Read Sabu LUKAS 12 Bible Online

LUKAS 12 - Sabu bible

LUKAS 12

¹ Tabbha-tabbha ddau ne do pee ke nga pewingi we, hakku tade era do pejhalli pa danni kabha jhalla. Pa dhara nga peworo-woro ne ddau do na harre, ta lii ke Yesus pa ana hekola No he, ”Meniga we mu pewoie-ie nga muu do Farisi he, ne pedabbho Ya nga lua pekebhalli-anni ro he.

² Rowi bhule dho lai do pehune-penite do dho medae ta ngadde, jhe bhule dho lai do wowuni do dho medae ta boka peteleo.

³Do pale ri mu pa awe maddha, do ta rangnge pa awe anni lodho; nga lai do pekewure ri mu pa wodilu ddau pa dhara kopo do henabbhe, do ta lango la hebhakka-hebhakka.”

⁴”Wo ihi anga-ihi anga Ya, henge we! Bhole meda'u mu pa ro do wata ke do nara ta pemade ngi'u dhe we, tapulara adho do nara ta tao do rihi ri ti napoanne.

⁵Mai ma pejhujhe ri Ya pa mu, pa nadu ne do jhamma ne mu ta meda'u. Meda'u we mu titu wata pa Deo we! Rowi ki alla ke pepemade ri No, do nga kuaha ri ko No ta nabha la dhara rao-ai do peloro ne! Parahajha we, do titu wata pa No he ke ne do jhamma mu ta meda'u.

⁶Lammi ngi'u menguu, pewie nga kebhue dhue mada doi do rihi wonaiki. Maji le ta mina harre bhule dho hengi'u he do ballu ri Deo.

⁷Rukattu pa wokolo mu le miha do alla ke pekire hari-hari, rowi do mina harre ke bhole meda'u; ne kebhue mu do rihi ngati menguu do na harre!”

⁸”Henge we pewoie-ie: Ddau do mengaku pa hedhapa ddau lowe ta do no ddau pedute Ya, do ta mengaku lema no ri Ana Ddau Raiwawa pa hedhapa naju-naju Deo.

⁹Tapulara ddau do pehili-anni pa hedhapa ddau lowe ta do adho ddau pedute Ya, no lema do ta pehile ri Ana Ddau Raiwawa pa hedhapa naju-naju Deo.

¹⁰ Kinga era ddau do pali ne nga-nga do pelawa-petaddhu nga Ana Ddau Raiwawa, do nara ke no ta pehuba; tapulara kinga kare-menihe Henga Deo, nara dho ke no ta pehuba ri.

¹¹ Kinga nuni-pera'u mu la ammu-ammu hebhajha tu ta la pedae ne hala pa hedhapa do pereda kiadho do higa, bhole kebhaddi ne jhara lua mina mii mu ne do jhamma ta pemole ne ngi'u mu, kiadho ne nga ne do jhamma ta pale ri mu.

¹²Rowi ne nga ne do jhamma ta pale ri mu, do ta peke ma pa mu ri Henga Deo kinga dhai ne awe ne.”

¹³Heddau ti telora ddau lowe he, ta lii ke pa Yesus, ”Ama Guru, hakko ko we ri Ama ta lii pa tuahhu ya wie pa ya haghe ngati puhaka ama jhi he.”

¹⁴Ta bhale ke ri Yesus, ”Tuahhu, nadu ne do alle pedhede Ya ta jadhi pehappo kiadho ta mone pebhagi puhaka pa telora mu hari do dhue?”

¹⁵Ta alla pemina harre ta lii ke Yesus pa hari-hari ddau do era paanne, ”Meniga we mu, bhole rihi ne lala. Rowi muri mada ddau raiwawa, adho do peini-anni pa lua kaja kete'e, maji lema ta do kenata ke ne unu-oha no.”

¹⁶Moko ta pedhire ke ri Yesus ne lipehakku do nadhe, ”Ta era ke heddau do kaja. No do nga rai nga unu, jhe do dhai jadhi ne habha-ne la'a no ngati rai no do na harre.

¹⁷Ta jhari ke ta penge ri no pa dhara ade no, ’Bhule dho ne era ri ta takka ne ihi-habha ya hedhe. Ne nga ke uku ya pa awe nadhe?’

¹⁸Ta alla pemina harre ta penge ke ri no pa dhara ade no miha, ’Ngadde ke ri ya ne uku; medae ta lii ke ya ta bhagi hari-hari ne guda ya do dui hedhe, jhe petitu guda do rihi worena ri. Do ta takka paanne ke ri ya ne ihi-habha ya nga hari-hari bhara do wala he ri.

¹⁹Ki alla ke pemina harre, do ta lii ke ya pa ngi'u ya miha: Do rihi mangngi tarra ke au! Hari-hari do ie-do ae do unu-do oha ke ri au, jhe adho do ta alla ri, maji lema ta ttau-ttau ne tui. Pengaha-ihi we au pa awe nadhe! Nga'a-nginu we au e'e ne ddhei au, pa dhara muri mada au!’

