Read Sabu MATIUS 26 Bible Online

MATIUS 26 - Sabu bible

MATIUS 26

¹Ta moko Yesus na ajha hari-hari lai do na harre, ta lii ke No pa ana hekola No he,

² ”Do toi ke ri mu ma, dae dhue lodho ke jhe dhai la lodho Nga'a Kewahhu Paskah ne, jhe Ana Ddau Raiwawa do ta jhole ru ta la ketoe-peabbha-rappa!”

³Pa awe naanne, kattu-kattu mone tunu-menahu he nga kattu-kattu do Yahudi he do peowu pa dhara rae Kattu Mone-ae mone tunu-menahu Kayafas.

⁴Peowu ro ta peli ta kappe dhara-dhara he we Yesus mita do dho bhule lua kenya'e nga buluru, jhe pemade No.

⁵”Tapulara,” ne ane ro, ”Bhole jhagge ne lai do nadhe pa dhara awe nga nga'a kewahhu dhe, rowi do ta hhau ne lua kenya'u-buluru pa telora ddau-rai.”

⁶Pa awe Yesus pa Betani, pa ammu Simon, do uru he do lakka ri paddha nada to,

⁷ ta dakka ke heddau mobanni la nga Yesus. Pa dhara nga mejaddhi ta nga'a Yesus, ta la tude ke ri eiloko wwau mangngi pa wokolo Yesus ri mobanni do naanne.

⁸Ne lai do naanne do heleo ri ana hekola Yesus he. Dhai bubu dha ra ro, ta lii ke ro, ”Ne nga ke ne guna ne na hedhe hari-hari, kinga dhutu liba ila mina hedhe?”

⁹”Eiloko wwau mangngi do mina hedhe, do nara ta pewie nga kebhue do dhai dhida, jhe ne kebhue ne do nara ta wie pa ddau do kehia nga gahara!”

¹⁰Do toi ri Yesus ne nga ne do era pa dhara penge ro, moko ta lii ke Yesus pa ro. Ta nga hakku pehedue ri mu ne mobanni do nadhe? Ne do tao ri no dhe, hahhi lai do woie tu Ya.

¹¹ Ddau do kehia nga gahara do era loro ma pa telora mu, tapulara Ya dhe, adho ke do ta era loro hela'u-la'u nga mu ri.

¹²Rowi ri lua tude ri eiloko wwau mangngi ri mobanni do nadhe ma wokolo Ya, nnau ta mii lua pemoke ne lua pedane Ya ke ri No.

¹³Parahajha we mu! Pa hari hewue raiwawa dhe, pa mii we ne Li Hagha Dhara do ngati Deo ne pelebe, lai do tao ri mobanni do nadhe do ta pedhire lema, mii hahhi lua ta pehewene jhara lua no.”

¹⁴Moko heddau ngati telora henguru do dhue ddau ana hekola Yesus, ne ngara no Yudas Iskariot, ta kako ke no la nga kattu-kattu mone tunu-menahu he.

¹⁵ Ta lii ke Yudas pa ro, ”Wie ne nga ya ri mu, ki jhole Yesus ri ya pa mu?” Moko ta kire ke ri ro tallu nguru mada doi mela pudi, jhe wie ne doi do na harre pa Yudas.

¹⁶Jhari rai ti awe naanne ta kale ke ne awe do woie ri Yudas tu ta jhole Yesus.

¹⁷Pa lodho petari pa dhara awe nga'a Kewahhu Roti do dho tao ri muu ne, ta dakka ke ne ana hekola Yesus la nga Yesus. Ta kebhali ke ro, ”Pa mii ke ne ddhei Ama, ta pemoke ri jhi ne era tu ta nga'a Paskah ne?”

¹⁸Ta bhale ke ri Yesus pa ro, ”Kako we mu la nga heddau ddau do pa dhara rae, jhe lii pa no, ’Ane Ama Guru, dhai ke ne awe tu Ya, pa dhara ammu au ke ne ddhei Ya ta tao ne nga'a Kewahhu Paskah ne hela'u-la'u nga ana hekola Ya he.’ ”

¹⁹Ta pedute ke ri ana hekola Yesus he ne nga ne do lii Yesus pa ro. Ta kako ro la pemoke ne era tu nga'a Paskah ne.

²⁰Ta dhai ta maddha, Yesus nga hari henguru do dhue ana hekola No he ta mejaddhi ke ro ta nga'a.

²¹Pa dhara nga nga'a ro ta lii ke Yesus, ”Dhanno ko ri mu, heddau ti telora mu do medae ta jhole Ya.”

