Read Sabu MARKUS 14 Bible Online

MARKUS 14 - Sabu bible

MARKUS 14

¹ Medae dhue lodho ke jhe dhai la lodho Nga'a Kewahhu Paskah nga Roti do dho tao ri muu ne. Ne kattu-kattu mone tunu-menahu he nga guru-guru ai gama he do pa dhara nga kale loro jhara ke, mita do dho era nga likenya'u nga-nga tu ta pemade Yesus.

²”Tapulara bhole tao ri di pa dhara nga nga'a kewahhu dhe,” ne ane ro, ”rowi do ta hhau lua kenya'u nga buluru.”

³ Ta dhai Yesus ta era pa Betania, pa ammu Simon, do uru he do lakka ri paddha nadato ne, ta dakka ke heddau mobanni la nga Yesus. Dakka ne mobanni do na anne nga aggu henawobhuri eiloko wwau mangngi do dhai dhida kebhue. Pa awe mejaddhi ta nga'a Yesus, ta pehappo ke ne koko wonabhuri ne ri mobanni do naanne, jhe hegabbhe ri no la wokolo Yesus.

⁴Do parri ddau ne ddau do era pa anne ta bubu dhara ke jhe lii heddau pa heddau, ”Guna nga ke ne dhutu liba-ila ne eiloko wwau mangngi do mina hidhe ne worawwu dhida kebhue?

⁵Eiloko wwau mangngi do mina hidhe do nara ta pewie nga kebhue do rihi ti tallu ngahu doi mela pudi, jhe ne doi he do nara ta wie pa do kehia nga gahara!” Moko ta bhani ke ro nga mobanni do naanne.

⁶Tapulara ta lii ke Yesus, ”Hane no! Ta nga hakku pehedue no ri mu? Ne nga ne do tao ri no, hahhi lai do woie nga do jhamma ta pekerihe penaja nga Ya.

⁷ Do kehia nga garaha do era loro ma pa telora mu. Pa awe do nami we, ki ddhei mu, ta nara he we mu ta ruba dhara nga ro. Tapulara ya dhe adho ke do ta era loro ri nga mu.

⁸Ne nga ne do tao ri mobanni do nadhe, nadhe ke nedo nara ta tao ri no penaja nga ya. Nnau ta mii pemoke lua pedane Ya ke ri no ri eiloko wwau mangngi do nadhe uru jhara nga do dho dhai dae ne awe ne.

⁹Pa rahajha we! Pa hari hewue raiwawa dhe, pa mii we ne Li Hagha Dhara do ngati Deo ne pelebe, ne nga ne do alle petao ri mobanni do nadhe do ta pedhire lema mii hahhi lua ta pehewene ne.”

¹⁰Moko Yudas Iskariot, heddau ngati henguru do dhue ddau ana hekola Yesus he, ta kako ke la nga kattu-kattu mone tunu-menahu he nga lua pedabbho ta la jhole Yesus pa ro.

¹¹Dhai mengallu dhara tarra ro ta rangnge ri ro ne litawa do naanne, jhe jadji ro ta wie doi pa Yudas. Moko ta jhari ke Yudas ta ka le ne awe do woie tu ta jhole Yesus.

¹²Pa lodho do petari lua Nga'a Kewahhu Roti do dho bhule nga muu ne — pa awe kehabbha ki'i Paskah ne — ta kebhali ke ne ana hekola Yesus he, ”Pa mii ke ne ddhei Ama, ne pemoke ri jhi ne nga'a Paskah tu Ama?”

¹³Ta pepu ke do dhue ddau ngati ro ri Yesus, ”Kako we mu la dhara rae, pa ni do ta peabu mu nga heddau momone do nga aggu hewue guhi do nga ei.

¹⁴Pedute we no ri mu la ammu do maho ri no ne, jhe lii pa muri ammu do naanne, ’Lii Ama Guru ta ma kebhali, pa mii ke ne era tu No nga ana hekola No he ta nga'a Nga'a Paskah ne.’

¹⁵Ri ddau napoanne do ta pejhujhe pa mu ne kama do balla pa dhida. Ne kama do napoanne do alle ke pepeato pewoie-ie jhe do nabbu hari-hari nalu-Pemoke we ri mu ne kama do naanne tu di.”

¹⁶Moko ta kako ke ne do dhue ddau do na harre la dhara rae do naanne. Pa ni ta peabu tarra ke ro, hela'u nga lii Yesus ne pa ro. Moko ta pemoko ke ri ro ne nga'a Paskah ne.

¹⁷Pa maddha he, ta dakka ke Yesus nga hari henguru do dhue ana hekola No he.

