Read Sabu MARKUS 3 Bible Online

MARKUS 3 - Sabu bible

MARKUS 3

¹Ta bhale ri ke Yesus la ammu hebhajha ne. Pa anne do era heddau do made hebhakka.

²Pa anne do era lema ne ddau do ddhei ta kale-kale ne hala Yesus, mita nara ro ne loro jhara ta pemaho likela penaja nga Yesus. Hakku ta pee nga heleo loro ke ri ro, ta do medae marra ta peie ri Yesus ddau pa lodho Pengaha-ihi ne.

³Moko ta lii ke Yesus pa ddau do made hebhakka ne, ”Mai ma titu ma dhe, pa hedhapa dhe.”

⁴Moko ta kebhali ke Yesus pa ddau-ddau do era pa anne, ”Pedutu nga uku aigama, ne nga ne do jhamma ta tao ri di pa lodho Pengaha-ihi? Tao lai do woie we tao lai do woapa? Ta peie ddau we ta pemade ddau?” Ta pehangngo-anni we ro hari-hari.

⁵Nga bubu dhara ta heleo ke ro pekeheru ri Yesus, tapulara do nga hedui lema ne ade No. Rowi do rihi tarra ro ne adu kewadu-kattu. Moko ta lii ke Yesus pa ddau do made hebhakka ne, ”Jhole ne ruai au ma dhe.” Ta jhole ke ri ddau do naanne ne ruai no, moko ta ie dhangnge ke no.

⁶Moko ta langnga ke ne Farisi he, ti ammu hebhajha ne, jhe la peli dhangnga nga do parri do pehala'u lii nga Herodes, tu ta pemade Yesus.

⁷Ta pejjhau-anni ke Yesus nga ana hekola No he la ngidi Eilobo Galilea. Moko dhai ae ddau ngati Galilea do kako la pedute Yesus. Ae lema do dakka ngati Yudea,

⁸ngati Yerusalem, ngati ihi rai Idumea nga ngati ihi rai do pa hebhakka bira dimu Yordan nga ngati rae-rae do peumu nga Tirus nga Sidon. Hari-hari ro dakka la nga Yesus, rowi do rangngi ke ri ro ne lai-lai do alla petao ri No he.

⁹ Do dhai rihi ae ne ddau do na harre, hakku tade lii Yesus pa ana hekola No he, ta pemoko kowa tu No, mita do dho pekedhaddo No ri ddau lowe he.

¹⁰Do dhai worawwu ae lema ne ddau do paddha ne do peie ri Yesus, hakku ro ne do paddha he do pee nga perubhi-rai ke ta peumu-anni nga Yesus, mita nara ro ta bhuje No.

¹¹Mina harre lema ne ddau do wujhu he, ki ngadde ke Yesus, ta mejura dhangnge ke ro pa hedhapa No jhe peka, ”Au ke ne Ana Deo ne!”

¹²Tapulara labba made ri Yesus ne wango-wango do na harre, mita do dho peteleo ri ro ta nadu No.

¹³Ta alla pemina harre, ta ha'e ke Yesus la hewue bhojo, jhe pedoa ri No, ne ddau-ddau do maddhi pa No. Moko ta dakka ke ne ddau-ddau do na harre,

¹⁴ta pidhi ke ri No ngati telora ro do na harre, henguru do dhue ddau. Ta lii ke Yesus, ”Ne pidhi mu hari-hari do na hedhe ri Ya, mita ie ke mu ta penau-pelere nga Ya, jhe ta pepu ri ya la pelebe ne Li Hagga Dhara do ngati Deo ne,

¹⁵jhe do ta nara mu kuaha ta hudi-keluru hega-henga kerabba.”

¹⁶Na hedhe ke ne ngara ro hari henguru do dhue ddau: Simon (do pedoe lema ta Petrus).

