Read Sabu LUKAS 13 Bible Online

LUKAS 13 - Sabu bible

LUKAS 13

¹Pa awe naanne ta pedhire ke ri ddau pa Yesus, jhara do parri ddau do Galilea do alla pepemade ri Pilatus, pa dhara nga jhula bhara tunu-menahu ro pa Deo.

²Mii libhale ngati lipedhiri do naanne ta lii ke Yesus, ”Taga tari mina harre ke ne lua made do Galilea do na harre, hakku ne peira ri mu, ta napoanne ke ne tada ta do rihi ne lubhu harro nga menyilu ro ngati Galilea do wala he?

³Adho tu-tu mina harre! Tapulara henge we: Ki do dho jharra mu ngati lubhu harro nga menyilu, mu hari-hari do ta made mii ro lema.

⁴Jhe mina mii ri ne jhara do henguru do aru ddau do made pa Siloam he, do nappi ri ammu jaga do keloli ne? Penge ri mu ne lai do naanne ta peteleo ta do rihi ke ne lubhu harro nga menyilu ro ngati ddau do wala he, do pee pa Yerusalem he?

⁵Adho tu-tu mina harre! Hewari ri ne li Ya pa mu: Ki dho jharra ke mu ngati lubhu harro nga menyilu mu, do ta made lema mu hela'u mii ro le.”

⁶Ta alla pemina harre ta pedhire lema ke ri Yesus ne lipehakku do nadhe, ”Ta era ke heddau do nga kepallu hekepue pa dhara dhoka ago no. Pa helodho ta kako ke no la kale ngeta era nga wue ne kepallu do naanne, tapulara bhule le dho ie ta hewue he.

⁷Hakku ta lii ke no pa mone jaga dhoka ne, ’Heleo we, tallu bhue ttau ke ya ne dakka ma wue kepallu do nadhe, tapulara ngaddi le dho ta peabu nga ya ie ta hewue he. Petue no! Wata ke no ta pealla wwau bbahha we!’

⁸Tapulara ta bhale ke ri mone jaga dhoka ne, ’Hane kowe no pemuri hewue ttau ri, muri ee. Do ta ketake ko ri ya ne worai pekehero kepue ne jhe tao ri wwau bbahha.

⁹Jaga nge ta wue no pa ttau hedhapa dhe. Tapulara ki dho wue ma no, ta petue he ke no, ki lii muri ta petue.’ ”

¹⁰Pa dhara helodho, lodho Pengaha-ihi, Yesus do era nga ajha ddau pa dhara hewue ammu hebhajha.

¹¹Paanne do era heddau mobanni do henguru aru bhue ttau ke ne paddha, ri do era ne wango pa dhara ngi'u no. Do buku ke ne mobanni do naanne jhe nara tu-tu dho ke no ta titu pemola-anni.

¹²Ta ngadde no ri Yesus, ta lii ke Yesus pa no, ”Ina, ludu ke au ngati paddha au dhe!”

¹³Moko ta takke ke ri Yesus ne ruai No pa mobanni do naanne, pa awe naanne dhangnge ta mola ke ne titu mobanni do naanne, jhe wue-waje Deo.

¹⁴ Ta bhani ke ne kattu ammu hebhajha ne, ri peie ddau ri Yesus pa lodho Pengaha-ihi, ri do mina harre ta lii ke ne kattu ammu hebhajha ne pa ddau he, ”Do era anna lodho tu ta jhagga; dakka we pa lodho-lodho do na harre ta ma peie ddau too, bhole pa lodho Pengaha-ihi mina hedhe!”

¹⁵Ta bhale ke ri Muri, ”Mu hedhe do pote do appi! Pa lodho Pengaha-ihi, hari-hari ddau do la golo ne hapi ro kiadho ne keledai ro ngati dhara bhaddo, jhe lari ri ro la penginu ei.

¹⁶Nah, pa dhe nee heddau mobanni kolo loro Abraham, do henguru aru bhue ttau ke ne tui ne akke ri wango. Ta do dho ie ke no ta gole le pa lodho Pengaha-ihi?”

¹⁷Ne lii bhale Yesus do naanne, do dhai pemekae ne dhara ihi-muhu ihi-lawa No he; tapulara hari-hari ddau do haghe he do mengallu dhara ne heleo hari-hari lua madalae do tao ri Yesus he.

¹⁸Ta kebhali ke Yesus, ”Kinga dhai ke Deo ta pereda, mina mii ke ne lua ne? Do nara ta pehakko nga nenga ke ri Ya?

