Read Sabu LUKAS 18 Bible Online

LUKAS 18 - Sabu bible

LUKAS 18

¹Ta alla pemina harre ta pedhire ke ri Yesus ri hewue lipehakku mii liajha tu ana hekola No he mita loro-loro ro ne hebhajha jhe bhole atta dhara.

²Ta lii ke Yesus, ”Pa hewue dhara rae, ta era ke heddau mone happo hala do dho meda'u ri Deo, jhe adho do pedhuli ie ta nga nadu we.

³Pa dhara rae do naanne lema do era heddau mobanni-wue do loro-loro ke ne kako la nga mone happo hala do naanne, la ame mita ie ta pemole ne kewallu no ri mone happo hala do naanne, ’Ruba ko we dhara nga ya pa dhara penaja ya nga ihi-muhu ya,’ ne ane mobanni do naanne.

⁴Pa dhara parri wari ne tui, wae dho ta ruba dhara ne mone happo hala do naanne nga mobanni-wue do naanne. Tapulara pa pedakka rahi ta penge ke ri mone happo hala do naanne, ’Maji lema ya ta do dho meda'u ri Deo jhe do adho lema do pedhuli ie ta nga nadu we,

⁵tapulara taga tari mobanni-wue do nadhe do loro-loro ne ke pekenyawo ne dhara ya, rihi ie no ta pemole ri ya pa dhara kewallu no dhe. Kiadho ke do mina harre, ta pee ke no nga dakka loro ma pehedue ya.’ ”

⁶Moko ta lii ke Muri, ”Heleo we ri mu ne nga ne do pale ri mone happo hala do bibhi hebhakka do naanne!

⁷Nah, ta do adho lema ke Deo do mina harre, do ta pemola ne hala annu-niki No miha, do peka pa No, anni-lodho nga anni-maddha? Do ta pelajho-lajho ke ri No ne awe tu ta la ruba dhara nga ro?

⁸Parahajha we mu: Do ta henginga No ne la pemola ne hala ro! Tapulara kinga dhai ta dakka Ana Ddau Raiwawa, era ko marra ne ddau do parahajha pa No pa raiwawa do nadhe?”

⁹Do pedhire lema ri Yesus ne lipehakku do nadhe, do petuju nga ddau do peheleo nga ddau do wala ta do dho bhule nga kebhue, jhe do ege ne ngi'u no ta do woie.

¹⁰Ane Yesus, ”Ta era ke do dhue ddau do ta la hebhajha la Ammu Deo. Heddau do Farisi, jhe heddau ri mone dhuki bhea.

¹¹Ne do Farisi ne ta titu ke pekiha-anni jhe hebhajha, ’Woo Deo, peha'e ri ya ne kolo lii ie-ae pa Au, rowi ya dhe adho mii ddau do wala he, do rihi lala nga hopa, do nga'a mada dalla kedhoa, kiadho do kenyo-langa-huka. Peha'e ri ya ne kolo lii ie-ae, rowi adho ya do mii mone dhuki bhea do na nidhe.

¹²Pa dhara hewue migu, dhue wari ya pe puasa, jhe do wie ri ya bhagi henguru ngati ihi habha ya, mii bhara jhula pa Au.’

¹³Tapulara we, ne mone dhuki bhea ne, ta titu ke rai ti jjhau, jhe rihi ti naanne, bhani dho no ta tengara la dhida. Nga herodhe ri no ne danni ade no, ta lii ke, ’Oo Deo yaee, ruba ko we ne dhara Au nga ya dhe, ddau do tobo ri lubhu harro nga menyilu dhe!’ ”

¹⁴ Ane Yesus, ”Parahajha we mu, pa awe bhale la ammu, ne mone dhuki bhea ne do ta hamme ri Deo, jhe adho do Farisi ne. Rowi nadu do ddhei ta pedhida anni do ta pewawe; jhe nadu do pewawa-anni do ta pedhede pedhida.”

¹⁵Ta era ke ne ddau-ddau nga ne ana-ana ro do naiki ko la nga Yesus, mita bhuju jhe wie ne lua tarro ie nga menyarro mangngi ri Yesus. Ta ngaddi ri ana hekola Yesus he, ta bhani ke ro nga ddau do na harre.

¹⁶Tapulara ta pedoa ke ri Yesus ne naiki-naiki do na harre, jhe lii pa ana hekola No he, ”Hani ro ne naiki-naiki do napoharre pe dakka ma nga Ya! Bhole labba ro, rowi ddau do mina hedhe ke ne do jadhi ta annu-niki Deo.

¹⁷Henge we! Ddau do dho hela'u mi naiki ne la mengadha nga Deo, adho do ta jadhi ai-alla annu-niki Deo.”

¹⁸Ta kebhali ke heddau kattu do Farisi pa Yesus, ”Wo Ama Guru do woie, ne nga ne do jhamma ta tao ri ya mita nara ta hamme ri ya ne muri mada do petu nga do peloro ne?”

¹⁹Ta kebhali ke Yesus pa no, ”Ta nga au hakku lii pa Ya ta do woie? Bhule dho heddau he do woie, wala ngati Deo miha.

