Read Sabu LUKAS 1 Bible Online

LUKAS 1 - Sabu bible

LUKAS 1

¹Wo Teofilus do dhai woie henge nga danni-ade, Ae ke ne ddau do petadi ta bhuki jhe pejhare nga woie, jhara hari-hari lai do alla pejadhi pa telora di.

²Ne do bhuki ri ro, do hela'u ke nga do pedhiri pa di he, ri ddau-ddau do ngaddi ke ri namada ro miha, ne hari-hari lai do na harre rai ti petari, jhe pelebe ri ro la hebhakka-hebhakka ne lii jhara lai do naanne.

³Ta alla ri ya pekale toi jhe penarro nga woie, ne jhara lai na harre hari-hari rai tare ti petari, pa penge ya, rihi ie ta bhuke ri ya hahhi lipejhara do pera'e nga woie tu tuan.

⁴Hakku tao ri ya mina harre, mita ie ke ta toi ri tuan, ta do ne nga ne do alle pepejhare ri ya pa tuan, napoanne do petu tarra.

⁵ Pa dhara awe Herodes jadhi ta duae pa rai Yudea, era heddau mone tunu-menahu ne ngara no Zakaria. No dhe ti kejie mone tunu-menahu Abia. Ne ngara ihi-ammu no, Elisabet, ti kolo loro mone tunu-menahu lema.

⁶Ne muri mada ro hari do dhue do pemengallo dhara Deo. Do henono-henarru ro pa hari-hari ne nga we ne do dare do Kewahho ri Muri.

⁷Adho ro do era nga ana, rowi Elisabet do kebaki jhe do weka ke ro hari do dhue.

⁸Pa dhara helodho, pa awe unu kejie Abia, ta lakka ke Zakaria ta la pekako jhagga mii heddau mone tunu-menahu pa hedhapa Deo.

⁹Pa tima, ne mone tunu-menahu he, do ta pepidhi ode ko uru jhara, ri do mina harre ke ta lakka ke Zakaria ta pejhujhe ta maho la dhara Ammu Deo ta la tunu keminya.

¹⁰Pa dhara nga tunu keminya ne, jhe ne ddau lowe he do hebhajha pa tele.

¹¹Pa dhara awe naanne ta pengaddi-anni ke heddau naju Deo pa Zakaria. Ne naju Deo do naanne do titu pa bira kedhanga ngati meja era tunu-menahu keminya ne.

¹²Ta ngadde ri Zakaria ne naju Deo do naanne, ta bhingu ke no jhe meda'u.

¹³Tapulara ta lii ke ne naju Deo ne, ”Bhole meda'u, Zakaria! Do dhanno do tenae ke ri Deo ne lihebhajha au. Elisabet, ihi-ammu au ne, do ta metana ri no heddau ana momone. Do jhamma ta pehune ri au ne ngara no ta Yohanes.

¹⁴Do ta mengallu nge nga kehaka dhara au, mina harre lema ae ddau do ta mengallu nge nga kehaka dhara, ki dhai hine ta metana ne naiki do naanne!

¹⁵ Do ta jadhi ddau do mone-ae no pa hedhapa Deo, jhe adho no do medae ta nginu ei-ago, kiadho bhara nginu ne nga we do ta pemawo ddau. Henga Deo do ta herimo-heruge no, rai ta metana.

¹⁶Ae do Israel do ta bhau ta bhata ri no, mita bhale langa Deo, Muri ro.

¹⁷ Do ta jadhi ddau pepu-peju Deo ke no, do rui nga do nga kuaha do mii Elia. Do ta peie ri no ama nga ana, jhe do ta bhau ta bhata ri no ne ddau do keti-ketinga mita bhale la lua penge do petu. Nga mina harre ke ne pemoke hekejie ddau do moko tu Muri.”

¹⁸”Mina mii ne nara ta toi ri ya ta do ta jadhi ne lai do naanne?” ne kebhale ri Zakaria pa naju Deo do naanne. ”Ya dhe do weka ke, mina harre lema ne ihi-ammu ya.”

