Read Sabu LUKAS 14 Bible Online

LUKAS 14 - Sabu bible

LUKAS 14

¹Pa dhara helodho, lodho Pengaha-ihi, ta kako ke Yesus la nga'a la ammu heddau mone kettau do Farisi. Paanne do pee nga heleo pewoie-ie ke Yesus ri ddau he.

²Moko ta dakka ke la nga Yesus, heddau do paddha bhai, do bhai ke ruai nga rubhebho no he.

³Moko ta kebhali ke Yesus pa guru-guru aigama he nga pa do Farisi he, ”Pedutu nga uku aigama di, ie marra di ta peie ddau do paddha kinga pa lodho Pengaha-ihi we adho?”

⁴Ta pehangngo-anni we ne guru-guru aigama he nga do Farisi he. Hakku ta pedoe ke ri Yesus ne ddau do paddha bhai ne, ta peie ke no ri Yesus, ta alla pemina harre ta lii ke Yesus pa ddau do naanne ta bhale.

⁵ Ta moko mina harre ta lii ke Yesus pa ddau he, ”Kita era he pa telora mu do nga na heddau naiki kiadho do nga hapi hengi'u do bunu la dhara eiholo pa lodho Pengaha-ihi, ta do adho ke mu do ta marri-ai-ai ne la nune ta pemahho la tele ne naiki kiadho ne hapi ne pa lodho do napoanne dhangnge ma?”

⁶Tapulara bhule dho ie ta heddau he do bhale ne likebhali Yesus jhara lai do naanne.

⁷Ta ngaddi ke ri Yesus, do era ne tamu-tamu do pili era do rihi woie. Rowi do mina harre ta wie ke ri Yesus ne liajha do nadhe pa ro hari-hari.

⁸ ”Kinga pedoa mu ri ddau la lai ala peloko nga'a, bhole kako mu la mejaddhi la kedera do pemoko tu ddau do takka pekerihi. Rowi ngeta do era ne ddau do rihi ri ti mu do pedoa le la lai ala do napoanne,

⁹mita do dho dhai ne muri ammu do pedoa mu hari do dhue, nga mejanni ade ne dakka la lii pa mu, ’Ami pehuba, ne era do nadhe do alle ke pepemoke tatu tamu do nanidhe.’ Moko nga tobo ri lua mekae dhara ta kaddhi ke mu nga hewiki, jhe kako la mejaddhi la era do lohe hape la kejhunga tu-tu ri.

¹⁰Rowi do mina harre ke, ki pedoa mu ri ddau, pili we era do hape la kejhunga, mita dakka ne muri ammu ne, jhe la lii pa mu, ’Ihi-anga, mai la mejaddhi la era do rihi woie.’ Rowi ri loro jhara do mina harre ke, ne pekerihe mu pa hedhapa hari-hari tamu do wala he.

¹¹ Rowi nadu do ddhei ta dhida-anni do ta pewawe, tapulara nadu do pewawa-anni do ta pedhede.”

¹²Moko ta lii ke Yesus pa muri ammu ne, ”Kinga pedoa au ddau ta ma lai ala tao nga'a, pa anni lodho kiadho pa anni maddha ko, bhole pedoa ihi-anga, kiadho tuahhu, kiadho a'a-ari, kiadho lema do rae do kowa do kaja. Rowi do ta pedoa au ri ro, rowi do mina harre ke do ta hamme bhale wari ri au ngati lai do tao ri au ne.

¹³Hakku, ki tao au lai tao nga'a, pedoa we ri au ne ddau do kehia nga gahara, do kai, do made heatta, nga do bhaddu.

¹⁴Ti lai do naanne do ta hamme ke ri au ne lua tarro ie nga menyarro mangngi, rowi do dho nara ke ta pebhale ne lua tao ie au ri ddau-ddau do na harre. Ne lua tao ie au ne do ta bhale ri Deo pa awe pekaddhi bhale wari ngati dhara made mada ne ddau-ddau do alla au petao ie he pa ro.”

¹⁵Pa awe naanne ta lii ke heddau ti telora do nga'a hela'u-la'u he paanne do dhanno ne lipedai Yesus ne, ane no, ”Dhai mangngi tarra ne ddau do ta nga'a hela'u-la'u nga Deo, kinga dhai No ta dakka mii Duae hine!”

¹⁶Tapulara ta lii ke Yesus pa ddau do naanne, ”Pa dhara hewari ta era ke heddau do tao lai ala tao nga'a do worena, jhe do ae ne ddau do pedoa.

