Read Sabu MARKUS 8 Bible Online

MARKUS 8 - Sabu bible

MARKUS 8

¹Rihi dho ne tui ti naanne, moko ta era ri ke hekewolo ddau lowe do dakka la peteni. Rowi do dho bhule ro nga nga'a-nginu, ta pedoa ke ri Yesus ne ana hekola No he, jhe lii pa ro,

²”Ta ruba dhara ya nga ddau lowe do na hedhe. Tallu lodho peduke-duke ke ro ne era hela'u-la'u nga Ya, jhe bhule dho ke ro nga nga'a-nginu.

³Kinga lii ke Ya pa ro ta bhale nga kelepo, lakka ke ro ta melanu he ke pa rujhara. Rihi-rihi ri pa telora ro, era do dakka ngati era-era do jjhau-jjhau.”

⁴Ta bhale ke ri ana hekola No he, ”Pa era do kiha mina hedhe, pa mii ke ddau ne nara nga'a do nara ta pelamma ne ddau do na hedhe hari-hari?”

⁵Ta kebhali ke Yesus pa ro, ”Henga ne ae roti do era pa mu?” ”Pidu bhue,” ne bhale ri ro.

⁶Moko ta lii ke Yesus pa ddau lowe he ta mejaddhi pa worai, jhe aggu ri No ne roti do pidu bhue he, jhe peha'e No kolo lii ie-ae pa Deo. Ta alla pemina harre ta pipi ke pemae ri ruai No ne roti do na harre, jhe wie ri No pa ana hekola he, ta la pebhagi-bhagi pa ddau lowe he. Moko ta la pebhagi-bhagi ke ri ana hekola he.

⁷Do era lema pa ro parri ngi'u nadu'u naiki. Ta peha'e kolo lii ie-ae ri ke Yesus pa nadu'u do na harre, jhe lii No pa ana hekola he ta la pekepala pa ddau lowe he.

⁸Ta nga'a ke ro tade bhahhu — era ma hino ta do appa tabbha ddau he ne do nga'a. Ta alla penga'a, ta pekupu ke ne do rihi he ri ana hekola he — tobo pidu hope. Moko ta lii ke Yesus pa ddau lowe he, ta bhale

¹⁰jhe Yesus nga ana hekola No he ta pekaddhi dhangnge ke ti anne ju la ihi-rai Dalmatuna.

¹¹ Ta dakka ke do parri ddau do Farisi la nga Yesus, jhe jhari ta pebhata tu ta hakko No. Ta ame ke Yesus ri ro ta tao lua madalae ta mii telia ta do tarra ta No do dakka ngati Deo.

¹² Ta pedihi-anni ke Yesus jhe bhale, ”Tanga marra hakku ame Ya ri ddau pa dhara awe nadhe ta tao lua madalae? Adho! Adho do medae ta wie ri Ya ne telia do mina harre pa ro!”

¹³Moko ta hani ke ro ri Yesus, jhe ha'e la dhara kowa; jhe pekaddhi la he bhakka eilobo ne.

¹⁴Bhale ne ana hekola Yesus he do ballu ta do dho aggu roti do waji tu ro. Wata ke hewue roti we ne do era pa ro pa dhara kowa ne.

¹⁵ Talii ke Yesus pa ro, ”Meniga pewoie-ie mu penaja nga muu do Farisi nga Herodes.”

¹⁶Moko ta jhari ke ne ana hekola he ta pedae ne jhara lai do naanne. Ta lii ke ro, ”Hakku lii No mina hidhe, rowi do dho bhule di nga roti.”

¹⁷Do toi ri Yesus ne nga ne do pedae ri ro he. Ri do mina harre ke, ta ke bhali ke Yesus pa ro, ”Ta nga hakku jadhi ta hahhi lai tu mu, taga ri do dho bhule mu nga aggu roti? Ta do dho toi dae ri mu? Tada dae dho mu? Do mina harre ko ne kedhaddu ne penge mu?

¹⁸ Do nga namada ma mu — ta nga hakku do dho ngaddi? Do nga wodilu ma mu — ta nga mu hakku do dho rangngi? Ta do dho henge ke ri mu,

¹⁹ne jhara lammi bhue roti do pipi-pemae ri Ya he? Parri hope ne do rihi dhai ta pekupu ri mu?” ”Henguru dhue hope,” ne bhale ri ro.

²⁰”Jhe pa awe pipi-pemae ri Ya ne roti do pidu bhue he, tu do appa tabbha ddau he, parri hopo ne do rihi dhai ta pekupu ri mu?” ”Pidu hope,” ne bhale ri ro.

