Read Sabu MATIUS 24 Bible Online

MATIUS 24 - Sabu bible

MATIUS 24

¹Pa dhara awe ta mahhu-anni Yesus ngati Ammu Deo, ta dakkake ne ana he kola No he, jhe pejhujhe ri ro ju la Ammu Deo.

²Ta lii ke Yesus pa ro, ”Ngaddi ri mu hari-hari ne do nahidhe? Mita toi ri mu, do medae hine ta do dho bhule le hewue wowadu he do pee nga pera'a pa era ro ngati Ammu Deo do na hidhe. Hari-hari hine do ta nyakka pekeloro.”

³Ta kako ke Yesus la Lede Zaitun, jhe pa dhara awe nga mejaddhi No, ta dakka ke ne ana hekola No he, jhe la pedai lii ro he we miha nga Yesus, ”Peke ko we pa jhi, parri ke medae ta jadhi ne hari-hari lai do na harre,” ne ane ro pa Yesus, ”Jhe ne nga ke ne telia-telia do ta peteleo ne jhara lua dakka Ama nga awe pedakka rahi raiwawa?”

⁴Ta bhale ke ri Yesus pa ro, ”Meniga we pewoie-ie, bhole luu mu nga hengi nga-nginga.

⁵Rowi ae ddou do medae ta dakka nga pake ngara Ya, jhe lii, ’Ya ke ne Duae Mone ma'i-Mone golo ne!’ Do medae ta ae ddau ne do pelu ri ro.

⁶Do ta rangngi ri mu ne likedu-kedarru lua pedhutu pemuhu nga lipelole jhara lua pepara-petabbhu, tapulara bhole meda'u mu. Rowi do jhamma ke ta jadhi hari-hari ne lai do na harre, tapulara ta mina harre lema adho dae awe pedakka rahi raiwawa.

⁷Ddau-rai do hewala do ta taki muhu nga ddau do hewala rai hewue rai pereda do ta dhutu muhu nga rai pereda do hewala. Pa hebhakka-hebhakka do ta jadhi lua menganga-rai nga dhai-ie.

⁸Hari-hari napoharre, lai petari he ko we, hela'u lema mii lua paddha dhallu pa heddau ina do ta kehoo dhara he.

⁹ Ki alla pemina harre, do medae mu ta kappa, jhe jhula tu ta dede ta merahhu jhe pemade. Hari hewue raiwawa do ta bubu nga kete nga mu taga tari mu ddau pedute Ya.

¹⁰Pa dhara awe naanne ae ddau do ta kebhatto ne ade ro, jhe tao apa nga takka-nui takka-bubu heddau penaja nga heddau.

¹¹Do ta hhau ae nabi-nabi do pote do appi jhe do ta peluu do jhajhi ae ddau.

¹²Wui ai-wui tao do woapa do ta menyabbha ke la hebhakka-hebhakka, hakku jhajhi ae ddau do muri mada nga do dho bhule lua pehajha-peddhei.

¹³ Tapulara ne ddau do makka tee nga wangnge, do ta hamme ne lua hela ma tona ie ne.

¹⁴Jhe Li Hagha Dhara jhara lua mina mii Deo ne medae ta pereda, do ta pelebe la hari he wue raiwawa, mita rangnge ri hari-hari ddau. Ki alla ke pemina harre, jhe itu dhai ne awe pedakka rahi raiwawa ne.”

¹⁵ ”Do ta ngadde ri mu, ’Lua tao apa do peapa-kerewe-rai ne’, do titu pa era do mmau do megala ne, mii do alle pepale ri Nabi Daniel (tu nadu we do ajhe ne nadhe do jhamma ta kale nga woie ne nga ne lua pedabbho ne).

¹⁶Pa dhara awe do naanne, ddau do era pa Yudea do jhamma ke ta perai la kolo lede.

¹⁷ Ddau do era pa danni ammu, bhole puru wari ta la aggu ne nga-nga ti dhara ammu.

¹⁸Ddau do pa dhara ma, bhole bhale wari la aggu juba no.

¹⁹Do dhai tarra ne meliri dhara pa lodho-lodho do napoharre pa mobanni do nga mejanni ihi, mina harre lema pa ina-ina do nga pehuhu ana.

²⁰Hebhajha we mu mita ie ne lai do naanne ta bhole jadhi pa dhara warru ajjhi-lai, kiadho mita do dho lakka pa Lodho Pengaha-ihi.

²¹ Pa lodho-lodho do dhai meliri dhara do mina harre, do ta era ne lua hedui-herui do dhai tarra ne hedui, hela'u lema mii lai do dho ngaddi dae ta jadhi rai tare ti petari-rai ta era raiwawa dhe lohe ma awe do nadhe, jhe adho lema ke do ta jadhi ri.

²²Kita do adho he ta penabhabhe ri Deo ne awe ne, moko do adho ke do ta era ri ie ta heddau he do muri mada. Tapulara we taga tari do henge ri Deo ne annu-niki No, moko ta pe nabhabhe ke ri Deo ne awe do napoanne.

²³Pa dhara awe naanne, ki era heddau do lii pa mu, ’Heleo we, ne Duae Mone ma'i-Mone golo ne, ne pa dhe No!’ kiadho, ’Nnai pa ni No!’ — bhole wae mu ta parahajha nga lii ddau do na harre.

²⁴Rowi do ta hhau ne mone ma'i-mone golo do pote-do appi nga nabi-nabi do pote-do appi. Do ta tao ri ro ne lai-lai do rihi ngati ihi nga lua madalae-lua madalae tu ta pelu ddau ki nga ie mudhe he mita luu le ne annu-niki Deo he.