¹⁹ Ta bhale ke ri naju Deo ne, ”Ya dhe Gabriel. Ya ke ne do pemoke Deo, jhe No ke ne do pepue ya ta ma peke pa au ne lii mengallu nge nga kehaka dhara do nadhe.

²⁰Ne nga ne do peke ri ya pa au dhe, do ta hine ki dhai ne awe ne. Tapulara taga tari do dho parahajha au, do medae ta do dho nara au ta pedai lii; do ta bhangnga au tade dhai hape la awe jadhi ne nga ne do peke ri ya dhe.”

²¹Pa dhara awe naanne ne ddau lowe he do pee ke nga mate Zakaria. Ta madalae ke ro ta nga hakku rihi tui Zakaria pa dhara Ammu Deo ne.

²²Ta dhai no ta mahhu-anni, i'a dho ke no pedai lii. Pee ke no nga wiu-wiu-ai ke pa ddau lowe he, jhe pee no nga bhangnga. Moko ta toi ke ri ddau he ta do alla ke Zakaria pengaddi hahhi lai pa dhara Ammu Deo.

²³Ta moko le ne jhagga Zakaria pa Ammu Deo, moko ta bhale ke Zakaria la ammu.

²⁴Tui dho ngati awe naanne, moko Elisabet ta era ke nga kadho, jhe bhaddo anni no pa dhara ammu, lammi warru ne tui.

²⁵Ta lii ke Elisabet, ”Pedakka rahi, ruba dhara ma Muri nga ya, jhe peele ne lua woapa ya.”

²⁶Ta dhai ta anna warru Elisabet ne era nga kadho, ta pepue ke naju Deo, Gabriel ri Deo la Nazaret, hewue rae pa ihi rai Galilea.

²⁷ Ne pepue Gabriel, la nga heddau ana do ngarru, ne ngara no Maria. Ne ana mobanni do naanne do pa dhara peddhei nga heddau ne ngara no Yusuf, kolo loro Duae Daud.

²⁸Ta dakka ke ne naju Deo ne la nga Maria, jhe lii, ”Helama tona ie tu au, au ke ne do ta wie ne lua tarro ie nga menyarro mangngi do kerihi ri Deo! Muri ne do ta penau-pelere nga au!”

²⁹Ta kebhaddi ke Maria ta dhai ta rangnge ri no ne lipedai naju Deo do naanne, hakku ta penge-nge ke ri no pa dhara ade no ne nga ne lua pedabbho lipelangu do naanne.

³⁰Moko ta lii ke ne naju Deo ne pa Maria, ”Bhole meda'u, Maria, rowi do maddhi ke au pa dhara ade Deo.

³¹ Do ta melole jhe metana ri au heddau ana momone, jhe do jhamma ta pehune ri au ne ngara ne ta Yesus.

³² Do ta keto-kelodo ke No, jhe do ta pale ta Ana Deo Tabbho-rai Tabbho-liru. Ri Muri Deo do ta dhede No ta jadhi Duae mii Daud ama-appu No.

³³Jhe do ta pereda No pa kolo loro Yakub lohe la lodho do nami mii ne. Ne Rai-pereda No adho do era nga lua pedakka ne.”

³⁴Ta lii ke Maria pa naju Deo ne, ”Mina mii ne nara ta jadhi ne lai do naanne, rowi ya dhe heddau ana do ngarru kehamme ko?”

³⁵Ta bhale ke ri naju Deo ne, ”Henga Deo do ta dakka ma nga au, jhe kuaha Deo ne do ta herimo-heruge au. Ri do mina harre ke ne naiki do ta metana ne, do ta pale ta Dommau-Domegala, Ana Deo.

³⁶Henge: Elisabet do tu raa-tu manynyi au ne, nnai ke wila nga wue, jhe anna warru ke, maji lema ta do weka ke no, jhe do pale ke ri ddau ta do kebaki.

