Read Sabu MARKUS 2 Bible Online

MARKUS 2 - Sabu bible

MARKUS 2

¹Ta ludu parri lodho, ta bhale ke Yesus la Kapernaum. Moko ta menyabbha ke lii ta do era ke No pa ammu.

²Moko ta ddakka ke ddau do ae la nga Yesus. Ta peworo penyabbhu ke ro pa anne tade bhule dho ke ne era ri. Pa ubha kelae ne le do dhai kehahhi ke ri ddau. Moko ta pedhae ke ri Yesus ne lii do ngati Deo ne pa ro.

³Pa dhara nga pedai lii ko Yesus, ta dakka ke do appa ddau nga mere heddau do made heatta ju la nga Yesus.

⁴Tapulara taga ta ri do rihi ae ke ddau, nara dho ke ro ta peumu-anni nga Yesus. Hakku ta ha'e ke ro la dhida, jhe boka ruammu pemaddhi nga era titu Yesus. Ta alla peminaharre ta pedhule ke ro ne ddau do paddha ne hela'u-la'u nga dappi no ne la hedhapa Yesus.

⁵Ta ngaddi ri Yesus ta do dhai tarra ne mone-ae lua manno nga kaho ro, moko ta lii ke Yesus pa ddau do paddha ne, ”Wo ana Ya, hari-hari ne lubhu harro nga menyilu au, alla ke pepehai-pehuba.”

⁶Do parri ddau guru aigama do era do mejaddhi pa anne, ta penge-nge ke ri ro pa dhara ade,

⁷”Bhani tarra ddau nadhe ta pali mina harre ee! Ta kare menihe Deo ri no dhe. Nadu ke do nara ta pehai-pehuba lubhu harro nga menyilu, wala ngati Deo miha?”

⁸Pa awe naanne dhangnge lema do toi ke ri Yesus, ne penge ro ta do mina harre. Moko ta lii ke Yesus, ”Ta nga mu hakku pee nga penge-nge mina harre pa dhara ade mu?

⁹Nami do rihi ne memudhe; pali ta, ’Lubhu harro nga menyilu au, do alle ke pepehai-pehuba’, we pali ta, ’Kadhi we au, aggo we ne dappi au jhe kako we au?’

¹⁰Tapulara mita toi ri mu, pa dhara awe nadhe ta peteleo ke pa mu ri Ya ta do pa danni raiwawa do nadhe, Ana Ddau Raiwawa do nga higa ta pehai-pehuba lubhu harro nga menyilu.” Moko ta lii ke Yesus pa do paddha ne,

¹¹”Kaddhi we au, aggo we ri au ne dappi au, jhe bhale we au la ammu au!”

¹²Ta kaddhi ke ne ddau do naanne, jhe aggo ri no ne dappi no, jhe mahhu-anni ngati anne nga heleo ri hari-hari ddau do era paanne. Dhai madalae ne ddau do na harre. Ta wue-waje ke Deo ri ro. Ta lii ke ro, ”Ngaddi de dho di ta peabu nga lai do mina hedhe!”

¹³Ta bhale ri ke Yesus la ngidi eilobo Galilea. Ae ne ddau do dakka la nga Yesus. Ta wie ke ri Yesus ne liajha pa ro.

¹⁴Pa dhara nga kako Yesus pa anne, ta ngadde ke ri No heddau mone dhuki bhea, ne ngara no Lewi ana ngati Alfeus, era do mejaddhi pa katto era hammi bhea ne. Ta lii ke Yesus pa no, ”Mai ma pedute Ya.” Moko ta kaddhi ke no jhe la pedute Yesus.

¹⁵Pa dhara awe nga mejaddhi ta nga'a Yesus pa ammu Lewi, ae ne mone dhuki bhea nga ddau-ddau do pali ta ddau do woapa he do dakka la nga'a hela'u nga Yesus nga ana hekola No he. Rowi do ae ti telora ro do pedute Yesus.

