Read Sabu MARKUS 1 Bible Online

MARKUS 1 - Sabu bible

MARKUS 1

¹Nadhe ke ne Li Hagha Dhara jhara lua Yesus Kristus, Ana Deo.

² Ne Li Hagha Dhara do napoanne, do jhare mii do bhuke ri Nabi Yesaya, do mi na hedhe, ” ’No ke do nadhe ne do pepue ri Ya,’ ane Deo: ’Do pepue ke no ri ya uru jhara ngati Au, mita ie ke ri no ta pemoke ne rujhara tu Au.’

³ Ta era heddau do langu do petoda pa dhara padha nga meraddha, ’Pemoke we ne rujhara tu Muri; pemere we ne loro jhara-loro jhara do ta narro ri No.’ ”

⁴Mina mii ne do hure do bhuke, mina harre le ma ke ne harra Yohanes la dhara kebhalla-ae ne. Ta pejhiu ke ddau ri no, jhe pepeke ri no ne lii do ngati Deo ne, ”Do jhamma ke mu ta jharra ngati lubhu harro nga menyilu mu, jhe jhula we ne ngi'u mu tu ta pejhiu, mita ie mu ta pehai-pehuba ri Deo,” mina harre ke ne lii Yohanes.

⁵Hari-hari ddau ngati ihi rai Yudea, mina harre lema ngati dhara rae Yerusalem do kako lema la dhanno ne lipeliba Yohanes ne. Ta kelolo mola ke ri ro ne lubhu harro nga menyilu ro. Ta pejhiu ke ro ri Yohanes pa dhara Loko Yordan.

⁶ Ne bhara pake Yohanes ne, ngati rrau unta. Ne dari wake no ngati kuri bhada, jhe ne bhara nga'a no mokebhara nga ei-oni-addu.

⁷Te pepeke ke ri no ne lii do nadhe, ”Do medae hine, kinga ludu ke ya, ta dakka heddau do rihi ngati ya.Jhamma tuu-tuu le dho ya, ta peru'u-anni, tu ta ma'e ne dari helapa No.

⁸Pejhiu mu ri ya, ri eiloko we, tapulara ri No do ta pejhiu mu ri Henga Deo.”

⁹Pa dhara awe naanne, ta dakka ke Yesus ngati Nazaret do pa ihi rai Galilea ne. Moko ta pejhio ke No ri Yohanes pa dhara Loko Yordan.

¹⁰Ta dhai ta mahhu-anni dhangnge Yesus ngati dhari ei ne, ta ngadde ke ri No, liru do boka-anni, jhe puru Henga Deo mii hengi'u koro jhawa he la wokolo No.

¹¹ Moka ta rangnge ke ne lipedai Deo do pali mina hedhe, ”Au ke ne Ana hajha nga Ana ddhei Ya. Au ke ne do maddhi pa dhara ade Ya.”

¹²Ta alla pemina harre ta aggo ke Yesus ri Henga Deo la dhara kebhalla-ae do keliu-kejidho.

¹³Appa nguru lodho No ne pee pa ni, ta hakko ke No ri Wango. Bhada-bhada addu era le do manga hela'u-la'u nga No pa ni, jhe No do pe moke ri naju Deo pa ni.

¹⁴Ta alle Yohanes pepemaho la dhara ammu bhaddo, ta kako ke Yesus la Galilea, jhe pepeke ri No ne Li Hagha Dhara do ngati Deo ne pa ni.

¹⁵ Ta lii ke Yesus mina hedhe, ”Do ta pereda ke Deo nga henginga. Jharra ngati lubhu harro nga menyilu mu, jhe parahajha we nga Li Hagha Dhara do ngati Deo ne!”

¹⁶Pa dhara nga lappa-lappa Yesus pa ngdi Eilobo Galilea ne, ta ngaddi ke ri No do dhue ddau mone jhala, Simon nga ari no Andrias. Era pa dhara nga jhala nadu'u ro pa dhara eilobo ne.

¹⁷Ta lii ke Yesus pa ro, ”Mai ma pedute Ya ri mu. Do ta ajha mu ri Ya ta mone jhala ddau.”

¹⁸Ta hani dhangnge ke ne jhala ro he jhe kako la pedute Yesus.

¹⁹Ta narru teru ke Yesus, moko ta ngaddi ke ri No ri do ddau do petuahhu Yakobus nga Yohanes, ana-ana ri Zebedeus. Era pa dhara kowa ro, pa dhara nga habbhi jhala.

²⁰Ta pedoa dhangnge ke ro ri Yesus. Ta kaddhi dhangnge ke ro, jhe hane ama ro nga ddau-ddau do nga'a gaji he pa dhara kowa ne, jhe kako ro la pedute Yesus.

²¹Ta dhai ke Yesus nga ana hekola No he la dhara rae Kapernaum. Ta dhai ro la ni, pa Lodho Pengaha-ihi do kedhue ne, ta mako ke No la dhara ammu hebhajha, jhe jhari No ta wie liajha pa anne.

²² Dhai madalae ne ddau-ddau do dhanno ne liajha No he. Rowi ne wie ri No ne liajha mii heddau do jhamma ta tengare, do wala kea-kea ngati guru-guru aigama he.

