Read Sabu MATIUS 7 Bible Online

MATIUS 7 - Sabu bible

MATIUS 7

¹”Bhole henginga ne pebunu hala ri mu pa ddau do wala, mita do dho henginga le Deo ne pebunu hala pa mu.

² Rowi do mina mii mu ne henginga pebunu hala pa ddau do wala, mina harre lema Deo ne medae ta pebunu hala pa mu. Ri ruhakku do pake ri mu hakku ddau do wala, ruhakku napoanne lema ne do ta pake ri Deo ta hakku mu.

³Ta nga hakku ketarre-lere ri mu huni ajhu do era pa dhara namada tuahhu mu ne, jhe ne bhalo do pa dhara namada mu ne miha, wae dho ta pereha ri mu?

⁴Mina mii mu ne nara ta lii pa tuahhu mu ’Mai ma hu'e ri ya ne huni ajhu ne ti dhara namada au ne,’ jhe pa dhara namada mu miha do era bhalo helaa?

⁵Wo ddau do pote do appi! Arre uru jhara ko we ne bhalo do ngati dhara namada mu ne miha jhe itu nara ta ngadde nga woie ri mu tu ta hu'e ne huni ajhu do era pa dhara namada tuahhu mu ne.

⁶Bhole wie bhara do mmau pa ngaka, mita do dho lure bhale mu ri ngaka do naanne. Jhe bhole wie mutiara pa wawi, mita do dho jhalle-kerupe ne mutiara ne ri wawi do naanne.”

⁷”Ami we, moko do ta hamme ri mu. Kale we, moko do ta nara mu. Kedakku we kelae, moko do ta boke tu mu.

⁸Rowi ddau do ami do ta hammi; ddau do kale do ta nara, jhe ddau do kedakku kelae do ta boke kelae tu no.

⁹Era pa telora mu, heddau ama, ki ami roti ne ana no, jhe wie wowadu?

¹⁰Kiadho ta wie debhoho ki ami nadu'u?

¹¹Maji lema mu ta ddau do apa do kerewe, do i'a ko ma mu ta wie bhara do woie tu ana-ana mu. Mina mii ri ko Ama mu do era pa era do mmau do megala ne! Lai do rihi woie ne do medae ta wie ri No tu ddau do ami pa No.

¹² Tao we ri mu penaja nga ddau do wala, mina mii ne lai do ddhei mu ta tao ddau do wala penaja nga mu. Napoanne ke ne kepue lidara Musa nga liajha nabi-nabi.”

¹³”Maho we jhara kelae do kobho, rowi do dhai balla nga telae ne kelae nga loro jhara do ju la dhara lua wolo ne, jhe do ae ne ddau do lake jhara rujhara do naanne.

¹⁴Tapulara do dhai kobho nga kehahhi jhe do dhai hedui ne kelae nga loro jhara do aggo ddau ju la dhara muri mada. Jhe do hudi we ne ddau dhae ne rujhara do naanne.”

¹⁵”Meniga we pewoie-ie penaja nga nabi-nabi do pote-do appi he. Ki dakka ro langa mu, do dakka mii naki'i jhawa he, tapulara ne adhe ro do mii ade ngaka addu he.

¹⁶Ti wui ai-wui tao ro, do ta tada ma ro ri mu, ta nadu ro. Nagti koo nga huki, hhau dho wue ago, kiadho wue kepallu.

¹⁷Ngati kepue ajhu do bebu do ta hhau ne wue do woie, ngati ajhu do lara do ta hhau ne wue do woapa.

¹⁸Ngati kepue ajhu do woie hhau dho wue do woapa, ngati kepue ajhu do lara, hhau dho wue do woie.

¹⁹ Nami we ne kepue ajhu do dho bhule nga wue do woie, do ta petue jhe tune pekappu ladu-ladu.

²⁰ Mina harre lema ne nabi-nabi do pote-do appi he. Do ta tada ma ro ri mu ngati wui ai-wui tao ro.”

²¹”Adho hari-hari ddau do pedoe Ya ta, ’Muri, Muri’ ne do ta jadhi ta annu-niki Deo, tapulara titu wata ddau do petobe ne lua ddhei Ama Ya do era pa era do mmau do megala ne.

²²Pa lodho pedakka rahi raiwawa, ae ddau do ta lii mina hedhe pa Ya, ’Muri, Muri ta do adho ke jhi hedhe nga pake ngara Au ma ne pedhae ri jhi ne litakka Deo ne? Jhe hari lema ta do adho ke pa dhara Muri lema ne alla ke ri jhi pehudhi nga keluru hari-hari henga kerabba, jhe hari lema alla ke petao ri jhi jhajhi ae ne lua madalae?’

²³ Tapulara do ta bhale ri Ya, ’Tada dho mu ri Ya! Ri do mina harre ke pejjhau-anni we mu ngati dhe, mu hari-hari ddau do tao apa nga kerewe!’ ”

²⁴”Owe, ne ddau do dhanno nga tenae nga do pedute ne lipedai Ya do nadhe, hela'u lema mii ddau do mmau dhara do petito ne ammu no pa kolo pahi-ae.

²⁵Kinga dakka ke ajjhi, jhe dakka ei-waa talo-rai do lere ri raga nga opo la malle la kebie ne ammu do naanne, i'a dho no kerattu wari ri, rowi do petito pa kolo pahi-ae.

²⁶Jhe nadu ne ddau do dhanno ne lipedai Ya do nadhe, jhe adho do pedute ne lipedai ya dhe, do hela'u ke mii ddau do bhodho do petitu ammu pa woraiwuu.

²⁷Ki dakka ke ajjhi, jhe dakka ei-waa talo-rai jhe do lere ri raga nga opo la malle la kebie ne ammu do naanne, do medae ta keloli jhe menyalla. Adho ke ta apa he we, tapulara do ta menyalla kebali-bali la hebhakka-bhakka.”

²⁸ Ta moko Yesus ne wie liajha, ta madalae ke hari-hari ne ddau do era pa anne, ta rangnge ri ro ne liajha Yesus ne.

²⁹Rowi ajha ri No ne ddau he, do tobo ri higa nga kuaha, do pewala ngati guru-guru aigama ro he.