Read Sabu MARKUS 9 Bible Online

MARKUS 9 - Sabu bible

MARKUS 9

¹”Do jhamma ke ri mu ta toi!” ane Yesus, ”Ngati telora mu do na hedhe, bhule de dho heddau he do made dae hine, ki dho ngadde dae ne lua pereda nga kuaha Deo ne!”

² Ta ludu anna lodho, ta aggu ke ri Yesus, Petrus nga Yakobus nga tuahhu no Yohanes, pekiha-anni la hewue lede do dhida. Pa hedhapa ro hari-hari, ta lari-anni ne worawwu Yesus.

³Ne bhara pake No ta pudi kewa'a ke. Bhule dho heddau tuka bhara he do nara ta bhaha tade pudi kewa'a mina harre ne worawwu.

⁴Ta alla pemina harre, ta ngaddi ke ri hari do tallu ana hekola No he, Yesus era do pedai-dai lii nga Elia nga Musa.

⁵Moko ta lii ke Petrus pa Yesus, ”Ama Guru, do woie tarra di pa dhe. Rihi ie jhi ta petitu talu bhue ammu bhalla lai: hewue tu Ama, hewue tu Musa nga hewue ri tu Elia.”

⁶Ne pa petu ne, toi dho ri Petrus ne nga ne do pale ri no ne, rowi ro hari do tallu pa dhara nga meda'u do dho ie ta nga-nga.

⁷ Ta alla pemina harre, ta dakka ke ne merammu la herimu ro, jhe rangnge ri ro lipedai ngati dhara merammu do naanne do pali, ”Nadhe ke ne Ana hajha nga Ana ddhei Ya ne. Pedhanno we mu nga No!”

⁸Nga henginga-nginga, ta heleo ke ri ro pekehero ne era do naanne, ngaddi dho ke ri ro ie ta heddau he nga ro ri pa anne wala ngati Yesus miha.

⁹Pa dhara nga puru ro ngati kolo lede ne, ta pehewina ke ri Yesus, ”Bhole pejha'i ri mu ie ta pa nadu we ne nga ne do ngaddi ri mu do ngine ne, ki do dho pekaddhe dae Ana Ddau Raiwawa ngati dhara made mada.”

¹⁰Ta pedute ke ri ro ne litakka Yesus do naanne, tapulara pa telora ro mi ha do jhari ke ta pedae ne nga ne lua pedabbho Yesus nga lipedai: ”muri bhale wari ngati made mada”.

¹¹ Moko ta kebhali ke ro pa Yesus, ”Ta nga hakku era ne lii guru-guru aigama he ta do Elia ne do jhamma ta dakka uru jhara?”

¹²Ta bhale ke ri Yesus, ”Do tarra ma Elia ta do dakka uru jhara ta ma pemoko hari-hari lai. Tapulara mina mii ke ne jhara lua Ana Ddau Raiwawa? Ta nga hakku pa dhara Buku Lidara-Likewahhu Deo, do era do hure do bhuke, ta do medae Ana Ddau Raiwawa ta dhui-hape jhajhi ae lua hedui-herui nga lua kare nga menihe ri ddau?

¹³Tapulara ne lii Ya pa mu: Do nee ke Elia, jhe e'e ne ddhei we ddau raiwawa ne tao pa no. Lai do napoanne do hela'u ke nga do hure do bhuke pa dhara Buku Lidara-Likewahhu Deo, jhara lua ngi'u no.”

¹⁴Ta dhai Yesus nga ana hekola No he hari do tallu la nga ana hekola do haghe he, ta ngaddi ke ri ro, do ae ke ddau pa anne. Do parri ddau guru aigama era ke do pebhata nga ana hekola Yesus he.

¹⁵Ta ngadde dhangnge Yesus ri ddau do na harre ta madalae ke ro, jhe perai-loro ta la peabu nga Yesus.

¹⁶”Ne nga ne do pedae ri mu nga guru-guru aigama do na hidhe?” ne kebhali Yesus pa ana hekola No he.

