Read Sabu MARKUS 11 Bible Online

MARKUS 11 - Sabu bible

MARKUS 11

¹Ta umu ro nga Yerusalem, ta dhia ke ro la Betfage nga Betania, pa keraha Lede Zaitun. Pa ni ta pepu ke uru jhara ri Yesus do dhue ddau ngati ana hekola No he.

²”Kako we mu la dhara rae do pa hedhapa di dhe,” ne lii Yesus pa ro, ”Mina harre dhangnge mu ne maho la dhara rae do na nidhe, do ta ngadde dhangnge ke ri mu hengi'u keledai do era do akke, do dho ngaddi dae ta menya'e ri ddau. Ma'e ri mu jhe aggo ma dhe.

³Jhe kinga era ddau do kebhali pa mu, ta nga hakku ma'e ri mu ne keledai do naanne, bhale ri mu, ’Ne ta paralu Muri nga no, jhe do ta pebhale ri No nga henginga.’ ”

⁴Ta kako ke hari do dhue ne ana hekola Yesus do na harre, jhe peabu tarra ro nga hengi'u ana keledai do era do akke pa kelae hewue ammu do pa ngidi ru jhara. Moko ta la ma'e ke ri ro ne keledai do naanne.

⁵Ta kebhali ke ne ddau-ddau do era pa anne, pa ro, ”Heeh, tanga mu pa anne? Ta nga hakku ma'e ri mu ne ana keledai do napoanne?”

⁶Ta bhale ke ri ro mii do lii Yesus pa ro he. Moko ta hane ke ri ddau-ddau do era pa anne, pee aggo ne keledai do naanne ri ana hekola Yesus he.

⁷Ta dhai ro la nga Yesus, ta walla ke ri ro pa danni keledai do naanne ri juba ro, moko ta menya'e ke ri Yesus.

⁸Ae ddau do walla ne juba ro pa rujhara ne, era ri do liba kelai-kelai ajhu do aggu ri ro ngati dhara maa pa rujhara do ta lake ri Yesus ne.

⁹ Hari-hari ddau, ie ta do pa hedhapa, mina harre lema do pa kejhunga he do nga hodho nga peka, ”Waje we Deo! Lua tarro ie nga menyarro mangngi tu No do dakka pa dhara ngara Muri!

¹⁰Medii-melatu ne lua pereda No do medae ta dakka ne — lua pereda Daud ama-appu di! Wue-wa je we ne ngara Deo do Dhida do Ketutu ne!”

¹¹Pa pedakka ta dhai ke Yesus la Yerusalem, jhe maho la Ammu Deo. Pa ni ta heleo ke ri No pekehero hari-hari kebhihu. Tapulara rowi do umu ke ta kerabba moko ta pekaddhi ke No la Betania hela'u-la'u nga hari henguru do dhue ddau ana hekola No he.

¹²Ta bhale ma jhammi-ae, pa dhara nga kako ro, mahhu-anni ngati Betania, ta menganga ke Yesus.

¹³Ngati jjhau ta ngadde ke ri Yesus hekepue kepallu do dhai bebu ne rrau ne. Hakku ta kako ke Yesus la kepue kepallu do naanne, ta la heleo ngeta era ne wue ne. Tapulara ta dhai Yesus la kepue ajhu do naanne, bhule dho nga wue ie ta hewue, titu wata ke rrau ne we, rowi do adho dae do dhai la awe wue kepallu.

¹⁴Moko ta lii ke Yesus pe kepue ajhu do naanne, ”Jhari rai ngati awe do nadhe bhule dho ke ie ta heddau he do ta nga'e ri ne wue au!” Ne lipali Yesus do naanne do rangnge ri ana hekola No he.

¹⁵Ta alla pemina harre ta dhai ke ro la Yerusalem, ta kako ro ke Yesus la Ammu Deo. Pa ta jhari ke ri No ta hudhi ta keluru hari-hari ddau do pewie-pe walli pa era do naanne. Nyakka pekeloli-bito bato ne meja-meja mone pehuru doi he, mina harre lema ne bhagu-bhagu mone pewie koro jhawa he.

¹⁶Jhe o'o le dho ke No ta era ie ta heddau he do nga aggu nenga-nga jhara kebhalla Ammu Deo ne.