³⁷ Rowi pa Deo bhule dho do dho dhae ta do dho jadhi.”

³⁸Moko ta lii ke Maria, ”Ya dhe annu Muri; la'a we no jadhi we pa ngi'u ya, mina mii ne do pale ri au ne.” Moko ta langnga ke ne naju Deo ne ti nga Maria.

³⁹Tui dho ti awe naanne, ta kako ke Maria la hewue rae pa Yudea pa ihi rai do pa kolo lari-ae.

⁴⁰Ne pedabbho Maria ta la ammu Zakaria, ta dhai no ta maho ta pelango ke Elisabet ri no.

⁴¹Mina harre ta ne rangnge ri Elisabet ne lipelangu Maria ne ta kebhijo-bhajo ke ne naiki pa dhallu Elisabet ne. Moko ta helibho ke Elisabet ri Henga Deo,

⁴²moko ta lii ke no, ”Au ke ne do hamme ne lua tarro ie nga menyarro mangngi do kerihi ngati hari-hari mobanni! Do medi-melatu ke ne naiki do ta metana ri au ne!

⁴³Nadu ke ya dhe hakku dakka ina ri Muri ya ta ma heaho ya?

⁴⁴Rowi mina harre ta rangnge ri ya ne lipelangu au ne, ne naiki do pa dhallu ya dhe ta kebhijo-bhajo ke ri mengallu dhara.

⁴⁵Mangngi nga mengallu dhara tu au, taga tari do parahajha ke au, ta do ne nga we do pale ri Muri pa au ne do ta jadhi!”

⁴⁶ Ta lii ke Maria, ”Ne ade ta wue-waje Muri ke,

⁴⁷jhe dhara kodo ya ta mengallu nge nga kehaka dhara ke rowi Deo ke ne Mone ma'e-Mone gole ya.

⁴⁸ Do henge ri No, ne annu No do woapa! Jhari ngati dhara awe nadhe hari-hari ddau-rai do ta lii pa ya ta do mangngi nga mengallu dhara

⁴⁹Rowi Deo do Mone Wiki Rihi higa nga pereda do tao ke ne lai-lai do mone-ae pa ya. Do mmau do megala ke ne ngara No.

⁵⁰Ngati hehuhu la hehuhu Muri do pee nga peloro ne pedhelo ne lua ruba dhara pa ddau do meghighi meda'u pa No.

⁵¹Ri rukemakku No do mina harre ne worawwu rui pemenyabbha kebali-bali ri No ne ddau do wue-anni, jhe pekenyawu-nyela ri No ne lai do peito perijho ri ro.

⁵² Pepuru ri No ne duae-duae ngati kedera era mejaddhi ro, jhe dhede pedhida ri No ne ddau do woapa.

⁵³Ddau do menganga, pebhahhu ri No ri hari-hari lai do woie, do kaja hudhi nga keluru ri No nga ai-wue.

⁵⁴Do rabhe do dharro ri No annu-niki No, Israel pedutu nga lijaji do alle petao ri No nga ama-appu di.

⁵⁵ Adho do ballo ri Muri ne lijaji No, do pedhelo ri No ne lua ruba dhara No pa Abraham nga pa kolo loro no lohe la lodho do nami mii ne.”

⁵⁶Era ma tallu warru he Maria ne pee nga Elisabet, jhe itu bhale no la ammu no.

⁵⁷Moko ta dhai ke ne awe pa Elisabet ta keho-dhara. Ta metana ke ri no heddau ana momone.

⁵⁸Ta dhai ta rangngi ne do rae do kowa no he, nga a'a-ari, wini-huhu no he, ta do mina harre ke ne dhai woie Muri penaja nga Elisabet, ta mengallu dhara ke ro hela'u-la'u nga Elisabet.

