Read Sabu MATIUS 27 Bible Online

MATIUS 27 - Sabu bible

MATIUS 27

¹Pa rai jhammi-ae-ae, hari-hari ne kattu-kattu mone tunu-menahu he nga kattu-kattu do Yahudi he, ta tao ke ro ne lihappo ta pemade Yesus.

²Ta ujhe Yesus ri ro, jhe aggo la jhole pa Pilatus, Gubernur Mone Pereda Roma.

³ Ta ngadde ri Yudas mone tao apa ne, ta do alle ke pepebune ne lua wolo pa Yesus, moko ta menyaha ke no. Moko ta la pebhale ke ri no hari tallu nguru mada doi mela pudi he, pa kattu-kattu mone-tunu menahu he.

⁴Ta lii ke Yudas, ”Alla ke ya petao lua apa nga kerewe pa ddau do dho bhule nga hala, hakku tade lakka No ri wolo ta pemade!” Tapulara ta bhale ke ri kattu-kattu mone tunu-menahu he nga kattu-kattu do Yahudi he, ”I'a dhoke jhi, napoanne unu pala au ke miha.”

⁵Ta nabbha ke ri Yudas ne doi do na harre la dhara Ammu Deo, jhe kako no la akki-anni.

⁶Ta pidhi ke ri kattu-kattu mone tunu-menahu he ne doi do na harre, jhe lii ro, ”Doi na hedhe, doi kebhue raa. Pedutu nga uku aigama, doi do mina hedhe, nara dho ta pemaho la dhara era takka bhara jhula pa Ammu Deo.”

⁷Ta moko le ro ne pehela'u-lii, ta pake ke ri ro ne doi do na harre ta walli worai jhe pehune ne worai do naanne ta: Worai Mone Mahhi Arru. Ne worai do naanne, do pake ta raidare ngati ddau do wala rai.

⁸Taga tari do mina harre ke hakku lohe ma dhara lodho do nadhe ne worai do naanne do pehune ta: ”Rai Raa”.

⁹ Ri do mina harre ke, tobo ke ne nga nedo pale ri Nabi Yermia, ”Ta hamme ke ri no ne doi mela pudi do tallu nguru mada ne, dhoi kebhue ngati lua hela'u-lii do Israel, mii lua ma'e kebhue No.

¹⁰Jhe ne doi do na harre ta pake ke ri ro tu ta walli Worai Mone Mahhi Arru, mii do pale ri Muri pa ya.”

¹¹Ta dhai Yesus la hedhapa Pilatus, gubernur pa rai do naanne, moko ta ke bhali ke no pa Yesus, ”Au ke ne duae do Yahudi ne?” ”Mina harre ke ne lii au ma,” bhale ri Yesus.

¹²Kattu-kattu mone tunu-menahu he nga kattu do Yahudi he, jhajhi ae ne likela ne do pemaho ri ro panaja nga Yesus, tapulara wae dho ta bhale ri Yesus ie ta heubha he.

¹³Rowi do mina harre ke, moko ta lii ke Pilatus pa Yesus, ”Rangngi dho ri Au, hari-hari ne likela ro hidhe penaja nga Au?”

¹⁴Tapulara bhale dho ri Yesus ie ta heubha he, hakku jadhi ta madalae we Pilatus.

¹⁵Hadhi dhai la awe nga'a Kewahhu Paskah, do tima mone pereda ta golo heddau do bhaddo pedutu nga lua ddhei ddau lowe.

¹⁶Pa awe naanne do era heddau do bhaddo do dhai keto ngara. Ne ngara no Yesus Barabas.

¹⁷Hakku pa dhara awe nga teni ke ne ddau lowe, ta kebhali ke Pilatus pa ro, ”Nadu ne do dhei mu ta gole tu mu? Barabas we Yesus do pale lema ta Kristus ne?”

¹⁸Hakku lii Pilatus mina harre rowi do toi ke ri no, ta do ne jhole Yesus pa no ri kattu-kattu do Yahudi he taga tari do pana dhara ke ro nga Yesus.

¹⁹Pa dhara nga mejaddhi Pilatus pa era happo kewallu ne, ta moa litakka ke ne ihi-ammu Pilatus ne, nga lii mina hedhe pa Pilatus, ”Bhole pehiwu lai ma au pa dhara kewallu ddau do dho bhule nga hala napoanne, rowi taga No, do peabu ya nga lua nii do meliri dhara pa lodho dhe.”

²⁰Tapulara ri kattu-kattu do Yahudi he, pee nga pedidi loro ne ddau lowe he mita lii ta gole Barabas pa Pilatus, jhe wole Yesus.

²¹Moko ri mone pereda do naanne ta kebhali ke pa ddau lowe he, ”Ngati do dhue ddau do na hedhe, nadu ne do ddhei mu ta gole ri ya tu mu?” ”Barabas,” ne bhale ri ro.

²²Ta kebhali ri ke Pilatus pa ro, ”Ki do mina harre ma, ne nga ke ne do jhamma ta tao ri ya penaja nga Yesus do pale ta Kristus ne?” ”Ketoe No peabbha-rappa!” ne bhale ri ddau lowe he hari-hari.