²²Ta rangnge ne naanne, dhai hedui ne ade ro hari-hari. Moko heddau alla heddau ta jhari ke ta kebhali pa Yesus, ”Bhara tatu ta adho ya ne do pedabbo ri Ama ne?”

²³ Ta bhale ke ri Yesus pa ro, ”Ddau do pehabbhu roti hela'u-la'u nga Ya la dhara mgo ne, no ke ne do ta jhole Ya ne.

²⁴Do tarra ma, Ana Ddau Raiwawa do ta made, mii do hure do bhuke pa dhara Buku Lidara-Likewahhu Deo. Tapulara we apa nga kerewe ne tu ddau do jhole Ana Ddau Raiwawa. Rihi ie no ta do dho metana ma danni raiwawa nadhe.”

²⁵Moko ta lii ke Yudas mone tao apa ne, ”Bhara tatu ta adho ya ne do pedabbho ri Ama Guru ne?” Bhale ri Yesus, ”Mina harre ke ne ane au ma!”

²⁶Pa dhara awe nga nga'a he ro, ta aggo ke ri Yesus ne roti ne, jhe hebhajha No. Ta alla pemina harre, ta pipi ke ri No ne roti do naanne, jhe jhula ri No pa ana hekola No he, jhe lii, ”Aggu we, jhe nga'a we; na dhe ke ne kebhue-kedalli Ya.”

²⁷Ta alla pemina harre ta aggo ke ri No hegelaa ne ago ne jhe hebhajha No pa Deo. Ta alla pemina harre ta jhole ke ri No pa ana hekola No he, jhe lii No, ”Nginu we ri mu hari-hari.

²⁸ Rowi nadhe ke ne raa Ya do ta perue ne lijaji Deo ne.

²⁹Ne li Ya pa mu, adho ke Ya do ta nginu ri ei-ago lohe la awe ngino ri Ya ne ei-ago do wiu ne hela'u-la'u nga mu pa dhara Raiwawa Ama Ya do wowiu ne.”

³⁰Ta alla pemina harre ta jhuka lodho ke ro, hewue lilodho liwue-waje. Ta alla pemina harre ta pekaddhi ke ro ju la Lede Zaitun.

³¹ Moko ta lii ke Yesus pa ana hekola No he, ”Pa dhara rammi do nadhe, do ta perai mu hari-hari jhe hane Ya miha; rowi do hure do bhuke pa dhara Buku Lidara-Likewahhu Deo, ’Do ta pemade ri Ya ne mone bhata ne, jhe ne naki'i-naki'i no do ta menyabbha kebali-bali.’

³² Tapulara we ki alla ke Ya pekaddhi bhale wari do ta uru jhara Ya ngati mu la Galilea.”

³³Ta lii ke Petrus pa Yesus, ”Maji lema ro hari-hari ta hane Ama, ya adho tu-tu!”

³⁴”Henge,” ane Yesus pa no, ”Pa dhara rammi na dhe dhangnge, nga do dho tutu-oo dae manu, alle ke Ya pepehile ri au tallu wari.”

³⁵Bhale ri Petrus, ”Maji lema ya ta made hela'u-la'u nga Ama, medae dho ya ta lii ta do dho tade Ama ri ya!” Mina harre lema ne ane ana hekola do wala he.

³⁶Ta alla pemina harre ta pekaddhi ke Yesus nga ana hekola No he la hahhi era, ne ngara era do naanne Getsemani. Pa ni ta lii ke Yesus pa ana hekola No he, ”Mejaddhi we mu pa dhe, ta la hebhajha ko Ya.”

³⁷Moko ta tina ke ri No, Petrus nga hari do dhue ana Zebedeus he ta penau hela'u nga No. Ta jhari ta herimo ke No ri hedui nga penina noho.

³⁸Ta lii ke Yesus pa ro, ”Ne ade Ya ne ke do dhai tarra ne hedui, mii do ta made he ke Ya ne worawwu. Pee ko we mu pa dhe, jhe jaga-jaga we hela'u nga Ya.”

³⁹Ta alla pemina harre ta kako ke Yesus hudi ju la hedhapa, moko ta lakku rutu ke No la worai, jhe hebhajha, ”Ama”, ane No, ”kinga ie mudhe he, pejjho ko we ngati Ya ne lua hedui-herui do jhamma ta dhue ta hape ri Ya dhe. Tapulara we, bhole pedute ne lua ddhei Ya, jadhi we pedute nga lua ddhei Ama ma.”