¹⁷Ta dhai ta jhari ne lai tao do naanne, ta lii ke ne ddau do naanne pa naannu no ta kako la nga ddau pedoa he, jhe la lii, ’Mai we, rowi do moko ke hari-hari!’

¹⁸Tapulara hari-hari ro, heddau-heddau ta ami huba ke ta do dho nara ro ta kako la lai tao do naanne. Do petari ne, lii mina hedhe paannu do naanne, ’Ta alla pewalli worai ko we ya, hakku do nee ta heleo ko ri ya ne worai do naanne. Pehuba ko we ya, nara dho ke ya ta kako.’

¹⁹Ane do wala he ri, ’Ta itu ta alla ko we ya pewalli lammi mawo hapi, jhe ddhei ta la hakku ko ri ya ne hapi do na harre. Pehuba ko we ya, nara dho ke ya ta kako.’

²⁰Ane do wala he ri, ’Ta itu ta alla ko we ya pepeloko-nga'a, rowi do mina harre nara dho ke ya ta kako.’

²¹Ta bhale ke ne naannu do naanne la pika pa muri no ne. Dhai bubu dhara ke ne muri do naanne, ta lii ke no pa naannu no ne, ’Kako we mu nga henginga la rujhara-ae poro mata, nga la rujhara pehapo pa dhara rae. Aggu we ri au madhe, ddau do kehia nga do gahara, ddau do kai, do bhaddu, do made heatta.’

²²Ta alla pemina harre ta lii ke ne naannu do naanne, ’Muri, alle ke ri ya pejhagge ne lipereda muri ne, tapulara ae ko ne era do dho mejaddhi dae ri ddau.’

²³Moko ta lii ne muri do naanne, ’Kako we la rujhara-ae poro mata do pa tele ti dhara rae dhe, jhe pehahhi we ri au ne ddau do dakka he, mita ie ne ammu ya dhe ta tobo huke-huke.

²⁴Henge we! Bhule dho heddau he ngati tamu-tamu do alla pepedoa he do ta nga'a ta nginu ne nga'a-nginu do pa dhara lai tao ya do nadhe!’ ”

²⁵Do dhai ae ne ddau do penau nga Yesus. Ta kebhibha ke Yesus jhe lii pa ro,

²⁶ ”Kinga dakka ddau ma nga Ya, tapulara ki do rihi ne ddhei no ina no, ama no, ihi-ammu no, ana-oha no, tuahhu-tuahhu no, rihi ri ti naanne nga ngi'u no miha, jhamma dho no ta jadhi ddau pedute Ya.

²⁷ Ddau do dho wae ta hape ne ajhu ketoe no, jhe pedute Ya, nara dho no ta jadhi ddau pedute Ya.

²⁸Ki heddau ti telora mu do ddhei ta petitu hewue ammu jaga, do bhara tatu ko no ta mejaddhi uru jhara ko, ta pekire ko henga ne ae doi do ta pake ri no, do waji marra ke ne doi no tu ta pemoke ne ammu jaga do naanne we adho dae.

²⁹Rowi kinga teleo ke ta do dho nara ke ta pemoke ri no ne ammu jaga do naanne, jhe alla ke ri no pepemoke ne era ne, do ta mare ta dhole ke no ri ddau he.

³⁰Do ta lii ke ne ddau he pa no, ’Heleo ko ne jhagga ddau do nadhe, pe'e dhoke ta jhu la dhaka-la dhuku!’

³¹Kinga heddau duae do nga horodhadhu do henguru tabbha ddau ne ae, jhe do ddhei ta la taki mu nga duae do nga horodhadhu do dhue nguru tabbha ddau, do bhara tatu ke ne duae do naanne ta mejaddhi uru jhara ko no ta peohe, makka marra no ta pelawa nga ihi-muhu ihi-lawa no do naanne.

³²Kinga toi ke ri no ta do dho makka ke no, do tatu ke no, rai ti jjhau ko ne ihi muhu no ne, do ta pepu ddau ke no ta la ami ta peie.”

³³Pa pedakka ta lii ke Yesus, ”Mina harre lema nga mu. Bhule dho heddau he ngati mu do nara ta jadhi ddau pedute Ya, ki dho hani ri no ne unu-oha no he.”

³⁴”Ki mengahhi do woie, tapulara kinga melai, do nara ri ko no ta pemedaddhe bhale wari?

³⁵Bhule dho ke no nga guna nga-nga ri, ie ta tu lada-maa-ko'o ie lema ta jadhi ta wwau-bbahha. Hakku ta hore he ke no. Ki do nga wodilu, do jhamma ke ta dhanno!”