Read Sabu MARKUS 5 Bible Online

MARKUS 5 - Sabu bible

MARKUS 5

¹Ta dhai ke Yesus nga ana hekola No he la hebhakka-rai, pa ihi rai Gerasa.

²Ta dhai dhangnge Yesus ta puru ngati kowa ne, ta dakka ke langa No heddau momone do mahhu-anni ngati ro'a-ro'a lie do pake ta raidare.

³Ne ddau do naanne do wujhu jhe do pee pa ro'a-ro'a raidare he. Adho ke no do nara ri ta akke; maji lema ta akke ri rate.

⁴Jhajhi wari ke ne kae no he hari appa laa ta ujhe ri rate, tapulara ta pehappo we ri no hari-hari ne rate do na harre. Mina harre lema ne tuki bhahhi do petuke pa rubhebho no he, pepada le ri no. Do wala wewo tarra ne rui no, hakku bhule dho ke ddau do nara ta kappe no ri.

⁵Anni lodho nga anni maddha pee nga pekemale-anni pa raidare nga pa kolo bhojo he ke no, jhe pee nga peka-pekarra, jhe garre-garre ne ngi'u ni ri wowadu tade no'e.

⁶Ta ngadde Yesus ri no ngati jjhau, ta perai-loro ke no jhe la mejura pa hedhapa Yesus.

⁷Nga lipeka do ie ta nga-nga ne maddu, ta lii ke no, ”Yesus Ana Deo Tabbho-rai Tabbho-liru! Do ta tao ne nga ke Au pa jhi we? Nga ngara Deo, ne ame ri ya pa au, bhole wolo we ya ri au.” (

⁸Hakku lii ne ddau do na anne mina harre pa Yesus, rowi do alla ke Yesus peli pa no, ”Wango-apa, mahhu-anni au ngati ddau do nadhe!”)

⁹Moko ta kebhali ke Yesus pa no, ”Nadu ne ngara au?” Ta bhale ke ri ddau do naanne, ”Ngara ya ’Legiun’ — rowi jhi hedhe do rihi ae!”

¹⁰Dhai meggai no ne ami loro-loro pa Yesus ta bhole lii pa wango he ta mahhu-anni ngati ihi-rai do naanne.

¹¹Peumu nga era do naanne do era ne wawi do dhai ae, do pa dhara nga kale nga'a pa keraha lede.

¹²Moko ta ami ke ne wango do na harre pa Yesus, ”Lii we pa jhi ta maho la dhara wawi-wawi do na hidhe.”

¹³Ta o'o he ke Yesus. Hakku ta mahhu-anni ke ne wango do na harre ngati ddau do naanne, jhe maho la dhara wawi-wawi do na harre. Hari-hari ne kewolo wawi do na harre, ta takka ta perai ke, jhe riju la dhara eilobo ne jhe janna hari-hari. Era ma ne wawi do na harre ta dhue tabbha ngi'u he ne ae.

¹⁴Moko ta perai ke ne mone bhata-mone bhata wawi he la dhara rae jhe la pe lebe ne lai do naanne nga pa rae-rae do peumu he nga rae do naanne. Moko ta mahhu-anni ke ne ddau-ddau he la heleo ne lai do alla pejadhi do naanne.

¹⁵Ta kako ke ro la nga Yesus, moko ta ngadde ke ro ne ddau do wujhu ne do era do mejaddhi pa anne. Era do nga pake bhara ke no, jhe do mmau dhara ke. Moko ta meda'u ke ro hari-hari.

¹⁶Ne ri ddau-ddau do alla ke pengadde miha ne lai do jadhi pa ddau do naanne nga pa wawi-wawi do na harre, ta kako ke ro la pedhiri ne lai-lai do na harre.

¹⁷Moko ta ame ke Yesus ri ddau pa ihi-rai do naanne mita ie No ta langnga ti anne.

¹⁸Ta dhai Yesus ta ha'e la dhara kowa ne, moko ne ddau do ie ngati wujhu ne ta ami ke pa Yesus mita ie no ta pedutu le.

¹⁹Tapulara o'o dho Yesus. jhe lii pa No, ”Bhale we au, jhe la peke we pa a'a-ari au, ne nga ne do alle petao ri Deo tu au, jhe do mina mii ne worawwu ie No penaja nga au!”

²⁰Moko ta kako ke ne ddau do naanne, jhe la pedhire pa ihi-rai Henguru Bhue Rae, ne nga ne do alla petao ri Yesus penaja nga ngi'u no. Ta madalae ke ro hari-hari ta rangnge ne lii do naanne.

²¹Ta bhale ke Yesus la hebhakka-rai. Pa ngidi eilobo do naanne, do ae ke ddau ne do dakka la pewore Yesus.

