Read Sabu MARKUS 10 Bible Online

MARKUS 10 - Sabu bible

MARKUS 10

¹Ta pekaddhi ke Yesus ngati era do naanne, jhe kako la ihi-rai Yudea nga ihi-rai do pa hebhakka Loko Yordan. Ta dakka ri ke ne ddau lowe he la pewore Yesus. Jhe mii pa tima ma ta ajha ke ro ri Yesus.

²Do parri ddau do Farisi ta dakka ke la hie Yesus. Ta kebhali ke ro pa Yesus, ”Pedutu nga uku aigama di, ie marra ddau ta pehagghi nga ihi-ammu no?”

³Ta bhale ke ri Yesus, ”Mina ne lipereda do wie ri Musa pa mu?”

⁴ ”Ri Musa do wie ma ne lua pa ddau ta pehagghi nga ihi-ammu no, hadhi we ta tao huri pehagghi uru jhara,” ne bhale ri ro.

⁵”Ne bhuke ri Musa ne lipereda do naanne, rowi do rihi tarra ne hedui ne peajha nga mu,” ane Yesus pa ro.

⁶ ”Tapulara pa awe petari-rai ne, pa awe woro nga panynyi ddau raiwawa ri Deo, do peteleo ke, ta do tao ro ta momone nga mobanni ri Deo.

⁷ Ri do mina harre ke, momone do ta hani ke ri no ina-ama no jhe la peheujhu-headde ta jadhi hahhi nga ihi-ammu no, moko ro hari do dhue, jadhi ta hahhi ke,

⁸hakku ro adho ke ta do dhue ddau ri, tapulara do jadhi ta hahhi ke.

⁹Ri do mina harre, ne nga ne do alla pepeketeme ta jadhi hahhi ri Deo, ie dho ke ta pemenyalle wari ri ddau raiwawa!”

¹⁰Ta alla ro pemaho la dhara ammu, ta kebhali ke ne ana hekola No he, jhara lai do naanne pa Yesus.

¹¹ Ta lii ke Yesus pa ro, ”Nadu do pehagghi nga ihi ammu no, jhe banga ammu ri nga mobanni do wala, ddau napoanne do kenyo-langa huka ke penaja nga ihi-ammu no ne.

¹²Mina harre lema mobanni do pehagghi nga ddau pa hedhapa no, jhe banga ammu nga momone do wala, mobanni do na anne lema do kenyo langa huka ke.”

¹³Ta era ke ne ddau-ddau do nga aggu ne ana ro la nga Yesus ta bhuju jhe wie ne lua tarro ie nga menyarro mangngi tu naiki do na harre. Tapulara ta bhani ke ne ana hekola Yesus nga ddau-ddau do na harre.

¹⁴Ta ngadde ri Yesus ne lai do tao ri ana hekola No he, ta bhani ke No nga ro, jhe lii pa ro, ”Ha ni ro ne naiki-naiki do napoharre pe dakka ma nga Ya. Bhole labba ro, rowi ddau-ddau do mina hedhe ke ne do ta jadhi ai-alla annu-niki Deo.

¹⁵ Henge we ne nadhe! Nadu do dho mengadha nga Deo, mii heddau naiki, jadhi dho no ta ai alla annu-niki Deo.”

¹⁶Ta alla pe lii mina harre, ta kedhaka ke ri Yesus ne naiki do na harre, jhe dhede ne ruai No pa wokolo naiki do na harre heddau-heddau, jhe wie ri no ne lua tarro ie nga menyarro mangngi tu ro.

¹⁷Pa dhara peterue ri Yesus ne loro jhara kako No, ta dakka ke heddau nga perai-loro la nga Yesus. Ta la mejura ke ne ddau do naanne la hedhapa Yesus jhe kebhali no, ”Wo Guru do woie, ne nga ke ne do jhamma ta tao ri ya tu ta hamme ri ya ne muri mada do petu nga do peloro ne?”

¹⁸”Ta nga au hakku lii pa Ya ta do woie?” ne kebhale ri Yesus pa ddau do naanne. ”Bhule dho do woie, titu wata Deo we miha.

¹⁹ Do toi ke ri au ma ne lipereda-lipereda Deo, ’Bhole pemade ddau, bhole kenyo-langa huka, bhole loi bhole mena'o, bhole ha'e hakahi pote, takka pekerihi we ina-ama mu.’ ”

²⁰”Ama Guru,” ne ane ddau do naanne, ”hari-hari ne lipedara do na harre, do pedutu ke ri ya rai ti awe nga ngarru ne ko ya.”

