Read Sabu MARKUS 15 Bible Online

MARKUS 15 - Sabu bible

MARKUS 15

¹Pa ri jhammi-ae-ae, hari-hari ne Kattu Aigama he, do maho le ke ne kattu-kattu mone tunu-menahu he, kattu-kattu do Yahudi nga guru-guru aigama he, do marri-marri-ai ke ne peli. Ta petuke ke Yesus ri ro, jhe aggo No la jhole pa Pilatus.

²Ta kebhali ke pilatus pa Yesus, ”Do petu ke ta au dhe ne duae do Yahudi ne?” ”Mina harre ke ne lii au ma,” ne bhale ri Yesus.

³Ne ri kattu-kattu mone tunu-menahu he do pemaho ke dhai ae likela penaja nga Yesus.

⁴Moko ta kebhali ri ke Pilatus pa Yesus, ”Wae dho ri Au ta bhale? Hakku ko ri au ta helao, henga ke ne ae likela ddau penaja nga Au!”

⁵Tapulara wae tu-tu dho ke Yesus ta pedai lii ri, hakku ta madale ke Pilatus.

⁶Hadhi ki dhai ke la lodho nga'a Kewahhu Paskah, pa tima Pilatus ta golo heddau do rate pedutu nga lua pidhi ddau lowe.

⁷Pa dhara ammu bhaddo, pa te lora do pelawa nga do pemade ddau pa awe era lua kenya'u ne, era heddau ne ngara no Barabas.

⁸Ta peowu ke ne ddau lowe he, jhe ami pa Pilatus mita ie ta gole ri no heddau do rate mii pa tima he.

⁹Ta kebhali ke Pilatus pa ro, ”Wae mu ta gole ri ya ne duae do Yahudi ne tu mu?”

¹⁰Rowi do toi ke ri Pilatus ma, hakku jhole Yesus pa no ri kattu-kattu mone tunu-menahu he, taga ta ri do pana dhara ma ke ro nga Yesus.

¹¹Tapulara ta pedidi ke ri kattu-kattu mone tunu-menahu he, ne ddau lowe he, mita ame pa Pilatus ta gole Barabas tu ro.

¹²Moko ta lii ri ke Pilatus pa ddau lowe he, ”Ki do mina harre ma ne nga ke ne do jhamma ta tao ri ya pe naja nga ddau do pale ri mu ne ta duae do Yahudi ne?”

¹³Ta pekakero, ”Ketoe No peabbha-rappa!”

¹⁴Ta kebhali ke Pilatus, ”Tapulara lua tao apa ne nga ne do tao ri No?” Moko ta ju maddu ke ro ne peka, ”Ketoe No peabbha-rappa!”

¹⁵Do ddhei ri Pilatus ta pemengallu dhara ne ddau lowe he, moko ta gole ke Barabas ri Pilatus tu ddau lowe he. Ta alla pemina harre ta lii ke Pilatus ta dede Yesus ri gui, jhe jhole Yesus ri No tu ta la keot peabbha-rappa.

¹⁶Ta aggo ke Yesus ri dohorodhadhu he la era happo hala pa dhara rae gubernur. Ta alla pemina harre ta pedoa ke hari-hari ne do horodhadhu he la pe kupu.

¹⁷Moko ta pepake ke ri ro pa Yesus juba do wokelere mea, jhe tao ri ro ne labba ngati kelai-kelai ajhu do dudu, ta alla pemina harre ta petaddho ke la kattu Yesus.

¹⁸Ta moko ne petaddho ri ro ta tabbhe ta petabhe ke ro nga Yesus, jhe lii, ”Medi-melatu tu duae do Yahudi!”

¹⁹Ta wabbe ke ri ro ri kajji pa kattu Yesus, jhe hebue ri ro ri ilu pa Yesus, jhe mejura ro pa No.

²⁰Ta alle Yesus pepemange mina harre ri ro, ta boke ke ri ro ne juba do wo kelere mea ne, jhe pepake wari ne bhara Yesus ma miha. Ta alla pemina harre ta aggo ke Yesus ri ro la tele tu ta la ketoe peabbha-rappa.

²¹ Pa telora loro jhara ta pehahhe ke ri ro heddau ddau ta hape ne ajhu ketoe Yesus ne. Ne ddau do naanne ta bhale padha ti liha kowe, jhe do ta ju la dhara rae ke. (Ne ngara ddau do naanne, Simon do Kirene — ama ri Aleksander nga Rufus.)

²²Ta lere ke ri ro ju la hahhi era ne ngara era do naanne Golgota, do ki pebhale ma lii rai di ”Era Rui Kabha Kattu.”

²³Pa ni do ddhei ke ro ta pengino Yesus ri eiago do pehiwo ri muu, tapulara wae dho ta ngino ri Yesus.

²⁴ Ta alla pemina harre ta ketoe peabbha-rappa ke Yesus ri ro, jhe pe bhage-bhage ne bhara No nga loro jhara pepidhi ode mita toi ne unu ro heddau heddau.

²⁵Ne lua ketoe No do naanne pa wabba heo jhammi-ae.

²⁶Pa dhida ajhu ketoe do naanne do era do bhuke ne lipeanynye Yesus, ”Duae do Yahudi.”

