Read Sabu LUKAS 16 Bible Online

LUKAS 16 - Sabu bible

LUKAS 16

¹Ta lii ke Yesus pa ana hekola No he, ”Ta era ke heddau mone kaja. Do nga mone takka doi do pemoko hari-hari ne unu-oha no. Moko ta era ke ne lipika ddau pa mone kaja ne, ta do ne mone takka doi no ne do ddhei ta leo-laja ne doi no he.

²Ri do mina harre ke, ta pedoe ke ri no ne mone takka doi ne jhe lii, ’Ne nga ke ne do rangngi ri ya jhara wui-ai au? Pa awe nadhe dhangnge jhole pa ya, hari-hari do mina mii ne lua pemane ri au pa dhara pemoko ne unu-oha ya he. Ie dho ke au ta jadhi mone takka doi ya ri.’

³Moko ta penge ke ri mone takka doi ne, ’Ne nga ke ne do jhamma ta tao ri ya pa dhara awe nadhe? Nee ke ya ta mahho ri muri ya. Ta la para maa, rui dho ya; jadhi ta mone ami-ami, ta mekae dhara ya.

⁴Ngadde ke ri ya ne penge; kinga dhai ke ya ta alla pemahho, do jhamma ke ya ta era nga ihi-anga do ddhei ta hamme ya pa ammu ro!’

⁵Hakku ta pedoe ke ri no, nadu we do lakka ri kallu ri muri no ne. Pa do petari ne, ta lii ke no, ’Henga ne ae kallu au pa muri ya?’

⁶Ta bhale ke ri ddau do naanne, ’Hengahu guhi eimanynyi zaitun.’ Ta lii ke ne mone takka doi ne, ’Oni ne huri kallu au ne. Mejaddhi au marri-ai jhe bhuke: lammi nguru.’

⁷Ta alla pemina harre, ta lii ri ke no pa do kedhue ne, ’Nga tuahhu, henga ne kallu au?’ Ta bhale ke ri ddau do naanne, ’Hetabbha karo gandum.’ Ta lii ke ne mone takka doi ne pa no, ’Oni ne huri kallu au ne. Bhuke: ta aru ngahu we.’

⁸Moko ta puji ke ne mone takka doi do kewarru do naanne ri muri no ne, rowi do i'a no ne kale penge pa awe do kedhaddu ne; rowi ddau-ddau raiwawa do rihi mmau dhara ne pemane lua jhagga ro ngati ddau-ddau do muri mada pa dhara teleo.”

⁹Moko ta lii ri ke Yesus, mina hedhe, ”Dhanno we ri mu! Pake we ri mu ne lua kaja raiwawa dhe tu ta nara ihi-anga, mita ie ki dhai ne lua kaja raiwawa dhe ta do dho bhule ke nga kebhue ri, do ta hamme ke mu pa era do peloro ne.

¹⁰Nadu do henarru pa lai-lai do naiki, moko pa lai-lai do mone-ae do nara ke tatao rino. Tapulara nadu do dho henarru pa lai-lai do naiki, moko henarru ledho ma no pa lai-lai do mone-ae.

¹¹Hakku, kinga jhara lua kaja raiwawa dhe, do dho nara ke mu ta parahajha ri ddau, nadu ri ke do medae ta wie ne lua parahajha ri pa mu jhara lua kaja nga kete'e do pedu nga Deo?

¹²Jhe kinga jhara lua bhara do unu ri ddau do wala, do teleo ta do dho parahajha ke ddau pa mu, nadu ri ke ne ddhei ta wie pa mu ne nga ne do jadhi ta unu mu miha?

¹³ Bhule dho heddau he do nara ta jhagga tu do dhue ddau muri; rowi do ta rihi ddhei no nga heddau ngati do heddau ne, kiadho do ta rihi pedhanno no nga heddau ngati do heddau ne. Mina harre lema mu. Nara dho mu ta jhagga tu Deo nga tu unu-oha raiwawa do nadhe.”

¹⁴Hari-hari ne nga ne do pali ri Yesus he do dhanno ri do Farisi he. Moko ta mare ta dhole ke Yesus ri ro, rowi ro do rihi ddhei nga doi.

