Read Sabu MATIUS 6 Bible Online

MATIUS 6 - Sabu bible

MATIUS 6

¹ ”Henge we, bhole jhagge ri mu ne uku-uku aigama he pa hedhapa ddau lowe kale mita ngadde ri ro. Ki do mina harre ke ne do tao ri mu, nara dho mu pai-pala mangngi ngati Ama mu do era pe era do mmau do megala ne.

²Hakku ki wie ri mu bhara ne nga we pa ddau do kehia nga gahara, bhole pedhire lere-rai jhara lai do naanne, hela'u mii do tao ri ddau do ddhei ta kale gaa ngara he. Ddau-ddau do na harre, ddhei ta tao ne lai-lai do mina harre pa dhara ammu-hebhajha, pa rujhara-ae, mita ie ro ta nara lipuji ri ddau. Henge we, do moko ke ne pai-pala ro kiri tao ke ro mina poharre.

³Tapulara mu, kinga wie ne nga-nga pa ddau, wie we ri mu dhara-dhara, mita do dho toi ri ddau do wala.

⁴Hane we ne wui ai-wui tao mu do naanne pe do dho toi ie tari nadu we, wala ngati Ama mu do era pa era do mmau do megala ne. Ri No do tarre lohe ne nga we ne do tao ri mu, maji le ta pa era do pehune-penite. Jhe do medae ta wie ne pai-pala pa mu.”

⁵ ”Kinga hebhajha mu, bhole tao mu mii do tao ri ddau do ddhei ta peukuanni he. Ddau do mina harre do rihi ddhei ro ta hebhajha nga titu pa dhara ammu-hebhajha nga pa rujhara-rujhara pehapo mita ngaddi ro ri ddau. Henge we ri mu, do napoanne ke ne pai-pala do hamme dhangnge ri ro.

⁶Tapulara ki hebhajha mu, maho we mu la dhara kama, jhe henabbhi we kelae, jhe hebhajha we mu pa Ama mu do dho ngadde ne. Do tarre lohe ri Ama mu ne nga we ne wui ai-wui tao mu do dho ngadde ri ddau ne, jhe do medae ta wie ri No pa mu ne pai-pala.

⁷Kinga hebhajha mu, bhole ddhei ta pekehero-rai mii do tao ri ddau-ddau do dho tade Muri. Ne peere ri ro, do ta hammi ke ne liami ro, rowi do merai ke ne lihebhajha ro.

⁸Bhole tao mu mii do tao ri ro he do mina harre. Do toi ma ri Ama mu ne nga ne do paralu ri mu, maji lema ta do dho ame dae ri mu pa No.

⁹Ri do mina harre ke, hebhajha we mu mina hedhe, ’Ama jhi do era pa era do mmau do megala: Au ke ne Deo do Kemolo ne. Ki ie mudhe Au ke ne do ta pedhede-peketute.

¹⁰Au ke ne Duae tu jhi. Ki ie mudhe he Au ke ne do pereda pa raiwawa jhe lua ddhei Au ke ne do ta pekerihe ne mii pa era do mmau do megala.

¹¹Wie we pa dhara lodho do nadhe ne bhara nga'a do paralu tu jhi.

¹²Pehuba we jhi ngati hala nga ludu jhi, mii do alla le ke ri jhi pepehuba ne ddau do tao hala penaja nga jhi.

¹³Bhole hani we pepada ne lua manno nga kaho jhi pa dhara peabu jhi nga ruluji-ruhakku tapulara gole we jhi ngati higa nga kuaha Mone tao apa nga kedhaha. [Wata Au ke ne Duae do mone higa nga pereda nga do dhida do ketutu ne lohe la lodho do nami mii ne. Amin.]’

¹⁴ Ki do pehuba ke ri mu ne hala ddau do tao hala penaja nga mu, do ta pehuba lema ne hala nga ludu mu ri Ama mu do era pa era do mmau do megala ne.

¹⁵Tapulara ki do dho pehuba ke ri mu ne ddau do tao hala penaja nga mu, pe huba le dho ma ne hala-ludu mu ri Ama mu do era pa era do mmau do megala ne.”

¹⁶”Kinga puasa mu, bhole pehebhuru-anni mii do tao ri ddau do peuku-anni he. Do ta uku ke ro ta pebhuru-anni mita toi ro ri ddau ta do era pa dhara nga puasa. Henge we ri mu, napoanne ke ne pai pala ro do alle ke pehamme ri ro.

