Read Sabu MARKUS 16 Bible Online

MARKUS 16 - Sabu bible

MARKUS 16

¹Ta ludu le ne lodho Pengaha-ihi ne, ta kako ke Maria Magdalena, Maria do ina ri Yakobus, nga Salome la walli wwau mangngi-wwau mangngi tu ta la pehame ne ngi'u Yesus ne.

²Pa lodho do petari ne pa migu do naanne, rai jhammi-ae-ae, ta kako ke ro la raidare ne.

³Pa telora rujhara ta pedai ke ro heddau nga heddau, ”Nadu marra ke ne do ruba dhara nga di ta la riho ne wowadu do henabbhe pa ubha ro'a ne?” Rowi ne wowadu do naanne do dhai worena. Tapulara ta dhai ro la ro'a ne, ta ngadde ke ri ro ne wowadu donaanne, alle ke periho.

⁵Moko ta maho ke ro la dhara ro'a ne. Pa bira pa dhara ro'a ne, ta ngadde ke ri ro heddau do ngarru, do era do mejaddhi do nga pake juba wopudi, moko ta kebhaddi ke ro.

⁶Moko ta lii ke ne do ngarru do naanne, ”Bhole meda'u! Do toi ri ya, ta do ta ma kale Yesus do Nazaret ne ri mu, do alle peketoe peabbha-rappa ne. Pe'e dho ke No pa dhe. Alla ke No pekaddhi bhale wari! Heleo miha we ri mu, pa dhe ke ne era pebba'e No ri ro he.

⁷ Kako we mu nadhe dhangnge la pedhae ne lai do nadhe pa ana hekola No he, nga pa Petrus lema. Lii pa ro, ’Do ta uru No ngati mu la Galilea. Pa Galilea ke jhe itu pengaddi mu nga No, mii do lii No pa mu do uru he.’ ”

⁸Moko ta mahhu-anni ke ne mobanni do harre ngati dhara ne, jhe perai ri kebhaddi nga meda'u. Rowi do meda'u ro, bhule le dho ro ta pedai-pejha'i lai ne nga-nga he ie ta nga heddau he. [

⁹Ta alla Yesus pekaddhi ngati made mada, pa rai jhammi-ae-ae pa lodho Migu, uru pengaddi-anni No pa Maria Magdalena. (Do ngati Maria dhe, do ngaddi ta hudi ri Yesus pidu ngi'u wango).

¹⁰Moko ta kako ke Maria Maria Magdalena la pepeke ne lai do jadhi naanne pa ihi-anga ihi-anga Yesus he, do era pa dhara lalu nga tangi he.

¹¹Tapulara ta dhai ta rangnge ri ro ta do muri ke Yesus jhe do alla ke pepengaddi-anni pa Maria, wae dho ro ta parahajha.

¹²Ta alla pemina harre ta pengaddi-anni ke Yesus pa do dhue ddau ana heko la No. Ne lua pengaddi-anni do nadhe, jadhi pa awe do dhue ddau do na harre era ta ju la hewue rae.

¹³Hakku ta bhale ke ro, jhe la peke ne lai do naanne pa do haghe he. Tapulara parahajha dho ro.

¹⁴Pa pedakka rahi, ta pengaddi-anni ke Yesus pa do henguru heddau ana hekola No he, pa awe nga nga'a ro. Ta lii ke Yesus pa ro, taga tari do kura ne lua manno ro nga do rihi adhu ne kewadu kattu, hakku do dho wae ro ta paraha jha nga lii ddau-ddau do ngadde ri namada miha ke, ta do tarra do alla ke Yesus pemuri.

¹⁵ Moko ta lii ke Yesus pa ro, ”Kako we mu la hari-hari kebhihu-raiwawa dhe, jhe la pelebe we ne Li Hagha Dhara do ngati Deo ne pa hari-hari ddau raiwawa.

¹⁶Ddau do dho parahajha do ta nara lua wolo. Tapulara ddau do parahajha jhe pejhiu do ta helama tona ie.

¹⁷Mii hahhi telia ta do parahajha ro, ddau-ddau do na harre do ta hudhi ta keluru wango pa dhara ngara ya, do ta pedai lii ro pa dhara lipedai-lipedai do dho tada ri ro.

¹⁸Kinga parru ro debhoho, kiadho kinga nginu ro raho, bhule do ro ta nga-nga. Kinga takka ne ruai ro pa ddau do paddha, moko ne ddau do na harre do ta ie.”

¹⁹ Ta alla Muri Yesus pepedai lii nga ro, ta dhede ke No la era do mmau do megala. Pa ni do ta pereda ke No hela'u-la'u nga Deo.

²⁰Moko ne ana hekola No he ta kako ke la pelebe ne lii do ngati Deo ne, la hebhakka-hebhakka. Jhe Muri lema do jhagga hela'u-la'u nga ro, jhe do peteleo pelake jhara lua mada lae-lua madalae ta do ne lipeliba ro do petu-petarra.] [ LUA PEDAKKA NGATI LIBHUKI DO DUI DO WALA RI Ta kako ke ne mobanni do na harre la nga Petrus nga ihi-anga no he, jhe pedhiri nga nabhabha he we ne hari-hari ne do alla pepika pa ro ri do ngarru do naanne. Ta alla pemina harre, Yesus miha nga pake ne ana hekola No he ta la pelebe ti bira Dimu pelohe la bira waa ne lii do mmau do megala nga do pe loro ne, jhara lua helama tona ie do peloro ne.]