Read Sabu MATIUS 23 Bible Online

MATIUS 23 - Sabu bible

MATIUS 23

¹Moko ta lii ke Yesus pa ddau lowe he, nga pa ana hekola No he,

²”Guru-guru aigama nga do Farisi, do nara higa ke ro ta dhahe ne lipereda Musa he.

³Rowi do mina harre ke, pedhanno we mu jhe pedutu hari-hari ne lipereda ro. Tapulara bhole tao dutu mu ne nga ne do tao ri ro, rowi ro adho do pekako penau nga liajha do ajha ri ro he.

⁴Ne do dhuki ri ro lai-lai do hedui, jhe wie ri ro ne rutie-rutatta do mejanni, tapulara adho ri ro do rabha do dharru ddau ta pekako ne lai do na harre ie ta hewuru he le.

⁵ Jhe nga hengaja ro ne pake dari-dari hebhajha do balla, jhe tao pehere-hereba ne wuijhalla juba ro!

⁶Do rihi ddhei ro nga era mejaddhi do rihi woie pa era-era lai-ala, nga kedera-kedera do dhai woie pa ammu-ammu hebhajha.

⁷Do dhai mengallu dhara ro kinga era ddau do pelangu ro pa paha-paha jhe ki pedoa ro ta ’Ama Guru’.

⁸Tapulara mu, bhole wae ta pedoa ta ’Ama Guru’, rowi ne Guru mu titu wata heddau we, jhe mu hari-hari do petuahhu.

⁹Jhe bhole pedoa ri mu ie ta heddau he pa danni raiwawa do nadhe ta ’Ama’, rowi titu wata heddau we ne Ama mu do era pa era do mmau do megala ne.

¹⁰Jhe bhole wae mu ie ta heddau he ta pedoa ta ’Kattu’, rowi wata heddau we ne Kattu unu mu, Duae Mone ma'i-Mone golo do jaje ri Deo ne.

¹¹ Ddau do jadhi ta kattu mone-ae pa telora mu, do jhamma ke no ta jadhi mone pemoko mu.

¹² Ddau do pedhida-anni do ta pewawe no, jhe ddau do pewawa-anni do ta pedhede no pedhida.”

¹³”Apa nga kerewe tu mu guru-guru aigama nga do Farisi! Mu hari-hari mone pekebhalli-anni. Mone labba ddau tu ta jadhi ai-alla annu-niki Deo. Jhe mu miha adho do wae ta jadhi ai-alla ngati annu-niki Deo, jhe ne ddau do era nga lua ddhei, labba ri mu.

¹⁴Apa nga kerewe tu mu guru-guru aigama nga do Farisi: Mu hari-hari mone pekebhalli-anni, pemodha-pekewarru ri mu ne unu-oha mobanni-moniki wue, jhe raba ri mu ne ammu nga kemali ro, nga mita herimu ne wui-ai mu do napoharre, ta hebhajha ke mu pekehero-rai. Ri do mina harre ke ne do tao ri mu do medae ke ta mejanni tarra ne lua wolo tu mu hine.

¹⁵Apa nga kerewe tu mu guru-guru aigama nga do Farisi! Mu mone pekebhalli anni! Dhai jjhau mu ne kako pagga llau, jhe bela ore rai, tu ta kale heddau ddau we mita ie no ta maho aigama mu. Jhe kinga maho ke no la dhara aigama mu, tao no ri mu ta jadhi ddau do ta ju la dhara lua wolo do peloro ne, jhe do dhue wari lipa ri ko ne rihi apa ngati mu miha!

¹⁶Apa nga kerewe tu mu mone kattau-mone kettau do bhaddu! Wie ri mu ne li ajha do mina hedhe, ’Kinga dhede ddau lihupa taga Ammu Deo, ddau napoanne adho do akke ri lihupa no ne, tapulara ki pehupa no taga mela-lara do era pa dhara Ammu Deo, ddau napoanne do ta akke ri lihupa no do naanne.’

¹⁷Mu ddau ddau do bhaddu jhe do bhodho ri! Nami ne do kerihi: Mela-lara ne we Ammu Deo do ri ammu do naanneke hakku tu ne mela-lara he ta mmau-ta megala?

¹⁸Do ajha lema ri mu mina hedhe, ’Kinga dhede hupa heddau taga dhea era tunu-menahu, ddau napoanne adho do akke ri lihupa no do naanne; tapulara we kinga dhe de no lihupa taga bhara tunu-menahu do era pa dhida dhea do naanne, moko do ta akke ke no ri lihupa no do naanne.’

¹⁹Dhai bhaddu tarra mu! Nami ne do ke rihi ne? Bhara tunu- menahu ne, we dhea era tunu-menahu ne, do ri dhea do naanne ke hakku tu ne bhara tunu-menahu he ta mmau-ta megala?

²⁰Ri do mina harre ke, kinga pehupa ke heddau taga dhea tunu-menahu, napoanne do hela'u ke ne kebhue ne nga bhara tunu-menahu do era pa dhida dhea do naanne.