²³”Tapulara lua tao apa ne nga ke ne do tao ri No?” ne kebhali Pilatus ri pa ro. Moko ta peka ke ro do rihi maddu, ”Ketoe peabbha-rapa No!”

²⁴ Pa pedakka rahi toi ke ri Pilatus, ta do dho nara ke no ta tao nga-nga ri, jhe nga penge ke ri no, jaga ngeta tao lua kenya'u-buluru ne ddau lowe he ta pelawa nga do pereda. Ri do mina harre ke, ta aggu eiloko ke Pilatus, jhe lonye ri no ne ruai no pa hedhapa ddau lowe he, jhe lii no, ”Do ludu nga ti kolo gunu ya ne jhara lua made ddau do nadhe. Lai napoanne jadhi ta bhara dhui-bhara hape mu ma miha!”

²⁵Ta bhale ke ri hari-hari ddau lowe he, ”Hane no pedhue-pehape ri jhi ma nga ana-oha jhi ne lua wolo taga ri Lua Made ddau do napoanne!”

²⁶Moko ta gole ke Barabas ri Pilatus tu ddau lowe he, jhe lii no pa ddau he ta dede ta merahho Yesus ri gui. Ta jhole ke Yesus ri Pilatus ta la ketoe peabbha rappa.

²⁷Ta alla pemina harre ta aggo ke Yesus ri do horodhadhu he la dhara rae Pilatus. Hari-hari ne do horodhadhu he ta pewore pekehero ke Yesus.

²⁸Ta boka ke ri ro ne bhara pake Yesus, jhe pepake ri ro pa No hewue juba do woawu-kelere-mea.

²⁹Ta tao ke ro hewue labba ngati kelai-kelai ajhu do dudu-do kanna jhe petaddho pa wokolo Yesus. Ta alla pemina harre ta peparro ke ri ro hebhangngu kajji pa ruai kedhanga No, jhe lakku rutu ro pa hedhapa No, jhe mare-jhe dhole No. ”Helama Duae Do Yahudi!” ne ane ro.

³⁰Ta hebue ke ri ilu Yesus ri ro, jhe rabe ne kajji ne, jhe liko petire-tire pa kattu Yesus.

³¹Ta alle pepemange mina harre Yesus ri ro, ta boke ke ri ro ne juba do wo awu kelara mea ne, jhe pepake wari ne bhara Yesus ma miha. Ta alla pemina harre ta aggo ke No la tele tu ta la ketoe peabbha-rappa.

³²Pa telora rujhara ta peabu ke ro nga heddau ti Kirene ne ngara no Simon. Ta pehahhe ke ri ro ne ddau naanne, ta hape ne ajhu ketoe Yesus ne.

³³Ta alla pemina harre, ta dhai ke ro la hahhi era do pehune ta Golgota, ki pa lirai di, ”Era Rui Kabha Kattu.”

³⁴ Pa anne, ta pengino ke Yesus ri ro eiago do pehiwo nga ei-addhu. Tapulara ta alle peketaddhe ri Yesus, wae dho ke ta ngino ri No.

³⁵ Ta alla pemina harre ta ketoe ke Yesus ri ropeabbha-rappa, jhe pebhagi-bhagi ri ro ne bhara pake No.

³⁶Ta moko mina harre ta mejaddhi ke ro ta jage Yesus pa anne.

³⁷Pa bira dhida ngati wokolo Yesus, era do bhuke ri ro ne lipedai do nadhe: ”Nadhe ke Yesus Duae do Yahudi ne.” Lipedai do nadhe ne mii hahhi lipeanynye Yesus ke.”

³⁸Hela'u-la'u nga Yesus, era lema do dhue ddau mone raba unu-oha ddau, do ketoe peabbha-rappa ri ro; heddau pa hebhakka kedhanga jhe heddau ri pa hebhakka keriu Yesus.

³⁹ Ne ddau-ddau do lake jhara anne, ta piku-piku kattu ke, jhe kare-menihe Yesus.

⁴⁰ Mina hede ne lii ro, ”Au ke dhe ne do ddhei ta pekelole Ammu Deo, jhe pekaddhe bhale wari pa dhara tallu lodho? Ki do tarra ma Au ta Ana Deo, puru we au ngati ajhu ketoe au do napoanne, jhe gole we ne ngi'u Au ma miha!”

⁴¹Mina harre lema ne kattu-kattu mone-tunu-menahu he, guru-guru aigama he nga kattu-kattu do Yahudi he, ne mare dhole Yesus. Mii he ne ane ro,

⁴²”Ddau do wala nara ri ro ta golo, tapulara ngi'u No miha, nara dho ta gole ri No. Ki do tarra ma No ta duae do Israel ne, rihi ie No ta puru ngati ajhu ketoe nidhe, jhe itu wae jhi ta parahajha pa No.

⁴³ No do pararahajha pa Deo ma, jhe lii No, ta do No ke ne Ana Deo ne. Ki mina harre mai ma heleo ri di, wae marra Deo ta ma gole No pa dhara awe nadhe.”