¹⁷Tapulara kinga puasa mu, labbho ne tanga mada mu jhe kao peie ne rukattu mu,

¹⁸mita do dho bhule ddau do toi mu ta do era pa dhara nga puasa, wala ngati Ama mu we ro era pa era do dho ngadde ne. Do ngadde ma ri No ne wui ai-wui tao mu do dho ngadde ri ddau ne, jhe do medae ta hamme ri mu ne pai-pala ne.”

¹⁹ ”Bhole kewore-kebhoke we ri mu hari-hari ne unu-oha tu ngi'u mu pa danni raiwawa, rowi do medae ta nga'e ri naweda nga rutu, jhe hari lema do medae ta mena'o ro do mena'o.

²⁰Rihi ie ta name ta kale we ri mu ne unu-oha do era pa era do mmau do megala ne, rowi pa ni adho ke do medae ta la peapa ri naweda nga rutu, nga adho lema ke do medae ta la mena'o ri do mena'o ri.

²¹Rowi pa mii we ne unu ne oha mu, do paanne lema ke ne ade mu!”

²²”Namada, lapu ke tu ngi'u. Ki do mmau ne namada mu, moko hari heddau ne ngi'u mu do weo do kelala ke.

²³Tapulara we, ki do henunu ne namada mu, moko hari heddau ne ngi'u mu do kerabba guru-rai ke. Hakku kinga ne lapu do pa dhara ngi'u mu ne do kerabba ke, moko dhai pedakka kerabba tarra ke ne lua kerabba do napoanne!”

²⁴”Bhule dho heddau he do nara ta jhagga tu do dhue ddau muri. Rowi do ta rihi ddhei no nga heddau tinga do heddau ne. Kiadho no do ta rihi mappe nga heddau muri ngati heddau do wala ne. Mina harre lema mu. Nara dho mu ta jhagga tu Deo lema nga tu onu-oha raiwawa do nadhe.

²⁵Rowi do mina harre ke, henge we ri mu; bhole kedhue-kepapi ne jhara lua muri mada mu, ne nga ne do medae ta nga'e ta ngino rowi mu, kiadho ne do medae ta pake ri mu. Ta do adho ke ne muri mada mu ne, do kerihi ti bhara nga'a, nga bhara nginu mu, mina harre lema ti bhara pake mu?

²⁶Heleo ko ri mu dolila jhara dhida. Ngaddi dho ro ta kujha nga ta ghattu, jhe ngaddi dho ta hali hoka. Maji le ta mina harre do piara-peluja ma ro ri Amu do era pa era do mmau do megala ne! Ta do adho ke ne kebhue mu do kerihi ngati kebhue dolila na harre?

²⁷Nadu ti telora mu do nara ta pebhue ne pemuri mu, maji le ta hekewahhu-ai he, ri lua kedhue-kepapi no ne?

²⁸Ta nga ke mu hakku kedhue-kepapi jhara lua bhara pake mu? Heleo we ri mu hari-hari bhunga pa dhara padha nga meraddha. Ngaddi dho ro ta jhagga nga ta mane nga menannu;

²⁹ tapulara Duae Salomo le miha dhai kaja nga kete'e, ngaddi dho no ta nnau mii meleke bhunga-bhunga do na harre.

³⁰Jhu'u pa dhara padha do muri ko pa dhara lodho do nadhe, jhe bhale ma balli-rai ne do ta tune pekappu. Maji le ta mina harre, pennau mina harre ne worawwu meleka ko ma ri Deo. Mina mii ri ko mu! Tapulara lohe de dho mu ne parahajha!

³¹Bhole kedhue-kepapi jhe lii, ’Ne nga ne do medae ta nga'e ri di, kiadho ne nga ne do medae ta ngino ri di, kiadho ne nga ne ta do me dae ta pake ri di?’

³²Lai-lai do napoharre do loro ke ne ddhei ta hudhekajhe-dhae ri ddau-ddau do dho tade Deo. Do ne pa petu ne, do lore ke petoi ma ri Ama mu, ta do napoharre do jhamma ta era tu mu.

³³Ri do mina harre ke, pekerihe ko we uru jhara, mita Deo ne do pereda pa dhara muri ma da mu, jhe jhagge we ne lua ddhei No. Moko ne lai-lai do hewala he, do medae ma ta wie ri Deo pa mu.

³⁴Ri do mina harre ke, bhole kedhue-kepapi we ne jhara lua do bhalli-rai ne. Rowi do bhalli-rai ne do nga lua kedhue-kepapi miha ma. Do waji he ke ne lua hedui herui tu lodho dhe, tenge dho ke ta pebhue ri.”