²¹”Nah, hakku pee ko ma mu nga do dho tada dae?” ne ane Yesus ri pa ro.

²²Ta dhai ke ro la Betsaida. Ta dakka ke ne ddau la anne nga aggu heddau do bhaddu la nga Yesus, jhe ame Yesus ri ro ta bhuje ne do bhaddu do naanne mita ie.

²³Moko ta parro ke ri Yesus ne ruai ddau do bhaddu ne, jhe kedhago ri No aggo ju la tele ngati dhara rae do naanne. Ta alla pemina-harre, ta penyi'o ke ri ilu No la namada ddau do naanne. Ta takke ke ne ruai No pa namada ddau do naanne, jhe kebhale ri No, ”Nara ke au ta ngaddi ne nga nga pa awe nadhe?”

²⁴Ta heleo ke ju la hedhapa ne ddau do naanne, jhe lii no, ”Oo, ngaddi ke ri ya ne ddau do lappa ma, tapulara hala dho mii hekepue ajhu he.”

²⁵Ta takke ke ri Yesus ne ruai No pa namada ddau do naanne. Pa awe do nadhe ta petadi tarra ke ne ddau do naanne ta ketarri. Ta ie ke ne namada no jhe ngaddi hari-hari ne nga we nga dhai woie ne teleo.

²⁶Moko ta lii ke Yesus pa no, ”Bhale we au jhe bhole bhale wari la rae do na nidhe.”

²⁷Ta kako ke Yesus nga ana hekola No he la rae-rae do peumu nga Kaisaria-Filipi. Pa telora rujhara ta kebhali ke Yesus pa ro, ”Pedutu nga lii ddau he nadu ke Ya dhe ne ane ro?”

²⁸ Ta bhale ke ri ro, ”Era do lii ta Yohanes Mone Pejhiu, era lema do lii ta Elia, jhe lii do wala ri: hala heddau ngati telora nabi he.”

²⁹ ”Tapulara ki pedutu nga lii mu miha, Ya dhe, nadu ke?” ne kebhali Yesus pa ro. Ta bhale ke ri Petrus, ”Ama ke ne Duae Mone-ma'i-Mone golo ne!”

³⁰Moko ta lii ke Yesus pa ro, ta bhole pepeke ie ta pa nadu we ne jhara lua ngi'u No ne.

³¹Ta alla pemina harre, ta jhari ke Yesus ta ajha ne ana hekola he, jhara Ana Ddau Raiwawa do jhamma ta dhui hape hedui-herui do dhai ae, jhe do ta tobhe-ta dharro No ri kattu-kattu mone tunu-menah u nga ri guru-guru aigama. Do ta pemade No, tapulara pa lodho do ketallu ne do ta pekaddhe bhale wari No.

³²Do dhai teleo ne peke ri Yesus ne jhara lai do naanne pa ana hekola No he. Moko ta nune ke Yesus ri Petrus la keraha, jhe jhege No.

³³Tapulara ta kebhibha ke Yesus jhe katarri ne ana hekola No he, jhe jhege Petrus ri No, ”Langnga au ngati dhe, Wango! Lua penge au dhe, lua penge ddau raiwawa we, adho lua penge Deo!”

³⁴ Ta alla pemina harre ta pedo ke ri Yesus ne ddau lowe do era pa anne he la'u-la'u nga ana hekola No he. Moko ta lii ke Yesus pa ro, ”Nadu do ddhei ta pedute Ya, do jhamma ke ri no ta awe la kejhunga ne lua ddhei no miha, jhe dhue hape ne ajhu ketoe no, jhe pee loro nga pedute Ya ri no.

³⁵ Rowi ne ddau do ddhei ta parro nga kedhago ne muri mada no, do ta ele ne muri mada no do naanne. Tapulara ddau do jhole ne muri mada no tu Ya nga tu Lii Hagha Dhara do ngati Deo ne, do ta pehelame ke ne muri mada no.

³⁶Ne nga ke ne lua mangngi pa heddau, maji le ta unu ri no hari hewue rai wawa dhe, tapulara do ele ne muri mada no?

³⁷Do nara ke ane ne muri mada ne ta pehure ri heworawwu bhara he?

³⁸Ki nga mekae ke heddau ta mengaku Ya, nga hari lema ne nga ne do ajha ri Ya pa dhara awe do apa-do kedhaha do nadhe, ri Ana Ddau Raiwawa lema do ta mekae ta mengaku ne ddau do napoanne, kinga dhai pa awe dakka No hine do nga kuaha Ama No, jhe do nga lere nga kelao ri naju-naju No do mmau do megala he.”