²⁵Hakku penge ie we ri mu! Alla ke ri Ya pepika pa mu hari alle, nga do dho dhai dae ta jadhi ne lai-lai do na harre.

²⁶ Kinga lii ddau pa mu, ’Heleo we, nnai ke No pa dhara kebhalla-ae!’ — bhole kako mu la ni. Kiadho, ki lii ro, ’Heleo ko, ne ke No pehuni-anni pa dhara kama pa dhe!’ — bhole parahajha mu.

²⁷Rowi ne lua dakka Ana Ddau Raiwawa do mii kehabbha weo bhela he ngati bira dimu pelohe la bira wa.

²⁸ Rowi pa mii we ne era bhada made, paanne ke gaga nga luji-ae ne peworo.”

²⁹ ”Rajja dho ke, ki ludu ke ne awe hedui-herui do naanne, mada lodho do ta kerabba, jhe mada warru adho ke do ta kelala ri. Moto-moto do ta keloro ngati ihi liru, nga hari-hari do nga higa pa ihi liru do ta kenyawu-nyela.

³⁰ Ki alla ke pemina harre ne telia jhara Ana Ddau Raiwawa do ta ngadde ke pa ihi liru. Pa dhara awe naanne hari-hari ddau pa danni raiwawa do ta tangi. Do ta ngadde ke ri ro Ana Ddau Raiwawa, do dakka jhara kolo merammu pudi nga lua higa nga kuaha, lua weo nga kana do dhai kelodo.

³¹Do ta tio ke pekedarro ne wotabbe-ae ne, jhe Ana Ddau Raiwawa do ta lii pa naju-naju No ta la pe kupu ne annu-niki No ngati hari appa kebhihu raiwawa, rai ti hebhakka kepue liru la hebhakka kepue liru do wala.”

³²”Aggu ko mu liajha ngati kepue kepallu. Ki dhai ke ta obho ne kolo no, napoanne telia ke tu mu ta do ta hedhape ke ne warru wadu.

³³Mina harre kinga ngaddi ta do jadhi ke ne lai-lai do na harre ri mu, ta toi ke ri mu ta do hedarra ke ne awe ne.

³⁴Mita toi rowi mu! Hari-hari lai do na harre do ta jadhi nga do dho made dae hari-hari ne ddau do era pa awe nadhe.

³⁵Liru nga raiwawa do ta ele, tapulara lipedai Ya do nadhe do peloro lohe la lodho do nami mii ne.”

³⁶”Bhule dho heddau he do toi ne lodho do nami nga ja do nami, ie ta naju naju Deo, hape ma Ana Deo le miha, wata ke Ama we miha, ne do toi.

³⁷ Kinga dhai ke Ana Ddau Raiwawa ta dakka hine, ne lua dakka No do dho hala ke mii pa dhara awe Noh do uru he.

³⁸Pa lodho-lodho nga do dho lale dae dahi, ddau ddau nga'a-nginu nga banga-ammu. Mina harre ke lohe hape ma awe maho ne Noh la dhara kapa ne.

³⁹ Pa awe lale ne ei-waa ne, jhe lale la kebii ro hari-hari, jhe itu kebhaddi ro, ta ne nga ne do ta hedhape ri ro. Mina harre lema ke hine ne lua dakka Ana Ddau Raiwawa.

⁴⁰Pa awe napoanne, do dhue ddau do pa dhara nga ko'o maa: Heddau do ta aggo jhe heddau ri do ta hane.

⁴¹Do dhue ddau mobanni do pa dhara geho gandum: Heddau do ta aggo, jhe heddau ri do ta hane.

⁴²Hakku meniga we pewoie-ie, rowi do dho toi ri mu ta parri ne awe dakka Muri mu.

⁴³ Henge we ne nadhe ri mu! Kita do toi he ri mone muri ammu, awe nami pa dhara anni-maddha ne dakka do mena'o, adho ke no do ta bba'i, mita do dho maho ne do mena'o ne la dhara ammu no.

⁴⁴Rowi do mina harre ke, do jhamma ke mu, ta pemoko-moko-anni. Rowi Ana Ddau Raiwawa, do ta dakka pa dhara awe do dho toi ri mu.”

⁴⁵Ta lii ri ke Yesus, ”Ki do mina harre, annu nami ke do pedhanno nga do mmau-dhara? No ke ne do ta dhede ri muri no ta jadhi kattu annu-annu no do wala he, mita ie ri no ta wie nga'a tu ro pa awe do petatu ne.

⁴⁶Dhai tarra ne mengallu dhara ne annu do naanne, kinga bhale ne muri no, jhe do era no pa dhara pekako ne tenge no.

⁴⁷Parahajha we mu, ri muri no do naanne, do ta jhula ke pa no hari-hari ne unu-oha muri no ne tu ta pemoko ri no.

⁴⁸Tapu lara we, ki do apa ne naannu do naanne, do taa lii no pa dhara ade no miha,

⁴⁹’Do tui ko jhe itu dakka muri ya, moko ta dede ta merahhu ke ri no ne annu-annu do wala he, jhe kako no la nga'a-nginu nga ddau-ddau do nginu mawo he.

⁵⁰Jhe moko ne muri no ne ta bhale pa awe do dho e'e-do dho toi ri no.

⁵¹Moko ne naannu do naanne, do ta dede ri muri no tade hetenga made nga muri, jhe nabhe la era ddau-ddau do apa do kerewe he. Do ta tangi ke ro pedihi noho nga dhui hape hedui-herui pa era do naanne.’ ”