Read Sabu LUKAS 17 Bible Online

LUKAS 17 - Sabu bible

LUKAS 17

¹Ta lii ke Yesus pa ana hekola No he, ”Lai-lai do pekedune ddau la dhara lubhu harro nga menyilu do tatu ke ta do medae ta era. Tapulara apa nga kerewe tu ddau do tao lai do naanne!

²Do rihi ne woie kita akke ri wowadu geho pa lakoko no, jhe nynyake la dhara dahi, ngati taga no do nara ta pekedune heddau ti telora naiki do na hedhe tu ta tao lubhu harro nga menyilu.

³ Rowi do mina harre ke, meniga we pewoie-ie! Kinga tao tuahhu lubhu harro nga menyilu, peware we ne kattu no. Kinga menyaha no, pehuba we no.

⁴Kinga tao no lubhu harro nga menyilu penaja nga au pidu wari pa dhara helodho, jhe hadhi tao no dakka la nga au, jhe la lii, ’Ami ta pehuba ya’, pehuba we no ri au.”

⁵Ta lii ke ne rasul he pa Yesus, ”Muri, perui we ne lua manno nga kaho jhi.”

⁶Ta bhale ke ri Yesus, ”Kinga era mu nga lua manno nga kaho mii worena namuhi wohajho he, do nara ke mu ta lii mina hedhe pa kepue ajhu do nadhe, ’Bhita-anni we au ngati dhe jhe la halla-anni we au la dhara dahi’, do tatu ke ta pedute ne lipereda au ri kepue ajhu do naanne.”

⁷”Kinga era he ngati mu do nga naannu do jhagga pa maa, kiadho do nga bhata ki'i. Kinga dhai ne naannu do naanne ne bhale la ammu, do ta lii mina hedhe ke no pa naannu no ne, ’Marri-ai, mai ma nga'a’?

⁸Do bhara tatu ke ta do adho mina harre! Tapulara do ta lii no pa naannu no ne, ’Pemoko ko nga'a tu ya. Pake we ne bhara au do mmau he, jhe hage ya pa dhara nga nga'a nga nginu ko ya kinga moko ya jhe ie au ta nga'a.’

⁹Ne naannu do naanne adho do tenge ta puji taga tari do alla ke ri no pepedute ne lipereda muri no, we adho?

¹⁰Mina harre lema mu. Kinga alla ke mu pejhagga hari-hari ne do lii pa mu ta jhagga he, lii we mu, ’Jhi hedhe heddau naannu pa tima he we, wata ke tenge jhi hema we, ne do jhagge ri jhi.’ ”

¹¹Pa loro jhara ta ju la Yerusalem, ta narru ke Yesus jhara ihi-rai do pewa ta nga Samaria nga Galilea.

¹²Pa awe ta maho No la hewue kapo, ta dakka ke la nga Yesus do henguru ddau do paddha nadato. Ta titu ke ro ngati jjhau,

¹³jhe peka ro, ”Yesus! Muri! Ruba kowe ne dhara au nga jhi!”

¹⁴ Ta ngaddi ro ri Yesus, ta lii ke No, ”Kako we mu la nga mone tunu-menahu, ami we pa ro ta pereha ne ngi'u mu.” Pa dhara nga kako ro, moko ta ie ke ro ngati lua paddha ro he.

¹⁵Heddau ti telora ro, ta toi ri no ta do ie ke no, ta bhale ke no nga wue-waje Deo.

¹⁶Moko ta dhai no la hedhapa Yesus ta mejura ke no, jhe jhula kolo lii ie-ae pa Yesus. Ne ddau do naanne heddau do Samaria.

¹⁷Ta lii ke Yesus, ”Ngine ne, adho do henguru ddau ne do alla ke peie? Hhai ke la mii ne do heo ddau he?

¹⁸Tanga hakku ne ddau do wala rai do nadhe we ne do bhale ma peha'e kolo lii ie-ae pa Deo?”

¹⁹Moko ta lii ke Yesus pa ddau do naanne, ”Kaddhi we au jhe kako we, taga tari do parahajha ke au pa Ya, ie ke au.”

²⁰Do parri ddau do Farisi ta kebhali ke pa Yesus, ta parri ke Deo ne dakka tu ta ma pereda. Ta bhale ke ri Yesus, ”Lua pereda Deo, jhare dho ri tada-tada do ngadde ri ddau,

²¹hakku do nara ddau ta lii, ’Mai ma heleo, oni ke no!’ kiadho, ’Nnai ke no pa nidhe!’ Rowi Deo do nee ke do jhari ta pereda pa telora mu.”

²²Ta alla pemina harre ta lii ke Yesus pa ana hekola No he, ”Do ta dhai ne awe ne, do ddhei ta ngadde ri mu helodho ngati lodho-lodho Ana Ddau Raiwawa, tapulara nara dho ta ngadde ri mu.

²³Do ta lii ddau pa mu, ’Heleo, pa ni!’ kiadho, ’Heleo pa dhe!’ Tapulara bhole mahhu-anni mu ta la kale no.

²⁴Mina mii bhele ne kehabbha pa ihi liru, jhe kelala ti hebhakka la hebhakka, mina harre lema ke hine ne jhara lua Ana Ddau Raiwawa pa lodho do ta peteleo ne.

²⁵Tapulara uru jhara ti naanne do jhamma ke No ta dhui hape ae lua hedui-herui, jhe adho No do ta hamme ri ddau-ddau pa dhara awe nadhe.

²⁶ Pa awe ta peteleo ne lodho Ana Ddau Raiwawa ne hine, hala dho ke mii pa awe Nuh do uru he.

²⁷ Ddau nga'a-nginu, banga-ammu, mii pa tima he nga do dho bhule nga pengaha lohe la awe maho ne Nuh la dhara kapa ne, jhe lale dahi jhe pemade hari-hari ddau.

²⁸ Mina harre lema pa awe Lot. Ddau nga'a-nginu, pemane nga maa nga petitu ammu nga kemali, pewie-pewalli.

²⁹Tapulara ta dhai Lot ta mahhu-anni ngati Sodom, pa lodho do naanne, puru ai ngati liru, jhe pemade hari-hari ddau.

³⁰Mina harre ke hine kinga dhai ke ne lodho Ana Ddau Raiwawa ta peteleo anni hine.

³¹ Pa dhara lodho naanne ddau do era pa danni ammu, bhole puru ri ta la aggu bhara-bhara do era pa dhara ammu. Mina harre lema ddau do era pa dhara maa, bhole bhale wari la ammu no.

³² Henge we ne nga do alla pejadhi pa ihi-ammu Lot ne!

³³ Ddau do ddhei ta pehelame ne muri mada no, do ta ele ngati no. Tapulara ddau do ele ne muri mada no, do ta pehelame ne muri mada no.

³⁴Parahajha we mu: Pa dhara rammi do naanne, do dhue ddau do era do bba'i pa hewue era bba'i, heddau do ta aggo jhe heddau do ta jhane.

³⁵Do dhue ddau mobanni do gili gandum, heddau do ta aggo jhe heddau do ta jhane. [

³⁶Do dhue ddau do era pa dhara nga jhagga pa dhara maa, heddau do ta aggo jhe heddau do ta jhane.]”

³⁷Ta kebhali ke ne ana hekola Yesus he, ”Muri, pa mii ke ne na harre ne medae ta jadhi?” Ta bhale ke ri Yesus, ”Pa mii ne do era bhada made, paanne lema ke gaga ne era.”