⁴⁴Mina harre lema ne do tao ri mone raba unu-oha ddau do ketoe hela'u nga Yesus he, do kare do menihe Yesus lema.

⁴⁵Pa awe nattu lodho kewore mawo ta jhalle, pa dhara tallu jaa ne tui, ta kerabba guru rai hari hewue ihi rai do naanne.

⁴⁶ Pa wabba tallu maddha lodho he, ta peka ke Yesus nga hahhi lipeka do dhai talla tarra, ”Eli, Eli lama, sebakhtani?” kipebhale ma lirai di, ”Wo Ama Ya, wo Ama Ya, ta nga ke hak ku jhane ya ri Au?”

⁴⁷Do parri ddau do era pa anne, ta rangnge ne lipeka No do naanne, ta lii ke ro, ”Nee ta pedoe Elia ri No!”

⁴⁸ Heddau ngati ro, nga henginga-nginga ta la aggu ke buro'o-dahi jhe la pehabbhoa la dhara ei-ago do menyilu. Ta pelue ke pa hu ajhu, jhe pejhole ri no la kurinyoro Yesus.

⁴⁹Tapulara ta lii ke ne do haghe he, ”Mata dae ko, mai ma heleo ko ri di, dakka marra Elia ma gole No we adho!”

⁵⁰Moko ta peka ri ke Yesus nga lipeka do maddu, jhe tule ri No ne henga No do pedakka rahi ne.

⁵¹ Bhalla wata do pa dhara Ammu Deo ne, tore bhagi dhue rai ngati dhida lo he ma dha'i. Dakka dhai-ei nga lede-lede wowadu mehakka tora-tora,

⁵²Raidare-raidare boka-anni, jhe ae ne annu-niki Deo do pekaddhi bhale wari.

⁵³Ta alle Yesus pepekaddhe ngati dhara made mada, ta mahhu-anni ke ro ngati ro'a-raidare, jhe maho ro la Yerusalem. Do ngaddi ro ri do ae ddau pa ni.

⁵⁴Ne kattu horodhadhu ne nga do horodhadhu do jage Yesus he, ta meda'u ke do dho ie ta nga-nga ri dakka dhai-ei ne, nga ri hari-hari lai do jadhi he. Ta lii ke ro, ”Tarra, No dhe, Ana Deo tarra!”

⁵⁵ Pa anne, do ae lema ne mobanni do heleo ngati jjhau. Ro do na harre do pedute nga do pemoke Yesus rai ti Galilea.

⁵⁶Ti telora ro do na harre: Maria Magdalena, Maria ina Yakobus nga Yusuf nga ina ri ana-ana Zebedeus he.

⁵⁷Pa dhara maddha lodho do naanne ta dakka ke heddau do kaja ngati Arimatea, ne ngara Yusuf. No lema heddau ana hekola Yesus.

⁵⁸Ta kako ke no la nga Pilatus, jhe la ame ne ngi'u Yesus ne. Moko ta lii ke Pilatus mita wie ne ngi'u Yesus ne pa Yusuf.

⁵⁹Moko ta la aggo ke ri no ne ngi'u Yesus ne, jhe la wute ri bhalla pudi do wiu ko.

⁶⁰Moko ta la takke ke ri no ne ngi'u Yesus ne la dhara ro'a raidare unu no miha, do tao pa dhara hewue bhujo wowadu. Ta alla pe mina harre, ta riho ke ri no hewue ne wowadu do worena jhe la henabbhe pa ubha ro'a ne. Ta moko, ta bhale ke no.

⁶¹Maria Magdalena nga Maria do wala he, pee ma paanne, mejaddhi ro hedhape ne raidare ne.

⁶²Ta bhale ma jhammi-ae, pa Lodho Pengaha-ihi ne, moko ne kattu-kattu mone tunu-menahu he nga do Farisi he, ta kako ke ro hela'u-la'u la nga Pilatus,

⁶³ ta lii ke ro pa Pilatus, ”Muri, nee do henge ri jhi ne lipedai ngati mone pote ne, pa awe nga muri mada ko No, do ngaddi No ta lii, ’Ki ludu ti tallu lodho, do ta kaddhi Ya.’

⁶⁴Rowi do mina harre ke, lii kowe pa ddau ta la jage pewoie-ie ne raidare ne lohe la lodho do ke tallu ne, mita do dho na ra ne ana hekola No he ta la aggo ne ngi'u No, jhe lii ro pa ddau ta do alla ke No pepekaddhe ngati dhara made mada. Moko ne lua pote nga appi do leto do nadhe do medae ta rihi ne apa ngati do uru jhara ne.”

⁶⁵Moko ta lii ke Pilatus pa ro, ”Do nga horodhadhu jaga ma mu, kako we la jage pebharre ne raidare ne.”

⁶⁶Moko ta kako ke ro la raidare ne, jhe la hege ri ro ne wowadu henabbhi ne, nga tao ri ro ne era jaga pa hedhapa ubha ro'a ne, mita dho bhule ddau la tao lai nga-nga pa raidare ne.