¹⁷Yakobus nga Yohanes tuahhu no, ana-ana ri Zebedeus (do pehuni ne ngara ro ta Boanerges, pa lii di ”ana dhoro”),

¹⁸Andreas, Filipus, Bertolomeus, Matius, Tomas, Yakobus ana Alfeus, Tadeus, Simon mone Jhuru-kattu ne

¹⁹nga Yudas Iskariot do mone pewie Yesus ne.

²⁰Ta alla pemina harre ta bhale ke Yesus la ammu. Tapulara ta jila ri ke ne ddau lowe he ne dakka la anne la peworo ro, hakku nara dho ke Yesus nga ana hekola No he ta nga'a-nginu.

²¹Ne ddau-ddau he lii pa Yesus, ”Alla ke No pewujhu!” Jhe dhai ta rangngi ri a'a-ari No ne lai do na poanne, ta kako ke ro ta la aggo Yesus ngati era do naanne.

²² Mina harre ne lii guru-guru aigama do dakka ngati Yerusalem he, ”Nnai do maho ri Beelzebul ke pa No! Kattu ngati henga-henga kerabba do naanne ke ne do wie kuaha pa No ta hudhi-keluru ne henga kerabba he.”

²³Moko ta pedoa ke ri Yesus ne ddau lowe do na harre, jhe pedhiri pa ro parri bhue lipehakku. ”Mina mii ne nara ta jadhi, henga kerabba hudhi ri henga kerabba,” ane Yesus pa ro.

²⁴”Kinga hewue rai pereda do menyalla pa dhara parri bhue kejie do pee nga pemuhu, moko nara dho ke ne rai pereda do napoanne ta era loro.

²⁵Jhe kinga pa dhara hewue ammu-kemali, adho do era ne lua heujhu-headde, jhe hari-hari ne ddau do pa dhara ammu-kemali do naanne do pee nga pehibhi-penyami, moko ne dhara ammu-kemali do naanne do ta mae-te bho-ttei.

²⁶Kinga pa dhara rai pereda Wango, do era ne lua pehagghi-pebhagi nga lua pepara-petabbhu, moko ne rai pereda do napoanne rajja dho ke ne titu, do ta ele nga henginga.

²⁷Bhule ledho ma heddau do nara ta maho la dhara ammu heddau do rui, jhe la rabe ne unu-oha no, ki do dho ujhe dae uru jhara ri no ne ddau do rui do ne. Ki alla pemina harre jhe itu nara ri no ta rabe ne unu-oha ddau do naanne.

²⁸Do jhamma ta toi ri mu! Kinga tao ddau lubhu harro nga menyilu jhe pali ne likara nga menihi, do nara ko no ta pehuba.

²⁹ Tapulara kinga kare nga menihe Henga Deo ri no, adho ke no do ta nara ri lua pehuba! Rowi ne lua kara nga menihi do napoanne, hahhi luaunu-kolo-taddhu do peloro.” (

³⁰Hakku lii Yesus mina harre, rowi era do lii, ta Yesus do maho ri henga kerabba).

³¹Ta alla pemina harre ta dakka ke la nga Yesus, ina nga tuahhu-tuahhu No. Do titu ta mata pa tele he we ro, jhe lii pa ddau he ta la pedoe Yesus.

³²Pa awe naanne do ae ddau ne do mejaddhi pewore Yesus. Ta lii ke ne ddau he pa Yesus, ”Ama, ina nga tuahhu-tuaahhu Ama, hhai pa tele ni. Hhai ta kale Ama ri ro.”

³³Ta bhale ke ri Yesus, ”Nadu ke ne ina Ya? Nadu ke ne tuahhu-tuahhu Ya?”

³⁴Ta alla pemina harre, ta heleo ke No ju la nga ddau-ddau do mejaddhi pekehero No he, jhe lii, ”Na hedhe ke ne ina nga tuahhu-tuaahhu Ya!

³⁵Ddau do pedute ne lua ddhei Deo, no ke ne tauhhu ya do momone nga do mobanni nga ina Ya.”