¹⁷Ta bhale ke ri heddau ti telora ddau lowe he pa Yesus, ”Ama Guru, ne do nga aggo ri ya, ne ana ya ma nga Ama. Ne do dho i'a pedai lii, rowi ne do maho ri wango ma dhara no.

¹⁸Kinga dhai ke no ta kepali, ta tue-tabbho-laggo ke no la worai, jhe woro ne ubha dhe, pekiho ne ngutu he jhe hekota hari hengi'u. Alla ke ri ya peami ne ana hekola Ama he ta hudhe ne wango do naanne, tapulara nara dho ta hudhe ri ro.”

¹⁹Moko ta lii ke Yesus pa ro, ”Do dhia lara-wata tarra mu he dhe hari-hari. Mu hedhe ddau do dho bhule nga lua manno nga kaho. Tade henga ri ko ne ne tui ne jhamma Ya ta era hela'u-la'u nga mu jhe makka tee penaja nga mu hari-hari? Aggo ma dhe ne naiki do napoanne!”

²⁰Ta aggo ke ri ro ne naiki do naanne la nga Yesus. Ta ngadde dhangnge Yesus ri wango do naanne, ta pekepangnge ke ri no ne na iki do naanne, hakku ta keloli pebhare-gore ke la worai, jhe woro ne ubha ne.

²¹Moko ta kebhali ke Yesus pa ama ri naiki do naanne, ”Henga ke ne tui, ne paddha no do mina hedhe?” ”Rai ngati awe naiki ko ma no!” ne bhale ri ama naiki ne.

²²”Jhajhi wari ne wango do naanne ne petadi ta pemade no nga loro jhara ta pekelole no la dhara rao-ai, kiadho la dhara ei. Tapulara kinga nara Ama ma ta ruba dhara, ruba ko we nga jhi!”

²³”Ne nga ne lii au? Kinga nara ma Ama?” ne bhale ri Yesus. ”Hari-hari lai do nara ta jadhi, hadhi we ddau ta parahajha!”

²⁴Ta hamme dhangnge ke ri ama ri naiki do naanne nga peka, ”Muri, parahajha ya, tapulara ne lua manno nga kaho ya do kura ko. Ruba kowe nga ya mita ju rui ne lua manno nga kaho ya!”

²⁵Ta dhai ta ngaddi ri Yesus ne ddau lowe he ta la peworo ro, ta lii ke Yesus pa wango do naanne, ”Wango hoe nga bhangnga, ne lii Ya pa au, mahhu-an ni we ngati naiki do nadhe, jhe bhole maho ri au la dhara no!”

²⁶Ta peka ke ne wango do naanne, jhe pekepangnge-pangnge ne ihi naiki do naanne. Ta heleo ne naiki do naanne, hala dho ke mii do made he, hakku ta lii ke ne ddau he hari-hari, ”Alla ke pemade no!”

²⁷Tapulara ta parro ke ri Yesus neruai naiki do naanne, jhe pekaddhe no. Ta kaddhi ke ne naiki do naanne.

²⁸Ta dhai Yesus la ammu, ta dakka ke ne ana hekola No he, pa awe ro he we miha, la kebhali pa Yesus, ”Ta nga marra, hakku nara dho ri jhi ta hudhe ne wango do naanne?”

²⁹Ta bhale ke ri Yesus, ”Wango do mina harre, adho do nara ta hudhi ie ta ri loro jhara ne nga we, wala ngati ri lihebhajha we.”

³⁰Ta pekaddhi ke Yesus nga ana hekola No he ngati era do naanne jhe peterue ne loro jhara kako ro, lake jhara Galilea. Ddhei dho ke Yesus ta toi ri ddau ta pa mii ne era No,

³¹rowi do pa dhara nga wie liajha ko ri No ne ana hekola he. ”Ana Ddau Raiwawa do ta jhole la dhara higa ddau raiwawa, jhe do ta pemade tapulara pa lodho do ketallu ne do ta kaddhi No!” mina harre ke ne lii Yesus.

