Read Sabu MATIUS 9 Bible Online

MATIUS 9 - Sabu bible

MATIUS 9

¹Ta ha'e ke Yesus la dhara kowa, jhe pekaddhi la hebhakka-rai, bhale la rae nga kowa No ma miha.

²Pa ni ta dakka ke ddau nga aggu heddau do made he atta, do meree pa era bba'i no. Ta ngaddi ri Yesus ta do dhai meramma tarra ne lua manno nga kaho ddau do na harre, ta lii ke No pa ddau do paddha ne, ”Halla-anni we, ana Ya! Ne lubhu harro nga menyilu au alle ke pepehai-pehuba.”

³Pa anne do era do parri ddau guru aigama, do lii pa dhara ade ro, ”Ddau do nadhe ta kare nga menihe Deo ri No!”

⁴Do toi ri Yesus ne nga ne do era pa dhara penge ro, hakku ta lii ke No, ”Ta nga hakku era pa dhara penge mu ne lua penge do mina poharre ne worawwu woapa?

⁵Nami ne do rihi memudhe: lii ta, ’Lubhu harro nga menyilu au do alle ke pepehai-pehuba’, we lii ta, ’Kaddhi we, jhe kako we’?

⁶Tapulara pa dhara awe nadhe ta peteleo ke ri Ya pa mu, ta do tarra pa danni raiwawa do nadhe, Ana Ddau Raiwawa do nga higa ta pehuba lubhu harro nga menyilu.” Ta lii ke Yesus pa ddau do made heatta ne, ”Kaddhi we, jhe aggo we ne era bba'i au, jhe bhale we au la ammu-la kemali au.”

⁷Ta kaddhi ke ne ddau do naanne, jhe bhale la ammu no.

⁸Ta ngadde ri ddau-ddau do era pa anne ne jhara lai do naanne, ta meda'u ke ro, jhe wuewaje Deo, rowi do wie ke ri Deo ne higa do dhai mone-ae pa ddau raiwawa.

⁹Ta alla pemina harre ta pekaddhi ke Yesus ngati era do naanne. Pa dhara nga kako ko ro, ta ngadde ke ri Yesus heddau mone hammi bhea, ne ngara no Matius era do mejaddhi pa kato no. Ta lii ke Yesus pa no, ”Mai ma pedute Ya!” Ta kaddhi dhangnge ke Matius jhe pedute Yesus.

¹⁰ Pa dhara awe ta nga'a Yesus pa ammu Matius, ta dakka ke jhajhi ae ne mone hammi bhea he nga ddau-ddau do ege ta ddau-ddau do hala loro-jhara kako he, ri ddau lowe, la nga'a hela'u-la'u nga Yesus nga ana hekola No he.

¹¹Do era le ne do Farisi he do ngadde ne lai do naanne. Ta la kebhali ke ro pa ana hekola Yesus he, ”Tanga hakku nga'a hela'u guru mu nga mone hammi bhea nga ddau do apa do kerewe he?”

¹²Do rangnge ri Yesus ne likebhali ro do naanne, moko ta bhale ke ri No pa ro, ”Ddau do ie, kale dho dote, titu wata ddau do paddha we.

¹³ Hakku ko ta kale toi ne nga ke ne lua pedabbho lilolo do pa dhara Buku Lidara-Likewahhu Deo do nadhe: ’Ne do menangnge ri Ya, ade do era nga lua peruba dhara ne, adho bhada tunu nga menahu.’ Rowi ne dakka Ya, adho ta ma pedoa ddau do lajaanni ta ddau do woie, tapulara tu ddau do tada ngi'u ta ddau do apa do kerewe.”

¹⁴Ta alla pemina harre, ta dakka ke ne ana hekola Yohanes Mone Pejhiu he langa Yesus. Ta kebbali ke ro, ”Ta nga jhi hari lema do Farisi he do puasa, tapulara ana-hekola Ama he, pi'a dho ro ta puasa?”

¹⁵Ta bhale ke ri Yesus, ”Mina mii pa dhara penge mu hari-hari? Nara marra hino tamu-tamu pa dhara hahhi lai-ala peloko-nga'a ta hedui ne ade ro ki do era hari ko ne mone ngedhe ne nga ro? Do bhara tatu ta adho! Tapulara do ta dhai ma ne awe, ne mone ngedhe ta aggo ti telora ro. Awe do naanne ke jhe itu puasa ro.

¹⁶Bhule dho ddau do kelapu bhajhu do dui ri bhalla do wiu. Rowi ne bhalla kelapu ne do ta kepudhu jhe pewio rihi ae ri ne bhajhu do naanne.

¹⁷Mina harre lema bhule dho ddau do hali ei-ago do wiu la dhara taa-kuri do dui. Rowi ne taa-kuri do naanne do medae ta mehakka jhe apa, moko ta hore ele he ke ne ei-ago do naanne. Ei-ago do eiu do jhamma ta hale taa-kuri do wiu ma, mita ie hari dhue ta pee ma nga ie.”