⁵⁹ Aru lodho ta alla pemetana ne naiki do naanne, ta dakka ke ro ta la dare ngutu ne naiki do naanne. Ne ddhei ro ne naiki do naanne ta pehune ne ngara no ta Zakaria pedute nga ngara ama no,

⁶⁰tapulara ta lii ke ina no, ”Bhole! Do jhamma ne ngara no pehune ta Yohanes.”

⁶¹Ta lii ke ro, ”Bhule dho ie ta heddau he ti telora a'a-ari mu do era ne ngara ta do mina harre.”

⁶²Ta wui-ai ke ro, ta kebhali pa Zakaria, ta ne nga ne ngara do ddhei Zakaria ta pehune pa naiki do naanne.

⁶³Ta ami ke Zakaria hewue lei, jhe bhuke ri no, ”Ne ngara no, Yohanes.” Ta madalae ke ro hari-hari.

⁶⁴Pa dhara awe naanne lema ta nara ke Zakaria ta pedai lii, jhe wue-waje Deo.

⁶⁵Ta meda'u ke hari-hari ne do rae do kowa ro he, jhe ne lai do naanne ta menyabbha ke la hari-hari ihi kolo lari-ae Yudea ne.

⁶⁶Hari-hari ddau do rangnge ne lai do naanne, ta kebhali ke ro pa dhara ade ro, ”Do medae ta jadhi nga marre ke ne naiki nadhe hine?” Rowi nee do penau-pelere Muri nga no.

⁶⁷Zakaria, ama ri naiki do naanne, ta helibho ke ri Henga Deo, hakku ta pedhae ke ri no, ne lii do ngati Deo ne. Ta lii ke no,

⁶⁸”Mai we di ma wue-waje Muri, Deo do Israel! Do nee ke No ma pedhelo ne lua ruba dhara no pa annu-niki No, jhe ma peballa ne kattu ro.

⁶⁹Do ma wie ke pa di ri No, ne Mone ma'i-Mone golo do ketoo, kolo loro Daud, annu No ne.

⁷⁰Rai uru-rai tare, pelake jhara nabi-nabi do jhujhu do pidhi ri No, do alle ke pewie ri Muri ne lijaji No

⁷¹tu ta ma'i ta golo di ngati ihi-muhu ihi-lawa di ngati dhara wolaabba ddau do kena nge-paddhu dhara nga di.

⁷²Tu ta ma pedhelo ne woie nge danni-ade No pa ama-appu di, do ta petobe ri No ne lijaji No do mmau do megala ne.

⁷³Nga dhede hupa No pa Abraham ama di, jhe pejaji No tu ta ma'i ta golo di ngati ihi-muhu ihi-lawa di, mita do dho bhule di nga meghighi meda'u ne pemoke No

⁷⁴

⁷⁵jhe jhole loro ne muri mada di pa No nga pemengallo nge nga kehaka dhara ne ade No pa hewue muri mada di.

⁷⁶ Au, ana ya ee, do ta pale ke ta nabi Deo do Rihi Dhida nga ketutu ne. Do pepue ke au uru jhara ngati Muri ta ma pemoke ne loro jhara tu No,

⁷⁷tu ta ma pepeke pa annu-niki No ta do ro do ta ma'i ta golo ke, ki alla ke ri Deo pepehai-pehuba ne lubhu harro nga menyilu ro.

⁷⁸Muri di do mone manynyi nga natta ade; ne dakka No ta ma'i ta golo di. Do mii mada lodho he ne hhau pa awe jhammi-ae,

⁷⁹ mina harre ke ne pekelale ri No ne weo nga kana No pa hari-hari ddau do muri mada pa dhara lua kerabba nga lua meghighi-meda'u. Do ta bhau ta bhata ke di ri No pa loro jhara do petuje la dhara lua pedhuri-pemira.”

⁸⁰Bhale ma ne ana Zakaria ne, ju rui ne henga no. Ne era pee no pa dhara padha nga meraddha, tade dhai la awe peteleo-anni ne no pa do Israel.