Read Sabu MARKUS 12 Bible Online

MARKUS 12 - Sabu bible

MARKUS 12

¹ Moko ta jhari ke Yesus ta pedai lii nga pake lipehakku pa kattu-kattu mone tunu-menahu he, guru aigama nga kattu-kattu unu do Yahudi he. Ta lii ke Yesus, ”Era ke heddau do halla ago pa hewue dhoka ago. Ta lao ke ri no ri lau ne dhoka do naanne. Ta alla pemina harre ta kkei ke no ro'a tu nalu hengappi woago, jhe petito ri no hewue ne leo jaga. Ta alla pemina harre ta pekehewe ke ri no pa do parri ddau mone jhagga, jhe pekaddhi no la rai do hewala.

²Ta dhai pa awe puu woago, moko ta pepu ke ri ddau do naanne heddau ne naannu no la nga mone jaga dhoka do na harre, tu ta la hammi ne ihi-rai unu pala mone dhoka ne.

³Tapulara we, ta kappe ke ne naannu do naanne mone jhagga do na harre, ta alle pekappe ri ro ta dede ta merahho ke, jhe lii pa no ta bhale nga ai wue.

⁴Moko ta pepu ri ke ri mone dhoka, ne naannu do wala ri. Tapulara ri mone jhagga dhoka he, ta mate ta wabbe petire pa kattu we na naannu do naanne, jhe hudhe-perage no nga dio-pedaddhe ri no.

⁵Ta pepu ri ke ne mone dhoka ne, heddau naannu do wala ri. Tapulara mate ri ro ta tah bho pemade ne naannu do naanne. Jhe mina harre ke teru ne tao ri ro pa do ae ri ko ne naannu do wala he, era do dede-do merahhu jhe era lema do pemade ri ro.

⁶Nadu ri ke ne nara ta pepu ri mone dhoka ne pa dhara awe do nadhe? Titu wata heddau ke, ana no miha, do ana hajha-ana ddhei ne no. Hakku pa pedak ka rahi ta pepue ke ri no ne ana no do naanne la nga mone jhagga dhoka do na harre. ’Do tatu ne ana ya dhe, do ta takke pekerihe ri ro,’ pa dhara penge mone dhoka ne.

⁷Tapulara ta peli ke ne mone jhagga dhoka he, heddau nga heddau, ’No ke dhe ne mone hammi puhaka ne. Mai ma pemade ri di, mita ie ta bunu pa di ne puhaka no!’

⁸Moko ta kappe ke ri ro ne ana do naanne, jhe pemade. Ne ngi'u ana do naanne ta nabhe ke ri ro la tele ngati dhara dhoka ne.”

⁹Moko ta kebhali ke Yesus, ”Ne nga ke ne do ta tao ri mone dhoka do naanne? Do dho rae here ke no ta kako, jhe la pemade ne mone jhagga dhoka do wala ri.

¹⁰ Do bhara tatu ke, do alla ke ri mu peajhe ne kewahhu do nadhe pa dhara Buku Lidara-Likewahhu Deo. ’Ne wowadu do dho pake ne ri tuka-tuka wowadu alla ke pejadhi ta wowadu kepue.

¹¹Na dhe ke ne lua jhagga Muri do dhai tarra ne gaa nga merake!’ ”

¹²Moko ne mone kettau-kettau ngati do Yahudi he, do dhanno ne lipehakku do naanne, ta kale ke ne rujhara tu ta kappe Yesus, rowi do toi ke ri ro ne lua pedabbho lipehakku do naanne do petuje penaja nga ro ke. Tapulara do meda'u ro penaja nga ddau lowe he. Hakku ta langnga ke ro jhe hane Yesus.

¹³Do parri ddau do Farisi nga do parri ddau do ti kejie Herodes do pepu ta la hie Yesus nga pake likebhali-likebhali.

