie ke ri ro hemada doi mela pudi pa Yesus.

²⁰Ta kebhali ke Yesus pa ro, ”Worawwu nga ngara nadu nadhe?”

²¹”Worawwu Kehe,” ne bhale ri ro. Moko ta kii ke Yesus pa ro, ”Ki do mina harre ma, wie we pa Kehe ne nga ne do unu ri Kehe, jhe wie we pa Deo ma ne nga ne do unu ri Deo ma.”

²²Ta rangnge ri ro ne lipejhara Yesus do naanne, ta madalae ke ro. Moko ta langnge he ke ro ti nga Yesus.

²³ Pa lodho do naanne lema, era do parri ddau do Saduki do dakka la nga Yesus. Ro do na harre ngati kejie do nga lua tada ta do ne ddau do made he, adho ke do nara ri ta kaddhi bhale wari.

²⁴ ”Ama Guru,” ne ane ro, ”Pedutu nga liajha Musa do mina hedhe: Kinga made heddau momone, jhe adho do ngaddi ana, moko tuahhu no do jhamma ata banga-ammu nga mobanni ihi-ammu do made ne, mita do dho happo ne kolo loro tuahhu no do made ne.

²⁵Ngaddi ta era do piddau do pea'a-ari do pee pa dhe. Ta banga-ammu ke ne mone a'a ne, jhe made nga do dho ngaddi ana. Ne ihi-ammu do made ne ta aggo ke ri tuahhu no do kedhue ne,

²⁶moko ta made le ke ne tuahhu no do naanne nga do dho ngaddi ana, ta aggo ke ri do ketallu ne, tapulara made ri, mina harre ke pelohe hape la do kepidu ne.

²⁷Pedakka rahi made le ne mobanni do naanne.

²⁸Nah, ki dhai pa awe pekaddhi bhale wari hine, ne mobanni do naanne jadhi ta ihi-ammu nadu ke? Rowi ri hari do pidu ddau do alla ke pebanga-ammu nga no.”

²⁹Ta bhale ke ri Yesus pa ro, ”Dahi huli tarra mu hedhe, rowi tada dho mu ne lii Buku Lidara-likewahu Deo.

³⁰Rowi kinga dhai ke do made ta kaddhi bhale wari, adho ke ro do ta banga-ammu ri, tapulara do ta muri mada ke ro mii naju Deo pa era do mmau do megala ne.

³¹Ngaddi de dho mu ta ajha ne nga ne do pale ri Deo jhara lua pekaddhi bhale wari ddau do made? Ane Deo,

³² ’Ya ke dhe ne Deo Abraham, Deo Ishak nga Deo Yakub.’ Deo adho Deo ddau do made. No Deo ri ddau do muri!”

³³Ta rangngi ri ddau lowe he ne lipejhara Yesus ne, dhai madalae tarra ro ne jhara liajha No ne.

³⁴Ta rangngi ri do Farisi he, ta do ne do Saduki he, i'a dhoke lii nganga ri penaja nga Yesus, moko ta peowu ke ro.

³⁵ Ata era ke heddau ti telora ro, heddau guru aigama, do la hakko ta hie Yesus ri likebhali,

³⁶”Ama Guru, li pereda do nami ke ne do rihi ketutu pa dhara uku aigama di?”

³⁷ Ta bhale ke ri Yesus pa no, ”Ddhei we nga Deo Muri mu nga hewue nge danni-ade, nga hari-hari lua rui nga kedi mu, nga hari-hari uku nga mmau dhara mu.

³⁸Napoanne ke ne lipereda do ketutu nga do kerihi!

³⁹ Lipereda do kedhue, do hela'u we nga do petari ne: Hajha-ddhei we mu nga ddau nga ddau ihi anga hela'u le mii ddhei nga ngi'u mu miha.

⁴⁰Hari-hari uku aigama do wie ri Musa nga liajha hari-hari nabi do petitu pa dhue kewahhu lipereda do na poharre ke.”

⁴¹Pa dhara nga peowu ko ne do Farisi he paanne, ta kebhali ke Yesus pa ro,

⁴²”Mina mii pa dhara penge mu jhara lua Duae Mone ma'i-Mone golo ne? Kolo loro nadu ke No?” ”Kolo loro Daud,” ne bhale ri ro.

⁴³”Ki do mina harre ma,” ne kebhali Yesus pa ro, ”tanga hakku peteleo ri Henga Deo pa Daud, hakku tu ta pale ri no ne Duae Mone ma'i-Mone golo ne ta: ’Muri’? Rowi ne ane Daud,

⁴⁴ ’Ne lii Muri pa Muri ya: mejaddhi we au pa hebhakka kedhanga Ya, tade pepada ri Ya ne ihi-muhu ihi-lawa Au he la dhara kabha jhalla Au.’

⁴⁵Hakku ki ri Daud miha do pale ke ne Duae Mone ma'i-Mone golo ne ta ’Muri’, mina mii ri ke No ne nara ta pale ta kolo loro Daud?”

⁴⁶Bhule dho ke heddau heri do nara ta bhale ne likebhali Yesus ne. Jhe jhari rai ti awe naanne, bhule dho ke do bhani ri ta kebhali ne nga-nga pa Yesus.