²²Ta dakka ke heddau ne ngara no Yairus. No heddau kattu ngati ammu hebhajha do era pa dhara rae do naanne. Ta ngadde Yesus ri no, ta la mejura ke no pa hedhapa Yesus,

²³jhe noho ne ame Yesus, ”Ama, ana ya, ana mobanni, nnai ke do paddha mejanni. Ruba kowe ne dhara Ama, ta la bhuje ne ihi no, mita ie no, jhe ludu ta do dho made!”

²⁴Moko ta kako ke Yesus penau nga Yairus. Ae ddau ne do pedute No, jhe do pekedhaddo No ngati hari-hari kebhihu.

²⁵Pa telora ro do na harre do era heddau mobanni do henguru dhue bhue ttau ke ne tui ne lakka ri paddha mili raa.

²⁶Alla ke hari-hari ne unu-oha no ne pake ta kehiwa dote-dote, tapulara bhule dho nara ta peie no, ta rihi ri we ne ju ne paddha no ne.

²⁷Do dhai ke ne lii do rangngi ri mobanni do naanne jhara lua Yesus. Moko pa telora ddau lowe do na harre ta pehedharra-anni ke no la nga Yesus ngati kejhunga,

²⁸rowi do penge ke ri no, ”Hadhi ta baro he we ri ya ne juba No, do ta ie ya!”

²⁹Ta baro ke ri no ne juba Yesus, moko pa dhara awe do naanne dhangnge ta pengaha ke ne mili raa no ne. Ta toi ke ri no ta do ie ke no.

³⁰Pa awe naanne lema ta toi ke ri Yesus ta do era hahhi higa ngati dhara No do mahhu-anni. Moko ta kebhibha ke Yesus la nga ddau lowe he, jhe lii No, ”Nadu ne do baro juba Ya?”

³¹Moko ta lii ke ne ana hekola No he, ”Ama, heleo miha we ri Ama, do mina hedhe ke ne worawwu ae ddau do pekedhaddu di. Bhole tenge ri we Ama ta kebhali ta nadu ne do baro Ama!”

³²Tapulara pee ma Yesus nga heleo teru pekeheru tu ta kale ne ddau do la baro No ne.

³³Moko ne mobanni do naanne do toi ke ne nga ne do alla pejadhi pa ngi'u no ne, nga kerighi-keraggu ta la mejura ke la hedhapa Yesus, jhe ke lole ke ri no hari-hari ne lai do alla ke pajadhi pa ngi'u no.

³⁴Moko ta lii ke Yesus pa mobanni do naanne, ”Ana Ya, taga tari do parahajha ke au pa Ya, hakku nara ke au ta ie! Kako we au nga helama tona ie. Do ie tu-tu ke au!”

³⁵Pa dhara nga pedai lii ko Yesus, ta dakka ke do parri ddau do pepu ti ammu Yairus, jhe la lii pa Yairus, ”Ne ana Muri ne, alla ke pemade, tenge dho ke Muri ta pehedue Ama Guru ri la ni.”

³⁶Wae dho Yesus ta pedhanno nga lii ddau do na harre, moko ta lii ke No pa Yairus, ”Bhole kebhaddi au, parahajha we au pa ya!”

³⁷Moko ta kako teru ke Yesus, tapulara o'o dho No ta era ddau do wala ne do pedute No, wata ke Petrus, Yohanes nga Yakobus do pea'a-ari he.

³⁸Ta dhai ro la ammu Yairus, ta ngaddi ke ri Yesus ne lai do pa anne do dhai kenya'u ke, jhe era ke litangipali do maddu.

³⁹Moko ta maho ke Yesus, jhe lii pa ro, ”Ta nga hakku kenya'u jhe tangi ri? Made dho ne naiki do nadhe, nee ta bba'i he we no!”

⁴⁰Ta mare ke Yesus ri ro. Moko ta lii ke Yesus pa ro hari-hari ta mahhu-anni la tele. Ta aggu ke ri Yesus, ina nga ama naiki do naanne nga ana hekola No do tallu ddau he, jhe maho la dhara kama naiki do naanne,

⁴¹jhe lii pa No, ”Talita kum,” pa dhara lii rai di, ”Ana mobanni, ne lii Ya pa au, kaddhi we au!”

⁴²Moko ta kaddhi dhangnge ke ne ana mobanni do naanne, jhe kako. (Ne pemuri no, henguru dhue bhue ttau ke.) Hari-hari ddau do ngadde ne lai do naanne dhai madalae!

⁴³Tapulara labba made ri Yesus pa ro ta pedae-pejha'e ie ta nga nadu we ne jhara lai do naanne. Moko ta lii ke No, ”Wie ko nga'a ne naiki na poanne.”