²⁰ Do toi ke ri au ma ne lipereda-lipereda Deo: ’Bhole kenyo-langa-huka, bhole pemade ddau, bhole loi-mena'o, bhole ha'e hakahi pote, nga takka we pekerihi ina nga ama mu.’ ”

²¹”Hari-hari ne lii pereda do na harre do alla ke pepedutu ri ya rai ti awe nga ngarru ne ko ya,” ne ane ddau do naanne.

²²Ta rangnge ri Yesus ta do mina harre ne libhale ddau do naanne, ta lii ke Yesus, ”Nee ko hahhi lai ne do jhamma ta tao ri au: Pewie we hari-hari ne unu-oha au, jhe ne doi kebhue he wie we ri au pa ddau do kehia nga gahara, moko do ta nara ke au unu-oha pa era do mmau do megala ne. Ki alla pemina harre mai we au ma pedute Ya.”

²³Tapulara ta rangnge ri ddau do naanne ne lii Yesus ne, ta hedui ke ne ade no, rowi do dhai kaja nga kete'e no.

²⁴Do toi ri Yesus ta do hedui ne ade ddau do naanne, ri do mina harre ke ta lii ke No, ”Dhai hedui tarra ddau do kaja ta jadhi ai-alla ngati annu-niki Deo!

²⁵Rihi memudhe tu hengi'u unta ta maho jhara ro'a wui-wohe ajhu-jhau, ngati heddau do kaja ta maho la Raiwawa Deo do Wowiu ne.”

²⁶Ne ddau-ddau do rangnge ne lii Yesus do naanne, ta kebhali ke ro, ”Ki do mina harre ma, nadu ke ne do ta nara ne lua helama ne?”

²⁷Ta bhale ke ri Yesus, ”Lai do dho jadhi pa ddau raiwawa, do ta i'a jadhi he we pa Deo!”

²⁸Moko ta lii ke Petrus, ”Heleo we! Alla ke ri jhi pehani ne ammu nga kemali jhi tu ta ma pedute Ama.”

²⁹Ta lii ke Yesus, ”Parahajha we mu, ddau do alla pehani ammu nga kemali no kiadho ihi-ammu no, kiadho tuahhu no, kiadho ana-oha no, taga tari ma pemoke Deo,

³⁰ddau napoanne do ta bhale pa no dhue wari lipa pa dhara awe do nadhe, jhe pa awe do ta dakka ne, do ta wie pa no ne muri mada do petu nga do peloro ne.”

³¹Ta pekupu ke ri Yesus hari henguru do dhue ne ana hekola No he, pekiha-anni, jhe lii No, ”Dhanno we ri mu! Pa awe nadhe hee ke di ta ju la Yerusalem. Pa ni, hari-hari ne do hure do bhuke ri nabi-nabi jhara lua Ana Ddau Raiwawa ne, do ta jadhi ke.

³²Do ta jhole No pa ddau-ddau do adho do Yahudi, do ta mareta jhole No, ta kare ta wagge nga do ta penyi'o ri ilu No.

³³Do ta dede ta merahho No ri ro, jhe pemade, tapulara pa lodho do ketallu ne, do ta kaddhi bhale wari No.”

³⁴Hari-hari ne na harre nara dho ta toi ri ana hekola he, maji le ta hewuru he. Ne lua pedabbho ngati lipedai Yesus do naanne do pewune ko pa ro. Tada dho ta jhara lua ne nga ne do pedae ri Yesus ne.

³⁵Ta dhai Yesus ta umu nga Yerikho, ta era ke heddau tuka ami-ami do bhaddu do mejaddhi pa ngidi rujhara.

³⁶Ta rangnge ri no, ta do ta era ddau lowe, do ta lake jhara anne, ta kebhali ke no, ”Era ne nga ne?”

³⁷Ta lii ke ne ddau pa no, ”Yesus do Nazaret ne, do ta lake jhara dhe.”

³⁸Moko ta peka ke ne do bhaddu ne, ”Woo Yesus Ana Daud, ruba ko we ne dhara Au nga ya!”

³⁹Ta bhani ke ddau do pehedhapa he nga no, jhe lii pa no ta pehangngo-anni. Tapulara ta ju peka we no do rihi maddu ri, ”Ana Daud, ruba ko we ne dhara Au nga ya!”

⁴⁰Ta pengaha ke Yesus, jhe lii pa ddau he ta aggo ne do bhaddu do naanne la nga No. Ta dhai ne ddau do naanne la nga Yesus, ta kebhali ke Yesus pa no,

⁴¹”Ne nga ke ne do ddhei au ta tao ri Ya tu au?” Bhale ri do bhaddu ne, ”Ne ddhei ya Muri ee, mita ie ta ngaddi.”

⁴²Moko ta lii ke Yesus, ”Ki do mina harre, ngaddi we au! Taga tari do parahajha ke au nga Ya, hakku ie ke au.”

⁴³Pa awe naanne dhangnge ta ngaddi ke ne ddau do bhaddu do naanne, moko ta pedute ke Yesus ri no, jhe peha'e ri no ne kolo lii ie-ae pa Deo. Ta ngadde ri ddau lowe he ne lai do naanne, ta wue-waje ke Deo ri ro.