¹⁹Ne lua ne mii lipehakku do nadhe ke. Helamuhi wosawi ta aggo ke ri heddau la halle la dhara dhoka no. Ta muri ke ne namuhi wowowagga do naanne, jhe jadhi ta hekepue ajhu do mone-ae, ri do mina harre ke ta dakka ke dolila la tao nyabbhu pa kelai-kejanga no.”

²⁰Ta ri ke Yesus, ”Kinga dhai ke Deo ta pereda, nga ne nga ke ne nara ta pehakko ri Ya ne jhara lua no?

²¹Ne lua no mii muu do aggo ri heddau mobanni, jhe la pehiwo nga appa nguru lite kebatte, tade jadhi ta hewuu hari-hari.”

²²Pa loro jhara ta ju la Yerusalem ta narru ke Yesus jhara rae-rae nga kejobho, jhe ajha ddau ri No.

²³Moko ta era ke heddau do kebhali pa No, ”Ama, do hudi ke ne ddau do ta nara ne lua helama tona ie ne?” Ta bhale ke ri Yesus,

²⁴ ”La'a rui we au ta maho jhara ubha kelae do kobho ne. Rowi henge we pewoie ri mu! Do ae ne ddau do ddhei ta maho, tapulara nara dho ro.

²⁵Pa awe kaddhi muri ammu jhe la henabbhe ne ubha kelae ne, do ta titu ke mu pa tele, jhe kedakku marri jhe lii mu, ’Muri, boka ko we kelae tu jhi!’ Do ta bhale ri muri ammu ne, ’Adho mu do tada ri ya ta ti mii!’

²⁶ Do ta bhale ri mu, ’Do alla ke jhi penga'a-penginu hela'u-la'u nga muri ma, jhe ri muri do alla ke peajha jhi pa rujhara-rujhara pa dhara rae jhi!’

²⁷ Tapulara do ta lii wari ne muri-ammu do naanne, ’Tada dho ri ya ta ngati mii. Langnga mu ti dhe, mu hedhe do tao apa nga kerewe!’

²⁸ Kinga dhai ta ngaddi ri mu, Abraham, Ishak, Yakub nga hari-hari nabi do era pa dhara lua mengallu nge nga kehaka dhara pa dhara Raiwawa Deo do Wowiu ne, do ta tangi penina noho-perajja jaru, rowi mu miha do ta hudhi ta keluru la tele!

²⁹Ddau-ddau do ta dakka ngati bira dimu nga bira waa, ngati bira bhodhae nga bollau, jhe do ta mengallu nge nga kehaka dhara pa dhara Raiwawa Deo do Wowiu ne.

³⁰ Tarra-tarra, ddau-ddau do pedakka-rahi do ta jadhi ta do petari-rai, jhe ddau do petari do ta jadhi ta do pedakka-rahi.”

³¹Pa dhara awe naanne lema, ta era ke do parri ddau do Farisi do dakka la nga Yesus, jhe lii, ”Bhole pee pa dhe! Langnga Au ngati dhe, rowi nee do ddhei ta pemade Au ri Herodes.”

³²Ta bhale ke ri Yesus, ”Kako la peke pa ddau do dho bhule nga guna do naanne, ’Lodho dhe nga bhalli-rai do ta hudhi wango nga do ta peie ddau do paddha ko Ya, tapulara nalli do ta pemoke ke ri Ya ne lua jhagga Ya.’

³³Maji lema ta mina harre do jhamma ta tapetue ma ri Ya ne loro jhara kako Ya pa lodho dhe, bhalli-rai nga nalli, rowi woie dho heddau nabi ta pemade pa tele Yerusalem.

³⁴Yerusalem, Yerusalem! Ne nabi-nabi he alla ke pepemade ri au! Ddau-ddau pepu-peju Deo, alla ke ri au petuku ri wowadu tade made! Jhajhi wari ke Ya ne ddhei ta wore ta ngape hari-hari ne ddau do pee pa dhara au, mii hengi'u renamanu he ne ddhei ta herugu ne ana-ana no pa dhara rualla no, tapulara wae dho au!

³⁵ Ri do mina purre adho ke Deo do penau-pelere nga mu. Do jhamma ke ta toi ri au, jhari ngati awe nadhe, do medae ke ta do dho ngadde Ya ri au, ri tade dhai hape la pali ri au, ’Medi melatu tu No do dakka pa dhara ngara Muri.’ ”