Read Sabu LUKAS 15 Bible Online

LUKAS 15 - Sabu bible

LUKAS 15

¹ Pa dhara helodho, do ae ne mone dhuki bhea nga ddau-ddau do ege ta ddau-ddau do apa he ri ddau lowe, do dakka la dhanno ne liajha Yesus.

²Ne do Farisi he nga guru-guru aigama he, ta jhari ke ta pegu. Ne ane ro, ”Bueh, ddau nadhe hammi ne ddau-ddau do apa jhe rihi-rihi ri ko nga'a hela'u-la'u nga ro!”

³Ri do mina harre ke ta pedhire ke ri Yesus ne lipehakku do nadhe,

⁴”Kita era he, heddau ti telora mu do nga ki'i jhawa hengahu ngi'u, jhe ele hengi'u — ne nga ke ne do ta tao ri no? Raehere dho ke ta do dho medae ta hani ri no ne heo nguru heo ngi'u he pa dhara padha, jhe kako la kale ri no ne do ele ne tade ngadde.

⁵Jhe kinga ngadde ke ri no, do dhai mengallu dhara ke no, tade hape ri no ki'i jhawa no ne pa kolo-gunu no,

⁶jhe aggo bhale ri no. Ta alla pemina harre ta pedoa ke ri no ne ihi anga-ihi anga no nga do rae do kowa no he, jhe lii no, ’Mai we di ma mengallu nge nga kehaka dhara, rowi ne ki'i jhawa ya do ele ne, nee ke do ngadde bhale wari!’

⁷Nah, mina harre lema ke pa era do mmau do megala, do ta era ne mengallu nge nga kehaka dhara do dhai tarra, ki era heddau do jharra ngati dhara lubhu harro nga menyilu, ti do heo nguru heo ddau do woie nga do dho tenge ke ta jharra ri.”

⁸”Kiadho, kita era he heddau mobanni do nga doi mela pudi henguru mada, jhe ele hewue — ne nga ne do ta tao ri no? Do medae ta pekini lapu no jhe penyaro ne ammu no nga kale ri no pa hebhakka-bhakka tade ngadde wari ri no ne doi no do naanne.

⁹Ki ngadde ke ri no ne doi no do naanne, do ta pedoa ke ri no ne ihi anga-ihi anga no nga do rae do kowa no, jhe lii no, ’Do tarra-tarra ke ya ne mengallu dhara rowi do ngadde bhale wari ke ne doi ya do ele ne. Mai we di ma mengallu nge nga kehaka dhara!’

¹⁰Do mina harre lema ke naju Deo he ne mengallu nge nga kehaka dhara kinga era ke heddau do tao apa nga kerewe do jharra ngati lubhu harro nga menyilu no. Parahajha we!”

¹¹Ta lii ri ke Yesus, ”Ta era ke heddau ama do nga ana momone do dhue ddau.

¹²Ta lii ke ne ana do mone-ari ne pa ama ne, ’Ama, wie we pa ya ne unu pala ya ne ngati puhaka ama he.’ Moko ta pebhagi ke ri ama ne pa ro hari do dhue.

¹³Ta ludu le parri lodho, ta pewie ke ri ana do mone-ari ne, ne do unu pala no he, jhe pekaddhi no la ihi rai do jjhau. Pa ni ta leo-laja ke ri no ne doi no he nga muri mada do keruka-kerakki.

¹⁴Ta alla le hari-hari ne doi no he, ta jadhi ke lua menganga do dhai ladhara-wata menganga, ta jhari le ke no ta hedui ri kehia.

¹⁵Moko ta kako ke no la jhagga pa heddau ana-rai pa rai do naanne, jhe lii pa no ta la padha ta la bhata wawi.

¹⁶Do dhai menganga tarra ke no hakku ta ddhei ke no ta nga'a ne nga'a unu wawi he. Maji lema no ta do mina harre ke ne worawwu menganga, bhule dho heddau he do wie nga'a pa no.