¹⁸Pa dhara nga pedai lii ko Yesus nga ana hekola Yohanes Mone Pejhiu he, ta dakka ke heddau kattu ammu-hebhajha. Ta la lakku rutu ke no pa hedhapa Yesus, jhe lii, ”Nnai ke ne ana ya do mobanni ta itu ko we ta alla pehappo henga. Ri do mina harre, ruba ko we ne dhara Ama ta la bhujhe, mita ie no ta muri bhale wari.”

¹⁹Ta kaddhi ke Yesus nga ana hekola No he penau nga ddau do naanne.

²⁰Pa telora rujhara ta era ke heddau mobanni do henguru dhue bhue ttau ke ne lakka ri paddha mili raa, ta dakka ke no la pehedharra-anni nga Yesus jhara kejhunga. Do penge ri no, ”Hadhi ta goe he we ri ya ne juba No do ta ie Ya.” Ta la goe ke ri no ne wui jhalla juba Yesus.

²²Pa dhara awe naanne ta kebhibha ke Yesus, jhe ketarre ne mobanni do na anne jhe lii pa no, ”Petone we ne ade au, ana Ya! Taga tari do parahajha ke au pa Ya, hakku ie ke au!” Pa dhara awe naanne dhangnge ta ie ke ne mobanni do naanne.

²³Ta alla pemina harre ta dhai ke Yesus la ammu kattu ammu-hebhajha ne. Ta ngaddi ke ri Yesus ne ddau do ggai ketadu-lalu nga ae ke ddau do kenya'u.

²⁴Ta lii ke Yesus pa ro, ”Mahhu-anni ko mu hari-hari! Naiki do nadhe adho ta made, ta bba'i he we no.” Ta mare ke Yesus ri ro hari-hari.

²⁵Ta alla pemahhu-anni ne ddau-ddau do na harre, ta maho ke Yesus la dhara kama ne, jhe parro ri Yesus ne ruai naiki do naanne. Ta kaddhi ke ne ana mobanni do naanne.

²⁶Ta menyabbha dhang nge ke ne lai la hari hewue ihi rai do naanne.

²⁷Ta pekaddhi ke Yesus ngati era do naanne. Pa telora rujhara, ta pedute ke No ri do dhue ddau do bhaddu. Ta peka ke ro, ”Ana Daud, ruba ko we ne dhara Au nga jhi!”

²⁸Ta dhai Yesus ta maho la dhara ammu, ta dakka le ke ne do dhue ddau do bhaddu he langa No. Ta kebhali ke Yesus pa ro, ”Do parahajha tarra ke mu hari do dhue ta do nara ri Ya ta peie mu?” Bhale ri ro, ”Parahajha tarra jhi, Ama!”

²⁹Ta herae ke ri Yesus ne ruai No pa namada ro, jhe lii, ”Rowi do paraha jha ke mu, jadhi we ne nga ne do henao ri mu.”

³⁰Moko ta ngaddi dhangnge ke ro. Ta takka lii ke Yesus pa ro, mita bhole pepeke ri ro ne lai do naanne, ie ta pa nadu we.

³¹Tapulara ta kako ke ro jhe la pepeke ne jhara lua Yesus pa hari hewue ihi rai do naanne.

³²Ta ludu ne do dhue ddau do na harre, moko ta dakka ri ke ne ddau nga aggo heddau do kewajje ri rani do dho i'a pedai lii la nga Yesus.

³³Ta hudhe ke ri Yesus ne rani ne, moko pa dhara awe do napoanne dhangnge ta i'a ke ne ddau do naanne pedai lii wari. Ta madalae ke ne ddau lowe he, jhe lii ro, ”Pe ngaddi de dho jhi nga lai do mina hedhe pa Israel!”

³⁴ Tapulara ta lii ke ne do Farisi he, ”Kattu wango he ne do wie No ne higa ta hudhi ne wango-wango do na harre.”

³⁵ Mina harre ke Yesus ne bela ngati hewue rae la hewue rae, ngati hewue kejobho la hewue kejobho. Wie ri No ne liajha pa ammu-ammu hebhajha, nga pe peke ne Li Hagha Dhara jhara lua mina mii Deo ne pereda mii heddau Duae. Pe ie ddau do paddha heworawwu-heworawwu paddha ri No nga ne nga we ne era pa ihi pa kuri ro.

³⁶ Ta ngaddi ri Yesus ne ddau lowe he, ta ruba dhara ke No, hala dho ke ro mii do bhingu he, jhe i'a dho ke ro tao nga-nga, lude dho ke mii ki'i do dho bhule nga mone bhata he.

³⁷ Moko ta lii ke Yesus pa ana hekola No he, ”Dhai ae ne do ta puru nga ta ghattu, tapulara dhai kappi ne mone puru nga ghattu.

³⁸Rowi do mina harre ke, ami we pa Mone muri dhoka ne mita pepu ri No ne mone puru nga ghattu ta la puru nga ghattu ne ihi habha no he.”