Read Sabu MATIUS 8 Bible Online

MATIUS 8 - Sabu bible

MATIUS 8

¹Ta puru ke Yesus ngati kolo bhojo ne, jhe do ae ddau ne do podute No.

²Pa dhara awe naanne ta dakka ke heddau do paddha nadato. Ta la lakku rutu ke no pa hedhapa Yesus, jhe lii no, ”Ama, kinga ddhei Ama, do nara ma ta peie ya ri Ama.”

³Ta herae ke no ri Yesus, jhe lii pa no, ”Do ddhei ya. Ie we au!” Pa dhara awe naanne dhangnge ta ele ke ne paddha no.

⁴ Moko ta lii ke Yesus pa no, ”Henge we pewoie ri au! Bhole pedhire ri au ne lai do nadhe ie ta pa nadu we. Tapulara kako we au la pengaddi-anni pa mone tunu-menahu, jhe ame no ri au ta peteleo ta ie ke au ngati paddha dhe. Ki alla ke pemina harre la jhole we ri au ne bhara tunu nga menahu do mina mii ne do lii ri Musa, mii hahhi telia ta ta do ie tarra ke au!”

⁵Ta dhai Yesus ta maho la Kepernaum, ta dakka ke heddau kattu horodhadhu Roma la peabu nga No, jhe ame ne lua ruba dhara No.

⁶”Ama”, ane katu horodhadhu do naanne, ”nnai ne ddau jhagga ya do paddha pa ammu ya. Nnai ke no ta pekelole he ke pa era bba'i no, i'a dho ke nga-nga, do dhai mejanni ke ne paddha no.”

⁷Ta lii ke Yesus pa no, ”Medae Ya ta kako la peie no.”

⁸Ta bhale ke ri kattu horodhadhu do naanne, ”Tenge dho Ama ta kako la ammu ya. Jhamma dho Ama ta hamme pa ammu ya. Ta pereda he we Ama. Do ta ie dhangnge ma ne ddau jhagga ya ne.

⁹Rowi ya lema do jhamma ta pewawa-anni palipereda do rihi dhida ngati ya. Jhe pa dha'i ya ri do era lema ne horodhadhu-horodhadhu do jhamma ta pedute ne lipereda ya. Ki lii pa heddau ti te lora ro, ’Kako we!’ ta kako he we no. Ki lii pa do wala ri, ’Mai ma dhe!’ moko ta dakka he we no; jhe ki nga pali ke ya pa ddau jhagga ya, ’Tao ko nadhe!’ ta i'a ta jhagge he we ri no.”

¹⁰Ta rangnge ri Yesus ne nga ne do pale ri kattu horodhadhu do naanne, dhai tarra Yesus ne madalae. Ta lii ke Yesus pa ddau-ddau do pedute No he pa dhara awe do naanne, ”Dhai tarra ne ddau do nadhe. Pa telora do Israel pengaddi de dho Ya ta peabu do mii mone-ae lua manno ddau do nadhe!”

¹¹ Tarra-tarra! Do medae ta ae ddau do ta dakka ti bira dimu nga bira waa ta ma mengallu nge nga kehaka dhara hela'u-la'u nga Abraham, Ishak nga Yakub pa dhara Raiwawa Deo do Wowiu ne.

¹² Jhe moko ri ne ddau-ddau do ne pa petu ne do jhamma ta jadhi annu-niki Deo do ta nabha la tele, la era do kerabba guru-rai ne. Pa ni ke ro do ta tangi penina-noho nga perajja-jaru.

¹³Moko ta lii ke Yesus pa kattu horodhadhu ne, ”Bhale we au, rowi ne nga ne do parahajha ri au ne, naanne do ta jadhi.” Pa dhara awe naanne dhangnge ta ie ke ne ddau jhagga kattu horodhadhu ne.

¹⁴Ta kako ke Yesus la ammu Petrus. Pa ni ta ngadde ke ri Yesus ne ina ri ihi-ammu Petrus ne, era do emo pa era bba'i no.

¹⁵Ta bhuje ke ri Yesus pa ruai no, moko ta ie dhangnge ke ne emo no. Ta kaddhi ke no jhe la pemoko nga'a-nginu tu Yesus.