⁴⁰Ta alla pemina harre, ta bhale ke Yesus nga ana hekola No do tallu ddau he, ta dhai No, era do bba'i ro. Ta lii ke Yesus pa Petrus, ”Makka le dho mu hari do tallu ta jaga hela'u nga Ya, ie ta hejaa he we?

⁴¹Jaga-jaga we, mido dho lakka mu ri ruhakku. Tarra ne ade mu do ddhei ta tao ne do petu, tapulara makka dho mu, rowi wue ddau raiwawa do keloe.”

⁴²Ta kako ri ke Yesus la hebhajha, ane No, ”Ama, kinga ne lua hedui-herui do nadhe do jhamma ke ta dhue ta hape ri Ya, jhe do adho ke do nara ta pejjho wari ngati Ya, la'a we no ta jadhi ma pedute nga lua ddehi Ama.”

⁴³Ta alla pemina harre, ta bhale ri ke Yesus, jhe ngaddi ri No ne ana hekola No he era do bba'i ma, rowi do dhai mengattu tarra ke ro.

⁴⁴Ta hani ke ro ri Yesus, jhe bhale No la hebhajha tu pa do ketallu wari ne nga pale ri No ne lipali No ma do hela'u nga do uru ne.

⁴⁵Ta alla pemina harre, ta bhale ke No la nga ana heloka No he, jhe lii, ”He ko ma mu do bba'i nga pengaha-ihi? Heleo we, dhai ke ne awe tu Ana Ddau Raiwawa ta jhole la dhara higa ddau-ddau do tao lubhu harro nga menyilu.

⁴⁶Kaddhi we, mai we di ma kako ngati dhe. Heleo we! Nee ke ne ddau do ta jhole Ya ne!”

⁴⁷Pa dhara nga pedai lii ko Yesus, Yudas heddau ti telora henguru do dhue ana hekola Yesus he, ta dakka ke. Ae ddau do dakka penau hela'u nga no, do nga aggu kelewa nga tubu. Ne ddau do na harre, do pepu ri kattu-kattu mone tunu-menahu nga kattu-kattu do Yahudi he.

⁴⁸Ri mone tao apa ne do alle ke pewie ne tada do nadhe, ”Ddau do hengaddho ri ya ne, No ke dhe bhoke. Kappe we No ri mu!”

⁴⁹Ta dhai dhangnge Yudas la era do naanne, ta kako dhangnge ke Yudas langa Yesus jhe lii no, ”Helama, Ama Guru!” jhe hengaddho Yesus ri no.

⁵⁰Ta bhale ke ri Yesus, ”Tuahhu, ta ma mii ke hakku dakka tuahhu ma dhe?” Ta alla pemina harre ta duli ke ne ddau lowe he, jhe kappe Yesus.

⁵¹Heddau ri telora ana hekola Yesus do era pa anne, ta bhita kelewa ke, jhe pare pa heddau annu Kattu Mone-ae mone tunu-menahu tade happo ne wodilu no.

⁵²Ta lii ke Yesus pa ana hekola No do naanne, ”Hope kebhali ne kelewa au do napoanne. Rowi hari-hari ddau do pemanga kelewa, do ta made ri kelewa ma.

⁵³Ne penge ri au ta dho nara Ya ta ami rurabha-rudharru ngati Ama Ya, jhe nga henginga ne moa ri No henguru dhue tajji naju No?

⁵⁴Tapulara ki do mina harre ke mina mii ne nara ta jadhi ne nga ne do alle pepedare pa dhara Buku Lidara-Likewahhu Deo, ta do tarra ta tade jadhi ne lai mii do jadhi pa dhara awe nadhe?”

⁵⁵ Moko ta lii ke Yesus pa ddau lowe he, ”Pa dhara penge mu, ta ddau do tao apa ke Ya dhe, hakku dakka mu nga aggu kelewa nga tubu tu ta ma kappe Ya? Helodho-helodho ma Ya ne wie liajha pa Ammu Deo, jhe pi'a dho mu ta kappe Ya!

⁵⁶Tapulara do tarra, do jhamma ke ta mina harre ma, mita tobo ke ne nga ne do hure do bhuke ri nabi-nabi pa dhara Buku Lidara-likewahhu Deo.” Ta alla pemina harre ta perai ke ne ana hekola Yesus he, jhe hane Yesus miha ri ro.

⁵⁷Ta alle Yesus pekappe ri ddau do na harre, ta aggo ke ri ro la ammu Kattu Mone-ae mone tunu-menahu Kayafas. Pa ni do teni ke no guru-guru aigama nga kattu-kattu do Yahudi he.