¹⁴Ta kako ke ro la nga Yesus jhe lii, ”Ama Guru, do toi ri jhi ta Ama heddau do mola jhe do adho do pedhu li nga lii nadu we. Ajha ri Ama nga dhai teleo, ne jhara lua ddhei Deo tu ddau raiwawa, rowi Ama adho do ketarri worawwu ddau. Nah, hakko ko ri Ama ta peteleo pa jhi, ’Pedutu nga uku aigama di, ie marra ta ma'i bhea pa Kehe we adho? Do jhamma ke di ta ma'i bhea do naanne we adho?’ ”

¹⁵Do toi ke ri Yesus ne lua pekebhalli-anni ro do na harre. Ta bhale ke ri Yesus, ”Ta nga ke hakku ma hie Ya ri mu? Hakko ko ri mu ta pedhelo pa Ya hemada doi wopudi.”

¹⁶Moko ta wie ke ri ro hemada doi wopudi pa Yesus. Moko ta kebhali ke Yesus pa ro, ”Worawwu nga ngara nadu nadhe?” ”Kehe,” ne bhale ri ro.

¹⁷”Nah, ki do mina harre,” ane Yesus pa ro, ”wie we pa Kehe ne nga ne do unu ri Kehe, jhe wie we pa Deo ne nga ne do unu ri Deo.” Ta madalae ke ro ta rangnge ri ro ne bhale Yesus do naanne.

¹⁸ Moko ta dakka ke do parri ddau ngati kejie do Saduki la nga Yesus. (Ro do na harre do ngati kejie do nga lua tada ta do adho do era lua kaddhi bhale wari tu ddau do alla pemade.)

¹⁹ ”Ama Guru,” mina harre ke ne ane ro lang ngu Yesus, ”Do bhuke ri Musa ne lidara tu di: ’Ki made heddau momone jhe do adho no do era nga ana, moko ne tuahhu ri no do jhamma ta banga-ammu nga mobanni do bhalu napoanne mita pemure ne kolo loro ngati tuahhu no do made ne.’

²⁰Ngaddi ta era do pidu ddau do petuahhu. Ta banga ammu ke ne do mone a'a ne, moko ta made ke nga do dho bhule ana.

²¹Moko ta peloje ke ne ihi-ammu do made ne ri nome dhue ne, tapulara made ri ne nome dhue nga do dho ngaddi-ana. Mina harre lema ne do jadhi pa do ketallu ne,

²²jhe pelohe la do kepidu ne. Pedakka rahi ta made le ke ne mobanni do naanne.

²³Pa lodho kaddhi bhale wari do made, jadhi ta ihi-ammu nadu ke ne mobanni do naanne? Rowi hari do pidu ddau alla ke pemanno-ammu nga no!”

²⁴Ta bhale ke ri Yesus, ”Dhai keliru tarra mu hedhe. Rowi tada dho mu ne lii pa dhara Buku Lidara-Likewahhu Deo, jhe mina harre lema nga higa Deo.

²⁵Rowi kinga dhai ta kaddhi bhale wari hari-hari do made, adho ke ro do ta banga-ammu ri, tapulara do ta muri mada ke ro mii naju-naju Deo do mmau megala he.

²⁶ Jhe jhara lua pekaddhi bhale wari do made, ngaddi dho mu ta ajha pa dhara buku Musa, jhara ro'a koo nga huki do woe ne. Pa dhara lilolo-lilolo do na harre do hure do bhuke, do lii Deo pa Musa, ’Ya ke ne Deo Abraham, Deo Ishak nga Deo Yakub.’

²⁷Deo do naanne adho Deo ddau do made. No Deo ri ddau do muri. Do dhai keliru tarra mu hedhe!”

²⁸ Moko ta dakka ke heddau guru aigama ta la dhanno ne lai do pedae ri Yesus nga ddau-ddau do ngati kejie do Saduki do na harre. Ta heleo ri guru aigama do naanne, do dhai woie ne bhale do bhale ri Yesus ne. Moko ta kebhali ke no pa Yesus, ”Lipereda do na mii ke ne do rihi ketutu ngati hari-hari lipereda?”

²⁹ Ta bhale ke ri Yesus, ”Lipereda do petari, nadhe ke: ’Dhanno we wo do Israel! Deo Muri di ne, Muri do naanne do kemolo.

³⁰Ddhei we au nga Deo Muri au nga hewue nge danni ade, nga hari-hari uku nga mmau dhara au, nga hari-hari lua rui nga kedii au.’