¹⁶Ta dhai ta umu ta maddha lodho, ae ddau do wujhu ne do aggu ri ddau langa Yesus. Ri heubha lipedai we, ne hudhi ri Yesus ne henga-henga kerabba do na harre nga peie lema ri No hari-hari ne do paddha he.

¹⁷ Hari-hari ne do tao ri Yesus do na harre mita tobo ke ne lii do pale ri Nabi Yesaya, ”No ke Mone dhui-hape hedui-herui di nga do peie di ngati lua roe nga paddha di.”

¹⁸Dhai ae tu-tu ne ddau do dhidhe pekehero Yesus. Ta ngaddi ro ri Yesus, ta lii ke Yesus pa ana hekola no he ta pekaddhi la hebhakka-rai.

¹⁹Ta dakka ke heddau guru aigama la nga Yesus, jhe lii no, ”Ama Guru, ddhei ta pedute Ama ri ya, ie ta la mii we Ama ne kako!”

²⁰Ta bhale ke ri Yesus, ”Ngaka addu era nga ro'a nga dolila era nga nyabbhu, tapulara Ana Ddau Raiwawa bhule dho nga era tu ta pelakku-anni.”

²¹Moko ta lii ri ke heddau ngati ddau do pedute No he, ”Ama, hane ko wue ya pebhale ta la pedane ama ya ko uru.”

²²Tapulara ta bhale ke ri Yesus pa no, ”Pedute we Ya ri au, hani ro do made pepedana ri ddau ro ma miha do made he.”

²³Ta ha'e ke Yesus la dhara kowa, mina harre lema ne ana hekola No he, do ha'e hela'u-la'u nga No.

²⁴Ta dakka hewakka ke ne raga nga opo do rihi meliri dhara la ei-lobo do naanne, hakku ta pengijho-ngajho ke ne kowa ne, ne tube ri kolo nawa ne. Yesus do bba'i pa dhara awe do naanne.

²⁵Ta kako ke ne ana hekola No he la peree No, ”Ama! Ruba kowe! Ihilaka ke di!” mina harre ke ne peka ro.

²⁶”Ta nga mu hakku meda'u?” ane Yesus, ”Do kura ko ne lua parahajha mu pa Ya.” Ta titu ke Yesus jhe jhege ne ngallu nga kolo nawa ne. Moko ta ketanna tu-tu dhangnge ke ne ei-lobo do naanne.

²⁷Ta madalae ke ne ana hekola No he hari-hari. Ta lii ke ro, ”Nadu ke No dhe, hakku ta i'a pedute he we ne lipereda No ri ngallu nga nawa!”

²⁸Ta dhai ke Yesus la hebhakka-rai la ihi rai Gadara. Pa ni ta dakka ke do dhue ddau do wujhu langa Yesus. Ne do wujhu do na harre hari do ddhue do dhai ke ne bhani nga ddau, hakku bhule dho ke heddau he do bhani ta lake jha ra anne.

²⁹Ta mahhu-anni ke ro ngati naba ro'a raidare he, jhe peka, ”Wo Ana Deo, ddhei ta nga ke jhi ri au? Adho ke au ddhei ta ma wolo jhi, maji lema ta do dho dhai dae ne awe ne?”

³⁰Rihi dho ne jjhau ngati era do naanne, do era hemabba ne wawi do pa dhara nga kale nga'a.

³¹Ta ami ke ne wango do na harre pa Yesus, ”Ki do ta lii ma Au ta mahhu-anni pa jhi, lii we pa jhi ta maho la dhara wawi-wawi do na hidhe.”

³²”Kako we!” ane Yesus. Ta mahhu-anni ke ne wango he ngati ddau do na har re, jhe maho la dhara wawi-wawi he. Moko ta perai ke ne wawi do na harre, me nyabbha kebali-bali, jhe riju la dhara ei-lobo ne, ta made he ke ne wawi he paanne.

³³Moko ne mone bhata-mone bhata wawi do na harre ta perai ke la dhara rae jhe la pedhiri jhara hari-hari lai do alla pejadhi he, mina harre ne jhara do dhue ddau do wujhu he.

³⁴Moko hari-hari ne ddau do pa dhara rae ne ta kako ke la peabu nga Yesus. Ta ngadde Yesus ri ro, ta huba ke ro pa Yesus, mita ie No ta langnga ti ihi-rai ro ne.