¹⁸ Pa awe mejaddhi ta nga'a ro, ta lii ke Yesus, ”Dhanno ko ri mu: heddau ti telora mu do nga'a hela'u-la'u nga Ya, do ta jhole Ya.”

¹⁹Ta rangnge ne lii do naanne, moko ta hedui ke ne ade ana hekola he. Moko ta kebhali ke ro heddau-heddau pa Yesus, ”Do bhara tatu ta adho ya ne do ane Ama ne?”

²⁰Ta bhale ke ri Yesus, ”Ne ddau do naanne, heddau ti telora mu ma do henguru dhue ddau hedhe, do nga'a pa hewue piri nga Ya.

²¹Do tarra ma ta Ana Ddau Raiwawa do ta made mii do hure do bhuke pa dhara Buku Lidara-Likewahhu Deo. Tapulara dhai tarra ne apa nga kedhaha pa ddau do jhole Ana Ddau Raiwawa ne!”

²²Pa dhara awe nga nga'a ro, ta aggo ke ri Yesus ne roti ne, jhe peha'e No kolo lii ie-ae pa Deo. Ta alla pemina harre ta pipi-pipi ke ri ruai No ne roti do naanne, jhe wie ri No pa ana hekola No he, jhe lii No, ”Aggo we, jhe nga'e we, nadhe ke ne kebhue-kedalli Ya.”

²³Ta alla pemina harre ta aggo ke ri No hewue ne era nginu eiago. Ta peha'e ri ke ri No ne kolo lii ie-ae pa Deo, jhe wie ri No pa ana hekola No he. Ta nginu ke ro hari-hari.

²⁴ Ta alla pemina harre ta lii ke Yesus, ”Nadhe ke ne raa ya do ta perue ne lijaji Deo ne, raa do dhute tu do ae ddau.

²⁵Nginu wari dho ke Ya eiago do mina hedhe, tade dhai ne awe tu Ya ta nginu ri ne ei ago do wowiu ne hela'u-la'u nga mu pa Raiwawa Deo do Wowiu ne.”

²⁶Ta alla pemina harre ta jhuka ke ro hewue lilodho liwue-waje. Ta moko mina harre ta kako ke ro la Lede Zaitun.

²⁷ Moko ta lii ke Yesus pa ro, ”Mu hari-hari do ta perai, jhe hane Ya miha. Rowi pa dhara Buku Lidara'likewahhu Deo do hure do bhuke, ’Do ta pemade ri Deo ne mone bhata ne, jhe ne naki'i-naki'i no he do ta menyalla kebali-bali.’

²⁸ Tapulara ki alle ke Ya pepekaddhe bhale wari, do ta kako ya uru jhara nga ti mu la Galilea.”

²⁹”Adho,” bhale ri Petrus, ”La'a we no ro hari-hari pee hane Ama, ya hane tu-tu dho Ama.”

³⁰”Henge eeh,” ne ane Yesus, ”parammi do nadhe dhangnge, nga do dho tutu-oo dae manu dhue wari, alle ke Ya pepehile ri au tallu wari.”

³¹Ta bhale ke ri Petrus nga rihi rui ri, ”La'a we no ya pejhamma ta made hela'u-la'u nga Ama, wae tu-tu dho ya ta lii ta do dho tade Ama!” Mina harre lema ne lii ana-ana hekola do hewala he.

³²Ta dhai ke ro la hahhi era ne ngara era do naanne Getsemani. Ta lii ke Yesus pa ana hekola No he, ”Mejaddhi ko we mu pa dhe, ta la hebhajha ko Ya.”

³³Ta tina ke ri Yesus, Petrus, Yakobus, nga Yohanes ta kako hela'u-la'u nga No. Jhari ta hedui ke No, jhe pedihi noho. Ta lii ke No pa ana hekola No do tallu ddau he,

³⁴”Ne ade Ya, dhai tarra ke ne hedui, hala dho ke mii do ta made he ke. Pee we mu pa dhe, jhe meniga-niga we mu!”

³⁵Ta kako ke Yesus pejjhau-anni hudi ngati ro. Ta mejaddhi lakku rutu ke No jhe peheguru-anni la worai, jhe hebhajha No. Pa dhara lihebhajha No ne, ta ami ke No, mita ki ie mudhe he, tenge dho ke ri No ta lake ne lua hedui do naanne.

³⁶”Ama, bhule dho ke hahhi lai he do dho jadhi pa Ama. Pelude ko we ne lua hedui-herui do nadhe ngati Ya. Tapulara we, bhole jadhi pedute nga do ddhei Ya, jadhi we nga lua ddhei Ama ma.”