³²Tada dho ne ana hekola he ne nga ne do ajha ri Yesus pa ro, tapulara do meda'u ro ta kebhali pa Yesus.

³³Ta dhai ke ro la Kapernaum. Pa awe pa ammu ko ro, ta kebhali ke Yesus pa ana hekola No he, ”Ne nga ne do pedae ri mu pa telora rujhara he ngine?”

³⁴ Bhule dho ri ro do bhale, rowi pa telora rujhara he do pehala ro, jhara lua nadu ne do rihi mone-ae ti telora ro.

³⁵ Ta mejaddhi ke Yesus, jhe pedoa ri No hari henguru do dhue ddau ne ana hekola No he. Ta lii ke Yesus pa ro, ”Ddau do ddhei ta jadhi ta nome ahhi, do jhamma no ta jadhi ta nome do pedakka rahi jhe do jhamma ta mone pemoko hari-hari ddau.”

³⁶Moko ta aggo ke ri Yesus heddau naiki, jhe petito pa hedhapa ro hari-hari.

³⁷ ”Ddau do hamme heddau naiki do mina hedhe taga Ya, napoanne do hamme Ya ke. Jhe nadu do hamme Ya, adho ke no ta hamme Ya he we, tapulara do hamme No lema ke do pepue Ya ne.”

³⁸Moko ta lii ke Yohanes pa Yesus, ”Ama Guru, ngadde ri jhi heddau do hudhi wango nga pake ne ngara Ama. Ta lii ke jhi pa no ta bhole tao mina harre rowi no do adho no ti nga di.”

³⁹Ta lii ke Yesus, ”Bhole labbe no, rowi bhule dho heddau he do tao lua madalae pa dhara ngara Ya, do nara dhangnge ta pewoape Ya.

⁴⁰ Rowi ddau do dho pelawa nga di, no do jhara nga di ke.

⁴¹ Henge we ri mu! Ddau do wie mu eiloko ta nginu, rowi do toi ta mu ddau pedute Duae Mone ma'i-Mone golo ne, do tatu ke do ta hamme ri no ne pai pala no hine.”

⁴²”Nadu do periju hala heddau ngati ddau-ddau do naiki do na hedhe, mita do dho parahajha ro pa Ya, rihi ie ta akke ri wowadu pa lakoko no, jhe nabhe no la dhara dahi.

⁴³ Ki nga ruai do perijo au ta tao lubhu harro nga menyilu atte ne ruai do napoanne. Rihi ie ta muri mada hela'u nga Deo nga do dho bhu le nga ruai hebhakka, ngati maho au nga ruai hari dhue bhakka la dhara raoai do peloro ne. [

⁴⁴Pa ni ke ne ai do dho i'a made wari ne nga attu do dho i'a made ne.]

⁴⁵Jhe ki nga rubhebho au do perijo au la dhara tao lubhu harro nga menyilu, attenne rubhebho au do naanne. Rihi ie au ta muri hela'u nga Deo nga rubhebho hela we, ngati nabhe au la dhara rao ai do peloro ne nga rubhebho dhue laa. [

⁴⁶Pa ni ke ne ke ne ai do dho i'a made wari ne nga attu do dho i'a made ne.]

⁴⁷ Kinga namada au do perijo au la dhara tao lubhu harro nga menyilu, wuke ne namada au do naanne. Rihi ie au ta maho la dhara Raiwawa Deo Do Wowiu ne nga namada hebhakka we, ngati maho au nga nadama hari dhue bhakka la dhara rao-ai do peloro ne.

⁴⁸ Pa ni ke ne ai do dho i'a ma de wari ne nga attu do nara ta made ne.

⁴⁹Heddau-heddau do happo ri ai, mii bhara tunu-menahu do pemoo-pemegala ri mongahhi.

⁵⁰ Mongahhi do woie, tapulara ki melai ke, nara ko marra no ta pemedaddhe? Hakku do jhamma ke mu ta jadhi mii mongahhi he — muri mada we hela'u-la'u nga penau-penadhe-ie.”