²⁰Tapulara ne lii Deo pa no, ’Woo do bhodho! Pa rammi do nadhe dhangnge do ta made ke au, nadu ke ne do ta hammi ne lua kaja nga kete'e do alla pepe kupu ri au he tu ngi'u au ne?’

²¹Mina harre ke ne do ta jadhi pa nadu we do ddhei ta kaja tu ngi'u no miha, tapulara adho do petadi ta kaja pa dhara namada Deo.”

²²Moko ta lii ke Yesus pa ana hekola No he, ”Ri do mina harre ne lii Ya pa mu, ’Bhole keba'a-kepapi mu jhara lua muri mada mu, jhara ne nga we ne do ta na'e ri mu, kiadho ne nga we do ta pake ri mu.’

²³Ne muri mada ne do rihi ti bhara nga, nga ngi do rihi ti bhara pake.

²⁴Heleo miha gaga ri mu! Ngaddi dho no ta kujha, jhe ngaddi le dho ma ta ghattu, bhule le dho ma no nga guda kiadho nga hoka. Tapulara do piara-peluja ma ri Deo hari-hari! Do rihi ne dhida ne kebhue mu ngati dolila do na harre!

²⁵Nadu ke ti telora mu do nara ta pemedere ne muri mada no ie ta heaggha he ri lua keba'a-kepapi no?

²⁶Ki lai-lai do mina harre ne worawwu he maddha nara dho ma ke ri mu ta tao, ta nga ri ko hakku keba'a-kepapi pa lai-lai do wala ri?

²⁷ Heleo miha kelia barri ne muri, ne bhunga-bhunga do na harre ngaddi dho ta mane-ta menannu. Tapulara Duae Salomo miha do mina harre ne worawwu kaja nga kete'e, ngaddi dho ta pake bhara do mina harre ne worawwu gaa nga merake mii wila bhunga do na harre!

²⁸Jhu'u pa pa dhara padhe do muri pa dhara helodho iki he we, jhe do pa bhalli-rai ne, do ta tunu ke pekappu-ladu-ladu. Tapulara Deo do pemoke no ta mina harre ne worawwu gaa nga merake. Mina mii ri ko mu ri! Tapulara lohe dho mu ne parahajha!

²⁹Hakku, bhole keba'a-kepapi nga bhingu jhara lua ne nga ne do ta nga'a ta nginu ri mu.

³⁰Lai-lai do mina harre do hudhe kajhe-dhae ri ddau-ddau do dho tade Deo we. Jhe ne pa petu ne ri Ama mu do toi ke ta do paralu ma tu mu hari-hari ne na harre.

³¹Tapulara do jhamma ma mu ta wohe-la'a-rui, mita ie Deo ta pereda pa dhara muri mada mu, moko ne lai-lai do wala he do ta wie lema ri Deo tu mu.”

³²”Ne ae mu do kappi we, bhole meda'u! Rowi Ama mu do nga mengallu dhara ne wie pa mu ne lua tarro ie nga menyarro mangngi ngati lua Pereda No.

³³Pewie we ne unu-oha mu, jhe ne doi kebhue he, wie we pa do kehia nga gahara. Tao we tu ngi'u mu ne wokepaka doi do adho do i'a bura wari, unu-oha do takke pa era do mmau do megala ne. Puhaka do dho i'a ele wari, rowi adho ke do dae ri ta la mena'o ri do mena'o nga adho ke do dae ri ta la peape ri rurai.

³⁴Rowi pa mii we ne puhaka mu, do paanne lema ke ne ade mu!”

³⁵ ”Pemoko-moko-anni we pa dhara hari-hari lai. Do jhamma mu ta era nga moko loro ne pake ne bhara mu, jhe ne lapu mu do pee nga peweo,

³⁶ hela'u mii naannu-naannu do pa dhara nga moko ta mate muri ro ta bhale ngati lai-ala peloko nga'a. Kinga dhai ne muri ro ta bhale, jhe kedakku kelae, do nga hengi-nga ke ro ne boka kelae.

³⁷Dhai tarra ne mengallu dhara ne naannu-naannu do abu pa dhara nga mate ne lua dakka muri ro ne. Parahajha we mu: ne muri do naanne do ta pebharra-anni ke jhe lii pa naannu do na harre ta mejaddhi, jhe no miha ne do ta pemoko nga'a-nginu tu ro.

³⁸Dhai tarra ne mangngi ne naannu do na harre kinga abu ke ro ri muri ro do era pa dhara nga pemoko-anni, ta mate no maji lema ne muri ro ne ta dakka pa awe telora maddha, kiadho rihi maddha ri ko ti naanne!

³⁹ Henge we ne nadhe! Kita do toi he ri muri ammu ne ta wabba henga ne medae ta dakka do mena'o, moko do ta jaga ke no, mita do dho nara ne do mena'o ne ta maho la dhara ammu no.