²¹Jhe hari lema kinga dhede ke heddau lihupa taga Ammu Deo, napoanne ne pa petu ne do pehupa ke no taga Ammu Deo do naanne, jhe lema nga taga Deo do pee dhara ammu do naanne ke.

²² Jhe kinga era heddau do dhede hupa taga era do mmau do megala ne, napoanne do ne pa petu ne, do hupa taga kedera era mejaddhi Muri ke, rihi ri ti naanne do taga Deo do mejaddhi pa kedera do naanne lema ke.

²³ Apa nga kerewe ke tu mu guru-guru aigama nga do Farisi! Mu hedhe mone pekebhalli-anni. Wwau mangngi-wwau mangngi mii rumeda'a, wobhagi nga wokuede jhole ri mu bhagi henguru tu Deo. Tapulara lai do rihi ketutu pa dhara uku aigama, mii lua mola-mira, lua ruba dhara nga lua mappe nga mejhanni, awi ri mu la kejhunga. Do ne pa petu ne, lai-lai do na harre ke ne do jhamma ta tao ri mu, jhe adho lema do ta hani ne lai-lai do hewala he.

²⁴Mu hedhe kattu-kattu do bhaddu! Lara pa dhara bhara nginu mu petae ri mu, tapulara unta dalla-kedhoa ri mu!

²⁵Apa nga kerewe tu mu guru-guru aigama nga do Farisi! Mu hedhe mone pekebhalli-anni! Mago nga piri nga'a mu he, lonye ri mu pemmau-mmau jhara tele, tapulara ne jhara dhara ne do dhai ra'i, ri lai-lai lua tao apa nga lua nga'a mada dalla-kedhoa.

²⁶Farisi bhaddu! Lonye we pemmau-mmau jhara dhara ne mago nga piri mu he, mita mmau le ne jhara tele ne.

²⁷ Apa nga kerewe ke tu mu guru-guru aigama nga do Farisi! Mu mone pekebhalli-anni! Mu hedhe do dho hala ke mii raidare-raidare do joje ri tee do pudi, ngati tele do dhai woie, tapulara pa dhara ne do tobo ri rui do wwaudo bhakku.

²⁸Do mina harre ke mu! Ngati tele heleo ri ddau, dhai tarra ne woie; tapulara pa dhara mu do tobo-do huke ri lai-lai do pote do appi nga lua hihu nga pagga.”

²⁹”Apa nga kerewe ke tu guru-guru aigama nga do Farisi! Mu hedhe mone pekebhalli-anni! Alla ke ri mu pepetitu ne raidare-raidare do woie tu nabi-nabi, jhe pennau ri mu pegaa-pemerake ne tada-tada ngara ddau-ddau do woie he ne muri mada ro.

³⁰Jhe lii mu, ’Kita jhi he do muri mada pa dhara awe ama-appu jhi he, pa awe do uru he, wae dho jhi ta pedutu hela'u nga ro ta pemade ne nabi-nabi he.’

³¹Jhe mu do pika wari-anni ke, ta mu hedhe kolo loro ddau-ddau do pemade nabi-nabi.

³²Ki do mina harre ke, peterue we jhe pemoke we ne lubhu harro nga menyilu do alle pejhare ri ama-appu mu he!

³³Mu do apado kerewe jhe kolo loro ddau do apa do kerewe. Mina mii ri ko mu ne nara ta ludu ne ngi'u mu ngati dhara wolo pa era wolo do peloro ne?

³⁴Dhanno we pewoie-ie: Do ta pepu ri ya la nga mu ne nabi-nabi, nga ddau-ddau do mmau dhara, nga guru-guru; bhagi dhue ngati ro do ta pemade ri mu, jhe haghe ri do ta ketoe peabbha. Jhe era ri do wala he do ta dede ta merahhu ri mu pa ammu-ammu hebhajha, nga do wala he ri do ta hudhi ta peraga ri mu ngati hewue rae la hewue rae.

³⁵Rowi do mina harre ke, do medae ke mu ta wolo taga tari raa raa ddau do dho bhule nga hala do na harre — jhari rai ngati lua pemade Habel do dho bhule nga hala ne lohe hape ma lua pemade Zakaria ana Berekia do pemade ri mu pa telora Ammu Deo nga dhea era tunu-menahu ne.

³⁶Parahajha we mu: hari-hari ne napoharre do ta dhue ta hape ri ddau-ddau pa dhara awe nadhe ke.”

³⁷”Yerusalem, Yerusalem! Au ke ne do pemade nabi-nabi. Au ke ne do kajjhi ri wowadu tade made ne ddau-ddau pepu-peju Deo. Do parri wari ke ya pe ddhei ta wore-ta ngapi hari-hari ddau do pee pa dhara au, mii hengi'u rena manu he ne herimu-herugu ne ana-ana no ri rualla no, tapulara wae dho mu,.

³⁸Rowi do mina harre ke, wae dho ke Deo ta penau-pelere nga mu ri.

³⁹Mita toi ri mu: Jhari ngati awe nadhe, adho ke do ta ngadde Ya ri mu, tade dhai ri ta pale ri au, ’Lua bebu nga meragi tu no do dakka nga ngara Muri.’ ”