³⁷Ta alla pe mina harre ta bhale ke Yesus, jhe ngaddi ri No ne ana hekola No he era ke do bba'i. Ta lii ke No pa Petrus, ”Simon ta bba'i au? Nara le dho au ta taha pe dhara heja he hela'u-la'u nga ya?”

³⁸Moko ta lii ke Yesus pa ro, ”Jaga-jaga we, jhe hebhajha we, mita do dho peabu mu nga lua ruhakku. Tarra ma ta do era ne lua ddhei mu ta jhagge ne lai do petu, tapulara nara dho, rowi ne ngi'u mu do keloe.”

³⁹Ta kako ri ke Yesus hewari ri la hebhajha jhe kebhale ne lii pali No ma do uru jhara ne.

⁴⁰Ta alla penanne ta bhale ri ke Yesus la nga ana hekola No he, moko era ma ro do bba'i rowi do rihi ke ro ne mengattu. Moko ta ngela he ke ro, i'a dho ke pali nga-nga ri pa Yesus.

⁴¹Ta dhai Yesus ta bhale pa do ketallu wari ne, ta lii ke No, ”Hee ko ma mu do bba'i ta peila keloe? Waji we! Dhai ke ne awe pa Ana Ddau ta jhole la dhara wolaabba ddau do tao apa nga kerewe.

⁴²Kaddhi we, mai we di ma kako ngati dhe. Heleo we! Naanne ke tianne ne ddau do ta jhole Ya ne!”

⁴³Pa dhara nga pedai lii ko Yesus, ta dakka ke Yudas, heddau ngati hengu ru do dhue ddau ana hekola Yesus he. Hela'u-la'u nga Yudas, dakka do ae ddau do nga aggu kelewa nga tubu. Ro do na harre do pepu ri kattu-kattu mone tunu-menahu he, guru-guru aigama nga ri kattu-kattu do Yahudi he.

⁴⁴Do alla ke pepeato ri Yudas ne hahhi telia tu ro, ”Nadu ne ddau do hengaddho ri ya ne, No ke. Kappe ri mu jhe aggo No, jhe jage nga dhai bharra,” mina harre ke lii jaji Yudas pa ddau do pedute no he.

⁴⁵Ta dakka Yudas ta dabbho dhangnge ke no ju la nga Yesus, jhe lii, ”Ama Guru!” ta hengaddho ke Yesus ri no.

⁴⁶Moko ta kappe ke Yesus ri ddau-ddau do penau nga Yudas he, jhe ujhe Yesus ri ro.

⁴⁷Tapulara hala heddau ngati do era paanne, ta radda kelewa ke no, jhe pare pa heddau annu ri Kattu Mone-ae mone tunu-menahu he, tade happo ne wodilu naannu do naanne.

⁴⁸Moko ta lii ke Yesus pa ro, ”Ne penge ri mu hedhe, ta ddau do tao apa ke Ya dhe, hakku dakka mu nga kelewa nga tubu ta ma kappe Ya?

⁴⁹ Helodho-helodho, adho do ajha ddau ma Ya pa hedhapa mu pa Ammu Deo, jhe pe'e Ya ta kappe ri mu? Tapulara do jhamma tarra ma ya ta mina harre, mita tobo ke ne do era do hure do bhuke pa dhara Buku Lidara-Likewahhu Deo.”

⁵⁰Moko ta perai ke hari-hari ne ana hekola Yesus he, jhe hane Yesus miha.

⁵¹Heddau ana do ngarru do nga pake hebhalla hi'i we pa ihi no, ta kako ke la pedute Yesus. Ta kappe ke no ri ddau he,

⁵²tapulara ta petegalli-anni ke no, ta gole ke ri no ne hi'i no ne, jhe perai nga do dho bhule bhara pa ihi.

⁵³Ta aggo ke Yesus la ammu kattu mone-ae mone tunu-menahu ne. Pa ni do pe teni ke hari-hari kattu mone tunu-menahu, kattu-kattu do Yahudi nga guru-guru aigama he.

⁵⁴Do pee nga pedute ma Yesus ri Petrus ngati jjhau tade maho ls kebhalla ammu kattu mone-ae mone tunu-menahu ne. Pa ni ta kako ke no la menyiru ai hela'u-la'u nga mone jaga he.

⁵⁵Kattu-kattu mone tunu-menahu he nga Kattu-kattu Aigama he, do petadi ke ta kale ne kewahhu do nara ta pebune hala pa Yesus, jhe nara ro ta happo ne lua wolo ta pemade Yesus. Tapulara na ra dho ro ie ta hekewahhu he.