²³Pa dhara awe naanne ta maho ke heddau do wujhu la dhara ammu hebhajha ne jhe do nga peka-pekarra,

²⁴”Wo Yesus do Nazaret, ddhei ta tao ne nga ke au penaja nga jhi hedhe? Ta ma pemade jhi ke ri Au? Do tade ri ya ta nadu Au. Au ke ne ddau pepu-peju do mmau do megala ne do ngati Deo!”

²⁵”Pehangngo-anni!” ne jhege ri Yesus ne wango do naanne, ”mahhu-anni au ngati dhara ddau do napoanne!”

²⁶Ta kenyoke ke do maddu-maddu pebito-bato la hebhakka-bhakka ne ddau do anne ri wango ne, jhe mahhu-anni ngati ddau do naanne nga peka.

²⁷Ta madalae ke ne ddau he hari-hari, jhe lii ro heddau pa heddau, ”Bhoka-eh, ne nga ke ne na hedhe? Hahhi liajha do wiu! Nga mina harre neworawwu henginga, ta lii he we No pa wango-wango do na harre ta mahhu-anni, ta i'a pedutu he we ro pa No!”

²⁸Moko ne lii jhara lua Yesus dhe dhai henginga ne menyabbha dhangnge la hari hewue ihi rai Galilea.

²⁹Ta pekaddhi ke Yesus nga ana hekola No he ngati ammu hebhajha ne, jhe kako la ammu Simon nga Andreas. Mina harre lema Yakobus nga Yohanes do penau lema la anne.

³⁰Ina matu ri Simon era do emo pa era bba'i no. Ta dhai Yesus nga ana hekola No he ta maho la dhara ammu ne, ta pika ke ro pa Yesus ne jhara lai do naanne.

³¹Moko ta kako ke Yesus la nga ina matu ri Simon ne, jhe parro ne ruai no. Ta pekaddhe ke no ri Yesus. Ta ie dhangnge ke no ti emo ne. Ri do mina harre ke, ta kako ke no la pemoko nga'a-nginu tu ro.

³²Pa dhara maddha lodho he, do janna ke mada lodho, ta dakka ke ddau lowe nga aggu hari-hari ddau do paddha nga do wujhu, la nga Yesus.

³³Hari-hari ddau pa dhara rae do naanne ta dakka ke la peworo penyabbhu la ubha kelae ammu do naanne.

³⁴Moko ta peie ke ri Yesus do ae ddau do nga paddha heworawwu heworawwu paddha do na harre, jhe hudhi-keluru lema ae wango ngati ddau do lakka ri wujhu he. Ne wango-wango do harre adho do wie ri Yesus ta pedai lii rowi do tade ke Yesus ri wango ta nadhu No.

³⁵Ta bhale ma bhalli-rai ne, pa dhara rai jhammi-ae-ae, ta kaddhi ke Yesus jhe kako ngati ammu do naanne. Ta kako ke No la hahhi era do keliu pa tele ngati dhara rae do naanne, jhe hebhajha No pa era do naanne.

³⁶Tapulara Simon nga ihi-anga no he ta kako ke la kale Yesus.

³⁷Ta dhai ta peabu ro nga Yesus, moko ta lii ke ro, ”Hhai ke hari-hari ddau do pekale nga Ama.”

³⁸Tapulara ta bhale ke ri Yesus pa ro, ”Mai we di ma peterue ne loro jhara kako dila dhara rae do wala he ri, rae-rae do peumu he pa dhe. Do jhamma lema ya ta la peliba lii la era do na harre, rowi ne dakka Ya ma raiwawa do nadhe, tu lai do naanne ke.”

³⁹ Rowi do mina harre ke ta bela-ta lappa ke Yesus la hebhakka-hakka pa hari hewue ihi rai Galilea, jhe peliba lii pa ammu-ammu hebhajha, jhe hudhi-keluru ne wango-wango he ngati hari-hari ddau do wu jhu.

⁴⁰Ta dakka ke heddau do paddha nadato la nga Yesus. Ta dhai no la nga Yesus, ta lakku rutu ke no pa hedhapa Yesus, jhe lii no, ”Kita ddhei he Ama, do nara ma Ama ta peie ya.”

⁴¹Ta ruba dhara ke Yesus nga ddau do naanne. Hakku ta bhuje ke ri No ne ddau do naanne, Jhe lii, ”Do ddhei Ya ta peie au!”

⁴²Pa awe naanne dhangnge ta ie ke ne ddau do naanne ngati paddha no ne.

⁴³Moko ta lii ke Yesus pa no ta bhale jhe lii,

⁴⁴ ”Jaga eeh, bhole pedhiri au ie ta pa nadu we, tapulara kako we au la nga mone tunu nga menahu, jhe ami we au pa ro ta peteleo ta do ie tarra ke au ngati lua paddha au dhe. Ki alla pemina harre, jhe kako au la jhole ne bhara jhula au, pedute nga lii do dare ri Musa, mii hahhi tada tu ddau lowe, ta do ie tarra ke au ngati lua paddha au.”

⁴⁵Tapulara we ne tao ddau do naanne, ta pedhire ke ri no la hebhakka-bhakka ne jhara lai do naanne, hakku nara dho ke Yesus ta kako nga peteleo-leo-anni la dhara rae do naanne. Wata ke No ta pee pa tele he ke, pa era-era do keliu he ke. Maji lema ta mina harre, pee ma nga dakka loro ne ddau la nga No, ti hebhakka-bhakka.