⁵⁸Petrus do pee ma nga pedute Yesus ngati jjhau tade dhai la kebhalla ammu Kayafas. Moko ta maho ke no lakebhalla do naanne, jhe la mejaddhi hela'u nga mone jaga he. Do ddhei ta roi ri Petrus mina mii ne pedakka ngati hari-hari do na harre.

⁵⁹Kattu-kattu mone tunu-menahu he nga hari-hari kattu Mone Happo Hala pa dhara Aigama he, pee ke ro nga petadi ta kale lilolo pote, mita nara ro ne rujhara ta pebune lua wolo made pa Yesus.

⁶⁰Tapulara nara dho ro, ie ta hahhi lai he do nara ta peteleo ta do era Yesus nga hala, maji lema ta ae ne lilolo hakaki do pote he. Moko ta era ke do maju la hedhapa.

⁶¹ Ta lii ke ro mina hedhe, ”Ddau nadhe do ngaddi ta lii mi na hedhe, ’Do nara ri ya ta pekelole Ammu Deo, jhe pa dhara tallu lodho nara ta petito bhale wari ri ya.’ ”

⁶²Moko ta titu ke Kayafas, jhe lii no pa Yesus, ”Wae dho ri au ta bhale ne lilolo do penaja nga au do ne hidhe?”

⁶³Tapulara ta pehangngo-anni we Yesus. Ta kebhale ri ke Kayafas pa Yesus, ”Pa dhara ngara Deo do Muri ne, lii ko au pa jhi, au ke ne Duae Mone ma'i-Mone golo, Ana Deo ne?”

⁶⁴ Ta bhale ke ri Yesus, ”Mina harre ke ne ane au ma. Tapulara, parahajha we, jhari ngati awe do nadhe do ta ngadde ke ri mu, Ana Ddau Raiwawa do ta mejaddhi pa hebhakka kedhanga Deo Do Mone Rihi Higa ne, jhe do ta dakka jhara merammu pudi pa ihi liru nidhe!”

⁶⁵ Moko ta hio kepale-pale ke ri Kayafas ne bhara pake no, jhe lii, ”No do kare-menihe Deo! Tenge dho ke ta era ri hakahi. Do rangnge miha ke ri mu, hari-hari ne lipedai No, ta do ri No dhe do kare menihe Deo.

⁶⁶Hakku mina mii ke ne pa dhara dhahi mu pa awe nadhe?” Ta bhale ke ri ro, ”Do hala No, jhe do jhamma No ta pemade.”

⁶⁷ Moko ta hebue ke ri ilu ne tanga mada Yesus ri ro, jhe dede jhe merahho Yesus ri ro. Era lema do tabbhe ne tanga mada No,

⁶⁸jhe lii, ”Hakko ko ta peere jhe peke pa jhi, woo Duae Mone ma'i-Mone golo! Nadu ne do tabbhe tanga mada Au dhe?”

⁶⁹Petrus era do mejaddhi pa tele, pa kebhalla ammu ne ma. Ta dakka ke heddau annu mobanni la nga Petrus, jhe lii pa no, ”Adho au lema dhe do hela'u-la'u nga Yesus do Galelia nidhe?”

⁷⁰Tapulara ta pehile ke Yesus ri Petrus, pa hedhapa hari-hari ddau do era ra paanne, ”Tada dho ya ne nga ne lua pedabbho au ne,” bhale ri Petrus, jhe ka ko no la ubha toka kebhalla do naanne.

⁷¹Ta ngadde ri ke Petrus ri heddau annu mobanni do wala ri, jhe lii pa ddau-ddau do era paanne, ”Ddau nadhe lema ngine ne do era hela'u-la'u nga Yesus do ngati Nazaret ne.”

⁷²Moko ta pehili ri ke Petrus jhe pehupa, ”Tarra-tarra tade dho ri ya ne ddau do na nidhe!” ane Petrus.

⁷³Rajja dho ngati naanne, ne ddau-ddau do titu paanne ta kako ke la nga Petrus, jhe lii ro pa Petrus, ”Do tarra ma au dhe heddau ti telora ro. Lai nadhe do teleo ngati alu lipedai au ma miha.”

⁷⁴Moko ta hupa-hupa wari-anni ke Petrus, jhe lii, ”Tade tu-tu dho ri ya ne ddau do na nidhe!” Pa awe naanne dhangnge ta tutu-oo ke manu.

⁷⁵Ta henge ke ri Petrus, ta do alla ke Yesus pe lii pa no, ”Nga do dho tu tu-oo manu, alle ke Ya pepehile ri au tade tallu wari.” Moko ta mahhu-anni ke Petrus la tele jhe la tangi nga pedihi-noho.