⁵⁶Ae ne hakahi do pedoa ri ro ta la wie lilolo do dho petu penaja nga Yesus, tapulara ne lilolo ro do petabbu heddau nga nga heddau.

⁵⁷Moko ta titu ke do parri ddau hakahi jhe wie ne lilolo do pote do mina hedhe jhara Yesus,

⁵⁸ ”Do rangnge ri jhi ne lii ddau do nadhe do lii mina hedhe, ’Do ta pekelole ri Ya ne Ammu Deo do nadhe, do tao ri ddau raiwawa, jhe ki ludu ti tallu lodho, do ta petitu do wala ri Ya, do adho do jhagge ri ruai nga kolo ku'u ddau raiwawa!’ ”

⁵⁹Tapulara ne lilolo-lilolo ddau-ddau do na harre do pee ma nga petabbu heddau nga heddau.

⁶⁰Moko ta titu ke ne kattu mone-ae mone tunu-menahu ne pa hedhapa ro hari-hari, jhe kebhali pa Yesus, ”Ta nga ri Au hakku do dho bhale ne likela-likela do penaja nga Au hidhe?”

⁶¹Tapulara ta pehangngo-anni we Yesus. Wae le dho ke No ta boka ubha he. Moko ta kebhali ri ke ne kattu mone-ae mone tunu-menahu ne pa Yesus, ”Au ke ne Duae Mone ma'i-Mone golo ne, Ana Deo do mmau do megala ne?”

⁶² Ta bhale ke ri Yesus, ”Ya ke, jhe do ta ngadde Ana Ddau Raiwawa do ta mejaddhi pa hebhakka kedhanga Deo Do Mone Wiki Rihi Higa nga Pereda ne, jhe do ta dakka jhara merammu pudi ngati ihi liru ni.”

⁶³Moko ta hio-kepale-pale ke ne bhara pake no ri kattu mone-ae mone tunu menahu ne, jhe lii, ”Tenge dho ke ta pake hakahi ri.

⁶⁴ Do rangnge miha ke ri mu ne lipedai-lipedai No do kare-menihe Deo. Ri do mina harre ke, ne nga ke ne lii mu mu pa dhara awe nadhe?” Ta happo ke ri ro hari-hari ta do hala ke Yesus, jhe do jhamma ta wole ri lua wolo ta pemade.

⁶⁵Moko ta jhari ke do parri ddau ta penyi'o Yesus ri ilu, jhe henabbhe ri ro ne tangamada No, jhe dede-merahho ri ro. Ta lii ke ro, ”Hakko ko ta peira ri Au, nadu ke ne do dede Au dhe?” Ne mone jaga he le ma ta dutu hela'u le ta tabbhe Yesus.

⁶⁶Pa awe nga era ko Petrus pa kebhalla ammu ne, ta dakka ke heddau moban ni, annu ri kattu mone-ae mone tunu-menahu ne la anne.

⁶⁷Ta ngadde ke Petrus ri no do era do menyiru ai, ta ketarre ke ri no pewoie-ie ne tanga mada Petrus, jhe lii no, ”Adho ke ta au lema dhe, do hela'u-la'u nga Yesus do Nazaret ne?”

⁶⁸Tapulara ta pehile ke ri Petrus, ”Toi dho ri ya, jhe tade dho ri ya, ne nga ne lua pedabbho au ne.” ane Petrus pa annu mobanni do naanne. Moko ta ka ko ke Petrus la ubha toka ammu kattu mone-ae mone tunu-merahu ne. [Pa awe naanne lema ta tutu-oo ke manu.]

⁶⁹Ta ngadde ri ke Petrus ri annu mobanni do naanne ma, ta lii ke no pa ddau-ddau do pa anne, ”No dhe do tarra ta hala heddau ngati ro!”

⁷⁰Tapulara ta pehile ke Yesus ri Petrus. Tui dho ti napoanne, ta lii ke ne ddau-ddau do paanne pa Petrus ri, ”Nara dho ke au ta pehili ri, do tarra ta au dhe hala heddau ngati ro, rowi au dhe ngati Galilea!”

⁷¹Moko ta hupa-hupa-annu ke Petrus jhe lii, ”Tade tu-tu dho ri ya ne ddau do ane mu ne!”

⁷²Pa awe naanne lema ta tutu-oo ke manu tu do kedhue wari ne pa dhara rammi do naanne. Ta henge ke ri Petrus ta do alla ke Yesus pa lii pa no, ”Nga do dho tutu-oo dae manu dhue wari, alla ke au pepehile Ya tallu wari,” Moko ta tangi pedihi noho ke Petrus.