¹⁷Pedakka rahi ta toi ke ri no ne ngi'u no, jhe lii no, ’Ddau-ddau jhagga pa ammu ama do dhai re'a nga lale ne nga'a-nginu ro, tapulara ya pa dhe, miga ke ta made ri menganga dhallu!

¹⁸Rihi ie ya ta pekaddhi ngati dhe, jhe bhale la nga ama ya, jhe do ta lii ya pa no: Ama, alla ke ya petao lubhu harro nga menyilu penaja nga Deo, mina harre lema penaja nga ama.

¹⁹Jhamma dho ke ya ta pedoe ta ana ri ama ri. Ege we ta heddau ddau jhagga oha ama he we.’

²⁰Moko ta pekaddhi ke no bhale la nga ama no. Rai ngati jjhau ko no, ngadde dhangnge ke no ri ama no. Nga mina harre ne worawwu ruba dhara, ta perai ke ne ama no ne la peabu nga no, jhe ngape jhe hengaddho no.

²¹Ta lii ke no pa ama no, ’Ama, alla ke ya petao lubhu harro nga menyilu penaja nga Deo nga penaja nga ama. Jhamma dho ke ta pale ri ta ana ri ama.’

²²Tapulara ri ama no ta pedoa ke ne naannu no he jhe lii pa ro, ’Henginga ne la aggu bhara do woie, jhe pepake pa no. Pepake ne teru'u pa kolo-ku'u no, jhe pepake ne helapa pa kabha jhalla no.

²³Ki alla pemina poharre kako la aggu ana hapi do kebhabbhu jhe kehabbhe. Do ta nga'a ta nginu di, ta mengallu nge nga kehaka dhara.

²⁴Rowi ne ana ya dhe mii do alla ke no pemade jhe pa awe nadhe, ne ke no do muri bhale wari; do alla ke no peele, pa awe na dhe ne ke no do ngadde bhale wari.’ Moko ta jhari ke ro ta elo ta bhaba.

²⁵Pa awe do naanne ne ana do mone a'a ne do era pa maa. Ta dhai no ta bhale, ta umu no nga ammu ne, ta rangngi ke ri no ne lii elo nga bhaba.

²⁶Ta pedoe ke ri no heddau ngati naannu no he, jhe kebhali, ’Era ne nga ne pa ammu dhe?’

²⁷Ta bhale ke ri naannu ne, ’Ari muri ne, nee ke do bhale! Jhe ama ri muri he, alla ke pelii ta para na hapi do kebhabbhu, rowi do ngadde bhale wari ke ri no ne ana no ne nga helama tona ie!’

²⁸Dhai bubu dhara ne ana mone a'a ne, hakku wae dho ke no ta maho la ammu ri. Moko ta mahhu-anni ke ama no jhe la ube no ta maho.

²⁹Tapulara ta lii ke no pa ama no, ’Ttau-ttau ke ya ne jhagga bhagi dhue made nga muri tu ama. Ngaddi dho ya ta pelawa nga lii ama. Ne nga do wie ri ama pa ya? Ie ta hengi'u naki'i he ngaddi le dho ta wie ri ama tu ya ta mengallu dhara nga ana ihi-anga ya!

³⁰Ana ama, do alla ke peleo-laja ne doi no nga mobanni do apa nga kerewe he, mina harre no ne bhale, para dhangnge ama na hapi do kebhabbhu tu no!’

³¹Ta bhale ke ri ama no, ’Woo ana ya, au do era loro ma pa dhe nga ya. Hari-hari ne unu-oha ya he, do na harre do unu-oha au ma.

³²Tapulara do jhamma ke di ta mengallu nge nga kehaka dhara, rowi ne ari au ne, mii do alla ke no pemade, tapulara pa awe nadhe, nee ke no do muri bhale wari; do alla ke no peele, tapulara pa dhara awe nadhe, nee ke no do ngadde bhale wari.’ ”