²¹Ta ketarre ke ri Yesus ne ddau do naanne nga ruba dhara jhe lii pa no, ”Nee ko hahhi lai ne do jhamma tu au. Kako we au la pewie hari-hari ne unu oha au he, jhe pebhagi we ne doi kebhue he pa ddau do kehia nga gahara, moko do ta hamme ke ri au ne puhaka do pa era do mmau do megala ne. Ki alla pemina harre, mai we au ma pedute Ya.”

²²Ta rangnge ri ddau do naanne ta do mina harre ne lii Yesus, ta penina noho ke no, jhe langnga ngati era do naanne nga hedui nge, rowi do kaja-do kete'e no.

²³Ta ketarri ke ri Yesus ne ana hekola No he, jhe lii pa ro, ”Hedui tarra tu ddau do kaja ta jadhi ai-alla annu-niki Deo!”

²⁴Ta madalae ke ne ana hekola No he ta rangnge ri ro ne lipedai Yesus do mina harre. Ta lii ri ke Yesus, ”Wo ana-ana Ya, do hedui tarra tu ta jadhi ai-alla annu niki Deo!

²⁵Do rihi memudhe tu hengi'u unta ta maho jhara ro'a wuiwohe ajhu-jhau ngati heddau do kaja ta maho la Raiwawa Deo do Wowiu ne.”

²⁶Ta madalae ke ne ana hekola Yesus he ta rangnge ri ro ne nga ne do pale ri Yesus he hari-hari do na harre. Ta pekerrai-kebhali ke ro heddau nga heddau, ”Ki do mina harre ma, nadu ke ne do ta nara ne lua helama ne?”

²⁷Ta ketarri ke ro ri Yesus, jhe bhale pa ro, ”Ne nga ne do dho jadhi pa ddau raiwawa; hari-hari lai do ta i'a jadhi he we pa Deo.”

²⁸Moko ta lii ke Petrus, ”Heleo we ri Ama, jhi hedhe alla ke pehani hari-hari ne nga we tu ta ma pedute Ama.”

²⁹Ane Yesus, ”Parahajha we mu; ddau do alla pehani ammu nga kemali no, ki adho tuahhu no momone nga mobanni, kiadho ina no, ama no, ana-oha no, kiadho maa are maa terae no, taga Ya nga taga Li Hagha Dhara do ngati Deo ne,

³⁰ddau napoanne do ta hammi do rihi ae ngati ne nga ne do era pa dhara awe do nadhe. Do ta hamme ri no hengahu wari rihi ae ammu nga kemali, tuahhu momone nga mobanni, ina-ama, ana-oha, maa are-maa terae, — nga lua dede nga merahhu le ma. Jhe hine pa awe do medae ne ddau do napoanne do ta hamme ne muri mada do petu nga do peloro ne.

³¹ Tapulara ae ddau do pa awe nadhe do petari-rai do ta jadhi ta do pedakka rahi, jhe ne do peddakka rahi do ta jadhi ta do petari-rai.”

³²Pa dhara awe ta ju la Yerusalem Yesus nga ana hekola No he. Do kako uru Yesus pa hedhapa, jhe ne ana hekola No he hari-hari, do pa dhara nga do dho mengallu dhara. Ddau lowe he do pedutu ro ti kejhunga do pa dhara nga meda'u. Ta pedoa ke ri Yesus ne ana hekola No he la pekiha-anni, jhe pika ri pa ro ne nga ne do ta jadhi hine pa ngi'u No.

³³”Dhanno we ri mu!” ane Yesus, ”pa dhara awe nadhe hee ke di ta ju la Yerusalem. Pa ni, Ana Ddau Raiwawa do ta jhole la dhara wolaabba kattu-kattu mone tunu-menahu nga guru-guru aigama. Do ta wole pemade No, ki alla pemina harre ta jhole ke No la dhara wolaabba ddau do adho do Yahudi.

³⁴Do ta mare ta dhole No ri ro, hebue ri ilu, jhe dede jhe merahho ri ro, jhe ketoe peabbha-rappa No. Tapulara pa lodho do ketallu ne do ta kaddhi bhale wari No.”

³⁵Moko ta dakka ke la nga Yesus, Yakobus nga Yohanes, ana-ana ri Zebedeus jhe lii, ”Ama Guru”, ane ro, ”ne hahhi lai ne do ddhei jhi ta tao ri Ama tu jhi.”