³¹ Lipereda do kedhue ne: ’Dhei we au nga ddau ihi-anga, mii ddhei nga ngi'u au le miha.’ Bhule dho ke ne lipereda do kerihi ri ngati dhue lipereda do napoharre.”

³² Moko ta lii ke ne guru aigama do naanne pa Yesus, ”Dhai petu tarra, Ama Guru. Tarra, do petu tarra ne do ane Ama ne: Muri ke ne Deo do Kemolo ne, jhe bhule ne Deo do wala ri.

³³ Jhe ddau raiwawa do jhamma ta ddhei nga hewue nge danni ade, nga hari-hari uku nga mmau dhara no, nga hari-hari lua rui nga kedii no. Jhe mina harre lema do jhamma ta hajha ta ddhei nga ddau nga ddau ihi-anga mii ddhei nga ngi'u no le miha. Napoanne do rihi ie ngati jhula bhara tunu-menahu nga bhara jhula do wala-wala he ri pa Deo.”

³⁴Ta heleo ri Yesus ta do ne libhale guru aigama do naanne, libhale do wo ie, moko ta lii ke Yesus pa no, ”Au dhe, dae hudi ke ta jadhi ai-alla ngati annu-niki Deo.” Ta alla pemina harre bhule dho ke heddau he do bhani ta pekako likebhali ri pa Yesus.

³⁵Pa dhara nga ajha pa Ammu Deo, ta kebhali ke Yesus, ”Mina mii hakku tu ta lii ne guru-guru aigama he ta ne Duae Mone ma'i-Mone golo ne ta kolo loro Daud?

³⁶ Jhe dhai ri Daud miha — taga ri do peke ri Henga Deo — do lii, ’Lii Muri pa Muri ya: mejaddhi we au pa hebhakka kedanga Ya tade alla pepejadhi ri Ya ne ihi muhu-ihi lawa Au ta pewawa-anni la dhara kabha jhalla Au.’

³⁷Hakku ri Daud miha do pale ke ne Duae Mone ma'i-Mone golo ne ta ’Muri’, ta mina mii ri ke hakku pale No ta kolo loro Daud ri?” Ne ddau lowe do era pa Ammu Deo he, dhai mengallu dhara, ne dhanno ne liajhe Yesus.

³⁸Ta lii ke Yesus pa ro, ”Meniga pewoie-ie mu penaja nga guru guru aigama he. Ne ddau do na harre do rihi ddhei ta bela nga lappa pa rujhara nga pake juba do dhai dhedho nga do ddhei ta pelangu ri ddau pa paha-paha.

³⁹Ne ddhei ro ta mejaddhi pa era-era do woie pa dhara ammu hebhajha, mina harre lema pa era-era lai-ala.

⁴⁰Do ta pelu ri ro ne do ula-do bhalu, jhe raba ne ammu nga kemali ro. Jhe tu ta herimu ne wui ai-wui tao ro do woapa he, ta hebhajha ke ro pemerai-rai. Ne lua wolo tu ro do mejanni hine!”

⁴¹Pa dhara nga mejaddhi penaja hedhapa Yesus ju la nga patti bhara jhula pa Ammu Deo. Ta heleo ke ri Yesus ne ddau do takka doi la dhara patti do naanne. Ae ddau do kaja do pemaho doi do ae;

⁴²moko ta dakka ke heddau mobanni do kehia, jhe la pemaho ri no dhue mada doi mara, doi womae do dhai wawa kebhue.

⁴³Moko ta pedoa ke ri Yesus ne ana hekola No he, jhe lii pa ro, ”He leo ko ne lai do nadhe; do pemaho ri mobanni do kehia do na nidhe, do rihi-ae ngati do pemaho ri hari-hari ddau do wala he la dhara patti do na nidhe.

⁴⁴Rowi ro hari-hari, ne do wie ri ro ngati unu-oha ro do kerihi. Tapulara we ne mobanni do na nidhe maji lema no ta do rihi kehia, Alla ke ri no pewie hari-hari ne nga we ne do era pa no, rihi-rihi bhara do rihi paralu tu muri-mada no.”