¹⁵Tapulara ta lii ke Yesus pa ro, ”Mu ke hedhe ne ddau do kita heleo pa hedhapa ddau do wala do dhai mola, tapulara ri Deo do toi ne ihi ade mu hedhe. Rowi ne nga ne do ege ta do dhida ri ddau raiwawa, do wawa ne he heleo ri Deo.

¹⁶ Lipereda do wie ri Musa ne nga liajha nabi-nabi, do pee ko hape ma awe Yohanes Mone Pejhiu. Rai ti dhara awe naanne Li Hagha Dhara jhara mina mii Deo ne pereda mii Duae do pee ke nga pepeke loro. Jhe ddau do ta pehahhe ke ne ngi'u no tu ta jadhi ai-alla ngati annu-niki Deo.

¹⁷ Tapulara do rihi ne memudhe tu liru nga raiwawa ta ele, ngati ele helete he ngati dhara lipereda Deo.

¹⁸ Nadu do pehagghi nga ihi-ammu no, jhe banga-ammu ri nga mobanni do wala, do kenyo-langa-huka ke ne ddau do napoanne. Jhe ne ddau do banga-ammu nga mobanni do alla pepehagghi do naanne, do tao lua kenyo-langa-huka lema ke.”

¹⁹”Ta era ke heddau do kaja. Ne bhara pake no do dhida kebue we, nga ne muri mada no pa dhara lua kereja-kenata ti helodho la helodho.

²⁰Pa hedhapa ubha kelae ammu no, do pejaddhe ri ddau, heddau do kehia nga gahara, ne ngara no Lazarus. Hari heddau ne ngi'u no do kerape-ree ri kemmau.

²¹Ddhei ke no ta nga'a ne tebui-tebui do bunu ngati meja mone kaja ne. Tapulara ngaka ri ko ne dakka la jhore ne kemmau no he.

²²Moko ta made ke ne do kehia do naanne jhe aggo ri naju Deo la era do rihi ie pa keraha Abraham pa era do mmau do megala. Ta made leke ne mone kaja ne jhe pedane.

²³Pa era maga do made do dhai tarra ne hedui ne mone kaja ne. Pa awe naanne ta tengara ke la dhida ne mone kaja ne, ta ngadde ke ri no Abraham pa era do jjhau, jhe Lazarus pa keraha no.

²⁴Ta peka ke no, ’Woo Abraham, ama ya! Ruba ko we ne dhara au nga ya. Pepue ko we Lazarus la pehabbho ne kolo-ku'u no pa eiloko, jhe ma pebobhe ko we ne koko ya. Nee ke ya do dhai tarra ne hedui pa dhara rao ai do nadhe!’

²⁵Tapulara ta bhale ke ri Abraham, ’Henge we ri au ana yaee. Henga ne merai muri mada au, alle ke ri au pehamme hari-hari ne do woie; bhale ri Lazarus do hamme ne do apa-apa he we. Pa awe nadhe nee ke no do mengallu dhara pa dhe, jhe au ri do dhue hape ne hedui-herui.

²⁶Rihi ri ti naanne pa telora au nga jhi, do alle ke petao ne tabbi do dhai balla, mita ie ddau ngati dhe, mina harre lema ngati anne nara dho ke ta peoli.’

²⁷Ta lii ri ke ne do kaja ne, ’Ki do mina harre ma ama yaee, ta menangnge tu-tu ke ri ya pa ama, mita ie ko Lazarus ta pepue ri ama la ammu ama ya.

²⁸Hhai ko do lammi ddau ne tuahhu ya pa ni. Lii we pa Lazarus ta la pekebhaddi ko ro, mita ie ro ta bhole tade dhai ri ta bunu ma era rae ra'e-jaru do nadhe.’

²⁹Bhale ri Abraham, ’Hhai ma pa ro buku-buku Musa nga buku nabi-nabi. Hani we ro pepedutu ne nga ne do hure do bhuke pa dhara buku-buku do na harre!’

³⁰Tapulara ta bhale ke ri do kaja ne, ’Waji dho ri na harre we, ama yaee Abraham. Tapulara kinga era do made do muri bhale wari jhe dakka langa ro, do ta jharra ke ro ngati lubhu harro nga menyilu ro!’

³¹Tapulara ta lii ke Abraham, ’Ki dho pedhuli ke ro nga lipedara Musa nga nabi-nabi, do bhara tatu lema ke ta do dho parahajha ro, maji lema ta kaddhi bhale wari ne do made.’ ”