³⁶Ta kebhale ke ri Yesus pa ro, ”Ne nga ke ne do ddhei mu ta tao ri Ya tu mu?”

³⁷Bhale ri ro, ”Ne ddhei jhi, ta mejaddhi pa kedhanga nga keriu Ama, ki nga dhai Ama ta mejaddhi pa kedera era mejaddhi Ama do dhida do kelodo ne.”

³⁸ Ta lii ke Yesus pa ro, ”Ta da dho mu ta ne nga ne liami mu do naanne, makke ta ngino ri mu ngati gela lua hedui-herui Ya do medae ta ngino ri Ya ne, jhe makka mu ta maho la dhara lua jaru nga lalu do ta dhue ta hape ri Ya ne?”

³⁹Bhale ri ro, ”Makka jhi!” Moko ta lii ke Yesus pa ro, ”Tarra do ta ngino ma ri mu ngati gela hedui-herui do ta ngino ri Ya ne, jhe do ta maho la dhara lua jharu nga lalu do ta maho ri Ya ne.

⁴⁰Tapulara we, jhara lua nadu do ta mejaddhi pa kedhanga nga keriu Ya, adho do petatu ri Ya. Deo miha we ne do petatu, ta nadu-nadu ne do ta mejaddhi pa era-era do na harre.”

⁴¹Ta rangngi ri do henguru ddau ana hekola Yesus do wala he, ne lai do naanne ta bubu dhara ke ro nga Yakobus nga Yohanes.

⁴² Hakku ta pedoa ke ro hari-hari ri Yesus, jhe lii, ”Do toi ke ri mu ma, ta do ne kattu-kattu ddau do dho tade Deo, do ta jhalli ta kerupu ne ana rai ro. Jhe ne mone pereda-mo ne pereda ro do ta jhalli ro pekepida.

⁴³ Tapulara ie dho mu ta tao mina harre. Rowi ne do pa petu ne, ddau do ddhei ta jadhi ddau do mone-ae, no do jhamma ta mone pemoko mu.

⁴⁴Jhe ne ddau do ddhei ta jadhi ta do petari ti telora mu, do jhamma ta jadhi ta annu tu hari-hari.

⁴⁵Rowi Ana Ddau Raiwawa ne dakka No adho ta ma pemoke ri ddau. Ne dakka No tu ta ma pemoke nga ta ma jhole ne ngi'u No tu ta ma'i nga golo do ae ddau.”

⁴⁶Ta dhai ke ro la Yerikho. Ta dhai Yesus nga ana hekola No he, hela'u-la'u nga ddau lowe he ta pekaddhi ngati rae do naanne, ta era ke heddau do bhaddu do mejaddhi nga henata-ai pa rujhara. Ne ngara no Bartimeus ana ri Timeus.

⁴⁷Ta dhai ta rangnge ri no, ta do ne ddau do ta lake jhara anne, Yesus do Nazaret ne, ta peka ke no, ”Yesus Ana Daud! Ruba kowe ne dahara au nga ya!”

⁴⁸Ae ddau do bhani nga do bhaddu do naanne, jhe lii pa no ta pehangngo-anni. Tapulara ta ju peka do rihi maddu ri we no, ”Wo Ana Daud! Ruba ko we ne dhara au nga ya.”

⁴⁹Moko ta pengaha ke Yesus, jhe lii, ”Pedoe ko no.” Hakku ta pedoe ke ri ro ne ddau do bhaddu do naanne. Ta lii ke ro pa no, ”Peketanna-anni we au! Nnai ke au ta pedoe ri Yesus, kaddhi we!”

⁵⁰Ta ligo ke ne juba ne ri do bhaddu ne jhe marri-ai-ai no ne kaddhi ta titu, jhe kako ju la nga Yesus.

⁵¹Ta kebhali ke Yesus pa no, ”Ne nga ne ddhei au ta tao ri Ya tu au?” Ta bhale ke ri do bhaddu ne, ”Ama Guru, ne ddhei ya, ta ngaddi ya.”

⁵²”Kako we au!” ane Yesus pa no, ”taga ta ri do parahajha ke au pa Ya, ie ke au.” Pa dhara awe naanne dhangnge ta ngaddi ke ne ddau do naanne. Moko ta pedute ke Yesus ri no pa loro kako Yesus do naanne.