¹⁶Do parri ddau guru aigama ngati kejie do Farisi, do ngadde Yesus ta nga'a hela'u la'u nga mone dhuki bhea he mina harre lema nga ddau-ddau do hala loro jhara kako he. Moko ta kebhali ke ne guru aigama he pa ana hekola Yesus he, ”Ta nga hakku nga'a hela'u-la'u ne guru mu nga mone dhuki bhea he mina harre lema nga ddau-ddau do hala loro jhara kako he?”

¹⁷Do rangnge ri Yesus ne likebhali ro do naanne, moko ta bhale ke ri No, ”Ki ddau do ie adho do paralu nga dote, wata ke ddau do paddha we. Ne dakka ya, adho ta ma pedoa do laje ne ngi'u no ta do woie, tapulara tu ddau do tade ne ngi'u no ta do woapa.”

¹⁸Pa dhara hewari, pa awe nga puasa, ana-ana hekola Yohanes Mone Pejhiu nga do Farisi he; ta dakka ke ddau la nga Yesus jhe kebhali, ”Ta ne ana heko la Yohanes Mone Pejhiu nga ddau ana hekola do Farisi he hakku puasa, jhe dhai ne ana hekola Ama adho do puasa?”

¹⁹Ta bhale ke ri Yesus, ”Pa era lai-ala peloko nga'a, adho ke ne tamu-tamu he do nga'a pa anne? Do bhara tatu ke ro ta nga'a nga era hela'u-la'u ko ne mone ngedhe ne.

²⁰Tapulara do ta dhai ma ne awe ne mone ngedhe ne ta aggo ti telora ro hine. Dhai pa awe napoanne ke hine, jhe itu do dho nga'a-ngi nu ro.

²¹Bhule dho ddau do kelapu bhajhu do bura ri bhalla do wiu. Rowi ne bhalla kelapu do wiu ne, do ta kepudhu, jhe pemejarre rihi ae ri ne bhajhu do na anne.

²²Mina harre lema, bhule ledho ma ddau do hali ei-ago do wiu la dhara haku kuri do dui. Rowi ri ei-ago do wiu ne do ta pekepahho ne haku kuri do dui ne. Pedakka rahi ta hora ila wue he ke hari dhue. Ei-ago do wiu do jhamma ta ihe la dhara haku kuri do wiu lema!”

²³ Pa dhara helodho, lodho Pengaha-ihi, pa dhara nga narru Yesus jhara hewue maa gandum, moko ne ana hekola Yesus he, ta ghattu ke ne wuri gandum he.

²⁴Moko ta lii ke ne do Farisi he pa Yesus, ”Ta nga hakku pehihu ne ana hekola Au he nga uku aigama di; nga tao ri ro ne lai do dho jhamma pa lodho Pengaha-ihi?”

²⁵ Ta bhale ke ri Yesus, ”Ngaddi dho mu ta ajha, ne nga ne do tao ri Daud, pa dhara awe Abyatar do jadhi kattu mone-ae ngati mone tunu-menahu he. Pa awe menganga Daud nga ddau-ddau no he, jhe adho ke ro do era ri nga bhara nga'a, do maho Daud la dhara Ammu Deo, jhe la nga'a ne roti do alla pejhula pa Deo he. Nga mina harre lema do wie ri no ne roti do harre pa ddau-ddau no he. Jhe ne pa petu ne, pa dhara uku aigama di, wata ke mone tunu-menahu he we ne do ie ta nga'a ne roti do na harre.”

²⁷Moko ta lii ri ke Yesus, ”Lodho Pengaha-ihi do tao tu ddau raiwawa, adho ddau raiwawa tu Lodho Pengaha-ihi.

²⁸Hakku Ana Ddau Raiwawa do nga kuaha, mina harre lema penaja nga lodho Pengaha-ihi.”