⁴⁰Rowi do mina harre ke do jhamma ke mu ta jaga nga meniga, rowi Ana Ddau Raiwawa do ta dakka pa awe do dho e'e do dho toi ri mu.”

⁴¹”Muri, mina mii, ne lii ajha do napoanne do petuje pa jhi ke ri Muri, we pa hari-hari ddau?” ne kebhali Petrus.

⁴²Bhale ri Muri, ”Nadu ne naannu do mappe nga henarru jhe do mmau dhara hakku dhede no ta jadhi kattu pa naannu do wala he, mita ie ta wie ri no ne nga'a-nginu pa awe do alle pepetato ne?

⁴³Dhai tarra ne mengallu dhara ne naannu do naanne ki bhale ne muri no ne, jhe abo no do pa dhara nga pekako ne tenge no!

⁴⁴Parahajha we mu: Ri muri do naanne do ta jhula ke hari-hari ne unu-oha no he tu ta pemoko ri naannu do naanne.

⁴⁵Tapulara kinga lii ne naannu do naanne pa dhara ade no, ’Do tui ko muri ya jhe itu bhale,’ jhe dede-merahhu ri no hari-hari ne naannu do wala he, jhe nga'a-nginu no tade mawo,

⁴⁶moko muri no ne do bhale pa awe do dho e'e do dho toi ri no. Moko ne naannu do napoanne do ta dede ta merahho tade hetenga made nga muri, jhe pehela'u ne unu pala no nga ddau-ddau do dho meda'u penaja nga Deo.

⁴⁷Naannu do toi ne lua ddhei muri no, jhe do dho pemoko-moko-anni nga dho tao pedute nga do ddhei muri no ne, do ta dede do mejanni no.

⁴⁸Tapulara naannu do dho toi ne lua ddhei muri no, jhe do tao ri no hahhi lai do jhamma no ta dede, do medae ta hema we ne dede no. Rowi ddau do alle pewie do ae, do ta dhuke do ae lema ngati no. Jhe ngati ddau do alle pejhole do ae tu ta pemoke ri no, ngati no lema do ta dhuke do ae.”

⁴⁹”Ne dakka Ya tu ta ma peera ai do ta pekappu ne nga-nga pa raiwawa dhe. Jhe do tarra ne woie ki do weo ke ne ai do naanne!

⁵⁰ Nee ko ne lua hedui-herui do rihi ngati ihi do jhamma ta narro ta lake ri Ya. Jhe ne ade Ya do pee ko nga penina noho nga do dho jadhi dae ne lai do naanne.

⁵¹We ne penge ri mu ne lua dakka Ya ma raiwawa do ta ma wei ne lua pedhuri-pemira? Adho, adho lua pedhuri-pemira, tapulara lua pelawa-petaddhu.

⁵²Jhari rai ngati awe nadhe, dhara ammu do era do lammi ddau pa dhara no, do ta petobha-pedharru, do tallu pelawa nga do dhue, kiadho do dhue pelawa nga do tallu.

⁵³ Ama do ta pelawa nga ana no do momone, jhe ana do momone do ta pelawa nga ama no. Ina do ta pelawa nga ana no do mobanni, jhe ana no do mobanni do ta pelawa nga ina no. Ina ri momone do ta pehala nga ihi-ammu ana no do momone, jhe ihi-ammu ri ana momone do ta pehala nga ina matu no.”

⁵⁴Mina harre lema ta lii ke Yesus pa ddau lowe he, ”Ki ngaddi mu merammu ta ha'e ti bira waa, lii dhangnge mu, ’Medae ke ta ajjhi.’ Jhe dakka tarra ajjhi.

⁵⁵Kinga toi ke ri mu ta dakka ke ngallu ti bira bhollau, ane mu, ’Medae ke ta pana.’ Jadhi tarra ta pana.

⁵⁶Mu hedhe ddau do ddhei ta pekebhalli-anni! Nara ri mu ta toi ne nga ne do ta jadhi jhara dhida nidhe nga heleo ihi liru nga do era pa dha'i dhe. Ta nga hakku do dho nara ri mu ta kale toi ne tada-tada ngati awe do nadhe?”

⁵⁷”Ta nga mu hakku do dho bhani ta happo miha ne nga ne do petu ne?

⁵⁸Kinga era ddau do la pemaho lii kela penaja nga mu pa mone happo hala, ne woie-ie ne kale we ri mu ne loro jhara ta pemoke ne kewallu do naanne nga pa telora loro jhara ko mu. Ki do adho ke do mina harre, do ta nuni ke mu ri no la hedhapa ddau mone happo hala, jhe ri mone happo hala do ta jhula ke mu pa polisi, jhe ri polisi ri do ta pemaho ke mu la dhara ammu bhaddo.

⁵⁹Parahajha we! Adho ke mu do medae ta mahhu-anni dae ngati dhara ammu bhaddo ne ki do dho mmau dae ne hala mu ne.”