Read Sabu MATIUS 28 Bible Online

MATIUS 28 - Sabu bible

MATIUS 28

¹Ta ludu ne lodho Pengaha-ihi ne, pa lodho Migu, rai jhammi-ae-ae, Maria Magdalena, nga Maria do wala he, ta kako ke ro la heaho ne raidare ne.

²Ta dakka hewakka ke ne dhai-ie do dhai meliri dhara. Heddau naju Muri puru ngati era do mmau do megala, jhe la riho ne wowadu henabbhi ubha ro'a ne. Ta alle periho ne wowadu ne, ta mejaddhi ke no pa dhida wowadu do naanne.

³Ne tanga mada no do kelala mii weo bhela he, jhe bhara pake no do pudi kewa'a.

⁴Ne do horodhadhu do jaga he ta meda'u ke jhe kerighi-keraggu, jhe hala dho ke mii do made he.

⁵Ta lii ke ne naju Deo ne pa mobanni he, ”Bhole meda'u mu! Do toi ri ya, mu hedhe do ta ma kale Yesus do alle peketoe peabbha-rappa ne.

⁶Pe'e dho ke No pa dhe. Alla ke No pekaddhi, mii do alla ma No peli pa mu do uru he. Mai we mu ma heleo ne era do pebba'e No dhe.

⁷Pa dhara awe nadhe, kako we mu nga henginga la pika pa ana hekola No he, ’Alla ke No pekaddhi, jhe pa awe nadhe, nnai ke No do uru jhara ngati mu la Galilea. Pa ni do ta pengaddi ke mu nga No!’ Henge we ne nga ne do alle pepeke ri ya pa mu.”

⁸Nga henginga-nginga ta langnga ke ti anne ne mobanni do na harre. Nga ade do nga meda'u-da'u jhe do nga mengallu dhara ma, ta perai ke ro nga henginga pa eke ne lai do naanne pa ana hekola Yesus he.

⁹Ta harra hewakka ke Yesus la peabu nga mobanni do na harre, jhe lii No, ”Helama tona ie tu mu!” Moko ta pehedharra-anni ke ro, jhe ngape ne rubhebho No, jhe wie hu nga mejura pa No.

¹⁰”Bhole mada'u mu,” ane Yesus pa ro, ”kako we mu la pika pa tuahhu-tuahhu Ya he, mita ie ro ta kako la Galilea; pa ni ke ro ne do medae ta ngadde Ya.”

¹¹Ta ludu ne mobanni he, do parri ddau ngati do horodhadhu do jaga pa rai dare he, ta bhale ke la dhara rae — jhe la pika pa kattu-kattu mone tunu-me nahu ne nga kattu-kattu do Yahudi he, ne jhara hari-hari lai do alla pejadhi he.

¹²Ta peli ke ne kattu mone tunu-menahu he nga kattu-kattu do Yahudi he. Moko ta wie ke ri ro pa do horodhadhu he, doi do dhai ae,

¹³jhe li ro, ”Dho jhamma mu ta lii ta do ana hekola Yesus he ne do dakka la mena'o ne ngi'u No pa awe anni-maddha, abu pa dhara nga bba'i mu.

¹⁴Jhe kinga rangngi gubernur ne lai do naanne, ta la ube ke ri jhi, mita do dho nara mu lua hedui nga-nga ri.”

¹⁵Moko ta aggu ke ri do horodhadhu he ne doi do na harre, jhe tao ri ro pedutu nga litakka do alla pejaji pa ro he. Rowi mina harre ke hakku ne lipe dhiri do naanne pee ko ma nga menyabbha pa telora do Yahudi lohe ma dhara lo dho do nadhe.

¹⁶ Hari do henguru heddau ne ana hekola Yesus he ta kako ke la hewue bhojo pa Galilea, pedutu mii litakka Yesus pa ro.

¹⁷Pa awe ngadde Yesus ri ro pa ni, ta wie hu nga mejura ke ro pa No. Tapulara era ma haghe ti telora ro do kepapi ne ade ro penaja nga No.

¹⁸Ta peumu-anni ke Yesus nga ro jhe lii pa ro, ”Hari-hari higa nga kuaha do era pa era do mmau do megala nga pa danni raiwawa, alla ke pejhole pa Ya.

¹⁹ Rowi do mina harre ke, kako we mu la nga hari-hari ddau pa hari-hari kebhihu raiwawa jhe pejadhi we ro ta ana-ana hekola Ya. Pejhiu we ro nga pale ne ngara Ama, nga Ana nga Henga Deo.

²⁰Ajha we ro ta pedutu hari-hari ne do alla pera'a-petakka ri Ya pa mu. Jhe henge we ri mu, do ta era loro Ya ne penau-hari pelere-hela'u nga mu lohe la pedak ka rahi raiwawa dhe.”