²⁷Era lema do ketoe peabbha-rappa hela'u-la'u nga Yesus do dhue ddau do mone raba unu-oha ddau, heddau pa hebhakka kedhanga jhe heddau ri pa hebhakka-keriu Yesus.

²⁸ [Ri do mina harre ke ne do hure do bhuke pa dhara Buku Lidara-Likewahhu Deo, ”No do ege ta ddau do tao apa nga kerewe.”]

²⁹ Ne ddau-ddau do lake jhara anne ta piku-piku kattu ke, jhe kare-jhe menihe Yesus. Ta lii ke ro, ”Woi, au dhe do ddhei ta pekelole Ammu Deo, jhe pe kaddhe wari pa dhara tallu lodho.

³⁰Hakku ko au ta puru ngati ajhu ketoe au do napoanne, jhe pelude ne ngi'u Au ngati lua made dhe!”

³¹Mina harre lema ne ri kattu-kattu mone tunu-menahu he nga guru-guru aigama he, ne mare nga dhole Yesus. Lii ro heddau pa heddau, ”Ddau do hewala pehelama ri No, tapulara tu ngi'u No miha, nara dho ri No ta pehelame!

³²Ki du ae do Israel ma No, Duae Mone ma'i-Mone golo ma, do ie ke No pa awe nadhe ta puru ngati ajhu ketoe do na nidhe ri jhi, jhe parahajha pa No!” Do kare do menihe lema Yesus ri ddau-ddau do ketoe peabbha-rappa hala'u-la'u nga No he.

³³Pa nattu lodho he, kewore mawo ta jhalle he, pa dhara tallu ja ne tui, hari-hari rai ta kerabba guru rai ke.

³⁴ Jhe pa wabba tallu maddha lodho he, ta peka Yesus nga lipeka do maddu, ”Eloi, Eloi, lama sabaktani?” pa lii di, ”Wo Deo Ya, wo Deo Ya, ta nga ke hakku jhane Ya ri Au?”

³⁵Ta lii ke do parri ddau do rangnge ne lipeka Yesus do naanne, ”Dhanno we, nnai ke ri No ta pedoe Elia!”

³⁶ Ta marri-ai-ai ke heddau ti telora ro, la aggu buro'o jhe tabbho pa hu ajhu, jhe la pebbho la dhara ei ago menyilu. Ta alla pemina harre ta jarro ke la kuri nyoro Yesus, jhe lii, ”Mate ko ri di, dakka marra Elia ma pepure No ngati ajhu ketoe do na nidhe.”

³⁷Moko ta peka ke Yesus, ta alla pemina harre ta made ke No.

³⁸ Bhalla lai do wata kama pa dhara Ammu Muri, harre bhagi dhue, ngati dhida lohe la dha'i.

³⁹Ne kattu horodhadhu ne do titu penaja hedhapa nga ajhu ketoe ne, do ngadde mina mii Yesus ne made. Ta lii ke no, ”Ddau nadhe tarra-tarra ta Ana Deo!”

⁴⁰ Pa anne lema era do parri ddau mobanni, do heleo hari-hari ne na poharre ngati jjhau. Pa telora ro do na harre: Salomo, Maria Magdalena, nga Maria ina ri Yakobus ana do ngarru ne nga Yoses.

⁴¹Ro ke ne mobanni-mobanni do pedutenge do pemoke Yesus pa dhara nga era ne ko Yesus pa Galilea, Jhe do era ri ko do ae ne mobanni do wala he pa anne do dakka ngati Yerusalem do penau hela'u nga Yesus.

⁴²Ta meringi lodho pa ihi, ta dakka ke Yusuf ngati Arimatea. No dhe, he ddau ngati Kattu Aigama do takke pekerihe ri ddau. No le ma do pa dhara nga mate ne awe Deo ta jhari ta pereda mii Duae. Ne lodho do napoanne, Lodho Pemoko-anni (helodho uru jhara ngati lodho Pengaha-ihi ne). Rido mina harre ke nga bhanni dhallu ta kako ke Yusuf la nga Pilatus, ta la ame ne ngi'u Yesus ne.

⁴³

⁴⁴Ta madalae ke Pilatus ta rangnge ri no ta do alla dhangnge ke Yesus pemade. Hakku ta pepu ke ddau ri Pilatus ta la pedoe ne kattu horodhadhu ne, jhe kebhali pa no ta do tui ke Yesus ne alla pemade, we adho dae.

⁴⁵Ta alla pedhanno ri Pilatus ne lipika kattu horodhadhu ne, ta wie lua ke ri no pa Yusuf ta la aggo ne ngi'u Yesus ne.

⁴⁶Moko ta la walli ke Yusuf bhalla do pudi kewa'a do lumu. Ta alle pepure ne ngi'u Yesus ne, moko ta wute ke ri Yusuf ri bhalla do naanne. Ta la takke ri no ne ngi'u Yesus pa dhara ro'a do kee pa hewue bhojo wowadu. Ta alla pemina harre, ta riho ke ri no hewue ne wowadu do worena, jhe henabbhe ri no pa ubha ro'a ne.

⁴⁷Pa awe naanne lema Maria Magdalena nga Maria ina Yoses ne do ngadde pa mii ne era takke ngi'u Yesus ne.