¹⁷ Alla pemina harre ta ajha ke ri Yesus ne ddau-ddau do era pa anne. Ta lii ke No, ”Pa dhara Buku Lidara-Likewahhu Deo era do hure do bhuke Do lii Deo, ’Ammu Ya dhe, do ta pale ta ammu era hebhajha hari-hari ddau-rai.’ Tapulara pejadhe ri mu ta nyabbhu do mena'o we!”

¹⁸Ri kattu-kattu mone tunu-menahu nga ri guru-guru aigama do rangnge ne pali Yesus do naanne. Moko ta jhari ke ro ta kale ne rujhara ta pemade Yesus. Do meda'u ro penaja nga No, rowi hari-hari ddau do kena'a-ketarra pa ade ro ne liajha Yesus.

¹⁹Ta umu ta maddha ta pekaddhi ke Yesus nga ana hekola No he ngati dhara rae do naanne.

²⁰Rai jhammi-ae-ae ta bhale ma helodho ne, ta dhai ta narru ke ro jhara kepue kepallu ne, ta ngadde ke ri ro ne kepue kepallu do naanne do made ke lohe la amo-amo he.

²¹Moko ta henge ke ri Petrus ne lai do jadhi ti helodho ne. Moko ta lii ke Petrus pa Yesus, ”Ama Guru, hakko ko ta heleo! Ne kepallu do wole ri Ama ne, made ke!”

²²Ta bhale ke ri Yesus, ”Parahajha we pa Deo.

²³ Tarra-tarra do nara mu ta lii pa bhojo do nadhe, ’Dhede-anni we jhe hora-anni we la dhara dahi!’ mo ko ne lai do na poanne do ta tao ma tu mu; hadhi we mu ta do dho keba'a-kepapi jhe do parahajha ta do ne nga we do pale rowi mu, napoanne do ta jadhi tarra-tarra ma.

²⁴Rowi do mina harre ke, henge we ri mu ne nadhe: Kinga dhai mu ta hebhajha jhe ami heworawwu lai, parahajha we ta do alle ke pewie ri Deo ne nga ne do ame ri mu ne.

²⁵ Jhe kinga hebhajha mu, tapulara ne ade mu adho do mengallu dhara penaja nga heddau, pehuba kowe ne ddau napoanne uru jhara, mita ie ri Ama mu do era pa era do mmau do megala ne le ma ta pehai-pehuba ne lubhu harro nga menyilu mu. [

²⁶Ki do dho pehuba ke ddau do he wala ri mu, Ama mu lema do era pa era do mmau do megala ne, wae le dho ma ta pehai-pehuba harro nga menyilu do tao ri mu he.]”

²⁷Ta bhale ke ro la Yerusalem. Pa dhara nga lappa Yesus pekehero pa dhara Ammu Deo, ta dakka ke ne kattu-kattu mone tunu-menahu he, guru-guru aigama nga kattu-kattu unu do Yahudi he la nga Yesus.

²⁸Ta kebhali ke ro, ”Jhalli pa lai ne nga ke Au, hakku tao ri au hari-hari ne lai do na hedhe? Nadu ke ne do wie higa pa Au?”

²⁹Ya lema ddhei ta kebhali pa mu. ”Bhale we ri mu mita bhale le ri Ya pa mu, nga higa ti nadu hakku tao ri Ya ne lai-lai do na hedhe.

³⁰Ne lua pejhiu do pekako ri Yohanes ne, nga higa ngati nadu, ngati Deo we ngati ddau-raiwawa?”

³¹Moko ne kattu-kattu mone tunu-menahu he nga guru-guru aigama he ta jhari ke ta peli pa telora ro. Ane ro, ”Kinga lii di, ’Nga higa ti Deo’, do ta lii No, ’ta nga mu hakku dho parahajha pa Yohanes?’

³²Tapulara hedui le ma kita lii di, ’Nga higa ti ddau raiwawa.’ ” Rowi do meda'u ro penaja nga ddau lowe he, rowi ri hari-hari ddau do takke Yohanes ta heddau nabi.

³³Hakku ta bhale ke ri ro pa Yesus, ”Toi dho ri jhi.” Moko ta lii ke Yesus pa ro, ”Ki do mina harre ma, wae le dho ma Ya ta pika pa mu, nga higa nadu ne tao ri Ya, hari-hari ne lai do na hedhe.”